ವಿಮಾನ ಅಪಘಾತಗಳಲ್ಲಿ ಪ್ರಯಾಣಿಕರ ಸುರಕ್ಷತೆಗೆ ಪ್ಯಾರಾಚೂಟ್ಗಳು ಪರಿಹಾರವೇ? ತೂಕ, ಸ್ಥಳಾವಕಾಶ, ತರಬೇತಿ ಮತ್ತು ಸಮಯದ ಕೊರತೆಯಂತಹ ಅಂಶಗಳನ್ನು ಪರಿಗಣಿಸಿ ತಜ್ಞರು ಈ ಪ್ರಶ್ನೆಗೆ ಉತ್ತರಿಸುತ್ತಾರೆ.
ಗುಜರಾತ್ನ ಅಹಮದಾಬಾದ್ನಲ್ಲಿ ಇತ್ತೀಚೆಗೆ ನಡೆದ ಏರ್ ಇಂಡಿಯಾ ವಿಮಾನ ಅಪಘಾತದಲ್ಲಿ 241 ಪ್ರಯಾಣಿಕರು ಸಾವನ್ನಪ್ಪಿದ ಘಟನೆ ದೇಶವನ್ನೇ ಬೆಚ್ಚಿಬಿಳಿಸಿದೆ. ಈ ದುರಂತವು ವಿಮಾನ ಸುರಕ್ಷತೆಯ ಬಗ್ಗೆ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ, ವಿಶೇಷವಾಗಿ, ಪ್ರತಿಯೊಬ್ಬ ಪ್ರಯಾಣಿಕರಿಗೂ ಪ್ಯಾರಾಚೂಟ್ ಏಕೆ ಒದಗಿಸಲಾಗುವುದಿಲ್ಲ? ಎಂಬ ಪ್ರಶ್ನೆ ಜನರ ಮನಸ್ಸಿನಲ್ಲಿ ಮೂಡಿದೆ. ಈ ಪ್ರಶ್ನೆಗೆ ಉತ್ತರವನ್ನು ವಿಮಾನಯಾನ ತಜ್ಞರ ವಿವರಣೆಯ ಆಧಾರದಲ್ಲಿ ತಿಳಿಯೋಣ.
ತೂಕ ಮತ್ತು ಸ್ಥಳಾವಕಾಶದ ಸಮಸ್ಯೆ:
ಪ್ಯಾರಾಚೂಟ್ಗಳನ್ನು ವಿಮಾನದಲ್ಲಿ ಒದಗಿಸುವುದು ಸುಲಭವಲ್ಲ. ಒಂದು ವಿಮಾನದಲ್ಲಿ ನೂರಾರು ಪ್ರಯಾಣಿಕರಿಗೆ ಪ್ಯಾರಾಚೂಟ್ಗಳು, ಹೆಲ್ಮೆಟ್ಗಳು, ಕನ್ನಡಕಗಳು ಮತ್ತು ಇತರ ಉಪಕರಣಗಳನ್ನು ಇಡಬೇಕಾದರೆ, ಇದು ವಿಮಾನದ ಒಟ್ಟು ತೂಕವನ್ನು 3,500 ರಿಂದ 3,600 ಕೆ.ಜಿ.ವರೆಗೆ ಹೆಚ್ಚಿಸುತ್ತದೆ. ಇದರಿಂದ ಇಂಧನದ ದಕ್ಷತೆ ಕಡಿಮೆಯಾಗುತ್ತದೆ ಮತ್ತು ವಿಮಾನದ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರುತ್ತದೆ. ಜೊತೆಗೆ, ಈ ಉಪಕರಣಗಳನ್ನು ಶೇಖರಿಸಲು ಸಾಕಷ್ಟು ಸ್ಥಳಾವಕಾಶ ಬೇಕಾಗುತ್ತದೆ, ಇದು ವಿಮಾನದ ವಿನ್ಯಾಸದಲ್ಲಿ ಸವಾಲಾಗುತ್ತದೆ.
Related Articles
ವಿಮಾನದ ಎತ್ತರದ ಸಮಸ್ಯೆ:
ವಾಣಿಜ್ಯ ವಿಮಾನಗಳು ಸಾಮಾನ್ಯವಾಗಿ 30,000 ರಿಂದ 35,000 ಅಡಿ ಎತ್ತರದಲ್ಲಿ ಹಾರುತ್ತವೆ, ಆದರೆ ಪ್ಯಾರಾಚೂಟ್ಗಳನ್ನು ಸಾಮಾನ್ಯವಾಗಿ 10,000 ರಿಂದ 15,000 ಅಡಿ ಎತ್ತರದಿಂದ ಬಳಸಲಾಗುತ್ತದೆ.
ವಿಮಾನ ಎತ್ತರದಲ್ಲಿ ಹಾರುತ್ತಿರುವಾಗ ಅಲ್ಲಿನ ಗಾಳಿಯ ಒತ್ತಡ ತುಂಬಾ ಕಡಿಮೆ ಇರುವುದರಿಂದ, ಆಮ್ಲಜನಕದ ಕೊರತೆಯಿಂದಾಗಿ ಪ್ರಯಾಣಿಕರ ಜೀವಕ್ಕೆ ಅಪಾಯವಾಗಬಹುದು. ಇದರ ಜೊತೆಗೆ, ಈ ಎತ್ತರದಲ್ಲಿ ತಾಪಮಾನವು -50°C ವರೆಗೆ ಇಳಿಯಬಹುದು, ಇದು ಮಾನವ ದೇಹಕ್ಕೆ ತಡೆದುಕೊಳ್ಳಲು ಕಷ್ಟಕರವಾಗಿದೆ.
ತರಬೇತಿಯ ಅಗತ್ಯತೆ:
ಪ್ಯಾರಾಚೂಟ್ ಬಳಸಲು ವಿಶೇಷ ತರಬೇತಿ ಅಗತ್ಯವಿದೆ. ಸಾಮಾನ್ಯ ಪ್ರಯಾಣಿಕರಿಗೆ ಈ ತರಬೇತಿ ಇರುವುದಿಲ್ಲ. ತಪ್ಪಾಗಿ ಪ್ಯಾರಾಚೂಟ್ ಬಳಸಿದರೆ, ಜಿಗಿಯುವಾಗ ಗಾಯಗಳಾಗಬಹುದು ಅಥವಾ ಇತರ ಪ್ರಯಾಣಿಕರಿಗೆ ಅಪಾಯವಾಗಬಹುದು. ಒಂದು ವೇಳೆ ತರಬೇತಿಯಿಲ್ಲದ ಪ್ರಯಾಣಿಕರು ಪ್ಯಾರಾಚೂಟ್ ಬಳಸಿದರೆ, ಸಣ್ಣ ತಪ್ಪು ಕೂಡ ದೊಡ್ಡ ಅಪಘಾತಕ್ಕೆ ಕಾರಣವಾಗಬಹುದು.
ಸಮಯದ ಕೊರತೆ:
ವಿಮಾನ ಅಪಘಾತದ ಸಂದರ್ಭದಲ್ಲಿ, ಪ್ರಯಾಣಿಕರಿಗೆ ತಪ್ಪಿಸಿಕೊಳ್ಳಲು ಕೆಲವೇ ಕ್ಷಣಗಳು ಲಭ್ಯವಿರುತ್ತವೆ. ಈ ಕಡಿಮೆ ಸಮಯದಲ್ಲಿ, ಪ್ಯಾರಾಚೂಟ್ ಧರಿಸಿ, ಸರಿಯಾಗಿ ಜಿಗಿಯಲು ಸಿದ್ಧವಾಗುವುದು ಅಸಾಧ್ಯವಾದದ್ದು. ಜೊತೆಗೆ, ವಿಮಾನದ ಬಾಗಿಲು ತೆರೆಯುವುದು, ಒತ್ತಡದ ಸಮತೋಲನವನ್ನು ಕಾಯ್ದುಕೊಳ್ಳುವುದು ಮತ್ತು ಎಲ್ಲರಿಗೂ ಸರಿಯಾದ ಸಮಯದಲ್ಲಿ ಜಿಗಿಯಲು ಅವಕಾಶ ಕೊಡುವುದು ಕಾರ್ಯತಃ ಸಾಧ್ಯವಿಲ್ಲ.
ಒಟ್ಟಾರೆ ಪ್ಯಾರಾಚೂಟ್ಗಳು ಕೆಲವು ಸಂದರ್ಭಗಳಲ್ಲಿ ಜೀವ ಉಳಿಸಬಹುದು ಎಂಬುದು ಸತ್ಯವಾದರೂ, ವಾಣಿಜ್ಯ ವಿಮಾನಗಳಲ್ಲಿ ಇವುಗಳನ್ನು ಒದಗಿಸುವುದು ತಾಂತ್ರಿಕವಾಗಿ, ಆರ್ಥಿಕವಾಗಿ ಮತ್ತು ವ್ಯವಹಾರಿಕವಾಗಿ ಸಾಧ್ಯವಿಲ್ಲ. ಬದಲಾಗಿ, ವಿಮಾನಯಾನ ಉದ್ಯಮವು ಸುರಕ್ಷತಾ ವ್ಯವಸ್ಥೆಗಳಾದ ಉತ್ತಮ ವಿಮಾನ ತಂತ್ರಜ್ಞಾನ, ತುರ್ತು ಭೂಸ್ಪರ್ಶ ವ್ಯವಸ್ಥೆಗಳು, ಮತ್ತು ಕಟ್ಟುನಿಟ್ಟಾದ ನಿರ್ವಹಣಾ ಪರಿಶೀಲನೆಯ ಮೂಲಕ ಪ್ರಯಾಣಿಕರ ಸುರಕ್ಷತೆಯನ್ನು ಖಾತ್ರಿಪಡಿಸುತ್ತದೆ.
ಅಹಮದಾಬಾದ್ ದುರಂತವು ವಿಮಾನಯಾನ ಸುರಕ್ಷತೆಯನ್ನು ಮತ್ತಷ್ಟು ಸುಧಾರಿಸಲು ಒತ್ತು ನೀಡಿದೆ, ಆದರೆ ಪ್ಯಾರಾಚೂಟ್ಗಳು ಈ ಸಮಸ್ಯೆಗೆ ಪರಿಹಾರವಲ್ಲ ಎಂಬುದು ತಜ್ಞರ ಅಭಿಪ್ರಾಯವಾಗಿದೆ.