ಬೆಂಗಳೂರು(ಆ.24):  ವೃತ್ತಿ​ಪರ ಕ್ರೀಡಾ ಲೀಗ್‌ನಲ್ಲಿ ತಂಡ​ವೊಂದನ್ನು ನಡೆ​ಸು​ವುದು ಸುಲ​ಭದ ಮಾತಲ್ಲ. ಪ್ರೊ ಕಬಡ್ಡಿ ಟೂರ್ನಿ​ಯಲ್ಲಿ ಮೊದಲ ಆವೃ​ತ್ತಿ​ಯಿಂದಲೂ ಆಡು​ತ್ತಿ​ರುವ, ಹಾಲಿ ಚಾಂಪಿ​ಯನ್‌ ಬೆಂಗಳೂರು ಬುಲ್ಸ್‌ ತಂಡ ಆರ್ಥಿಕ ಸಂಕ​ಷ್ಟ​ದ​ಲ್ಲಿದೆ. 6ನೇ ಆವೃ​ತ್ತಿ​ಯಲ್ಲಿ ತಂಡ ಪ್ರಶಸ್ತಿ ಗೆದ್ದರೂ ತಂಡ​ದೊ​ಳಗೆ ಹಲವು ಸಮ​ಸ್ಯೆಗಳು ಭುಗಿ​ಲೆ​ದಿದ್ದು, ಅದನ್ನು ಇನ್ನೂ ಬಗೆಹರಿ​ಸಿ​ಕೊ​ಳ್ಳಲು ಮಾಲೀ​ಕ​ರಿಗೆ ಸಾಧ್ಯ​ವಾ​ಗಿಲ್ಲ.

ಇದನ್ನೂ ಓದಿ: PKL7: ಬೆಂಗಳೂರು ಬುಲ್ಸ್ ನೆಗೆತಕ್ಕೆ ಅಪ್ಪಚ್ಚಿಯಾದ ತಮಿಳ್ ತಲೈವಾಸ್!

6ನೇ ಆವೃ​ತ್ತಿ​ಯ ನಿರ್ವ​ಹಣೆಗೆ ವಿವಿಧ ಮಾರಾಟಗಾರ​ರಿಂದ ಪಡೆ​ದಿದ್ದ ಸೇವೆ, ಸಿಬ್ಬಂದಿಯ ವೇತನ, ಆಡ​ಳಿತದಲ್ಲಿದ್ದ ಹಲವು ಮುಖ್ಯ ವ್ಯಕ್ತಿ​ಗ​ಳಿಗೆ ನೀಡ​ಬೇ​ಕಾದ ಹಣ ಎಲ್ಲಾ ಸೇರಿ .2.5 ಕೋಟಿಗೂ ಹೆಚ್ಚು ಬಾಕಿ ಉಳಿ​ಸಿ​ಕೊಂಡಿದೆ. ಹಳೆ ಬಾಕಿ ಚುಕ್ತಾ ಮಾಡದೆ 7ನೇ ಆವೃ​ತ್ತಿ​ಯಲ್ಲಿ ತಂಡ ಕಣ​ಕ್ಕಿ​ಳಿ​ದಿದೆ. ತಂಡ ಉಳಿ​ಸಿ​ಕೊಂಡಿ​ರುವ ಬಾಕಿ ಹಣದ ಸಂಪೂರ್ಣ ವಿವರ ‘ಕ​ನ್ನ​ಡ​ಪ್ರಭ’ಕ್ಕೆ ಲಭ್ಯ​ವಾ​ಗಿದೆ.

ಇದನ್ನೂ ಓದಿ: ಪ್ರೊ ಕಬಡ್ಡಿ 2019: ಪಾಟ್ನಾಗೆ 6ನೇ ಸೋಲು!

ಆಗಿ​ರು​ವು​ದೇ​ನು?
ಬೆಂಗ​ಳೂರು ಬುಲ್ಸ್‌ ತಂಡದ ಮಾಲೀ​ಕರು ಯಾರು ಎನ್ನುವ ಮಾಹಿತಿ ಇದು ವರೆಗೂ ಬಹು​ತೇ​ಕ​ರಿಗೆ ತಿಳಿ​ದಿಲ್ಲ. ತಂಡದ ನಿಜ​ವಾದ ಮಾಲೀ​ಕರು ಸ್ವಘೋ​ಷಿತ ದೇವ ಮಾನವ ಕಲ್ಕಿ ಭಗ​ವಾನ್‌ರ ಪುತ್ರ, ಉದ್ಯಮಿ ಎನ್‌.ವಿ.​ಕೃಷ್ಣ. ಆದರೆ ಮೊದಲ ಆವೃ​ತ್ತಿ​ಯಿಂದ​ಲೂ ತಂಡದ ನಿರ್ವ​ಹಣೆ ಮಾಡಿ​ಕೊಂಡು ಬಂದಿದ್ದು ಸಿಇಒ ಉದಯ್‌ ಸಿನ್ಹಾ​ವಾಲಾ. ಪ್ರತಿ ವರ್ಷವೂ ಉದಯ್‌ ಹಾಗೂ ಅವರ ತಂಡವೇ, ಬುಲ್ಸ್‌ನ ತರ​ಬೇತಿ ಶಿಬಿರದಿಂದ ಹಿಡಿದು ಆಟ​ಗಾ​ರ​ರಿಗೆ ಅಗತ್ಯವಿದ್ದ ಎಲ್ಲಾ ಸೌಲ​ಭ್ಯ​ಗ​ಳ ವ್ಯವಸ್ಥೆ ಮಾಡು​ತ್ತಿತ್ತು. 5ನೇ ಆವೃ​ತ್ತಿಯ ಕೊನೆಯಲ್ಲಿ ಮಾಲೀ​ಕ​ರಿಗೆ ಆರ್ಥಿಕ ಸಂಕಷ್ಟಎದು​ರಾ​ಗಿದೆ. ಇದು 6ನೇ ಆವೃ​ತ್ತಿ​ಯಲ್ಲೂ ಮುಂದು​ವ​ರಿದಿದ್ದು, ತಂಡದ ನಿರ್ವ​ಹಣೆಗೆ ಮಾಲೀ​ಕ​ರು ಹಣ ನೀಡಿಲ್ಲ.

ಉದಯ್‌ ಹಾಗೂ ಅವರ ತಂಡದ ಮೇಲಿದ್ದ ನಂಬಿಕೆಯಿಂದಲೇ ಮಾರಾಟಗಾರರು ಅಗತ್ಯ ಸೇವೆಗಳನ್ನು ಒದ​ಗಿ​ಸಿ​ದ್ದಾರೆ. ಕಳೆದ ವರ್ಷ ಬೆಂಗ​ಳೂರು ತಂಡದ ತವರು ಚರಣದ ಪಂದ್ಯ​ಗಳು ಪುಣೆಗೆ ಸ್ಥಳಾಂತರಗೊಂಡಿತ್ತು. ಅಲ್ಲಿ ಕ್ರೀಡಾಂಗಣದ ಮ್ಯಾಟ್‌ ಅಳ​ವ​ಡಿಕೆ, ಪ್ರಚಾರ ಕಾರ್ಯ ಸೇರಿ​ದಂತೆ ವಿವಿಧ ಸೇವೆಗಳನ್ನು ಪಡೆ​ದು 8 ತಿಂಗ​ಳಾ​ದರೂ ಇನ್ನೂ ಹಣ ಬಾಕಿ ನೀಡಿಲ್ಲ.

ಹೊಸ ಆಡ​ಳಿತ ರಚನೆ!
6 ವರ್ಷಗಳ ಕಾಲ ತಂಡವನ್ನು ಮುನ್ನ​ಡೆ​ಸಿದ ಸಿಇಒ ಉದಯ್‌ ಸೇರಿ​ದಂತೆ ಅವರ ತಂಡ​ವನ್ನು 6ನೇ ಆವೃತ್ತಿ ಬಳಿ​ಕ ಬುಲ್ಸ್‌ ಮಾಲೀ​ಕರು ಕಿತ್ತು ಹಾಕಿ, ಹೊಸ ಆಡ​ಳಿತದೊಂದಿಗೆ 7ನೇ ಆವೃ​ತ್ತಿ​ಯಲ್ಲಿ ಕಣ​ಕ್ಕಿ​ಳಿ​ದಿ​ದ್ದಾರೆ. ಈ ಬಗ್ಗೆ ಪ್ರತಿ​ಕ್ರಿ​ಯಿ​ಸಿದ ಉಯದ್‌, ‘ಕ​ಬಡ್ಡಿ ಬೆಳೆ​ಯ​ಬೇಕು ಎನ್ನುವ ಉದ್ದೇ​ಶ​ದಿಂದ ಆರ್ಥಿಕ ಸಂಕ​ಷ್ಟದ ನಡುವೆಯೂ ತಂಡ ನಿರ್ವ​ಹಣೆ ಮಾಡಿ​ದೆವು. ಪ್ರತಿ ಸಂಸ್ಥೆಗೂ ಸಂಕಷ್ಟಎದು​ರಾ​ಗು​ತ್ತದೆ. ಆದರೆ ಬುಲ್ಸ್‌ ಮಾಲೀ​ಕರು ನಮ್ಮನ್ನು ನಡೆ​ಸಿ​ಕೊಂಡ ರೀತಿ ಸರಿ​ಯಲ್ಲ. ನಮ್ಮ ಕಚೇ​ರಿಯ ಸಹಾ​ಯಕ (ಆ​ಫೀಸ್‌ ಬಾಯ್‌) ತನ್ನ ಕಿಸೆಯಿಂದ .45 ಸಾವಿರ ಖರ್ಚು ಮಾಡಿ​ದ್ದಾನೆ. ಆತನಿಗೂ ಬಾಕಿ ಪಾವ​ತಿ​ಸು​ತ್ತಿಲ್ಲ. ತಂಡದ ಫಿಸಿ​ಯೋ, ವಕೀಲರು ಸೇರಿ​ದಂತೆ ಅನೇ​ಕ​ರಿಗೆ ಕೊಡ​ಬೇ​ಕಾದ ಹಣ ಬಾಕಿ ಇದೆ. ಸಂಸ್ಥೆಯಲ್ಲಿ ಕೆಲಸ ಮಾಡುವ ಎಲ್ಲರಿಗೂ ದೊಡ್ಡ ಮೊತ್ತದ ವೇತನ ಸಿಗು​ವು​ದಿಲ್ಲ. ಅಂಥ​ವ​ರಿಗೆ ಮೋಸವಾಗ​ಬಾ​ರ​ದು’ ಎಂದರು.

ಈ ಸಂಬಂಧ ಬುಲ್ಸ್‌ ತಂಡದ ಸಹ ಮಾಲೀ​ಕ ರಾಜು ಪಶು​ಪತಿ ಅವ​ರಿಂದ ಪ್ರತಿ​ಕ್ರಿಯೆ ಪಡೆ​ಯಲು ‘ಕ​ನ್ನ​ಡ​ಪ್ರ​ಭ’ ನಡೆ​ಸಿ​ತು. ಆದರೆ ರಾಜು ಅವರು ಉತ್ತ​ರಿ​ಸಲಿಲ್ಲ.

ಒಂದು ಆವೃ​ತ್ತಿಗೆ ಖರ್ಚೆ​ಷ್ಟು, ಲಾಭ​ವೆ​ಷ್ಟು?
ಆಟ​ಗಾರರ ವೇತನ, ಪಂಚ​ತಾರಾ ಹೋಟೆಲ್‌ ಕೊಠಡಿ, ವಿಮಾನ ಟಿಕೆಟ್‌, ಆಟ​ಗಾ​ರರ ತರ​ಬೇತಿ ಶಿಬಿರ, ಆಹಾರ, ಪೂರಕ ಆಹಾರ (ಫುಡ್‌ ಸಪ್ಲಿ​ಮೆಂಟ್ಸ್‌), ಪ್ರೋಟಿನ್‌, ಫಿಸಿ​ಯೋ, ವೈದ್ಯರು ಹೀಗೆ ಎಲ್ಲಾ ಸೇರಿ ಒಂದು ಆವೃತ್ತಿಗೆ 12 ಕೋಟಿ ವರೆಗೂ ಖರ್ಚಾ​ಗು​ತ್ತದೆ. ಲೀಗ್‌ ಮಾಲೀ​ಕ​ತ್ವ ಹೊಂದಿ​ರುವ ಸ್ಟಾರ್‌ ಹಾಗೂ ಮಶಾಲ್‌ ಸ್ಪೋಟ್ಸ್‌ರ್‍ ಪ್ರಸಾರ ಹಕ್ಕಿನಿಂದ ಬರುವ ಹಣದಲ್ಲಿ ಪ್ರತಿ ತಂಡಕ್ಕೆ 6 ಕೋಟಿ ನೀಡು​ತ್ತದೆ. ಇನ್ನು​ಳಿದ ಹಣವನ್ನು ಪ್ರಾಯೋ​ಜ​ಕತ್ವ ಒಪ್ಪಂದಗಳಿಂದ ತಂಡ​ಗಳು ಪಡೆ​ಯ​ಬೇಕು. 6ನೇ ಆವೃ​ತ್ತಿ​ಯಲ್ಲಿ ಬುಲ್ಸ್‌ ಚಾಂಪಿ​ಯನ್‌ ಆಗಿ​ದ್ದ​ಕ್ಕೆ 3 ಕೋಟಿ ಹೆಚ್ಚು​ವರಿ ಮೊತ್ತ ಸಿಕ್ಕಿದೆ. ಹೀಗಾಗಿ ಆರ್ಥಿಕ ಸಮಸ್ಯೆ ಎದು​ರಾ​ಗುವ ಸಾಧ್ಯತೆ ತೀರಾ ಕಡಿಮೆ. ಹೀಗಿದ್ದು, 2.5 ಕೋಟಿ ಬಾಕಿ ಉಳಿ​ಸಿ​ಕೊಂಡಿ​ರು​ವುದು ಅನು​ಮಾನ ಮೂಡಿ​ಸು​ತ್ತಿದೆ ಎಂದು ತಂಡ​ದಲ್ಲಿ 6 ವರ್ಷ ವ್ಯವ​ಸ್ಥಾ​ಪ​ಕ​ರಾಗಿದ್ದವರು ಹೇಳಿ​ದ್ದಾರೆ.

ಪಾವ​ತಿ​ಸ​ಬೇ​ಕಿ​ರುವ ಬಾಕಿ ವಿವರ
ಸಿಬ್ಬಂದಿ ವೇತ​ನ    3.6 ಲಕ್ಷ
ಜಿಎಸ್‌ಟಿ    1.27 ಕೋಟಿ
ಪುಣೆ ಮಾರಾಟಗಾರರಿ​ಗೆ ಬಾಕಿ    37.78 ಲಕ್ಷ
ವಿವಿಧ ಮಾರಾಟಗಾರ​ರಿಗೆ ಬಾಕಿ    49.05 ಲಕ್ಷ

ವರದಿ: ಸ್ಪಂದನ್‌ ಕಣಿ​ಯಾರ್‌