ಫಾರ್ಮುಲಾ 2 ಚಾಂಪಿಯನ್ಶಿಪ್ನ ಮೊನಾಕೊ ಸ್ಪ್ರಿಂಟ್ ರೇಸ್ನಲ್ಲಿ ಭಾರತದ ಕುಶ್ ಮೈನಿ ಐತಿಹಾಸಿಕ ಗೆಲುವು ಸಾಧಿಸಿದ್ದಾರೆ. ಮೊನಾಕೊದಲ್ಲಿ F2 ರೇಸ್ ಗೆದ್ದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಫಾರ್ಮುಲಾ 2 ಚಾಂಪಿಯನ್ಶಿಪ್ನ ಮೊನಾಕೊ ಸ್ಪ್ರಿಂಟ್ ರೇಸ್ನಲ್ಲಿ ಭಾರತದ ರೇಸಿಂಗ್ ಚಾಲಕ ಕುಶ್ ಮೈನಿ ಐತಿಹಾಸಿಕ ಗೆಲುವು ಸಾಧಿಸಿದ್ದಾರೆ. ಇದರೊಂದಿಗೆ ಮೊನಾಕೊದಲ್ಲಿ F2 ರೇಸ್ ಗೆದ್ದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಬೆಂಗಳೂರಿನ ಕುಶ್ ಮೈನಿಯ ಈ ಗೆಲುವು ಭಾರತದ ಫಾರ್ಮುಲಾ 1 ಕನಸುಗಳಿಗೆ ಹೊಸ ಚೈತನ್ಯ ತುಂಬಿದೆ.
ಕುಶ್ ಮೈನಿಯ ಸಾಧನೆ:
DAMS ಲ್ಯೂಕಸ್ ಆಯಿಲ್ ತಂಡದ ಪರ ಆಡುತ್ತಿರುವ 24 ವರ್ಷದ ಕುಶ್ ಮೈನಿ, ಶನಿವಾರ ನಡೆದ ಸ್ಪ್ರಿಂಟ್ ರೇಸ್ನಲ್ಲಿ ಪೋಲ್ ಪೊಸಿಷನ್ನಿಂದ ಆರಂಭಿಸಿ, ರೇಸ್ ಮುಗಿಯುವವರೆಗೂ ತಮ್ಮ ಪ್ರಾಬಲ್ಯ ಮೆರೆದರು. ಈ ಅದ್ಭುತ ಗೆಲುವು ಪ್ರಪಂಚದ ಅತ್ಯಂತ ಕಠಿಣವಾದ ಮೊನಾಕೊ ಟ್ರ್ಯಾಕ್ನಲ್ಲಿ ಬಂದದ್ದು ಗಮನಾರ್ಹ.
Related Articles
ಈ ಗೆಲುವಿನ ಬಗ್ಗೆ ಕುಶ್ ಮೈನಿ ಮಾತನಾಡಿ, “P1 ಮತ್ತು ಮೊನಾಕೊದಲ್ಲಿ ಗೆದ್ದ ಮೊದಲ ಭಾರತೀಯ ನಾನು. ಇದು ದೊಡ್ಡ ಗೌರವ, ನಿಜಕ್ಕೂ ಕನಸು ನನಸಾದಂತೆ. DAMS ತಂಡಕ್ಕೆ ಮತ್ತು ನನಗೆ ಬೆಂಬಲ ನೀಡಿದ ಎಲ್ಲರಿಗೂ ಧನ್ಯವಾದಗಳು” ಎಂದರು.
ಭಾರತದ ರಾಷ್ಟ್ರಗೀತೆ ಮೊಳಗಿದಾಗ ಮೈನಿ ಹೆಮ್ಮೆಯಿಂದ ಹಾಡಿದ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಕುಶ್ ಮೈನಿಯ ಈ ಸಾಧನೆಗೆ ವಿವಿಧ ವಲಯಗಳಿಂದ ಪ್ರಶಂಸೆ ವ್ಯಕ್ತವಾಗಿದೆ.
ಆನಂದ್ ಮಹೀಂದ್ರಾ ಪ್ರಶಂಸೆ:
ಉದ್ಯಮಿ ಆನಂದ್ ಮಹೀಂದ್ರಾ ತಮ್ಮ X (ಟ್ವಿಟರ್) ಪೋಸ್ಟ್ನಲ್ಲಿ, "ನೀವು ಎತ್ತರಕ್ಕೆ ಏರಿದ್ದೀರಿ, ಕುಶ್ ಮೈನಿ, ದೇಶವೂ ನಿಮ್ಮೊಂದಿಗೆ ಎತ್ತರಕ್ಕೆ ಏರಿದೆ. ಮಾಂಟೆ ಕಾರ್ಲೋದಲ್ಲಿ F2 ರೇಸ್ ಗೆದ್ದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದೀರಿ. ಮಹೀಂದ್ರಾ ರೇಸಿಂಗ್ ತಂಡದಲ್ಲಿ ನಿಮ್ಮನ್ನು ಹೊಂದಿರುವುದು ನಮಗೆ ಹೆಮ್ಮೆ" ಎಂದು ಬರೆದಿದ್ದಾರೆ.
JK ರೇಸಿಂಗ್ ಮತ್ತು TVS ರೇಸಿಂಗ್ ಮುಂತಾದ ಭಾರತೀಯ ಮೋಟಾರ್ಸ್ಪೋರ್ಟ್ ಸಂಸ್ಥೆಗಳು ಕುಶ್ ಮೈನಿಯ ಬೆಳವಣಿಗೆಗೆ ಬೆಂಬಲ ನೀಡುತ್ತಿವೆ.
BWT ಆಲ್ಪೈನ್ F1 ತಂಡದ ರಿಸರ್ವ್ ಚಾಲಕ ಮತ್ತು ಮಹೀಂದ್ರಾ ರೇಸಿಂಗ್ ಫಾರ್ಮುಲಾ E ತಂಡದ ಸದಸ್ಯರಾಗಿರುವ ಕುಶ್ ಮೈನಿ, ತಮ್ಮ ಅಸಾಧಾರಣ ಪ್ರತಿಭೆ ಮತ್ತು ಸವಾಲುಗಳನ್ನು ಎದುರಿಸುವ ಛಲವನ್ನು ಈ ಗೆಲುವಿನ ಮೂಲಕ ಸಾಬೀತುಪಡಿಸಿದ್ದಾರೆ. ಅವರ ಈ ಗೆಲುವು ಭಾರತದಲ್ಲಿ ಮೋಟಾರ್ಸ್ಪೋರ್ಟ್ಗೆ ಸ್ಫೂರ್ತಿ ತುಂಬಿದೆ.
ಒಂದು ಕಾಲದಲ್ಲಿ ಫಾರ್ಮುಲಾ 1 ಭಾರತೀಯ ಗ್ರ್ಯಾಂಡ್ ಪ್ರಿಕ್ಸ್ ಅನ್ನು ಆಯೋಜಿಸಿದ್ದ ಭಾರತ, ಹೆಚ್ಚಿನ ವೆಚ್ಚಗಳು, ಮೂಲಸೌಕರ್ಯಗಳ ಕೊರತೆ ಮತ್ತು ಆಡಳಿತಾತ್ಮಕ ಸಮಸ್ಯೆಗಳಿಂದಾಗಿ ವಿಶ್ವ ಮೋಟಾರ್ಸ್ಪೋರ್ಟ್ನಲ್ಲಿ ಹಿಂದುಳಿದಿತ್ತು. ಆದರೆ, ಕುಶ್ ಮೈನಿಯ ಮೊನಾಕೊ ಗೆಲುವು ಭಾರತದಲ್ಲಿ ಮೋಟಾರ್ಸ್ಪೋರ್ಟ್ಗೆ ಹೊಸ ಭರವಸೆ ಮೂಡಿಸಿದೆ.
ಈ ಗೆಲುವಿನ ನಂತರ ಕುಶ್ ಮೈನಿ ಬರುವ ಭಾನುವಾರ ನಡೆಯಲಿರುವ ಫೀಚರ್ ರೇಸ್ ಮತ್ತು ಮುಂದಿನ ವಾರ ಬಾರ್ಸಿಲೋನಾದಲ್ಲಿ ನಡೆಯಲಿರುವ ಸ್ಪರ್ಧೆಗೆ ಆತ್ಮವಿಶ್ವಾಸದಿಂದ ಸಜ್ಜಾಗಿದ್ದಾರೆ.