ಟೆಸ್ಟ್'ನಲ್ಲಿ ಹೊಸ ದಾಖಲೆ ಬರೆದ ಕುಕ್; ಸಚಿನ್ ಮತ್ತೊಂದು ದಾಖಲೆ ಉಡೀಸ್
ಮೊದಲ ಇನ್ನಿಂಗ್ಸ್‌'ನಲ್ಲಿ 39 ರನ್ ಗಳಿಸಿದ್ದ ಕುಕ್'ಗೆ 12,000 ರನ್ ಮೈಲಿಗಲ್ಲು ತಲುಪಲು 5 ರನ್'ಗಳ ಅಗತ್ಯವಿತ್ತು. ಸ್ಟಾರ್ಕ್ ಬೌಲಿಂಗ್'ನಲ್ಲಿ ಒಂಟಿ ರನ್ ಪಡೆದ ಕುಕ್, ದಿಗ್ಗಜ ಬ್ಯಾಟ್ಸ್‌'ಮನ್‌'ಗಳ ಸಾಲಿಗೆ ಸೇರ್ಪಡೆಗೊಂಡರು.
ಸಿಡ್ನಿ(ಜ.08): ಇಂಗ್ಲೆಂಡ್ ತಂಡದ ರನ್ ಮಷಿನ್ ಅಲಿಸ್ಟರ್ ಕುಕ್, ಟೆಸ್ಟ್ ಕ್ರಿಕೆಟ್‌'ನಲ್ಲಿ ಮತ್ತೊಂದು ಮೈಲಿಗಲ್ಲು ತಲುಪಿದ್ದಾರೆ. ಆಸ್ಟ್ರೇಲಿಯಾ ವಿರುದ್ಧ ಇಲ್ಲಿ ನಡೆಯುತ್ತಿರುವ ಆ್ಯಷಸ್ ಸರಣಿಯ 5ನೇ ಟೆಸ್ಟ್'ನ 2ನೇ ಇನ್ನಿಂಗ್ಸ್‌'ನಲ್ಲಿ 10 ರನ್ ಗಳಿಸಿದ ಕುಕ್, ಟೆಸ್ಟ್'ನಲ್ಲಿ 12,000 ರನ್ ಪೂರೈಸಿದ್ದಾರೆ. ಈ ಸಾಧನೆ ಮಾಡಿದ ವಿಶ್ವದ 6ನೇ ಹಾಗೂ ಇಂಗ್ಲೆಂಡ್'ನ ಮೊದಲ ಕ್ರಿಕೆಟಿಗ ಎನ್ನುವ ದಾಖಲೆಗೆ ಕುಕ್ ಪಾತ್ರರಾಗಿದ್ದಾರೆ.
ಮೊದಲ ಇನ್ನಿಂಗ್ಸ್‌'ನಲ್ಲಿ 39 ರನ್ ಗಳಿಸಿದ್ದ ಕುಕ್'ಗೆ 12,000 ರನ್ ಮೈಲಿಗಲ್ಲು ತಲುಪಲು 5 ರನ್'ಗಳ ಅಗತ್ಯವಿತ್ತು. ಸ್ಟಾರ್ಕ್ ಬೌಲಿಂಗ್'ನಲ್ಲಿ ಒಂಟಿ ರನ್ ಪಡೆದ ಕುಕ್, ದಿಗ್ಗಜ ಬ್ಯಾಟ್ಸ್‌'ಮನ್‌'ಗಳ ಸಾಲಿಗೆ ಸೇರ್ಪಡೆಗೊಂಡರು.
ಅತಿ ಕಿರಿಯ: 12 ಸಾವಿರ ರನ್ ಪೂರೈಸಿದ ಅತಿ ಕಿರಿಯ ಆಟಗಾರ ಎನ್ನುವ ದಾಖಲೆಯನ್ನು ಕುಕ್ (33 ವರ್ಷ, 12 ದಿನ) ಬರೆದಿದ್ದಾರೆ. ಈ ಮೊದಲು ಈ ದಾಖಲೆ ಸಚಿನ್ ತೆಂಡುಲ್ಕರ್ (35 ವರ್ಷ, 176 ದಿನ) ಹೆಸರಿನಲ್ಲಿತ್ತು. ಅಲ್ಲದೇ ಅತಿ ಕಡಿಮೆ ಸಮಯದಲ್ಲಿ ಈ ಸಾಧನೆ ಮಾಡಿದ ಕೀರ್ತಿಗೂ ಕುಕ್ ಪಾತ್ರರಾಗಿದ್ದಾರೆ. ಪದಾರ್ಪಣೆ ಮಾಡಿ 11 ವರ್ಷ, 312 ದಿನಗಳಲ್ಲಿ ಕುಕ್ 12 ಸಾವಿರ ರನ್ ತಲುಪಿದ್ದಾರೆ. ಈ ಮೊದಲು 14 ವರ್ಷ 167 ದಿನಗಳಲ್ಲಿ ಈ ಸಾಧನೆ ಮಾಡಿದ್ದ ಸಂಗಕ್ಕಾರ ಹೆಸರಿನಲ್ಲಿ ಅತಿ ವೇಗದ ದಾಖಲೆ ಇತ್ತು. ಆದರೆ ಕುಕ್, 275 ಇನ್ನಿಂಗ್ಸ್‌'ಗಳಲ್ಲಿ 12 ಸಾವಿರ ರನ್ ಗಳಿಸಿ 6 ಆಟಗಾರರ ಪೈಕಿ ಅತಿ ಹೆಚ್ಚು ಇನ್ನಿಂಗ್ಸ್‌'ಗಳನ್ನು ತೆಗೆದುಕೊಂಡ ಆಟಗಾರ ಎನಿಸಿಕೊಂಡಿದ್ದಾರೆ.
12,000+ ರನ್ ಕ್ಲಬ್:
ಆಟಗಾರ ಟೆಸ್ಟ್ ರನ್
ಸಚಿನ್ 200 15921
ಪಾಂಟಿಂಗ್ 168 13378
ಕಾಲಿಸ್ 166 13289
ದ್ರಾವಿಡ್ 164 13288
ಸಂಗಕ್ಕಾರ 134 12400
ಕುಕ್ 152 12005
