ಬೆಂಗಳೂರು ಆಸ್ತಿ ತೆರಿಗೆ ಬಾಕಿ ಉಳಿಸಿಕೊಂಡವರ ಕಟ್ಟಡಗಳಿಗೆ ಬೀಗ ಜಡಿದು ಹೋದ ಬಿಬಿಎಂಪಿ!
ಬಿಬಿಎಂಪಿ ವ್ಯಾಪ್ತಿಯಲ್ಲಿ ಆಸ್ತಿ ತೆರಿಗೆ ಬಾಕಿ ಉಳಿಸಿಕೊಂಡಿರುವ ವಾಣಿಜ್ಯ ಮಳಿಗೆಗಳಿಗೆ ಬೀಗ ಮುದ್ರೆ ಹಾಕಲು ಕ್ರಮ ಕೈಗೊಳ್ಳಲಾಗಿದೆ. ಬಾಕಿ ತೆರಿಗೆ ಸಂಗ್ರಹಿಸಲು 8 ವಲಯಗಳಲ್ಲಿ ಬೀಗಮುದ್ರೆ ಹಾಕಿ, ಜಪ್ತಿ ಮಾರಾಟದ ಪ್ರಕ್ರಿಯೆ ಆರಂಭಿಸಲಾಗಿದೆ.
Followಬೆಂಗಳೂರು (ಜ.06): ಬಿಬಿಎಂಪಿ ವ್ಯಾಪ್ತಿಯಲ್ಲಿ ಅತಿ ಹೆಚ್ಚು ಆಸ್ತಿ ತೆರಿಗೆ ಬಾಕಿ ಉಳಿಸಿಕೊಂಡಿರುವ ವಾಣಿಜ್ಯ ಮಳಿಗೆಗಳಿಗೆ ಬೀಗ ಮುದ್ರೆ ಹಾಕಲು ಎಲ್ಲಾ ವಲಯ ಆಯುಕ್ತರಿಗೆ ಸೂಚನೆ ನೀಡಲಾಗಿದೆ ಎಂದು ಕಂದಾಯ ವಿಭಾಗದ ವಿಶೇಷ ಆಯಯುಕ್ತ ಮುನೀಶ್ ಮೌದ್ಗಿಲ್ ತಿಳಿಸಿದರು.
ಪಾಲಿಕೆಯ 8 ವಲಯಗಳಲ್ಲಿ ಅತಿ ಹೆಚ್ಚು ಬಾಕಿ ಆಸ್ತಿ ತೆರಿಗೆ ಪಾವತಿಸದ ಸುಸ್ತಿದಾರರಿಂದ ತ್ವರಿತಗತಿಯಲ್ಲಿ ಆಸ್ತಿ ತೆರಿಗೆಯನ್ನು ಸಂಗ್ರಹಿಸಬೇಕು. ಈ ಪೈಕಿ ಆಯಾ ವಲಯಗಳಲ್ಲಿ ಹೆಚ್ಚು ಬಾಕಿ ಉಳಿಸಿಕೊಂಡಿರುವ ವಾಣಿಜ್ಯ ಕಟ್ಟಡಗಳಿಗೆ ಬೀಗ ಮುದ್ರೆ ಹಾಕಿ ತ್ವರಿತಗತಿಯಲ್ಲಿ ಬಾಕಿ ಆಸ್ತಿ ತೆರಿಗೆಯನ್ನು ಸಂಗ್ರಹಿಸಲು ಕ್ರಮವಹಿಸಲಾಗುತ್ತಿದೆ. ಎಲ್ಲಾ ಪರಿಷ್ಕರಣೆ ಪ್ರಕರಣಗಳಲ್ಲಿ, ಆಸ್ತಿಗಳಿಗೆ ಬೀಗಮುದ್ರೆ, ಮುಟ್ಟುಗೋಲು ಮತ್ತು ಜಪ್ತಿ ಮಾರಾಟವನ್ನು ಬಳಸಿಕೊಂಡು ವಸೂಲಾತಿ ಮಾಡಬೇಕಿದೆ. ಈ ನಿಟ್ಟಿನಲ್ಲಿ ಪರಿಷ್ಕರಣೆಯಲ್ಲಿ ಸುಮಾರು 9000 ಆಸ್ತಿಗಳಿದ್ದು, ಅದರಿಂದ 191 ಕೋಟಿ ರೂಪಾಯಿ ಬಾಕಿ ಉಳಿಸಿಕೊಂಡಿವೆ. ಪ್ರತಿಯೊಬ್ಬರೂ ಪ್ರತಿ ಪ್ರಕರಣವನ್ನು ಪರಿಶೀಲಿಸಿ, ವಸೂಲಾತಿ ಮಾಡಬೇಕು.
ಇದನ್ನೂ ಓದಿ: ಬೆಂಗ್ಳೂರಲ್ಲಿ 400ಕ್ಕೂ ಹೆಚ್ಚು ಅಕ್ರಮ ಕಟ್ಟಡ ನೆಲಸಮಕ್ಕೆ ಬಿಬಿಎಂಪಿ ಆದೇಶ
ವಲಯವಾರು ಬೀಗ ಮುದ್ರೆ ಹಾಕಿರುವ ಮಾಹಿತಿ:
1. ಬೊಮ್ಮನಹಳ್ಳಿ ವಲಯ: ಅತಿ ಹೆಚ್ಚು ಬಾಕಿ ಇರುವ ಆಸ್ತಿಗಳನ್ನು ಪಾವತಿ ಮಾಡದಿರುವ ಟಾಪ್ 15 ಆಸ್ತಿಗಳನ್ನು ಜಪ್ತಿ ಮಾರಾಟಕ್ಕಾಗಿ ಸೀಲ್ ಮಾಡಲಾಗಿದೆ. ಜಪ್ತಿ ಮಾರಾಟದ ಪ್ರಸ್ತಾವನೆ ಸಿದ್ಧಪಡಿಸಲಾಗುತ್ತದೆ.
2. ಪೂರ್ವ ವಲಯ: ಅತಿ ಹೆಚ್ಚು ಬಾಕಿ ಇರುವ ಬಾಕಿಯನ್ನು ಪಾವತಿಸದಿದ್ದಕ್ಕಾಗಿ 77 ಕಟ್ಟಡಗಳನ್ನು ಸೀಲ್ ಮಾಡಲಾಗಿದೆ. ಜಪ್ತಿ ಮಾರಾಟಕ್ಕಾಗಿ ಅತ್ಯಧಿಕ ಬಾಕಿ ಇರುವ ಆಸ್ತಿಗಳ ಗುರುತಿಸುವಿಕೆ ಮಾಡಲಾಗುತ್ತಿದೆ.
3. ಪಶ್ಚಿಮ ವಲಯ: ಕಳೆದ ಒಂದು ವಾರದಲ್ಲಿ ಆಸ್ತಿ ತೆರಿಗೆಯ ಬಾಕಿ ಪಾವತಿ ಮಾಡದಿದ್ದಕ್ಕಾಗಿ 68 ಕಟ್ಟಡಗಳನ್ನು ಸೀಲ್ ಮಾಡಲಾಗಿದೆ. ಈ ಪೈಕಿ ಆಸ್ತಿಗಳ ಜಪ್ತಿ ಮಾರಾಟಕ್ಕಾಗಿ 3 ಅತ್ಯಧಿಕ ಡಿಫಾಲ್ಟರ್ ಬಾಕಿ ಆಸ್ತಿಗಳ ಗುರುತಿಸುವಿಕೆ ಮಾಡಲಾಗುತ್ತಿದೆ.
4. ಆರ್‌ಆರ್‌ನಗರ ವಲಯ: ಅತಿ ಹೆಚ್ಚು ಬಾಕಿ ಇರುವ ಬಾಕಿಯನ್ನು ಪಾವತಿಸದಿದ್ದಕ್ಕಾಗಿ 10 ವಸತಿಯೇತರ ಆಸ್ತಿಗಳನ್ನು ಸೀಲ್ ಮಾಡಲಾಗಿದೆ.
5. ಯಲಹಂಕ ವಲಯ: ಅತಿ ಹೆಚ್ಚು ಬಾಕಿ ಇರುವ ವಸತಿ ರಹಿತ ಆಸ್ತಿಗಳ 5 ಸೀಲ್ ಮಾಡಲಾಗಿದೆ. ಅತಿ ಹೆಚ್ಚು ಬಾಕಿ ಇರುವ ಆಸ್ತಿಗಳನ್ನು ಜಪ್ತಿ ಮಾರಾಟಕ್ಕಾಗಿ ಗುರುತಿಸಲಾಗುತ್ತಿದೆ.
6. ದಾಸರಹಳ್ಳಿ ವಲಯ: ಅತಿ ಹೆಚ್ಚು ಬಾಕಿ ಇರುವ ವಸತಿ ರಹಿತ ಆಸ್ತಿಗಳ 12 ಸೀಲ್ ಮಾಡಲಾಗಿದೆ. ಜಪ್ತಿ ಮಾರಾಟಕ್ಕಾಗಿ ಯೋಗ್ಯವಾದ ಅತಿ ಹೆಚ್ಚು ಬಾಕಿ ಇರುವ ಆಸ್ತಿಗಳನ್ನು ಗುರುತಿಸಲಾಗುತ್ತಿದೆ.
7. ಮಹದೇವಪುರ ವಲಯ: ಅತಿ ಹೆಚ್ಚು ಬಾಕಿ ಇರುವ 20 ವಸತಿಯೇತರ ಆಸ್ತಿಗಳನ್ನು ಸೀಲ್ ಮಾಡಲಾಗಿದೆ. ಅತಿ ಹೆಚ್ಚು 3 ಬಾಕಿ ಇರುವ ಆಸ್ತಿಗಳನ್ನು ಜಪ್ತಿ ಮಾರಾಟಕ್ಕಾಗಿ ಗುರುತಿಸಲಾಗುತ್ತಿದೆ
8. ದಕ್ಷಿಣ ವಲಯ: ಅತಿ ಹೆಚ್ಚು ಬಾಕಿ ಇರುವ ಬಾಕಿಯನ್ನು ಪಾವತಿಸದಿದ್ದಕ್ಕಾಗಿ 15 ವಸತಿಯೇತರ ಆಸ್ತಿಗಳನ್ನು ಸೀಲ್ ಮಾಡಲಾಗಿದೆ.
ಇದನ್ನೂ ಓದಿ: 200 ಕೋಟಿ ವೆಚ್ಚದಲ್ಲಿ ಬೆಂಗಳೂರಿಗರಿಗೆ 7.22 KM ಉದ್ದದ ಹೊಸ ರಸ್ತೆ; ನೋ ಟ್ರಾಫಿಕ್, ಫುಲ್ ಜಾಲಿ ರೈಡ್
