ನವದೆಹಲಿ: ಅಮರಿಕದ ಟೈಮ್‌ ನಿಯತಕಾಲಿಕೆಯಲ್ಲಿ ತಮ್ಮನ್ನು ವಿಭಾಜಕ ಮುಖ್ಯಸ್ಥ ಎಂದು ಕರೆದಿರುವುದಕ್ಕೆ ಪ್ರಧಾನಿ ನರೇಂದ್ರ ಮೋದಿ ಮೌನ ಮುರಿದಿದ್ದಾರೆ. ತಮ್ಮ ಘನತೆಯನ್ನು ಹಾಳು ಮಾಡಲು ಕೆಲವರು ಕಳೆದ 20 ವರ್ಷಗಳಿಂದ ಯತ್ನ ನಡೆಸುತ್ತಲೇ ಇದ್ದಾರೆ. ಆದರೆ, ಅದರಿಂದ ಅವರಿಂದ ಅವರ ಘನತೆಯೇ ಮಣ್ಣುಪಾಲಾಗಿದೆ ಎಂದು ಹೇಳಿದ್ದಾರೆ.

 ಚುನಾವಣಾ ಪ್ರಚಾರದ ವೇಳೆ ಮಾಧ್ಯಮವೊಂದಕ್ಕೆ ಪ್ರತಿಕ್ರಿಯೆ ನೀಡಿದ ಮೋದಿ, ತಮ್ಮ ವ್ಯಕ್ತಿತ್ವವನ್ನು ಹೆಚ್ಚಿಸಿಕೊಳ್ಳಬೇಕು ಎಂದು ಬಯಸುವವರು 20 ವರ್ಷದಿಂದ ನನ್ನ ವ್ಯಕ್ತಿತ್ವಕ್ಕೆ ಮಸಿ ಬಳಿಯಲು ಯತ್ನಿಸುತ್ತಲೇ ಇದ್ದಾರೆ. ಆದರೆ, ಅದು ಅವರಿಗೇ ತಿರುಗುಬಾಣವಾಗಿದೆ. ಅವರ ಬಗ್ಗೆ ನನಗೆ ಕರುಣೆ ಇದೆ ಎಂದು ಹೇಳುವ ಮೂಲಕ ಟೈಮ್‌ ನಿಯತಕಾಲಿಕೆಯ ಮುಖಪುಟದಲ್ಲಿ ತಮ್ಮ ಬಗ್ಗೆ ಪ್ರಕಟವಾದ ಲೇಖನವನ್ನು ಪ್ರಸ್ತಾಪಿಸಿದರು. 

ನನ್ನನ್ನು ವಿಭಾಜಕ ಎಂದು ಕರೆಯುವ ಮುನ್ನ ವಿಭಜನೆ ಲಂಬವಾಗಿಯೋ ಅಥವಾ ಅಡ್ಡವಾಗಿಯೋ ಎನ್ನುವುದನ್ನು ಅರ್ಥಮಾಡಿಕೊಳ್ಳಬೇಕು. ಒಂದು ವೇಳೆ ವಿಭಜನೆ ಇದ್ದಿದ್ದೇ ಆದರೆ, ಬಡವರು ಒಂದುಗೂಡಿದ್ದಾರೆ ಮತ್ತು ಮೋದಿಯ ಜೊತೆ ಗುರುತಿಸಿಕೊಂಡಿದ್ದಾರೆ. ಬಡವರು ದೇಶದ ಸುಧಾರಣೆ ಬಯಸುವುದಾದರೆ ಅದರಲ್ಲಿ ತಪ್ಪೇನಿದೆ ಎಂದು ಮೋದಿ ಪ್ರಶ್ನಿಸಿದ್ದಾರೆ.