ಫಿಫಾ ವಿಶ್ವಕಪ್ ಗೆಲ್ಲೋ ನೆಚ್ಚಿನ ತಂಡಕ್ಕೆ ಈ 3 ತಂಡಗಳು ನೀಡಬಹುದು ಶಾಕ್
ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಸ್ಪೇನ್, ಜರ್ಮನಿ, ಬ್ರೆಜಿಲ್, ಫ್ರಾನ್ಸ್ ಸೇರಿದಂತೆ ಕೆಲ ತಂಡಗಳು ಪ್ರಶಸ್ತಿ ಗೆಲ್ಲೋ ಫೇವರಿಟ್ ತಂಡಗಳಾಗಿ ಗುರುತಿಸಿಕೊಂಡಿದೆ. ಆದರೆ ಈ ಬಲಿಷ್ಠ ತಂಡಗಳಿಗೆ ಶಾಕ್ ನೀಡಲು ಕೆಲ ತಂಡಗಳು ಸಜ್ಜಾಗಿದೆ. ಆ ತಂಡಗಳು ಯಾವುದು?
ರಷ್ಯಾ(ಜೂನ್.11): ಫಿಫಾ ವಿಶ್ವಕಪ್ ಟೂರ್ನಿ ಗೆಲ್ಲೋದು ಹಲವು ತಂಡಗಳಿಗೆ ಕನಸಿನ ಮಾತು. ಪ್ರತಿಷ್ಠಿತ ಟೂರ್ನಿಯಲ್ಲಿ ಪಾಲ್ಗೊಳ್ಳುವುದೇ ಸಂತಸದ ವಿಚಾರ. ಅದರಲ್ಲೂ ಚಾಂಪಿಯನ್ ತಂಡಗಳನ್ನ ಮಣಿಸಿ ಪ್ರಶಸ್ತಿ ಗೆಲ್ಲಲು ಹರಸಾಹಸ ಪಡಬೇಕು. ಈ ಬಾರಿ ರಷ್ಯಾದಲ್ಲಿ ನಡೆಯುತ್ತಿರುವ ಫಿಫಾ ವಿಶ್ವಕಪ್ ಟೂರ್ನಿ ಗೆಲ್ಲಲು ಫೇವರಿಟ್ ತಂಡಗಳ ನಡುವೆ ಭಾರಿ ಪೈಪೋಟಿ ಇದೆ.
ಸ್ಪೇನ್, ಜರ್ಮನಿ, ಬ್ರೆಜಿಲ್, ಫ್ರಾನ್ಸ್ ಸೇರಿದಂತೆ ಕೆಲ ತಂಡಗಳು ಪ್ರಶಸ್ತಿ ಗೆಲ್ಲೋ ಫೇವರಿಟ್ ತಂಡಗಳಾಗಿ ಗುರುತಿಸಿಕೊಂಡಿದೆ. ಈ ನೆಚ್ಚಿನ ತಂಡಗಳಿಗೆ ಯಾವುದೇ ಸಂದರ್ಭದಲ್ಲೂ ಈ 3 ತಂಡಗಳು ಶಾಕ್ ನೀಡಬಹುದು.
ಕೊಲಂಬಿಯಾ:
ಅಗ್ರಸ್ಥಾನದಲ್ಲಿರೋ ತಂಡಗಳಿಗೆ ಶಾಕ್ ನೀಡೋದರಲ್ಲಿ ಕೊಲಂಬಿಯಾ ತಂಡ ಯಾವತ್ತೂ ಹಿಂದೆ ಬಿದ್ದಿಲ್ಲ. 2014ರ ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಬಲಿಷ್ಠ ತಂಡಗಳನ್ನ ಮಣಿಸಿದ ಕೊಲಂಬಿಯಾ, ಕ್ವಾರ್ಟರ್ ಫೈನಲ್ ಪ್ರವೇಶಿಸಿತ್ತು. ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಬ್ರೆಜಿಲ್ ವಿರುದ್ಧ 1-2 ಅಂತರದಲ್ಲಿ ವಿರೋಚಿತ ಸೋಲು ಕಂಡಿತ್ತು. ಈ ಬಾರಿಯೂ ಕೊಲಂಬಿಯಾ ಇದೇ ಪ್ರದರ್ಶನ ನೀಡಿದರೆ ಅಚ್ಚರಿ ಫಲಿತಾಂಶ ನೀಡೋದರಲ್ಲಿ ಅನುಮಾನವಿಲ್ಲ.
ಉರುಗ್ವೆ:
ಸ್ಟಾರ್ ಪ್ಲೇಯರ್‌ಗಳಾದ ಲೂಯಿಸಿ ಸೌರೆಝ್ ಹಾಗೂ ಎಡಿನ್ಸನ್ ಕವಾನಿ ಉರುಗ್ವೆ ತಂಡದ ಶಕ್ತಿ ಹೆಚ್ಚಿಸಿದ್ದಾರೆ. 2014ರಲ್ಲಿ ಇಂಗ್ಲೆಂಡ್, ಇಟಲಿ ಹಾಗೂ ಕೋಸ್ಟರಿಕಾ ತಂಡಗಳಿಗೆ ನೀರು ಕುಡಿಸಿತ್ತು. ಬಲಿಷ್ಠ ಡಿಫೆಂಡರ್‌ಗಳನ್ನ ಹೊಂದಿರುವ ಉರುಗ್ವೆ, ಈ ಬಾರಿಯ ವಿಶ್ವಕಪ್ ಟೂರ್ನಿಯಲ್ಲೂ ಮೋಡಿ ಮಾಡೋ ತವಕದಲ್ಲಿದೆ.
ಕ್ರೋವೇಶಿಯಾ:
ಅನುಭವಿ ಹಾಗೂ ಪ್ರತಿಭಾನ್ವಿತ ಆಟಗಾರರನ್ನೊಳಗೊಂಡ ಕ್ರೋವೇಶಿಯಾ, ಪ್ರತಿ ಬಾರಿ ಅಚ್ಚರಿ ಫಲಿತಾಂಶ ನೀಡಿದೆ. ಟ್ಯಾಲೆಂಟೆಡ್ ಆಟಗಾರರಾದ ಲೂಕಾ ಮೊಡ್ರಿಕ್ ಹಾಗೂ ಇವಾನ್ ರಾಟಿಕ್, ಈ ಬಾರಿ ಮೋಡಿ ಮಾಡಿದರೆ ಕ್ರೋವೇಶಿಯಾ ಇತಿಹಾಸ ರಚಿಸೋದು ಕಷ್ಟವೇನಲ್ಲ. ಸಂಘಟಿತ ಹೋರಾಟ ನೀಡಿದರೆ , 2018ರ ವಿಶ್ವಕಪ್ ಟೂರ್ನಿಯಲ್ಲಿ ಕ್ರೋವೇಶಿಯಾ ಬಲಿಷ್ಠ ತಂಡಗಳಿಗೆ ಸುಲಭವಾಗಿ ಶಾಕ್ ನೀಡಬಹುದು.
