ವಿಶ್ವಕಪ್ ಕ್ವಾಲಿಫೈಯರ್‌: ಭಾರತ ತಂಡಕ್ಕೆ ಆಘಾತ!
ಒಮಾನ್ ವಿರುದ್ಧ ನಡೆದ ರೋಚಕ ಪಂದ್ಯದಲ್ಲಿ ಭಾರತಕ್ಕೆ ಆಘಾತವಾಗಿದೆ. ಆರಂಭಿಕ 82 ನಿಮಿಷಗಳ ವರೆಗೆ ಭಾರತ 1-0 ಅಂತರದಲ್ಲಿ ಮುನ್ನಡೆ ಸಾಧಿಸಿತ್ತು. ಆದರೆ ಅಂತಿ 8 ನಿಮಿಷದಲ್ಲಿ ಪಂದ್ಯದ ಚಿತ್ರಣವೆ ಬದಲಾಗಿತ್ತು.
ಗುವಾಹಟಿ(ಸೆ.06): 2022ರ ಫಿಫಾ ವಿಶ್ವಕಪ್ ಅರ್ಹತಾ ಸುತ್ತಿನ 2ನೇ ಹಂತದಲ್ಲಿ ಭಾರತ ಆರಂಭಿಕ ಆಘಾತ ಅನುಭವಿಸಿದೆ. ಗುರುವಾರ ಇಲ್ಲಿ ನಡೆದ ‘ಇ’ ಗುಂಪಿನ ಪಂದ್ಯದಲ್ಲಿ ಭಾರತ ಬಲಿಷ್ಠ ಒಮಾನ್ ವಿರುದ್ಧ 1-2 ಗೋಲುಗಳಿಂದ ಸೋಲುಂಡಿತು.
24ನೇ ನಿಮಿಷದಲ್ಲಿ ನಾಯಕ ಸುನಿಲ್‌ ಚೆಟ್ರಿ ಗೋಲು ಬಾರಿಸಿ ಭಾರತಕ್ಕೆ ಮುನ್ನಡೆ ಒದಗಿಸಿದರು. 1-0 ಮುನ್ನಡೆಯೊಂದಿಗೆ ಮೊದಲಾರ್ಧ ಮುಕ್ತಾಯಗೊಳಿಸಿದ ಭಾರತ, ದ್ವಿತೀಯಾರ್ಧದಲ್ಲಿ ಆಘಾತ ಅನುಭವಿಸಿತು.
ಕೊನೆ 8 ನಿಮಿಷಗಳಲ್ಲಿ ಒಮಾನ್ 2 ಗೋಲು ಬಾರಿಸಿ, ಆತಿಥೇಯರಿಂದ ಗೆಲುವನ್ನು ಕಸಿದುಕೊಂಡಿತು. 82ನೇ ಹಾಗೂ 90ನೇ ನಿಮಿಷದಲ್ಲಿ ಒಮಾನ್ ಪರ ರಾಬಿಯ ಅಲ್‌ ಮಂಧರ್‌ ಗೋಲು ಗಳಿಸಿದರು.
ಮಂಗಳವಾರ ಭಾರತ ತಂಡ ತನ್ನ ಮುಂದಿನ ಕ್ವಾಲಿಫೈಯರ್‌ ಪಂದ್ಯದಲ್ಲಿ ಕತಾರನ್ನು ಎದುರಿಸಲಿದೆ. ಸೆ.10ರಂದು ಭಾರತ ತನ್ನ 2ನೇ ಪಂದ್ಯದಲ್ಲಿ ಕತಾರ್‌ ವಿರುದ್ಧ ಸೆಣಸಲಿದೆ.
