ಕೊಹ್ಲಿಯವರು ಬ್ಯಾಟಿಂಗ್ ಮಾಡುವಾಗ ಬಹಳ ನಕರಾತ್ಮಕವಾಗಿ ಯೋಚಿಸುತ್ತಿದ್ದಾರೆ, ಚಂಚಲವಾಗಿಬಿಟ್ಟಿದ್ದಾರೆ. ಅವರ ಈ ಮನೋಭಾವವು ಇತರ ಆಟಗಾರರ ಮೇಲೆ ಪರಿಣಾಮ ಬೀರಿದೆ. ಇದರಿಂದ ಅವರ ಬ್ಯಾಟಿಂಗ್ ಕೂಡ ನಕರಾತ್ಮಕವಾಗಿದೆ ಎಂದು ಮಾರ್ಕ್ ವಾ ಅಭಿಪ್ರಾಯಪಟ್ಟಿದ್ದಾರೆ.
ನವದೆಹಲಿ(ಮಾ. 05): ಆಸ್ಟ್ರೇಲಿಯಾ ವಿರುದ್ಧದ ಕ್ರಿಕೆಟ್ ಸರಣಿಯಲ್ಲಿ ಭಾರತ ಹೀನಾಯ ಪ್ರದರ್ಶನ ನೀಡುತ್ತಿದೆ. ಟೀಮ್ ಇಂಡಿಯಾ ಮೊದಲ ಟೆಸ್ಟ್'ನಲ್ಲಿನ ತನ್ನ ಕಳಪೆ ಆಟವನ್ನು ಎರಡನೇ ಪಂದ್ಯದಲ್ಲೂ ಮುಂದುವರಿಸಿದೆ. ಭಾರತದ ಬ್ಯಾಟಿಂಗ್ ಆಧಾರ ಸ್ತಂಭ ವಿರಾಟ್ ಕೊಹ್ಲಿಯವರ ಬ್ಯಾಟಿಂಗ್ ವೈಫಲ್ಯ ತಂಡದ ಸ್ಥಿತಿಯನ್ನು ಇನ್ನಷ್ಟು ಬಿಗಡಾಯಿಸಿದೆ. ತವರಿನಲ್ಲಿ ಹುಲಿಗಳಂತಿರುವ ಟೀಮ್ ಇಂಡಿಯಾಗೆ ಯಾಕಿಂಥ ಸ್ಥಿತಿ ಬಂತು? ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಮಾರ್ಕ್ ವಾ ಭಾರತದ ಕಳಪೆ ಪ್ರದರ್ಶನಕ್ಕೆ ಕಾರಣಗಳನ್ನು ನೀಡಿದ್ದಾರೆ. ಅವರ ಪ್ರಕಾರ, ಭಾರತದ ಬ್ಯಾಟುಗಾರರು ಸರಿಯಾಗಿ ಆಡದೇ ಇರಲು ವಿರಾಟ್ ಕೊಹ್ಲಿಯೇ ಕಾರಣವಂತೆ.
ಕೊಹ್ಲಿಯವರು ಬ್ಯಾಟಿಂಗ್ ಮಾಡುವಾಗ ಬಹಳ ನಕರಾತ್ಮಕವಾಗಿ ಯೋಚಿಸುತ್ತಿದ್ದಾರೆ, ಚಂಚಲವಾಗಿಬಿಟ್ಟಿದ್ದಾರೆ. ಅವರ ಈ ಮನೋಭಾವವು ಇತರ ಆಟಗಾರರ ಮೇಲೆ ಪರಿಣಾಮ ಬೀರಿದೆ. ಇದರಿಂದ ಅವರ ಬ್ಯಾಟಿಂಗ್ ಕೂಡ ನಕರಾತ್ಮಕವಾಗಿದೆ ಎಂದು ಮಾರ್ಕ್ ವಾ ಅಭಿಪ್ರಾಯಪಟ್ಟಿದ್ದಾರೆ.
ವಾರ್ಕ್ ವಾ ಹೇಳಿದ್ದೇನು?
* ಚೆಂಡು ಬೌನ್ಸ್ ಆಗಿ ಥೈ(ತೊಡೆ) ಪ್ಯಾಡ್ ಮೇಲೆ ಬಡಿಯುವ ಮುನ್ನ ಕೊಹ್ಲಿಯ ಮನಃಸ್ಥಿತಿ ಗೊತ್ತಾಯಿತು. ಲೆಗ್'ಸೈಡ್'ನಲ್ಲಿ ಇಬ್ಬರು ಫೀಲ್ಡರ್'ಗಳಿದ್ದುದು ಕೊಹ್ಲಿಯ ಆತಂಕಕ್ಕೆ ಕಾರಣವಾಗಿತ್ತು. ಆದರೆ, ಭಾರತದ ಶ್ರೇಷ್ಠ ಬ್ಯಾಟುಗಾರನಿಗೆ ಇಂತಹ ಫೀಲ್ಡಿಂಗ್ ರಚನೆ ಇದ್ದರೆ ಭೂರಿ ಭೋಜನ ಇದ್ದಂತೆ. ಬೌನ್ಸ್ ಆಗಿ ತೊಡೆಯತ್ತ ಬರುವ ಚೆಂಡನ್ನು ಕ್ಲೀನಾಗಿ ಟಕ್ ಮಾಡಬಿಡುತ್ತಾರೆ. ಆದರೆ, ಕೊಹ್ಲಿ ಚಂಚಲತೆಗೊಳಗಾಗಿದ್ದಾರೆ. ಏಕಾಗ್ರತೆ ಕಳೆದುಕೊಂಡಿದ್ದಾರೆ.
* ಬ್ಯಾಟ್ ಸುತ್ತ ಫೀಲ್ಡರ್ಸ್ ಇದ್ದಾರೆಂಬ ಕಾರಣಕ್ಕೆ ಕೊಹ್ಲಿ ನಕರಾತ್ಮಕವಾಗಿ ಯೋಚಿಸಲು ಆರಂಭಿಸಿದರು. ಚೆಂಡು ಬೌನ್ಸ್ ಆದರೆ ಇನ್ಸೈಡ್ ಎಡ್ಜ್ ಆಗಬಹುದೆಂಬ ಭೀತಿ ಅವರನ್ನ ಆವರಿಸಿತು. ಒಬ್ಬ ಬ್ಯಾಟುಗಾರನಾಗಿ ನೀವು ಆ ರೀತಿ ಯೋಚಿಸಲು ಸಾಧ್ಯವಿಲ್ಲ.
* ಕೊಹ್ಲಿ ಕನಸು ಕಾಣುತ್ತಲೇ ರನ್'ಗಳನ್ನು ಗಳಿಸಬಲ್ಲರು. ಆದರೆ, ಅವರ ನಕರಾತ್ಮಕ ಯೋಚನೆಯು ಇತರ ಆಟಗಾರರ ಮೇಲೂ ಪ್ರಭಾವ ಬೀರಿದೆ. ಬಹುತೇಕ ಆಟಗಾರರು ಇಂದು ಕ್ರೀಸ್'ನಲ್ಲಿ ಅನಿಶ್ಚಿತ ಸ್ಥಿತಿಯಲ್ಲಿದ್ದಂತೆ ಕಂಡು ಬಂದರು. ತಾವು ಔಟ್ ಆದ ರೀತಿ ಬಗ್ಗೆ ಅವರಿಗೆ ನಿರಾಶೆ ಆಗಿರುತ್ತದೆ.
* ಈ ಪಂದ್ಯದಲ್ಲಿ ಇನ್ನಷ್ಟು ಗಮನದಿಂದ ಆಡುವುದು ಅಗತ್ಯ ಎಂದು ಕೊಹ್ಲಿ ಹೇಳಿದ್ದರು. ಆದರೆ, ಹೇಗೆ ಆಡಬಾರದು ಎಂಬುದಕ್ಕೆ ಕೊಹ್ಲಿಯೇ ಒಳ್ಳೆಯ ಉದಾಹರಣೆ ಆಗಿಬಿಟ್ಟಿದ್ದಾರೆ. ಇವರು ಕೊಹ್ಲಿಯಾ ಎಂಬ ಅನುಮಾನ ಶುರುವಾಗಿದೆ.
