ಅಫ್ಘಾನ್ಗೆ ತಲೆಬಾಗಿದ ಶ್ರೀಲಂಕಾ ಏಷ್ಯಾ ಕಪ್ನಿಂದಲೇ ಔಟ್..!
ಸತತ ಎರಡು ಸೋಲು ಅನುಭವಿಸಿದ ಶ್ರೀಲಂಕಾ ಏಷ್ಯಾ ಕಪ್ ಟೂರ್ನಿಯಿಂದ ಹೊರ ಬಿದ್ದಿದೆ. ಬಾಂಗ್ಲಾ ವಿರುದ್ಧ ನಡೆದ ಮೊದಲ ಪಂದ್ಯದಲ್ಲಿ 137 ರನ್ಗಳ ಸೋಲು ಅನುಭವಿಸಿದ್ದ ಸಿಂಹಳೀಯರು, ನಿನ್ನೆ ನಡೆದ 2ನೇ ಪಂದ್ಯದಲ್ಲಿ ಕ್ರಿಕೆಟ್ ಶಿಶು ಅಫ್ಘಾನ್ ವಿರುದ್ಧ 91 ರನ್ಗಳ ಸೋಲು ಅನುಭವಿಸಿತು.
ಅಬುಧಾಬಿ, (ಸೆ.18): ಸತತ ಎರಡು ಸೋಲು ಅನುಭವಿಸಿದ ಶ್ರೀಲಂಕಾ ಏಷ್ಯಾ ಕಪ್ ಟೂರ್ನಿಯಿಂದ ಹೊರ ಬಿದ್ದಿದೆ. ಬಾಂಗ್ಲಾ ವಿರುದ್ಧ ನಡೆದ ಮೊದಲ ಪಂದ್ಯದಲ್ಲಿ 137 ರನ್ಗಳ ಸೋಲು ಅನುಭವಿಸಿದ್ದ ಸಿಂಹಳೀಯರು, ನಿನ್ನೆ (ಸೋಮವಾರ) ನಡೆದ 2ನೇ ಪಂದ್ಯದಲ್ಲಿ ಕ್ರಿಕೆಟ್ ಶಿಶು ಅಫ್ಘಾನ್ ವಿರುದ್ಧ 91 ರನ್ಗಳ ಸೋಲು ಅನುಭವಿಸಿತು. ಈ ಮೂಲಕ 5 ಬಾರಿಯ ಏಷ್ಯಾ ಚಾಂಪಿಯನ್ ಲಂಕಾ, ಗುಂಪು ಹಂತದಲ್ಲೆ ಟೂರ್ನಿಯಿಂದ ಹೊರ ನಡೆಯಿತು.
ಟಾಸ್ ಗೆದ್ದು ಬ್ಯಾಟಿಂಗ್ ಆರಂಭಿಸಿದ ಅಫ್ಘಾನ್ ತಂಡ ದಿಟ್ಟ ಬ್ಯಾಟಿಂಗ್ ಪ್ರದರ್ಶನ ನೀಡಿತು. ನಿಗದಿತ 50 ಓವರ್ಗಳಲ್ಲಿ 249 ರನ್ ಗಳಿಸುವ ಮೂಲಕ ಸವಾಲಿನ ಮೊತ್ತ ಕಲೆ ಹಾಕಿತು. ಆರಂಭಿಕರಾದ ಮೊಹಮ್ಮದ್ ಶಹಜಾದ್ ಇಶಾನ್ ಉಲ್ಲ ತಂಡಕ್ಕೆ ಉತ್ತಮ ಓಪನಿಂಗ್ ನೀಡಿದರು. ಬಳಿಕ ಬಂದ ರಹಮತ್ ಶಾ 72 ರನ್ ಬಾರಿಸುವವ ಮೂಲಕ ತಂಡದ ಮೊತ್ತ ಹೆಚ್ಚಿಸಿದರು.
ಅಫ್ಘಾನಿಸ್ತಾನ ನೀಡಿದ್ದ ಗುರಿ ಬೆನ್ನತ್ತಿದ್ದ ಲಂಕಾ, ಆರಂಭದಲ್ಲೇ ಆಘಾತ ಅನುಭವಿಸಿತು. ಆರಂಭಿಕ ಬ್ಯಾಟ್ಸ್ಮನ್ ಕುಸಾಲ್ ಮೆಂಡೀಸ್ ಖಾತೆ ತೆರೆಯುವುದಕ್ಕೂ ಮುನ್ನ ಮೊದಲ ಓವರ್ನಲ್ಲೇ ಮುಜೀಬ್ ಉರ್ ರೆಹಮಾನ್ಗೆ ವಿಕೆಟ್ ಒಪ್ಪಿಸಿದರು. ಬಳಿಕ ಉಪುಲ್ ತರಂಗಾ ಹಾಗೂ ಧನಂಜಯ್ ಡಿ ಸಿಲ್ವಾ ಕೊಂಚ ಪ್ರತಿರೋದ ಹೊಡ್ಡಿದರಾದರೂ ತಂಡವನ್ನ ಗೆಲ್ಲಿಸಿಕೊಡುವಲ್ಲಿ ವಿಫಲರಾದರು.
ಅಫ್ಘಾನ್ ಸ್ಪಿನ್ ಮೋಡಿಗೆ ಲಂಕಾ ಅಂತಿಮವಾಗಿ 41.2 ಓವರ್ಗಳಲ್ಲಿ 158 ರನ್ಗಳಿಗೆ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 91 ರನ್ಗಳ ಸೋಲು ಅನುಭವಿಸಿತು. ಈ ಮೂಲಕ ಏಷ್ಯಾಕಪ್ ಟೂರ್ನಿಯಿಂದಲೇ ಹೊರ ಬಿತ್ತು.