ಯುವ ಕಬಡ್ಡಿ ಪ್ರತಿಭೆಗಳಿಗೆ ವೇದಿಕೆ KBD ಜೂನಿಯರ್ಸ್
ಪ್ರೊ ಕಬಡ್ಡಿ ಟೂರ್ನಿಯಲ್ಲಿ ‘ಕೆಬಿಡಿ ಜೂನಿಯರ್ಸ್’ ಎನ್ನುವ ಹೆಸರಲ್ಲಿ ಶಾಲಾ ಮಕ್ಕಳ ಕಬಡ್ಡಿ ಚಾಂಪಿಯನ್‌ಶಿಪ್‌ ಆಯೋಜಿಸಲಾಗುತ್ತಿದೆ. ಇದರ ಉದ್ದೇಶ, ಅನುಕೂಲ, ಆಯ್ಕೆ ಕುರಿತಂತೆ ಸವಿಸ್ತಾರವಾದ ವರದಿ ಇಲ್ಲಿದೆ ನೋಡಿ..
Followಬೆಂಗಳೂರು[ಸೆ.14]: ಗ್ರಾಮೀಣ ಭಾಗಕ್ಕೆ ಸೀಮಿತವಾಗಿದ್ದ, ದೇಸಿ ಕ್ರೀಡೆ ಕಬಡ್ಡಿಗೆ ಆಧುನಿಕ ಸ್ಪರ್ಶ ನೀಡಿ ಜಗತ್ಪ್ರಸಿದ್ಧಿ ತಂದುಕೊಟ್ಟಿದ್ದು ಪ್ರೊ ಕಬಡ್ಡಿ. ದಿನೇ ದಿನೇ ಕಬಡ್ಡಿ ನೋಡುಗರ ಸಂಖ್ಯೆ ಹೆಚ್ಚುತ್ತಿದ್ದು, ಕ್ರೀಡೆಯನ್ನು ವೃತ್ತಿಯಾಗಿ ಸ್ವೀಕರಿಸುವವರ ಸಂಖ್ಯೆಯೂ ಏರುತ್ತಿದೆ. ಹೊಸ ಹೊಸ ಪ್ರತಿಭೆಗಳು ದೇಶದ ಮೂಲೆ ಮೂಲೆಯಿಂದ ಹೊರಬರುತ್ತಿದ್ದು, ಶಾಲಾ ಮಕ್ಕಳಲ್ಲೇ ಕಬಡ್ಡಿ ಬಗ್ಗೆ ಆಸಕ್ತಿ ಹೆಚ್ಚಿಸಲು ಹಾಗೂ ಅವರಲ್ಲಿರುವ ಪ್ರತಿಭೆಗೆ ಸೂಕ್ತ ವೇದಿಕೆ ನೀಡುವ ಕೆಲಸವನ್ನು ಪ್ರೊ ಕಬಡ್ಡಿ ಆಯೋಜಕರು ಮಾಡುತ್ತಿದ್ದಾರೆ.
ಕಳೆದ 3 ವರ್ಷಗಳಿಂದ ‘ಕೆಬಿಡಿ ಜೂನಿಯರ್ಸ್’ ಎನ್ನುವ ಹೆಸರಲ್ಲಿ ಶಾಲಾ ಮಕ್ಕಳ ಕಬಡ್ಡಿ ಚಾಂಪಿಯನ್‌ಶಿಪ್‌ ಆಯೋಜಿಸಲಾಗುತ್ತಿದ್ದು, ಸಾವಿರಾರು ಮಕ್ಕಳು ಪಾಲ್ಗೊಂಡಿದ್ದಾರೆ. ಪ್ರೊ ಕಬಡ್ಡಿ ಟೂರ್ನಿ ಜತೆಯಲ್ಲೇ ಈ ಟೂರ್ನಿಯೂ ನಡೆಯಲಿದೆ. ಪ್ರೊ ಕಬಡ್ಡಿ ತಂಡಗಳು ಪ್ರತಿನಿಧಿಸುವ ನಗರಗಳ ಆಯ್ದ ಶಾಲಾ ತಂಡಗಳು ಕೆಬಿಡಿ ಜೂನಿಯರ್ಸ್’ನಲ್ಲಿ ಸ್ಪರ್ಧಿಸಲಿದ್ದು, ನಗರಗಳ ಚಾಂಪಿಯನ್‌ಗಳಾಗಿ ಹೊರಹೊಮ್ಮಲಿವೆ.
PKL 2019: ಆರಂಭದಲ್ಲಿ ಅಬ್ಬರಿಸಿ ಅಂತ್ಯದಲ್ಲಿ ಪಂದ್ಯ ಕೈಚೆಲ್ಲಿದ ಬುಲ್ಸ್!
3000 ಮಕ್ಕಳು: ಪ್ರತಿ ನಗರದಲ್ಲಿ ಕೆಬಿಡಿ ಜೂನಿಯರ್ಸ್’ಗಾಗಿ ಹಂತ 1, ಹಂತ 2 ಎಂದು ಮಾಡಿಕೊಳ್ಳಲಾಗಿದೆ. ಹಂತ 1ರಲ್ಲಿ 24 ಶಾಲಾ ತಂಡಗಳಿಗೆ ಪ್ರೊ ಕಬಡ್ಡಿ ಸಂಘಟಕರೇ ಆಹ್ವಾನ ನೀಡುತ್ತಾರೆ. ಅದರಲ್ಲಿ ನಗರದ ಟಾಪ್‌ 10 ಶಾಲೆಗಳು ಸೇರಿರಲಿವೆ. ಈ ರೀತಿಯಾಗಿ ದೇಶಾದ್ಯಂತ ಪ್ರತಿ ಆವೃತ್ತಿಯಲ್ಲಿ 228 ಶಾಲೆಗಳಿಗೆ ಆಹ್ವಾನ ನೀಡಲಾಗುತ್ತಿದ್ದು, ಸುಮಾರು 3000 ವಿದ್ಯಾರ್ಥಿಗಳು ಪಾಲ್ಗೊಳ್ಳುತ್ತಾರೆ.
ಕ್ರೀಡಾಂಗಣದಲ್ಲಿ ಕೊಹ್ಲಿಗೆ ಕಿಸ್, ಅನುಷ್ಕಾ ದಿಲ್ ಖುಷ್!
ಹಂತ 1ರಲ್ಲಿ 24 ತಂಡಗಳನ್ನು ಎರಡು ವಿಭಾಗಗಳನ್ನಾಗಿ ಮಾಡಲಾಗುತ್ತದೆ. ಈ ಹಂತದಿಂದ 2ನೇ ಹಂತಕ್ಕೆ 8 ತಂಡಗಳನ್ನು ಆಯ್ಕೆ ಮಾಡಲಾಗುತ್ತದೆ. ಪ್ರೊ ಕಬಡ್ಡಿ ಆರಂಭವಾಗುವ ಎರಡು ತಿಂಗಳು ಮೊದಲೇ ಈ ಕಾರ್ಯ ಪೂರ್ಣಗೊಳ್ಳಲಿದೆ. ಪ್ರೊ ಕಬಡ್ಡಿ ಆರಂಭವಾದ ಮೇಲೆ ಆಯಾ ಚರಣದ ವೇಳೆ ಕೆಬಿಡಿ ಜೂನಿಯರ್ಸ್ ಪಂದ್ಯಗಳನ್ನೂ ಆಡಿಸಲಾಗುತ್ತದೆ. ಅಲ್ಲದೇ ಪಂದ್ಯಗಳ ಪ್ರಸಾರವನ್ನೂ ಮಾಡಲಾಗುತ್ತದೆ. ಪ್ರತಿ ನಗರಗಳಲ್ಲಿ ಚಾಂಪಿಯನ್‌ ಆಗುವ ತಂಡಗಳ ನಡುವೆ ರಾಷ್ಟ್ರೀಯ ಚಾಂಪಿಯನ್‌ಶಿಪ್‌ಗೆ ಸ್ಪರ್ಧೆ ನಡೆಯಲಿದೆ.
ಉದ್ದೇಶವೇನು?: ಕೆಬಿಡಿ ಜೂನಿಯರ್ಸ್ ಟೂರ್ನಿಯ ಮುಖ್ಯ ಉದ್ದೇಶ ಕಬಡ್ಡಿ ಕ್ರೀಡೆಯನ್ನು ಜನಪ್ರಿಯಗೊಳಿಸುವುದು. ಹೆಚ್ಚಿನ ಜನರನ್ನು ಕ್ರೀಡೆಯತ್ತ ಆಕರ್ಷಿಸುವುದು. ಭವಿಷ್ಯದ ಕಬಡ್ಡಿ ಪ್ರತಿಭೆಗಳನ್ನು ಹುಡುಕಿ, ಅವರನ್ನು ಬೆಳೆಸುವುದು. ಸಾಮಾನ್ಯವಾಗಿ ನಗರ ಭಾಗದ ಶಾಲಾ ಮಕ್ಕಳು ಕ್ರಿಕೆಟ್‌, ಟೆನಿಸ್‌, ಬ್ಯಾಡ್ಮಿಂಟನ್‌ನಂತಹ ಕ್ರೀಡೆಗಳತ್ತ ಆಕರ್ಷಿತರಾಗಿರುತ್ತಾರೆ. ಅಂತಹ ಮಕ್ಕಳನ್ನು ಕಬಡ್ಡಿಯತ್ತ ಸೆಳೆಯುವ ಉದ್ದೇಶವೂ ಇದರಲ್ಲಿ ಅಡಗಿದೆ. ಮಕ್ಕಳಲ್ಲಿ ಸ್ಪರ್ಧಾ ಮನೋಭಾವ, ಕೌಶಲ್ಯ, ಧೈರ್ಯ ವೃದ್ಧಿಗೆ ಈ ಟೂರ್ನಿ ನೆರವಾಗಲಿದೆ.
ಪ್ರೊ ಕಬಡ್ಡಿ 2019: 7ನೇ ಆವೃತ್ತಿ ವೇಳಾಪಟ್ಟಿ ಪ್ರಕಟ!
ಗ್ರಾಮೀಣ ಶಾಲೆಗಳತ್ತಲೂ ಗಮನ: ಕಳೆದ ಎರಡು ಆವೃತ್ತಿಯಲ್ಲಿ ಕೇವಲ ನಗರ ಪ್ರದೇಶದ ಶಾಲೆಗಳಿಗೆ ಮಾತ್ರ ಆಹ್ವಾನ ನೀಡಲಾಗಿತ್ತು. ಆದರೆ, ಪ್ರಸಕ್ತ ವರ್ಷ ತಾಲೂಕು ಕ್ಷೇತ್ರಗಳಲ್ಲಿರುವ ಕೆಲವು ಶಾಲೆಗಳು ಸ್ವಯಂ ಇಚ್ಛೆಯಿಂದ ಬಂದು ಭಾಗವಹಿಸಿವೆ. ತುಮಕೂರು ಜಿಲ್ಲೆ ಕುಣಿಗಲ್‌ ತಾಲೂಕಿನ ಅರವಿಂದ್‌ ಇಂಟರ್‌ ನ್ಯಾಷನಲ್‌ ಸ್ಕೂಲ್‌ ಮತ್ತು ಬೆಳಗಾವಿ ಜಿಲ್ಲೆ ಅಥಣಿ ತಾಲೂಕಿನ ಕೆಎಲ್‌ಇ ಶಾಲೆಗಳು ಬೆಂಗಳೂರು ಚರಣದಲ್ಲಿ ಆಡಿದ್ದವು. ಮುಂದಿನ ಆವೃತ್ತಿಗಳಲ್ಲಿ ಗ್ರಾಮೀಣ ಶಾಲೆಗಳಿಗೆ ಆದ್ಯತೆ ನೀಡುವ ಬಗ್ಗೆ ಸಂಘಟಕರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಕೆಬಿಡಿ ಜೂನಿಯರ್‌ 2017ರಲ್ಲಿ ಆರಂಭವಾಗಿದ್ದರೂ ಬೆಂಗಳೂರಿಗೆ ಇದು ಎರಡನೇ ಆವೃತ್ತಿ. ಕ್ರೀಡಾಂಗಣದ ಸಮಸ್ಯೆಯಿಂದ 2017ರಲ್ಲಿ ನಡೆದಿರಲಿಲ್ಲ. ಈ ಬಾರಿ ಪ್ರೊ ಕಬಡ್ಡಿ ಆರಂಭಕ್ಕೂ ಎರಡು ತಿಂಗಳು ಮುನ್ನವೇ ನಗರದ ಟಾಪ್‌ 10 ಶಾಲೆಗಳು ಸೇರಿದಂತೆ 24 ತಂಡಗಳಿಗೆ ಆಹ್ವಾನ ನೀಡಲಾಗಿತ್ತು. ಇವುಗಳಲ್ಲಿ ಶ್ರೀಚೈತನ್ಯ ಟೆಕ್ನೋ ಸ್ಕೂಲ್‌, ಅರವಿಂದ್‌ ಇಂಟರ್‌ ನ್ಯಾಷನಲ್‌ ಸ್ಕೂಲ್‌, ರಾಯಲ್‌ ಕಾನಕೋರ್ಡೆ ಕಲ್ಯಾಣ ನಗರ, ಶ್ರೀಚೈತನ್ಯ ಎಚ್‌ಎಸ್‌ಆರ್‌, ಕೆಎಲ್‌ಇ ಸ್ಕೂಲ್‌, ಡಿಪಿಎಸ್‌ ನಾರ್ಥ್, ವಿಎಸ್‌ಎಸ್‌ ಇಂಟರ್‌ನ್ಯಾಷನಲ್‌ ಪಬ್ಲಿಕ್‌ ಸ್ಕೂಲ್‌, ಲಾರೆನ್ಸ್‌ ಹೈಸ್ಕೂಲ್‌ ತಂಡಗಳು 2ನೇ ಹಂತಕ್ಕೆ ಆಯ್ಕೆಯಾಗಿದ್ದವು. ಪ್ರೊ ಕಬಡ್ಡಿಯ ಬೆಂಗಳೂರು ಚರಣ ನಡೆಯುವ ಸಂದರ್ಭದಲ್ಲಿಯೇ ಕೆಬಿಡಿ ಜೂನಿಯರ್ಸ್ ಸಹ ನಡೆಯಿತು. ತೀವ್ರ ಪೈಪೋಟಿಯಿಂದ ಕೂಡಿದ ಫೈನಲ್‌ ಪಂದ್ಯದಲ್ಲಿ ಶ್ರೀಚೈತನ್ಯ ಎಚ್‌ಎಸ್‌ಆರ್‌ ತಂಡ 22-21ರಿಂದ ಅರವಿಂದ್‌ ಇಂಟರ್‌ ನ್ಯಾಷನಲ್‌ ಸ್ಕೂಲ್‌ ತಂಡದ ವಿರುದ್ಧ ಗೆದ್ದು, ಬೆಂಗಳೂರು ಚರಣದಲ್ಲಿ ಚಾಂಪಿಯನ್‌ ಆಯಿತು.
‘ಕಬಡ್ಡಿ ಜನಪ್ರಿಯತೆಯನ್ನು ಹೆಚ್ಚಿಸಲು ಕೆಬಿಡಿ ಜೂನಿಯರ್ಸ್ ನೆರವಾಗುತ್ತಿದೆ. ಮಕ್ಕಳು ಸಹ ವೃತ್ತಿಪರ ಆಟಗಾರರಂತೆ ಆಡುತ್ತಾರೆ. ಅದರಲ್ಲಿಯೂ ವಿಶೇಷವಾಗಿ ತಾರಾ ಆಟಗಾರರಾದ ಪ್ರದೀಪ್‌ ನರ್ವಾಲ್‌, ರಾಹುಲ್‌ ಚೌಧರಿಯ ಅವರನ್ನು ಮಕ್ಕಳು ಅನುಕರಿಸುವುದನ್ನು ನೋಡಿದ್ದೇನೆ. ಕೆಬಿಡಿ ಜೂನಿಯರ್ಸ್’ನಲ್ಲಿ ಗ್ರಾಮೀಣ ಭಾಗದ ಶಾಲೆಗಳು ಸ್ಪರ್ಧಿಸುವಂತಾಗಬೇಕು ಎನ್ನುವುದೇ ನನ್ನ ಆಶಯ.‘
-ಡಾ. ಶಿವಣ್ಣ ಎನ್‌.ಕೆ, ಕೆಬಿಡಿ ಜೂನಿಯರ್ಸ್ ತಾಂತ್ರಿಕ ಸಮಿತಿ ಉಸ್ತುವಾರಿ
ವರದಿ: ಮಂಜು ಮಳಗುಳಿ
