ಶೇ. 100ರಷ್ಟು ಲಸಿಕೆ ಪಡೆದ ದೇಶದ ಮೊದಲ ಹಳ್ಳಿ, ಕಣಿವೆ ನಾಡಿನ ವೆಯಾನ್!
* ಜಮ್ಮು-ಕಾಶ್ಮೀರದ ಬಂಡಿಪೊರಾ ಜಿಲ್ಲೆಯ ಸಣ್ಣ ಕುಗ್ರಾಮ
* ಜಮ್ಮು-ಕಾಶ್ಮೀರದ ವೆಯಾನ್ ಕುಗ್ರಾಮ ಶೇ.100 ಲಸಿಕೆ ಪಡೆದ ದೇಶದ ಮೊದಲ ಹಳ್ಳಿ
* ಶೇ.100ರಷ್ಟುಲಸಿಕೆ ಪಡೆದ ದೇಶದ ಮೊದಲ ಗ್ರಾಮ ಎಂಬ ಖ್ಯಾತಿ
ಶ್ರೀನಗರ(ಜೂ.09): ಜಮ್ಮು-ಕಾಶ್ಮೀರದ ಬಂಡಿಪೊರಾ ಜಿಲ್ಲೆಯ ಸಣ್ಣ ಕುಗ್ರಾಮವೊಂದರಲ್ಲಿ ವಯಸ್ಕರಾದ ಎಲ್ಲರಿಗೂ ಕೋವಿಡ್ ಲಸಿಕೆ ನೀಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇದರೊಂದಿಗೆ 362 ಮಂದಿ ಇರುವ ವೆಯಾನ್ ಎಂಬ ಈ ಕುಗ್ರಾಮವು ಶೇ.100ರಷ್ಟು ಲಸಿಕೆ ಪಡೆದ ದೇಶದ ಮೊದಲ ಗ್ರಾಮ ಎಂಬ ಖ್ಯಾತಿಗೆ ಭಾಜನವಾಗಿದೆ.
ಬಂಡಿಪೊರಾ ಜಿಲ್ಲಾ ಕೇಂದ್ರದಿಂದ 28 ಕಿ.ಮೀ ದೂರದಲ್ಲಿರುವ ಈ ಗ್ರಾಮಸ್ಥರು ನಗರಕ್ಕೆ ತೆರಳಬೇಕಾದರೆ ವಾಹನಗಳ ಸೌಕರ್ಯವಿಲ್ಲದ ಕಾರಣ ಕನಿಷ್ಠ 18 ಕಿ.ಮೀ ನಡೆದೇ ಹೋಗಬೇಕು. ಜೊತೆಗೆ ಈ ಗ್ರಾಮದಲ್ಲಿ ನೆಲೆಸಿರುವವರೆಲ್ಲರೂ ಅಲೆಮಾರಿಗಳಾದ ಕಾರಣ ತಮಗೆ ಅಗತ್ಯವಿರುವ ವಸ್ತುಗಳನ್ನು ತರಲು ದೂರದ ಪ್ರದೇಶಗಳಿಗೆ ನಡೆದುಕೊಂಡೇ ಹೋಗಿರುತ್ತಿದ್ದರು. ಜೊತೆಗೆ ಗ್ರಾಮದಲ್ಲಿ ಇಂಟರ್ನೆಟ್ ಸೇವೆ ಇಲ್ಲದ ಕಾರಣ ಲಸಿಕೆಗೆ ಸ್ಲಾಟ್ ಬುಕ್ ಮಾಡುವುದು ಸಹ ದುಸ್ತರವಾಗಿತ್ತು.
ಈ ಹಿನ್ನೆಲೆಯಲ್ಲಿ ಈ ಗ್ರಾಮಸ್ಥರಿಗೆ ಲಸಿಕೆ ನೀಡುವುದು ಆರೋಗ್ಯ ಸಿಬ್ಬಂದಿಗೆ ಒಂದು ದೊಡ್ಡ ಸವಾಲಾಗಿ ಪರಿಣಮಿಸಿತ್ತು. ಆದಾಗ್ಯೂ, ಆರೋಗ್ಯ ಸಿಬ್ಬಂದಿಯ ಪರಿಶ್ರಮದಿಂದಾಗಿ ಈ ಗ್ರಾಮ ಇದೀಗ ಶೇ.100 ಲಸಿಕೆ ಪಡೆದ ಗ್ರಾಮವಾಗಿದೆ ಎಂದು ಅಧಿಕಾರಿಯೊಬ್ಬರು ಹೇಳಿದರು.