IPL 2020: ಆರ್ಸಿಬಿ ವರ್ಸಸ್ ಸನ್ರೈಸರ್ಸ್ ಎಲಿಮಿನೇಟರ್ ಪಂದ್ಯಕ್ಕೆ ಕ್ಷಣಗಣನೆ ಶುರು
13ನೇ ಆವೃತ್ತಿಯ ಐಪಿಎಲ್ ಟೂರ್ನಿಯ ಎಲಿಮಿನೇಟರ್ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಸನ್ರೈಸರ್ಸ್ ಹೈದರಾಬಾದ್ ತಂಡಗಳು ಅಬುಧಾಬಿಯ ಶೇಕ್ ಜಾಯೆದ್ ಮೈದಾನದಲ್ಲಿ ಮುಖಾಮುಖಿಯಾಗಲಿವೆ. ಈ ಕುರಿತಾದ ಒಂದು ರಿಪೋರ್ಟ್ ಇಲ್ಲಿದೆ ನೋಡಿ
ಅಬುಧಾಬಿ(ನ.06): ಐಪಿಎಲ್ ಫೈನಲ್ನಲ್ಲಿ ಆಡುವ ಒಂದು ತಂಡ ಯಾವುದು ಎನ್ನುವುದು ಈಗಾಗಲೇ ನಿರ್ಧಾರವಾಗಿದೆ. ಮತ್ತೊಂದು ಸ್ಥಾನಕ್ಕಾಗಿ 3 ತಂಡಗಳು ಪೈಪೋಟಿಯಲ್ಲಿವೆ. ಈ ಪೈಕಿ ಒಂದು ತಂಡದ ಕನಸು ಶುಕ್ರವಾರ ಅಂತ್ಯಗೊಳ್ಳಲಿದೆ. ಇಲ್ಲಿ ನಡೆಯಲಿರುವ ಎಲಿಮಿನೇಟರ್ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಸನ್ರೈಸರ್ಸ್ ಹೈದರಾಬಾದ್ ಮುಖಾಮುಖಿಯಾಗಲಿದ್ದು, ಸೋಲುವ ತಂಡ ಟೂರ್ನಿಯಿಂದ ಹೊರಬೀಳಲಿದೆ.
ಲೀಗ್ ಹಂತದ ಅಂತಿಮ ಘಟ್ಟದಲ್ಲಿ ಸನ್ರೈಸರ್ಸ್ ಗೆಲುವಿನ ಮೇಲೆ ಗೆಲುವು ಸಾಧಿಸಿ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿದ್ದರೆ, ಆರ್ಸಿಬಿ ಸತತ 4 ಸೋಲು ಕಂಡರೂ ಪ್ಲೇ-ಆಫ್ಗೆ ನುಸುಳುವಲ್ಲಿ ಯಶಸ್ವಿಯಾಗಿತ್ತು. ಆದರೂ ತಂಡದ ಆತ್ಮವಿಶ್ವಾಸಕ್ಕೆ ಭಾರೀ ಪೆಟ್ಟು ಬಿದ್ದಿದ್ದು, ಟೂರ್ನಿಯಲ್ಲಿ ಮುಂದೆ ಸಾಗಬೇಕಿದ್ದರೆ ಸೋಲಿನ ಕಹಿಯನ್ನು ಮರೆಯಬೇಕು ಎಂದು ನಾಯಕ ವಿರಾಟ್ ಕೊಹ್ಲಿ ಈಗಾಗಲೇ ಸಹ ಆಟಗಾರರಿಗೆ ಕರೆ ನೀಡಿದ್ದಾರೆ.
ವಾರ್ನರ್ ಹಾಗೂ ಸಾಹ ಆರಂಭಿಕರಾಗಿ ಆಡುತ್ತಿರುವುದು ಸನ್ರೈಸರ್ಸ್ ಪಾಲಿಗೆ ವರದಾನವಾಗಿದೆ. ಜೊತೆಗೆ ಸಂದೀಪ್ ಶರ್ಮಾ, ಜೇಸನ್ ಹೋಲ್ಡರ್, ರಶೀದ್ ಖಾನ್, ಟಿ.ನಟರಾಜನ್ ಹಾಗೂ ಶಾಬಾಜ್ ನದೀಂ ಭರ್ಜರಿ ಬೌಲಿಂಗ್ ಪ್ರದರ್ಶನ ತೋರುತ್ತಿದ್ದಾರೆ. ತಂಡ ಸಮತೋಲನದಿಂದ ಕೂಡಿದೆ.
ಮತ್ತೊಂದೆಡೆ ಆರ್ಸಿಬಿ ಕೊಹ್ಲಿ ಹಾಗೂ ಎಬಿ ಡಿ ವಿಲಿಯರ್ಸ್ ಮೇಲೆಯೇ ಹೆಚ್ಚು ಅವಲಂಬಿತಗೊಂಡಿದೆ. ಇಬ್ಬರಲ್ಲಿ ಒಬ್ಬರಾದರೂ ದೊಡ್ಡ ಇನ್ನಿಂಗ್ಸ್ ಆಡಿದರೆ ಮಾತ್ರ ತಂಡ ಗೆಲ್ಲುತ್ತೆ ಎನ್ನುವ ಪರಿಸ್ಥಿತಿ ಮುಂದುವರಿದಿದೆ. ದೇವದತ್ ಪಡಿಕ್ಕಲ್ ಉತ್ತಮ ಲಯದಲ್ಲಿದ್ದು, ಆಲ್ರೌಂಡರ್ ಮೋರಿಸ್ ಹಾಗೂ ಸ್ಪಿನ್ನರ್ ಚಹಲ್ ಮೇಲೆ ತಂಡ ವಿಶ್ವಾಸವಿರಿಸಿದೆ. ಗಾಯದಿಂದ ಚೇತರಿಸಿಕೊಂಡಿರುವ ವೇಗಿ ನವ್ದೀಪ್ ಸೈನಿ ಆಡುವ ಸಾಧ್ಯತೆ ಇದೆ. ಜೋಶ್ವಾ ಫಿಲಿಪಿ ಬದಲಿಗೆ ಆ್ಯರೋನ್ ಫಿಂಚ್ ಆಡುವ ಹನ್ನೊಂದರಲ್ಲಿ ಸ್ಥಾನ ಪಡೆಯುವ ನಿರೀಕ್ಷೆ ಇದೆ.
ಡೆಲ್ಲಿ ಸೋಲಿಸಿ IPL 2020 ಫೈನಲ್ ಪ್ರವೇಶಿಸಿದ ಮುಂಬೈ!
ಸನ್ರೈಸರ್ಸ್ ವಿರುದ್ಧ ಭರ್ಜರಿ ಗೆಲುವು ಸಾಧಿಸಿ ಈ ಆವೃತ್ತಿಯನ್ನು ಆರಂಭಿಸಿದ್ದ ಆರ್ಸಿಬಿ, 2ನೇ ಮುಖಾಮುಖಿಯಲ್ಲಿ ಸೋಲುಂಡಿತ್ತು. ಈ ಪಂದ್ಯದಲ್ಲಿ ಗೆದ್ದು ಚೊಚ್ಚಲ ಬಾರಿಗೆ ಕಪ್ ಗೆಲ್ಲುವ ಕನಸು ಜೀವಂತವಾಗಿರಿಸಿಕೊಳ್ಳಲು ಎದುರು ನೋಡುತ್ತಿದೆ.
ಪಿಚ್ ರಿಪೋರ್ಟ್
ಕಳೆದ 5 ಪಂದ್ಯಗಳಲ್ಲಿ ಇದು ಸರಾಸರಿ 150-160 ರನ್ ದಾಖಲಾಗಿದ್ದು, ಐದೂ ಪಂದ್ಯಗಳಲ್ಲಿ ಮೊದಲು ಫೀಲ್ಡ್ ಮಾಡಿದ ತಂಡ ಜಯಗಳಿಸಿದೆ. ಹೀಗಾಗಿ ಟಾಸ್ ನಿರ್ಣಾಯಕವಾಗಲಿದೆ. ಮೊದಲು ಬ್ಯಾಟ್ ಮಾಡುವ ತಂಡ 190ಕ್ಕಿಂತ ಹೆಚ್ಚು ಮೊತ್ತ ಗಳಿಸಬೇಕಿದರೆ ರಕ್ಷಿಸಿಕೊಳ್ಳಬಹುದಾದ ಸಾಧ್ಯತೆ ಹೆಚ್ಚು.
ಸಂಭಾವನೀಯ ಆಟಗಾರರ ಪಟ್ಟಿ
ಆರ್ಸಿಬಿ: ಫಿಲಿಪಿ/ಫಿಂಚ್, ಪಡಿಕ್ಕಲ್, ಕೊಹ್ಲಿ(ನಾಯಕ), ವಿಲಿಯರ್ಸ್, ಮೋರಿಸ್, ವಾಷಿಂಗ್ಟನ್, ದುಬೆ, ಉಡಾನ, ಸೈನಿ, ಸಿರಾಜ್, ಚಹಲ್.
ಸನ್ರೈಸರ್ಸ್: ವಾರ್ನರ್(ನಾಯಕ), ಸಾಹ, ಪಾಂಡೆ, ವಿಲಿಯಮ್ಸನ್, ಗರ್ಗ್, ಹೋಲ್ಡರ್, ಸಮದ್, ರಶೀದ್, ನದೀಂ, ಸಂದೀಪ್, ನಟರಾಜನ್.
ಸ್ಥಳ: ಅಬುಧಾಬಿ
ಪಂದ್ಯ: ಸಂಜೆ 7.30ಕ್ಕೆ
ನೇರ ಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್