ಕಾನ್ಪುರ(ಸೆ.21): ತವರಿನಲ್ಲಿ ಕಳೆದ ಹದಿನೈದು ಟೆಸ್ಟ್ ಸರಣಿಗಳಲ್ಲಿ ಕೇವಲ ಒಂದನ್ನಷ್ಟೇ ಸೋತಿರುವ ಆತಿಥೇಯ ಭಾರತ, ಪ್ರವಾಸಿ ನ್ಯೂಜಿಲೆಂಡ್‌ ವಿರುದ್ಧದ ಮೂರು ಟೆಸ್ಟ್ ಸರಣಿಯ ಮೊದಲ ಐತಿಹಾಸಿಕ ಪಂದ್ಯಕ್ಕೆ ಸಜ್ಜಾಗಿ ನಿಂತಿದ್ದು, ಸರಣಿಯಲ್ಲಿ ಜಯದ ಆರಂಭ ಕಾಣುವ ವಿಶ್ವಾಸದಲ್ಲಿದೆ.
ಮುಂದಿನ ಆರು ತಿಂಗಳ ಅವಧಿಯಲ್ಲಿ ತವರಿನಲ್ಲಿ 13 ಟೆಸ್ಟ್ ಆಡಲಿರುವ ಭಾರತ, ಕಿವೀಸ್‌ ವಿರುದ್ಧದ ಈ ಸರಣಿಯನ್ನು ಗಂಭೀರವಾಗಿ ಪರಿಗಣಿಸಿದೆ. ಕನ್ನಡಿಗ ಅನಿಲ್‌ ಕುಂಬ್ಳೆ ಟೀಂ ಇಂಡಿಯಾದ ನೂತನ ಕೋಚ್‌ ಆದ ನಂತರದಲ್ಲಿ ನಡೆದ ವೆಸ್ಟ್‌ಇಂಡೀಸ್‌ ವಿರುದ್ಧದ ಟೆಸ್ಟ್ ಪಂದ್ಯ ಸರಣಿಯನ್ನು 2-0 ಅಂತರದಿಂದ ಗೆದ್ದ ಭಾರತ, ಸಹಜವಾಗಿಯೇ ನ್ಯೂಜಿಲೆಂಡ್‌ ವಿರುದ್ಧವೂ ಇದೇ ಗೆಲುವಿನ ಅಭಿಯಾನ ಮುಂದುವರೆಸುವ ವಿಶ್ವಾಸದಲ್ಲಿದೆ.
ಐತಿಹಾಸಿಕ ಪಂದ್ಯ
ಇಲ್ಲಿನ ಗ್ರೀನ್‌ ಪಾರ್ಕ್ ಕ್ರೀಡಾಂಗಣದಲ್ಲಿ ನಡೆಯಲಿರುವ ಪಂದ್ಯವು ಟೀಂ ಇಂಡಿಯಾ ಪಾಲಿಗೆ ಮಹತ್ವಪೂರ್ಣವೆನಿಸಿದೆ. ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ 500ನೇ ಪಂದ್ಯ ಆಡುತ್ತಿರುವ ಭಾರತ ತಂಡದಲ್ಲಿ ಹಬ್ಬದ ವಾತಾವರಣ ನಿರ್ಮಾಣವಾಗಿದೆ. ಈ ಸಾಧನೆಯೊಂದಿಗೆ 500 ಮತ್ತು ಇಲ್ಲವೇ ಅದಕ್ಕೂ ಹೆಚ್ಚಿನ ಪಂದ್ಯಗಳನ್ನಾಡಿದ ವಿಶ್ವದ ನಾಲ್ಕನೇ ರಾಷ್ಟ್ರ ಎಂಬ ಕೀರ್ತಿಗೆ ಭಾರತ ಭಾಜನವಾಗಲಿದೆ. ವೆಸ್ಟ್‌ಇಂಡೀಸ್‌ (517), ಆಸ್ಪ್ರೇಲಿಯಾ (791) ಮತ್ತು ಇಂಗ್ಲೆಂಡ್‌ (976) ಅತಿಹೆಚ್ಚು ಟೆಸ್ಟ್ ಆಡಿರುವ ಮೊದಲ ಮೂರು ರಾಷ್ಟ್ರಗಳು. ಅಂದಹಾಗೆ ಭಾರತ ತಂಡದ ಈ ಚಾರಿತ್ರಿಕ ಟೆಸ್ಟ್ ಪಂದ್ಯಕ್ಕೆ ಎಲ್ಲ ಮಾಜಿ ನಾಯಕರುಗಳನ್ನು ಬಿಸಿಸಿಐ ಆಹ್ವಾನಿಸಿದ್ದು, ಭಾರತ ಕ್ರಿಕೆಟ್‌ಗೆ ಕೊಡುಗೆ ನೀಡಿದ ದಿಗ್ಗಜರೆಲ್ಲಾ ಇದಕ್ಕೆ ಸಾಕ್ಷಿಯಾಗಲಿದ್ದಾರೆ. ಇದೇ ಗ್ರೀನ್‌ ಪಾರ್ಕ್ನಲ್ಲಿ ಭಾರತ 22 ಪಂದ್ಯಗಳನ್ನಾಡಿದ್ದು, 6ರಲ್ಲಿ ಗೆಲುವು ಕಂಡಿದ್ದರೆ, 3ರಲ್ಲಿ ಸೋತಿದೆ. ಅಂದಹಾಗೆ ಪಿಚ್‌ ಸಂಪೂರ್ಣ ತಿರುವು ಮತ್ತು ಸ್ವಿಂಗ್‌ನಿಂದ ಕೂಡಿರಲಿದೆ ಎಂದು ಪಿಚ್‌ ಕ್ಯುರೇಟರ್‌ ಹೇಳಿದ್ದಾರೆ.
ಭಾರತದ ಪ್ರಭುತ್ವ
ಭಾರತದಲ್ಲಿ ನ್ಯೂಜಿಲೆಂಡ್‌ ಇಲ್ಲೀವರೆಗೆ 31 ಪಂದ್ಯಗಳನ್ನಾಡಿದ್ದು, ಈ ಪೈಕಿ 13ರಲ್ಲಿ ಸೋಲನುಭವಿಸಿದರೆ, 2ರಲ್ಲಿ ಗೆಲುವು ಸಾಧಿಸಿದೆ. ಅಂತೆಯೇ ಮಿಕ್ಕ 16 ಪಂದ್ಯಗಳು ಡ್ರಾ ಕಂಡಿವೆ. ಇನ್ನು ತವರಿನಲ್ಲಿ ಕಿವೀಸ್‌ ಎದುರು ಭಾರತ 13 ಪಂದ್ಯಗಳನ್ನು ಗೆದ್ದು ಪ್ರಭುತ್ವ ಮೆರೆದಿದೆ. ನಾಲ್ಕು ವರ್ಷಗಳ ಹಿಂದೆ ಭಾರತ ಪ್ರವಾಸ ಕೈಗೊಂಡಿದ್ದ ನ್ಯೂಜಿಲೆಂಡ್‌ ವಿರುದ್ಧ ಎಂ.ಎಸ್‌. ಧೋನಿ ಸಾರಥ್ಯದ ಟೀಂ ಇಂಡಿಯಾ ಎರಡು ಟೆಸ್ಟ್ ಸರಣಿಯನ್ನು ಗೆದ್ದಿತ್ತು.
ಭರವಸೆಯಲ್ಲಿ ಕೊಹ್ಲಿ
ಇನ್ನು ಕೆರಿಬಿಯನ್‌ ಪ್ರವಾಸದಲ್ಲಿ ವೃತ್ತಿಬದುಕಿನ ಚೊಚ್ಚಲ ದ್ವಿಶತಕ ಬಾರಿಸಿ ಮಿಂಚು ಹರಿಸಿದ ವಿರಾಟ್‌ ಕೊಹ್ಲಿ ತವರಿನಲ್ಲಿನ ಸರಣಿಯಲ್ಲಿಯೂ ಇದೇ ಆಕರ್ಷಕ ಬ್ಯಾಟಿಂಗ್‌ ಮುಂದುವರೆಸುವ ಭರವಸೆಯಲ್ಲಿದ್ದಾರೆ. ನ್ಯೂಜಿಲೆಂಡ್‌ ವಿರುದ್ಧದ ಏಳು ಇನ್ನಿಂಗ್ಸ್‌ಗಳಲ್ಲಿ ಐದು ಬಾರಿ 50+ ರನ್‌ ಸೇರಿದಂತೆ 85.20ರ ಸರಾಸರಿಯಲ್ಲಿ ಕೊಹ್ಲಿ 426 ರನ್‌ ದಾಖಲಿಸಿದ್ದಾರೆ. ಅವರೊಂದಿಗೆ ಕನ್ನಡಿಗ ಕೆ.ಎಲ್‌. ರಾಹುಲ್‌ ಕಿವೀಸ್‌ ಸರಣಿಯಲ್ಲಿ ಪ್ರಮುಖ ಪಾತ್ರ ವಹಿಸಲು ಸಜ್ಜಾಗಿದ್ದಾರೆ. ಇನ್ನು ಬೌಲಿಂಗ್‌ನಲ್ಲಿ ಸ್ಪಿನ್‌ ಮಾಂತ್ರಿಕ ಆರ್‌. ಅಶ್ವಿನ್‌ ಕಿವೀಸ್‌ ವಿರುದ್ಧದ ನಾಲ್ಕು ಇನ್ನಿಂಗ್ಸ್‌ಗಳಲ್ಲಿ ಮೂರು ಬಾರಿ 5 ವಿಕೆಟ್‌ ಸಾಧನೆಯಲ್ಲದೆ, 13.11ರ ಸರಾಸರಿಯಲ್ಲಿ 18 ವಿಕೆಟ್‌ ಗಳಿಸಿದ್ದಾರೆ. ಅಶ್ವಿನ್‌ ಜತೆಗೆ ರವೀಂದ್ರ ಜಡೇಜಾ ಕೂಡ ಕಿವೀಸ್‌ಗೆ ಸವಾಲಾಗಿ ಪರಿಣಮಿಸುವ ಸಂಭವವಿದೆ.
ಸ್ಪಿನ್‌ಗೆ ದಿಟ್ಟಉತ್ತರದ ನಿರೀಕ್ಷೆ
ಯುವ ಹಾಗೂ ಅನುಭವಿ ಆಟಗಾರರನ್ನು ಒಳಗೊಂಡಿರುವ ನ್ಯೂಜಿಲೆಂಡ್‌ ಈ ಬಾರಿ ಭಾರತದ ವಿರುದ್ಧ ಪಕ್ಕಾ ಲೆಕ್ಕಾಚಾರದ ಆಟಕ್ಕೆ ಒತ್ತು ನೀಡಿದೆ. ಎಲ್ಲಕ್ಕಿಂತ ಮಿಗಿಲಾಗಿ ಭಾರತದ ಪ್ರಬಲ ಸ್ಪಿನ್‌ ಬೌಲಿಂಗ್‌ಗೆ ದಿಟ್ಟಉತ್ತರ ನೀಡಲು ಕಿವೀಸ್‌ ನಿರ್ಧರಿಸಿದೆ. ನಾಯಕ ಕೇನ್‌ ವಿಲಿಯಮ್ಸನ್‌ ಅಲ್ಲದೆ ನೀಲ್‌ ವಾಗ್ನರ್‌, ಟಿಮ್‌ ಸೌಥೀ, ಟ್ರೆಂಟ್‌ ಬೌಲ್ಟ್‌, ಇಶ್‌ ಸೋಧಿ ಸೇರಿದಂತೆ ಇನ್ನೂ ಅನೇಕರು ಐಪಿಎಲ್‌ನಲ್ಲಿ ಆಡಿದ್ದು ಇಲ್ಲಿನ ವಾತಾವರಣಕ್ಕೆ ಹೊಂದಿಕೊಂಡು ಆಡುವ ವಿಶ್ವಾಸದಲ್ಲಿದ್ದಾರೆ. ಇನ್ನು ಇತ್ತೀಚಿನ ಟೂರ್ನಿಗಳಲ್ಲಿ ಕಳಪೆ ಫಾಮ್‌ರ್‍ನಲ್ಲಿರುವ ಮಾರ್ಟಿನ್‌ ಗುಪ್ಟಿಲ್‌ ಲಯ ಕಂಡುಕೊಳ್ಳಬೇಕಾದ ಒತ್ತಡದಲ್ಲಿದ್ದರೆ, ಅನುಭವಿ ಆಟಗಾರ ರಾಸ್‌ ಟೇಲರ್‌ ನ್ಯೂಜಿಲೆಂಡ್‌ಗೆ ಬಲ ತುಂಬಬೇಕಿದೆ.
ತಂಡಗಳು
ಭಾರತ: ವಿರಾಟ್‌ ಕೊಹ್ಲಿ (ನಾಯಕ), ಲೋಕೇಶ್‌ ರಾಹುಲ್‌, ಶಿಖರ್‌ ಧವನ್‌, ಚೇತೇಶ್ವರ ಪೂಜಾರ, ಅಜಿಂಕ್ಯ ರಹಾನೆ, ಮುರಳಿ ವಿಜಯ್‌, ರೋಹಿತ್‌ ಶರ್ಮಾ, ರವಿಚಂದ್ರನ್‌ ಅಶ್ವಿನ್‌, ವೃದ್ಧಿಮಾನ್‌ ಸಾಹ, ರವೀಂದ್ರ ಜಡೇಜಾ, ಮೊಹಮದ್‌ ಶಮಿ, ಇಶಾಂತ್‌ ಶರ್ಮಾ, ಭುವನೇಶ್ವರ್‌ ಕುಮಾರ್‌, ಅಮಿತ್‌ ಮಿಶ್ರಾ ಮತ್ತು ಉಮೇಶ್‌ ಯಾದವ್‌.
ನ್ಯೂಜಿಲೆಂಡ್‌: ಕೇನ್‌ ವಿಲಿಯಮ್ಸನ್‌ (ನಾಯಕ), ಟ್ರೆಂಟ್‌ ಬೌಲ್ಟ್‌, ಡಗ್‌ ಬ್ರಾಸ್‌ವೆಲ್‌, ಮಾರ್ಕ್ ಕ್ರೆಗ್‌, ಮಾರ್ಟಿನ್‌ ಗುಪ್ಟಿಲ್‌, ಟಾಮ್‌ ಲಾಥಮ್‌, ಜಿಮ್ಮಿ ನೀಶಮ್‌, ಹೆನ್ರಿ ನಿಕೋಲಸ್‌, ಲೂಕ್‌ ರೊಂಚಿ, ಮಿಚೆಲ್‌ ಸ್ಯಾಂಟ್ನರ್‌, ಇಶ್‌ ಸೋಧಿ, ಮ್ಯಾಟ್‌ ಹೆನ್ರಿ, ರಾಸ್‌ ಟೇಲರ್‌, ನೀಲ್‌ ವಾಗ್ನರ್‌ ಮತ್ತು ಬಿ.ಜೆ. ವಾಟ್ಲಿಂಗ್‌.
ಪಂದ್ಯ ಆರಂಭ: ಮುಂಜಾನೆ 9.30
ನೇರಪ್ರಸಾರ: ಸ್ಟಾರ್‌ ಸ್ಪೋರ್ಟ್ಸ್
