ಹೊಸ ವರ್ಷ, ಹೊಸ ದರ: ಟೀವಿ ಕೇಬಲ್, ಡಿಟಿಎಚ್ ಗ್ರಾಹಕರ ಜೇಬಿಗೆ ಕತ್ತರಿ!
ಹೊಸ ವರ್ಷದಿಂದ ಹೊಸ ದರ ಜಾರಿ| 10 ಪಟ್ಟು ಏರಿಕೆ ಸಂಭವ| ಟ್ರಾಯ್ನ ಹೊಸ ನಿಯಮದ ಎಫೆಕ್ಟ್| ಬೇಸಿಕ್ ಚಾನಲ್ ಬಿಟ್ಟು ಇನ್ನಾವುದೇ ಚಾನಲ್ ಬೇಕೆಂದರೂ ಪ್ರತ್ಯೇಕ ಶುಲ್ಕ
ಬೆಂಗಳೂರು[ಡಿ.18]: ನೀವು ಟೀವಿ ಪ್ರಿಯರೇ.. ಹಾಗಿದ್ದರೆ ಹೊಸ ವರ್ಷದಿಂದ ನಿಮ್ಮ ಜೇಬಿಗೆ ಭಾರಿ ಕತ್ತರಿ ಬೀಳಲಿದೆ.
ಹೌದು, ಇದುವರೆಗೂ 150 ರು.ನಿಂದ 250 ರು. ಮಾಸಿಕ ಶುಲ್ಕ ನೀಡಿ 400ರಿಂದ 500 ಚಾನಲ್ಗಳನ್ನು ವೀಕ್ಷಿಸುತ್ತಿದ್ದ ಗ್ರಾಹಕರು ಕೇಂದ್ರ ಸರ್ಕಾರ ಜಾರಿಗೊಳಿಸಿರುವ ಹೊಸ ನೀತಿಯಿಂದಾಗಿ ಹೊಸ ವರ್ಷದಿಂದ ಇಷ್ಟೇ ಚಾನಲ್ಗಳಿಗಾಗಿ ಮಾಸಿಕ 1500 ರು. ಪಾವತಿಸುವಂತಾಗಲಿದೆ!
ಟೀವಿ ಕೇಬಲ್ ನಿಯಮಾವಳಿಗಳ ಸಂಬಂಧ ಕೇಂದ್ರ ಸರ್ಕಾರದ ಟ್ರಾಯ್ (ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ) ಮೂಲಕ ಹೊಸ ನಿಯಮ ಜಾರಿಗೊಳಿಸುವುದಕ್ಕೆ ಮುಂದಾಗಿದ್ದು, ಡಿ.29ರಿಂದ ಜಾರಿಗೆ ಬರಲಿದೆ. ಆಗ ಕೇಬಲ್ ಟೀವಿ ಗ್ರಾಹಕರು ವೀಕ್ಷಣೆ ಮಾಡುತ್ತಿರುವ ಚಾನಲ್ಗಳಿಗೆ ಪಾವತಿಸುವ ಶುಲ್ಕದ ಮೊತ್ತ ಸುಮಾರು 10 ಪಟ್ಟು ಹೆಚ್ಚಾಗಲಿದೆ. ಈ ನಿಯಮ ಡಿಟಿಎಚ್ ಗ್ರಾಹಕರಿಗೂ ಅನ್ವಯವಾಗಲಿದೆ.
ಪ್ರಸಕ್ತ ರಾಜ್ಯಾದ್ಯಂತ 400ರಿಂದ 500 ಚಾನಲ್ಗಳನ್ನು ಕೇಬಲ್ ಟೀವಿ ಗ್ರಾಹಕರಿಗೆ ಕೇಬಲ್ ಆಪರೇಟರ್ಗಳು ನೀಡುತ್ತಿದ್ದಾರೆ. ಗ್ರಾಮಾಂತರ ಪ್ರದೇಶಗಳಲ್ಲಿ 150 ರು., ಬೆಂಗಳೂರು, ಮೈಸೂರು ಸೇರಿದಂತೆ ಮಹಾನಗರದಲ್ಲಿ 250 ರು.ಗಳಿಂದ 350 ರು.ವರೆಗೆ ಮಾಸಿಕ ಶುಲ್ಕ ಸಂಗ್ರಹಿಸುತ್ತಿದ್ದಾರೆ. ಹೊಸ ನಿಯಮದಿಂದ ಏಕರೂಪದ ಶುಲ್ಕ ಪಾವತಿ ವ್ಯವಸ್ಥೆ ಜಾರಿಗೆ ಬರುವುದರ ಜತೆಗೆ ಶುಲ್ಕದ ಪ್ರಮಾಣ ಹೆಚ್ಚಾಗಲಿದ್ದು, ಗ್ರಾಹಕರಿಗೆ ದೊಡ್ಡ ಹೊರೆಯಾಗಲಿದೆ.
ಏನಿದು ಹೊಸ ನಿಯಮ?:
ಕೇಂದ್ರ ಸರ್ಕಾರದ ಟ್ರಾಯ್ ಸಂಸ್ಥೆಯು ತಂದಿರುವ ಕೇಬಲ್ ಚಾನಲ್ಗಳ ಹೊಸ ಶುಲ್ಕ ಪದ್ಧತಿ ಪ್ರಕಾರ ಗ್ರಾಹಕರು ಟೀವಿ ಚಾನಲ್ಗಳನ್ನು ಪಡೆಯಲು ಟ್ರಾಯ್ ಪ್ರಾಥಮಿಕ ಶುಲ್ಕವನ್ನು ವಿಧಿಸುತ್ತದೆ. ಇದರ ಮೇಲೆ ನೀವು ಜನಪ್ರಿಯ ಚಾನಲ್ಗಳನ್ನು ನೋಡಬೇಕು ಎಂದರೆ, ಅವುಗಳಿಗೆ ಪ್ರತ್ಯೇಕ (ಪ್ರತಿ ಚಾನಲ್ಗೂ) ಶುಲ್ಕವನ್ನು ನೀಡಬೇಕು. ಈ ಜನಪ್ರಿಯ ಚಾನಲ್ಗಳನ್ನು ಆಯ್ಕೆ ಮಾಡಿಕೊಳ್ಳುವ ಅವಕಾಶವನ್ನು ಗ್ರಾಹಕರಿಗೆ ನೀಡಲಾಗಿದೆ.
ಪ್ರಸ್ತುತ ಗ್ರಾಹಕರು 400ರಿಂದ 500 ಚಾನಲ್ ವೀಕ್ಷಣೆ ಮಾಡುವುದಕ್ಕೆ ಪ್ರತಿ ತಿಂಗಳು 150 ರು. ಪಾವತಿ ಮಾಡುತ್ತಿದ್ದಾರೆ. ಆದರೆ, ಡಿ.29ರ ನಂತರ ಒಂದು ತಿಂಗಳಿಗೆ ಬಾಡಿಗೆ ರೂಪದಲ್ಲಿ 130 ರು. ಪಾವತಿ ಮಾಡಬೇಕು. ಅದಕ್ಕೆ ತೆರಿಗೆ (ಜಿಎಸ್ಟಿ) ಶೇ.18ರಷ್ಟುಸೇರಿಸಿದರೆ ಶುಲ್ಕದ ಮೊತ್ತ 150 ರುಪಾಯಿಗಿಂತ ಹೆಚ್ಚಾಗಲಿದೆ. ಈ ಮೊತ್ತ ನೀಡಿದರೆ, ನಿಮಗೆ ಮೊದಲಿನಂತೆ ಎಲ್ಲಾ ಜನಪ್ರಿಯ ಚಾನಲ್ಗಳು ಸಿಗುವುದಿಲ್ಲ. ಬದಲಾಗಿ, 24 ದೂರದರ್ಶನ ಚಾನಲ್ಗಳು, 100 ಉಚಿತ ವೀಕ್ಷಣೆಯ ಚಾನಲ್ಗಳು ಮಾತ್ರ ಸಿಗಲಿವೆ.
ಜನಪ್ರಿಯ ಚಾನಲ್ ಬೇಕು ಎಂದರೆ ಅವುಗಳಿಗೆ ನೀವು ಪ್ರತ್ಯೇಕವಾಗಿ ಶುಲ್ಕವನ್ನು ಪಾವತಿ ಮಾಡಬೇಕು. ಈ ಜನಪ್ರಿಯ ಚಾನಲ್ಗಳಿಗೆ ಅವುಗಳ ಜನಪ್ರಿಯತೆ ಆಧಾರದ ಮೇಲೆ 1 ರು.ನಿಂದ 19 ರು.ವರೆಗೆ ಶುಲ್ಕ ನಿಗದಿಯಾಗಿರುತ್ತದೆ. ಕಡಿಮೆ ಬೇಡಿಕೆ ಇರುವ ಚಾನಲ್ಗಳಿಗೆ ಕಡಿಮೆ ಶುಲ್ಕ, ಹೆಚ್ಚು ಬೇಡಿಕೆ ಇರುವ ಚಾನಲ್ಗಳಿಗೆ ಹೆಚ್ಚಿನ ಶುಲ್ಕ ಇರುತ್ತದೆ. ಈಗಾಗಲೇ ಜನಪ್ರಿಯವಾಗಿರುವ ಚಾನಲ್ಗಳ ಶುಲ್ಕ 15ರಿಂದ 19 ರು. ಆಗಿರುತ್ತದೆ.
ಕನಿಷ್ಠ 400 ರು ಶುಲ್ಕ:
ಅಂದರೆ, ನೀವು ಎಲ್ಲಾ ಚಾನಲ್ ನೋಡಬೇಕು ಎಂದರೆ 1500 ರು. ಶುಲ್ಕ ನೀಡಬೇಕಾಗುತ್ತದೆ. ನಾನು ಕೆಲವೇ ಜನಪ್ರಿಯ ಚಾನಲ್ಗಳನ್ನು ನೋಡುತ್ತೇನೆ ಎಂದು ಅವುಗಳನ್ನು ಆಯ್ಕೆ ಮಾಡಿಕೊಂಡರೆ ನೀವು ಪಾವತಿ ಮಾಡಬೇಕಾದ ಶುಲ್ಕ ಕನಿಷ್ಠ ಎಂದರೂ 400ರಿಂದ 500 ರು. ಆಗುತ್ತದೆ.
ಎಲ್ಲಿ, ಎಷ್ಟುದರ?
ಪ್ರದೇಶ ಪ್ರಸ್ತುತ ದರ ಹೊಸ ದರ (ಸುಮಾರು)
ಬೆಂಗಳೂರು ಮತ್ತು ಮಹಾನಗರ 250-350 ರು. 1500 ರು.
ಗ್ರಾಮಾಂತರ ಪ್ರದೇಶ 150 ರು. 1500 ರು.
ಏಕೆ ಇಷ್ಟುದುಬಾರಿ?
ಪ್ರಾಥಮಿಕ ಶುಲ್ಕ- 130 ರು. (ಬಾಡಿಗೆ)
ತೆರಿಗೆ- ಶೇ.18 (24 ರು.)
ಒಟ್ಟು- 154 ರು. (ಉಚಿತ 124 ಚಾನಲ್ಗೆ)
ಪ್ರತಿ ಜನಪ್ರಿಯ ಚಾನಲ್ಗೆ 1ರಿಂದ 19 ರು.
ಟೀವಿ ಗ್ರಾಹಕರ ವಿವರ
ಗ್ರಾಹಕರು ದೇಶ ಕರ್ನಾಟಕ ಬೆಂಗಳೂರು
ಕೇಬಲ್ ಟೀವಿ 9.6 ಕೋಟಿ 60-80 ಲಕ್ಷ 25-30 ಲಕ್ಷ
ಡಿಟಿಎಚ್ 3.5 ಕೋಟಿ 6-10 ಲಕ್ಷ 3-5 ಲಕ್ಷ
ಕೇಬಲ್ ಟೀವಿ ಚಾನಲ್ ಆಪರೇಟರ್ಸ್
ರಾಜ್ಯದಲ್ಲಿ ಸುಮಾರು 1 ಲಕ್ಷ
ಬೆಂಗಳೂರು 2,250