ಸಾಲೂರು ಬೃಹನ್ಮಠದ ಶ್ರೀ ಗುರುಸ್ವಾಮೀಜಿ ಲಿಂಗೈಕ್ಯರಾಗಿದ್ದಾರೆ. ಗುಡ್ಡಗಾಡು ಜನಾಂಗದ ಅಭಿವೃದ್ಧಿ ಹಾಗೂ ಬಡಮಕ್ಕಳ ಶಿಕ್ಷಣಕ್ಕೆ ಅವಿರತ ಶ್ರಮಿಸಿದ ಶ್ರೀಗಳು 'ಕಲಿಯುಗದ ಮಹದೇಶ್ವರ'ರೆಂದೇ ಪ್ರಸಿದ್ಧಿ. ಮಠದಲ್ಲಿ ಇಂದು ಸಂಜೆ ಅಂತ್ಯಕ್ರಿಯೆ ನೆರವೇರಲಿದೆ.
ಚಾಮರಾಜನಗರ (ಮೇ 20): ಮಹದೇಶ್ವರ ಬೆಟ್ಟದ ಹತ್ತಿರವಿರುವ ಸಾಲೂರು ಬೃಹನ್ಮಠದ ಹಿರಿಯ ಪೀಠಾಧಿಪತಿ ಪೂಜ್ಯ ಶ್ರೀ ಶ್ರೀ ಗುರುಸ್ವಾಮೀಜಿ ಇಂದು ಬೆಳಗಿನ ಜಾವ ಲಿಂಗೈಕ್ಯರಾಗಿದ್ದಾರೆ. ಇವರ ಲಿಂಗೈಕ್ಯದಿಂದ ಮಠದಲ್ಲಿ ಮಾತ್ರವಲ್ಲದೆ, ಭಕ್ತರಲ್ಲಿ, ಶಿಕ್ಷಣ ಕ್ಷೇತ್ರ ಎಲ್ಲವೂ ಖಾಲಿ ಖಾಲಿಯಾಗಿವೆ.
ಸಾಲೂರು ಮಠದ 17ನೇ ಪೀಠಾಧಿಪತಿಯಾಗಿ ಸೇವೆ ಸಲ್ಲಿಸಿದ್ದ ಶ್ರೀಗಳು, ಗುಡ್ಡಗಾಡು ಪ್ರದೇಶದ ಜನಾಂಗಗಳ ಅಭಿವೃದ್ಧಿಗೆ ತಮ್ಮ ಜೀವನವನ್ನೇ ಮೀಸಲಿಟ್ಟಿದ್ದವರು. ಕಾಡಂಚಿನ ಬಾಲಕರನ್ನು ಮಠಕ್ಕೆ ಕರೆತಂದು ವಸತಿ, ಊಟ ಮತ್ತು ಶಿಕ್ಷಣದ ವ್ಯವಸ್ಥೆ ಮಾಡಿದರು. ಬಡ ಮಕ್ಕಳ ಭವಿಷ್ಯದ ಕುರಿತ ಚಿಂತನೆಯೇ ಅವರಿಗೆ ಧ್ಯೇಯವಾಕ್ಯವಾಗಿತ್ತು. ಪೊನ್ನಾಚಿ ಎಂಬ ಕುಗ್ರಾಮದಲ್ಲಿ ಅವರು ಪ್ರೌಢಶಾಲೆಯನ್ನು ಸ್ಥಾಪಿಸಿ ಹೆಣ್ಣು ಮಕ್ಕಳ ಶಿಕ್ಷಣಕ್ಕೆ ಹೊಸ ಬೆಳಕನ್ನು ತಂದರು. ಈ ಶಾಲೆ ಸಾವಿರಾರು ಮಕ್ಕಳು ಜ್ಞಾನ ದೀಪದಿಂದ ಬೆಳಗಲು ಕಾರಣವಾಯಿತು. ಮಠದ ಆವರಣದಲ್ಲೇ ಬಡ ಮಕ್ಕಳಿಗಾಗಿ ವಿದ್ಯಾರ್ಥಿ ನಿಲಯವನ್ನು ಆರಂಭಿಸಿ, ಉಚಿತ ಶಿಕ್ಷಣ, ವಸತಿ, ಆಹಾರ ಹಾಗೂ ಮೌಲ್ಯಾಧಾರಿತ ಜೀವನಕ್ಕೆ ಪಾಠ ಕಲಿಸಿದರು.
ಪೂಜ್ಯ ಶ್ರೀಗಳು ಕೇವಲ ಧಾರ್ಮಿಕ ಗುರುಗಳಾಗಿ ಮಾತ್ರವಲ್ಲ, ಸಮಾಜಪರ ಕಾರ್ಯಕರ್ತರಾಗಿಯೂ ಗುರುತಿಸಿಕೊಂಡಿದ್ದರು. ಸುತ್ತಮುತ್ತಲ ಗ್ರಾಮಗಳಲ್ಲಿ ಬಿಕ್ಷೆ ಬೇಡಿ ಆ ಹಣವನ್ನು ಮಕ್ಕಳ ಪಾಠಶಾಲೆಗಳ ಅಭಿವೃದ್ಧಿಗೆ ಬಳಸುತ್ತಿದ್ದರು. ಅವರ ನಿರಂಜನ ಸೇವಾ ಮನೋಭಾವ, ತ್ಯಾಗಮಯ ಜೀವನ ಶ್ರಮ ಎಲ್ಲರಿಗೂ ಮಾದರಿಯಾಗಿದೆ. ಇಂದು ಸಂಜೆ 5:30ಕ್ಕೆ ಮಠದ ಆವರಣದಲ್ಲೇ ಅಂತ್ಯಕ್ರಿಯೆ ನಡೆಯಲಿದೆ. ಶ್ರೀಗಳ ಪಾರ್ಥಿವ ಶರೀರವನ್ನು ಮಹದೇಶ್ವರ ಬೆಟ್ಟದ ಭಕ್ತರು ಮೆರವಣಿಗೆಯಲ್ಲಿ ನೋಡಲು ವ್ಯವಸ್ಥೆ ಮಾಡಲಾಗಿದೆ. ಅಪಾರ ಭಕ್ತರ ಹೃದಯದಲ್ಲಿ ಪೂಜ್ಯ ಶ್ರೀಗಳು 'ಕಲಿಯುಗದ ಮಹದೇಶ್ವರ' ಎಂಬ ಹೆಸರಿನಿಂದ ನೆಲೆಸಿದ್ದಾರೆ.
Related Articles
ಭಕ್ತರಿಂದ ಶ್ರದ್ಧಾಂಜಲಿ
ಪ್ರೀತಿಯ ಮೂರ್ತಿಯಾದ ಶ್ರೀ ಗುರುಸ್ವಾಮೀಜಿ, ತಾವು ಬಡ ಮಕ್ಕಳ ಹಕ್ಕಿಗಾಗಿ ಮಾಡಿದ್ದ ಹೋರಾಟಗಳು ಎಂದಿಗೂ ಮರೆಯಲಾಗದು. ಭಕ್ತರ ಹೃದಯದಲ್ಲಿ ಸದಾ ಜೀವಂತವಾಗಿರುತ್ತಾರೆ. ಓಂ ಶಾಂತಿ ಎಂದು ಭಕ್ತರು ತಿಳಿಸಿದ್ದಾರೆ.
