ಮುಂಬೈ(ಸೆ.15): ಭಾರತ ರಾಷ್ಟ್ರೀಯ ಕ್ರಿಕೆಟ್ ಹಿರಿಯರ ತಂಡದ ಆಯ್ಕೆ ಮಂಡಳಿಯ ಸದಸ್ಯತ್ವಕ್ಕಾಗಿ ಮಾಜಿ ಕ್ರಿಕೆಟಿಗರಿಂದ ಬಿಸಿಸಿಐ ಅರ್ಜಿಗಳನ್ನು ಆಹ್ವಾನಿಸಿರುವ ಹಿನ್ನೆಲೆಯಲ್ಲಿ ಕರ್ನಾಟಕದ ಮಾಜಿ ಕ್ರಿಕೆಟಿಗ ವೆಂಕಟೇಶ್‌ ಪ್ರಸಾದ್‌ ಹಾಗೂ ಮತ್ತೊಬ್ಬ ಮಾಜಿ ಕ್ರಿಕೆಟಿಗ ನಯನ್‌ ಮೋಂಗಿಯಾ ಅರ್ಜಿ ಹಾಕಿದ್ದಾರೆ. ಸದ್ಯಕ್ಕೆ ಕಿರಿಯರ ರಾಷ್ಟ್ರೀಯ ಆಯ್ಕೆ ಸಮಿತಿಯ ಅಧ್ಯಕ್ಷರಾಗಿರುವ ವೆಂಕಟೇಶ್‌ ಪ್ರಸಾದ್‌ ಇದೀಗ ಹಿರಿಯರ ಆಯ್ಕೆ ಸಮಿತಿಗೆ ಸೇರ್ಪಡೆಗೊಳ್ಳಲು ಪ್ರಯತ್ನಿಸಿದ್ದಾರೆ.
ಲೋಧಾ ಸಮಿತಿ ಶಿಫಾರಸುಗಳ ಪ್ರಕಾರ, ಈ ಬಾರಿಯ ಆಯ್ಕೆ ಸಮಿತಿಗೆ ಆಯ್ಕೆಯಾಗುವ ಅಭ್ಯರ್ಥಿಗಳಿಗೆ ಹೊಸ ನಿಬಂಧನೆಗಳನ್ನು ಬಿಸಿಸಿಐ ವಿಧಿಸಿತ್ತು. ಅದರಂತೆ, ಅಭ್ಯರ್ಥಿಗಳು 60 ವರ್ಷಕ್ಕಿಂತ ಮೇಲ್ಪಟ್ಟಿರಬಾರದು. ಅಲ್ಲದೆ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕನಿಷ್ಠ ಒಂದು ಟೆಸ್ಟ್ ಅಥವಾ ಒಂದು ಏಕದಿನ ಪಂದ್ಯವನ್ನಾದರೂ ಆಡಿರಬೇಕು. ಕನಿಷ್ಠ 50 ಪ್ರಥಮ ದರ್ಜೆ ಪಂದ್ಯಗಳನ್ನಾದರೂ ಆಡಿರಬೇಕೆಂಬ ಷರತ್ತುಗಳನ್ನು ವಿಧಿಸಲಾಗಿತ್ತು.
ಅಂತಾರಾಷ್ಟ್ರೀಯ ಮಟ್ಟದಲ್ಲಿ 33 ಟೆಸ್ಟ್ ಹಾಗೂ 161 ಏಕದಿನ ಪಂದ್ಯಗಳನ್ನು ವೆಂಕಟೇಶ್‌ ಪ್ರಸಾದ್‌ ಆಡಿದ್ದಾರೆ. ಇನ್ನು, 123 ಪ್ರಥಮ ದರ್ಜೆ ಪಂದ್ಯಗಳಲ್ಲಿ ಕಾಣಿಸಿಕೊಂಡಿರುವ ಅವರು ತಮ್ಮ ಉಮೇದುವಾರಿಕೆಯನ್ನು ಅರ್ಜಿಯಲ್ಲಿ ಸಮರ್ಥಿಸಿಕೊಂಡಿದ್ದಾರೆ. ಇನ್ನು, ಭಾರತ ಕಂಡ ಅತ್ಯುತ್ತಮ ವಿಕೆಟ್‌ ಕೀಪರ್‌ಗಳಲ್ಲೊಬ್ಬರಾಗಿರುವ ನಯನ್‌ ಮೋಂಗಿಯಾ 44 ಅಂತಾರಾಷ್ಟ್ರೀಯ ಟೆಸ್ಟ್ ಪಂದ್ಯಗಳಲ್ಲಿ ಕಾಣಿಸಿಕೊಂಡಿದ್ದು, 140 ಏಕದಿನ ಹಾಗೂ 158 ಪ್ರಥಮ ದರ್ಜೆ ಪಂದ್ಯಗಳನ್ನಾಡಿದ್ದಾರೆ.
ವೆಂಕಟೇಶ್‌ ಪ್ರಸಾದ್‌ ಹಾಗೂ ನಯನ್‌ ಮೋಂಗಿಯಾ ಹೊರತುಪಡಿಸಿದಂತೆ, ಟೀಂ ಇಂಡಿಯಾದ ಮತ್ತೊಬ್ಬ ಮಾಜಿ ವಿಕೆಟ್‌ ಕೀಪರ್‌ ಸಮೀರ್‌ ಡಿಘೆ, ಎಡಗೈ ಸ್ಪಿನ್ನರ್‌ ನೈಲೇಶ್‌ ಕುಲಕರ್ಣಿ ಹಾಗೂ ವೇಗಿ ಅಬೆ ಕುರುವಿಲ್ಲಾ ಸಹ ಆಯ್ಕೆ ಸಮಿತಿಗೆ ಆಯ್ಕೆ ಬಯಸಿ ಅರ್ಜಿ ಸಲ್ಲಿಸಿದ್ದಾರೆ.
ಇವರೊಂದಿಗೆ, ಕೆಲವಾರು ಮಾಜಿ ರಾಷ್ಟ್ರಮಟ್ಟದ ಕ್ರಿಕೆಟರ್‌ಗಳೂ ಅರ್ಜಿ ಸಲ್ಲಿಸಿದ್ದು, ಅವರಲ್ಲಿ ಶಿಶಿರ್‌ ಹಟ್ಟಂಗಡಿ, ಶಂತನು ಸುಗ್ವೇಕರ್, ರಾಬಿನ್‌ ಸಿಂಗ್‌ (ಜೂನಿಯರ್‌) ಹಾಗೂ ಪ್ರೀತಂ ಗಂಧೆ ಸಹ ಅರ್ಜಿ ಸಲ್ಲಿಸಿದ್ದಾರೆ.
