ಹಾಲಿ ವಿಂಬಲ್ಡನ್ ಚಾಂಪಿಯನ್ ಸ್ಪೇನ್‌'ನ ಗಾರ್ಬೈನ್ ಮುಗುರುಜಾ ಸಹ ಪಂದ್ಯಾವಳಿಯಿಂದ ನಿರ್ಗಮಿಸಿದ್ದಾರೆ.
ನ್ಯೂಯಾರ್ಕ್(ಸೆ.04): ಸುಮಾರು 15 ತಿಂಗಳು ನಿಷೇಧದ ಬಳಿಕ ಮೊದಲ ಬಾರಿಗೆ ಗ್ರ್ಯಾಂಡ್'ಸ್ಲಾಂನಲ್ಲಿ ಕಣಕ್ಕಿಳಿದು ಪ್ರಶಸ್ತಿ ಜಯಿಸುವ ಕನಸು ಕಾಣುತ್ತಿದ್ದ ಮರಿಯಾ ಶರಪೋವಾಗೆ ಆಘಾತವಾಗಿದೆ. ಮಹಿಳಾ ಸಿಂಗಲ್ಸ್'ನ ನಾಲ್ಕನೇ ಸುತ್ತಿನಲ್ಲಿ ರಷ್ಯಾ ಆಟಗಾರ್ತಿ, 16ನೇ ಶ್ರೇಯಾಂಕಿತೆ ಲಾತ್ವಿಯಾದ ಅನಸ್ತಾನಿಯ ಸೆವಸ್ಟೊವಾ ವಿರುದ್ಧ 7-5, 4-6, 2-6 ಸೆಟ್'ಗಳಲ್ಲಿ ಸೋಲುಂಡರು.
2006ರ ಯುಎಸ್ ಓಪನ್ ಚಾಂಪಿಯನ್ ಶರಪೋವಾ, ಮೊದಲ ಸೆಟ್'ನಲ್ಲಿ ಗೆಲುವು ಸಾಧಿಸಿದರೂ, ಆನಂತರ ಅನಗತ್ಯ ತಪ್ಪುಗಳ ಮೂಲಕ ಮುಂದಿನ ಎರಡು ಸೆಟ್ ಬಿಟ್ಟುಕೊಟ್ಟರು. ಸೋಲಿನ ಬಳಿಕ ಮಾತನಾಡಿದ ಶರಪೋವಾ ‘ಹಿಂದಿರುಗಿ ನೋಡಿದಾಗ ಈ ಪಂದ್ಯಾವಳಿಯಲ್ಲಿ ನನ್ನ ಪ್ರದರ್ಶನ ಖುಷಿ ನೀಡಿದೆ. ಈ ಪಂದ್ಯಾವಳಿ ಸಾಕಷ್ಟು ಅನುಭವ ನೀಡಿದೆ’ ಎಂದಿದ್ದಾರೆ.
ಮುಗುರುಜಾ ನಿರ್ಗಮನ:
ಹಾಲಿ ವಿಂಬಲ್ಡನ್ ಚಾಂಪಿಯನ್ ಸ್ಪೇನ್'ನ ಗಾರ್ಬೈನ್ ಮುಗುರುಜಾ ಸಹ ಪಂದ್ಯಾವಳಿಯಿಂದ ನಿರ್ಗಮಿಸಿದ್ದಾರೆ.
ಪ್ರೀ ಕ್ವಾರ್ಟರ್'ನಲ್ಲಿ 3ನೇ ಶ್ರೇಯಾಂಕಿತೆ ಮುಗುರುಜಾ, 13ನೇ ಶ್ರೇಯಾಂಕಿತೆ ಜೆಕ್ ಗಣರಾಜ್ಯದ ಪೆಟ್ರಾ ಕ್ವಿಟೊವಾ ವಿರುದ್ಧ ಸೋಲುಂಡರು. ಕ್ವಿಟೊವಾ 7-6(7/3), 6-3 ಸೆಟ್'ಗಳಲ್ಲಿ ಸುಲಭ ಜಯ ದಾಖಲಿಸಿದರು.
