ರಾಜೀವ್ ಗಾಂಧಿ ಹಂತಕಿಗೆ ಒಂದು ತಿಂಗಳು ಪರೋಲ್
ರಾಜೀವ್ ಗಾಂಧಿ ಹಂತಕಿಗೆ ಒಂದು ತಿಂಗಳು ಪರೋಲ್| ಮಗಳ ಮದುವೆ ತಯಾರಿಗೆ 6 ತಿಂಗಳು ಪರೋಲ್ ಕೇಳಿದ್ದ ನಳಿನಿ| ದೋಷಿ ಮನವಿಗೆ ಕೇವಲ ಒಂದು ತಿಂಗಳ ಷರತ್ತು ಬದ್ಧ ಪರೋಲ್ ನೀಡಿದ ಮದ್ರಾಸ್ ಹೈಕೋರ್ಟ್
ಮದ್ರಾಸ್[ಜು.25]: ಪುತ್ರಿ ಮದುವೆ ಸಂಬಂಧ ಅಗತ್ಯ ಸಿದ್ದತೆ ಮಾಡಿಕೊಳ್ಳಲು ಮಾಜಿ ಪಿಎಂ ರಾಜೀವ್ ಗಾಂಧಿ ಹತ್ಯೆ ಅಪರಾಧಿ ನಳಿನಿ ಶ್ರೀಹರನ್ ಗೆ ಮದ್ರಾಸ್ ಹೈಕೋರ್ಟ್ 30 ದಿನಗಳ ಪರೋಲ್ ನೀಡಿದೆ.
ತನ್ನ ಪುತ್ರಿಯ ವಿವಾಹ ಸಂಬಂಧ ತಯಾರಿಗಾಗಿ 6 ತಿಂಗಳು ಪರೋಲ್ ನೀಡುವಂತೆ ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಅಪರಾಧಿ ನಳಿನಿ ಶ್ರೀಹರನ್ ಮದ್ರಾಸ್ ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದರು. ಜುಲೈ 5 ರಂದು ಈ ಅರ್ಜಿ ಕೋರ್ಟ್ ಪುಸ್ಕರಿಸಿದೆಯಾದರೂ ಕೇವಲ ಒಂದು ತಿಂಗಳ ಷರತ್ತು ಬದ್ಧ ಪರೋಲ್ ಗೆ ಅನುಮತಿ ನೀಡಿದೆ.
ಜೈಲಿನಿಂದ ಹೊರಗಿರುವ ಸಂದರ್ಭದಲ್ಲಿ ಸುದ್ದಿ ಮಾಧ್ಯಮಗಳಿಗೆ ಸಂದರ್ಶನ, ಹೇಳಿಕೆ ನೀಡಬಾರದು ಎಂದು ಮದ್ರಾಸ್ ಹೈಕೋರ್ಟ್ ಷರತ್ತು ವಿಧಿಸಿದೆ. ಈ ಅರ್ಜಿಯನ್ನು ತಿರಸ್ಕರಿಸಿದ ಕೋರ್ಟ್, 30 ದಿನಗಳ ಕಾಲ ಷರತ್ತು ಬದ್ಧ ಪರೋಲ್ಗೆ ಅನುಮತಿ ನೀಡಿದೆ.
ರಾಜೀವ್ ಗಾಂಧಿ ಹತ್ಯೆ ಪ್ರಕರಣದಲ್ಲಿಜೀವಾವಧಿ ಶಿಕ್ಷೆಗೊಳಗಾಗಿದ್ದ ನಳಿನಿ ಶ್ರೀಹರನ್ ಕಳೆದ 28 ವರ್ಷಗಳಿಂದ ವೆಲ್ಲೂರು ಸೆಂಟ್ರಲ್ ಜೈಲಿನಲ್ಲಿದ್ದರು. ಈ ಹಿಂದೆ 2016ರಲ್ಲಿ ನಳಿನಿಗೆ ಅವರ ತಂದೆಯ ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಳ್ಳಲು 12 ಗಂಟೆಗಳ ಪರೋಲ್ ನೀಡಲಾಗಿತ್ತು.