ಕೇಂದ್ರ ಸರ್ಕಾರದ ಮಹತ್ವದ ಕೊಡುಗೆ| ಮೊದಲ 365 ದಿನ ಸಂಪೂರ್ಣ ವೇತನ ಸಹಿತ ರಜೆ| ನಂತರದ 365 ದಿನ ಶೇ.20ರಷ್ಟುವೇತನ ಕಡಿತ| ನೌಕರ ಏಕಾಂಗಿ ಪಾಲಕನಾಗಿದ್ದರೆ ಈ ಸವಲತ್ತು
ನವದೆಹಲಿ[ಡಿ.29]: ಕೇಂದ್ರ ಸರ್ಕಾರದ ನೌಕರರಾಗಿದ್ದುಕೊಂಡು ಮಗುವಿನ ‘ಏಕಾಂಗಿ ಪಾಲಕ’ರಾಗಿದ್ದರೆ ಅಂಥವರಿಗೆ 730 ದಿನಗಳ ಅವಧಿಯ (2 ವರ್ಷದ) ‘ಶಿಶುಪಾಲನಾ ರಜೆ’ ನೀಡಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಈವರೆಗೆ ಕೇವಲ ಮಹಿಳಾ ನೌಕರರರಿಗೆ ಸೀಮಿತವಾಗಿದ್ದ ಈ ಸವಲತ್ತು ಈಗ ಪುರುಷ ಪಾಲಕರಿಗೂ ಲಭಿಸಲಿದೆ. ಪುರುಷ ಏಕಾಂಗಿ ನೌಕರರನ್ನು ‘ಅವಿವಾಹಿತ, ವಿಧುರ ಹಾಗೂ ವಿಚ್ಛೇದಿತ ಪುರುಷ ನೌಕರ’ ಎಂದು ಗುರುತಿಸಲಾಗಿದ್ದು, ತಮ್ಮ ಇಡೀ ಸೇವಾವಧಿಯಲ್ಲಿ 730 ದಿನಗಳವರೆಗೆ ವೇತನ ಸಹಿತ ಶಿಶುಪಾಲನಾ ರಜೆ ಪಡೆಯಲು ಅವಕಾಶ ನೀಡಲಾಗಿದೆ.
ಈ ರೀತಿಯ ಏಕಾಂಗಿ ಪುರುಷ ನೌಕರರ ಸಂಖ್ಯೆ ಕಮ್ಮಿ ಇರಬಹುದಾದರೂ, ಶಿಶುಪಾಲನೆಗೆ ಸಂಬಂಧಿಸಿದಂತೆ ಕೇವಲ ಮಹಿಳೆಯರಿಗೆ ಮಾತ್ರ ಆದ್ಯತೆ ಎಂಬ ನೀತಿಯನ್ನು ಸರ್ಕಾರ ಬದಲಿಸಿದಂತಿದೆ.
ಇದೇ ವೇಳೆ, ಮಹಿಳಾ ಕೇಂದ್ರ ಸರ್ಕಾರಿ ನೌಕರರಿಗೆ ಇಬ್ಬರು ಮಕ್ಕಳವರೆಗೆ 2 ವರ್ಷದ ಶಿಶುಪಾಲನಾ ರಜೆ ಪಡೆಯಲು ಅವಕಾಶವಿದೆ. ಒಂದು ವರ್ಷದಲ್ಲಿ 3 ಹಂತಗಳಲ್ಲಿ ಈ ರಜೆ ಪಡೆಯಲು ಈವರೆಗೆ ಆಸ್ಪದವಿತ್ತು. ಇದನ್ನು ಈಗ 6 ಹಂತಗಳಿಗೆ ವಿಸ್ತರಿಸಲಾಗಿದೆ. ಈಗಾಗಲೇ ಮಹಿಳೆಯರು 180 ದಿವಸಗಳ ಕಾಲದ ವೇತನ ಸಹಿತ ಹೆರಿಗೆ ರಜೆ ಪಡೆಯುತ್ತಿದ್ದಾರೆ ಹಾಗೂ ಪುರುಷರು 15 ದಿವಸಗಳ ವೇತನ ಸಹಿತ ರಜೆ ಪಡೆಯುತ್ತಿದ್ದಾರೆ.
ದ್ವಿತೀಯಾರ್ಧದಲ್ಲಿ ಶೇ.20 ವೇತನ ಕಡಿತ:
ಮಹಿಳಾ ನೌಕರರು ಹಾಗೂ ಏಕಾಂಗಿ ಪುರುಷ ನೌಕರರು 730 ದಿವಸಗಳ ಅವಧಿಯ ಶಿಶುಪಾಲನಾ ರಜೆಗೆ ಅರ್ಹರಾಗಲಿದ್ದಾರೆ. ಗರಿಷ್ಠ ಎರಡು ಮಕ್ಕಳವರೆಗೆ ಈ ಪ್ರಯೋಜನ ಲಭಿಸಲಿದೆ. ಅನಾರೋಗ್ಯ, ಶಿಕ್ಷಣ ಅಥವಾ ಇತರ ಅವಶ್ಯಕತೆಗಳು ಬಂದಾಗ ಈ ರಜೆ ಪಡೆಯಬಹುದು.
ಏಳನೇ ವೇತನ ಆಯೋಗದ ಶಿಫಾರಸಿನ ಪ್ರಕಾರ ಮೊದಲ 365 ದಿನಗಳ ಅವಧಿಯಲ್ಲಿ ನೌಕರರು ಸಂಪೂರ್ಣ ವೇತನ ಸಹಿತ ರಜೆ ಪಡೆಯಲಿದ್ದಾರೆ. ಆದರೆ ಎರಡನೇ ಹಂತದ 365 ದಿನಗಳಲ್ಲಿ ಶೇ.20ರಷ್ಟುವೇತನ ಕಡಿತವಾಗಲಿದೆ ಎಂದು ಈ ಕುರಿತು ಆದೇಶ ಹೊರಡಿಸಿಸಿರುವ ಕೇಂದ್ರ ಸಿಬ್ಬಂದಿ ಸಚಿವಾಲಯ ಹೇಳಿದೆ.
