‘ಸಿಗ್ನಲ್ ಜಂಪ್ ಮಾಡು ಇಲ್ಲಾ ರೇಪ್ ಮಾಡ್ತಿನಿ’ ! ಎಲ್ಲಿಗೆ ಬಂತು ಬೆಂಗ್ಳೂರು?
ಹೆಣ್ಣು ಮಕ್ಕಳ ಮೇಲಿನ ಲೈಂಗಿಕ ಶೋಷಣೆ ಪ್ರಕರಣಗಳು ರಾಜಧಾನಿ ಬೆಂಗಳೂರಿಗೆ ಹೊಸದೇನಲ್ಲ. ಈ ಬಾರಿಯದ್ದು ಕೊಂಚ ವಿಚಿತ್ರ. ಆದರೆ ಎಲ್ಲರಿಗೂ ಎಚ್ಚರಿಕೆ ಘಂಟೆಯಾಗಿದೆ.
ಬೆಂಗಳೂರು (ಸೆ.30) ಓಲಾ. ಉಬರ್ ಕಾಲು ಚಾಲಕರಿಂದ ಯುವತಿಯರಿಗೆ ಕಿರುಕುಳ ನಡೆಯುತ್ತಿದ್ದ ಪ್ರಕರಣಗಳು ವರದಿಯಾಗುತ್ತಿದ್ದವು. ಇದೀಗ ಅದೇ ಸಾಲಿಗೆ ಮತ್ತೊಂದು ಸೇರ್ಪಡೆಯಾಗಿದೆ. ಈ ಬಾರಿ ಬೈಕ್ ಚಾಲಕನೇ ಯುವತಿಗೆ ಅತ್ಯಾಚಾರದ ಬೆದರಿಕೆ ಹಾಕಿದ್ದಾನೆ.
ತಿಲಕ್ನಗರದ ಬಿಲಾಲ್ ಮಸೀದಿ ಬಳಿಯ ಸಿಗ್ನಲ್ನಲ್ಲಿ 26 ವರ್ಷದ ಮಹಿಳಾ ಫೋಟೋಗ್ರಾಫರ್ಗೆ ಸಿಗ್ನಲ್ ಜಂಪ್ ಮಾಡು ಇಲ್ಲದಿದ್ದರೆ ರೇಪ್ ಮಾಡುತ್ತೇನೆ ಎಂದು ಚಂದ್ರಶೇಖರ್ ಎಂಬಾತ ಬೆದರಿಕೆ ಹಾಕಿದ್ದಾನೆ.
ಸಿಗ್ನಲ್ನಲ್ಲಿ ರೆಡ್ಲೈಟ್ ಬಿದ್ದಿದ್ದರಿಂದ ಯುವತಿ ತಮ್ಮ ಕಾರನ್ನು ನಿಲ್ಲಿಸಿದ್ದಾರೆ. ಈ ವೇಳೆ ಹಿಂಬದಿಯಿಂದ ಬಂದ ಬೈಕ್ ಸವಾರ ಜೋರಾಗಿ ಹಾರನ್ ಮಾಡಿ, ಆಕೆಗೆ ಸಿಗ್ನಲ್ ಜಂಪ್ ಮಾಡುವಂತೆ ಕೂಗಿದ್ದಾನೆ. ಆದರೆ ರೆಡ್ಲೈಟ್ ಬಿದ್ದದ್ದರಿಂದ ಯುವತಿ ಸಿಗ್ನಲ್ ಜಂಪ್ ಮಾಡಿರಲಿಲ್ಲ. ಹೀಗಾಗಿ ಆಕೆಯ ಜೊತೆ ಜಗಳ ತೆಗೆದು ಅವಾಚ್ಯ ಶಬ್ಧಗಳಿಂದ ನಿಂದಿಸಿದ್ದಾನೆ. ರೊಚ್ಚಿಗೆದ್ದ ಯುವತಿಯೂ ಪ್ರತ್ಯುತ್ತರ ನೀಡಿದ್ದಾರೆ.
ಆರೋಪಿ
ಅಷ್ಟೇ ಅಲ್ಲದೆ ಗ್ರೀನ್ ಸಿಗ್ನಲ್ ಬಿದ್ದ ನಂತರ ಆ ಯುವತಿಯ ಕಾರು ಹಿಂಬಾಲಿಸಿಕೊಂಡು ಹೋಗಿದ್ದಾನೆ. ಕಾರನ್ನು ಅಡ್ಡಗಟ್ಟಿ ಅತ್ಯಾಚಾರ ಮಾಡುವ ಬೆದರಿಕೆ ಹಾಕಿದ ಎಂದು ಯುವತಿ ಆರೋಪಿಸಿದ್ದಾಳೆ. ಪಕ್ಕಕ್ಕೆ ನಡಿ, ಹೇಗೆ ರೇಪ್ ಮಾಡುತ್ತೇನೆ ಅಂತಾ ತೋರಿಸುತ್ತೇನೆ ಎಂದು ಬೆದರಿಸಿದ್ದಾನೆ. ಇದಾದ ಬಳಿಕ ಆ ಮಹಿಳೆ ತಮ್ಮ ಕ್ಯಾಮೆರಾದಿಂದ ಬೈಕ್ನ ಫೋಟೋ ತೆಗೆದಿದ್ದಾಳೆ. ಬಳಿಕ ತಿಲಕ್ನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾಳೆ. ಆರೋಪಿಯನ್ನು ಚಂದ್ರಶೇಖರ್(43)ನನ್ನು ತಿಲಕ್ನಗರ ಪೊಲೀಸರು ಬಂಧಿಸಿದ್ದು, ವಿಚಾರಣೆ ನಡೆಸುತ್ತಿದ್ದಾರೆ.