640 ಗ್ರಾಂ. ಮಗು ಜನನ: ರಾಜ್ಯದಲ್ಲಿ ಇದೇ ಮೊದಲು
ಆರೂವರೆ ತಿಂಗಳಿಗೇ ಸಿಜೇರಿಯನ್ ಮೂಲಕ ಮಗು ಜನನ| 46 ದಿನದ ನಂತರವೂ ಆರೋಗ್ಯವಾಗಿರುವ ಮಗು
ಬೆಂಗಳೂರು[ಡಿ.18]: ರಾಜ್ಯದ ವೈದ್ಯಕೀಯ ಕ್ಷೇತ್ರದ ಇತಿಹಾಸದಲ್ಲಿಯೇ ಇದೇ ಮೊದಲ ಬಾರಿಗೆ ಆರೂವರೆ ತಿಂಗಳ: ಗರ್ಭಿಣಿಗೆ ಶಸ್ತ್ರಚಿಕಿತ್ಸೆ ಮಾಡುವ ಮೂಲಕ ಕೇವಲ 640 ಗ್ರಾಂ. ತೂಕವಿದ್ದ ಶಿಶುವನ್ನು ಸುರಕ್ಷಿತವಾಗಿ ಹೆರಿಗೆ ಮಾಡಿಸುವಲ್ಲಿ ನಗರದ ಖಾಸಗಿ ಆಸ್ಪತ್ರೆ ವೈದ್ಯರ ತಂಡ ಯಶಸ್ವಿಯಾಗಿದೆ.
ಹೂವಿನ ವ್ಯಾಪಾರಿ ಪತ್ನಿಗೆ 5 ಕೆಜಿ ತೂಕದ ಮಗು ಜನನ
ಹೊಸಕೆರೆಹಳ್ಳಿಯಲ್ಲಿರುವ ಎ.ವಿ. ಮಲ್ಟಿಸ್ಪೆಶಾಲಿಟಿ ಆಸ್ಪತ್ರೆಯ ವೈದ್ಯರು ಈ ಸಾಧನೆ ಮಾಡಿದ್ದು, ಸಿಜೇರಿಯನ್ ಮೂಲಕ ಹೆರಿಗೆ ಮಾಡಿಸಲಾದ ಈ ಮಗುವಿಗೆ ಈಗ 46 ದಿನ ವಯಸ್ಸು! ತಾಯಿ ಮತ್ತು ಮಗು ಆರೋಗ್ಯವಾಗಿದ್ದಾರೆ. ಮಗುವಿನ ಬೆಳವಣಿಗೆ ಉತ್ತಮವಾಗಿದೆ ಎಂದು ಆಸ್ಪತ್ರೆಯ ಸ್ತ್ರೀರೋಗ ತಜ್ಞೆ ಡಾ. ಗೋಪಿಕಾ ರಾಜೇಶ್ ತಿಳಿಸಿದರು.
ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಧಾರವಾಡ ಜಿಲ್ಲೆಯ ನವಲಗುಂದದ ಅನಿಲ್ಕುಮಾರ್ ಪತ್ನಿ ಪೂಜಾ ಅವರು ಅ.31 ರಂದು ಆಸ್ಪತ್ರೆಗೆ ದಾಖಲಾದರು. ಮಗುವಿನ ದೈಹಿಕ ಬೆಳವಣಿಗೆ ಉತ್ತಮವಾಗಿರಲಿಲ್ಲ. ಹೀಗಾಗಿ, ಭ್ರೂಣಕ್ಕೆ 26 ವಾರ (ಆರೂವರೆ ತಿಂಗಳು) ವಿದ್ದಾಗಲೇ ಸಿಜೇರಿಯನ್ ಮೂಲಕ ಹೊರ ತೆಗೆಯಲಾಯಿತು ಎಂದರು.
ತಡ ಮಾಡಬೇಡಿ, ದೇಶದಲ್ಲಿ ಮಕ್ಕಳ ಸಂಖ್ಯೆ ಹೆಚ್ಚಲಿ: ಸರ್ಕಾರದ ಮನವಿ!
ಆರೂವರೆ ತಿಂಗಳಿಗೆ ಭ್ರೂಣ ಸಾಮಾನ್ಯವಾಗಿ 600ರಿಂದ 700 ಗ್ರಾಂ. ಇರುತ್ತದೆ. ಅಂತರ್ಜಾಲದ ಮಾಹಿತಿ ಪ್ರಕಾರ ಕೇರಳ ರಾಜ್ಯದಲ್ಲಿ 625 ಗ್ರಾಂ. ತೂಕದ ಮಗುವನ್ನು ಅವಧಿಪೂರ್ವ ಹೆರಿಗೆ ಮಾಡಿಸಿದ್ದೇ ದಾಖಲೆ. ರಾಜ್ಯದ ಬಗ್ಗೆ ಇಂತಹ ಯಾವುದೇ ಮಾಹಿತಿಯಿಲ್ಲ. ಹೀಗಾಗಿ ಇಷ್ಟು ಕಡಿಮೆ ತೂಕದ ಮಗ ಹುಟ್ಟಿರುವುದು ರಾಜ್ಯದಲ್ಲಿ ಇದೇ ಮೊದಲು. ಇದೊಂದು ದಾಖಲೆ ಎಂದು ಹೇಳಿದರು.
ಈ ವೇಳೆ ಮಗುವಿನ ಪೋಷಕರಾದ ಅನಿಲ್ಕುಮಾರ್ ಮತ್ತು ಪೂಜಾ ದಂಪತಿ ವೈದ್ಯರ ಕಾರ್ಯಕ್ಕೆ ಶ್ಲಾಘನೆ ವ್ಯಕ್ತಪಡಿಸಿದರು. ಆಸ್ಪತ್ರೆ ವೈದ್ಯ ಡಾ.ಜಗದೀಶ್, ಡಾ.ರಾಜೇಶ್ ಕುಮಾರ್ ಉಪಸ್ಥಿತರಿದ್ದರು.