* ರಿಯಲ್ ಎಸ್ಟೇಟ್ ಕಂಪನಿಯಲ್ಲಿ 4 ದಿನದಿಂದ ಪರಿಶೀಲನೆ, 24 ಲಾಕರ್ ವಶ* 1 ಕೋಟಿ ನಗದು ಅಧಿಕಾರಿಗಳಿಂದ ಜಪ್ತಿ* ಐಟಿ ದಾಳಿ: ಗುಜರಾತ್ ಕಂಪನಿ 500 ಕೋಟಿ ರು. ಅಕ್ರಮ ಪತ್ತೆ
ನವದೆಹಲಿ(ಅ.02): ಗುಜರಾತಿನ(Gujarat) ರಿಯಲ್ ಎಸ್ಟೇಟ್ ಕಂಪನಿಯೊಂದರ(Real Estate company) ಮೇಲೆ ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ದಾಳಿ(IT Raid) ನಡೆಸಿದ್ದು, ಈ ವೇಳೆ 500 ಕೋಟಿ ರು.ಗೂ ಅಧಿಕ ದಾಖಲೆರಹಿತ ವಹಿವಾಟು ಪತ್ತೆಯಾಗಿದೆ.
ಅಹಮದಾಬಾದ್ ಮೂಲದ ರಿಯಲ್ ಎಸ್ಟೇಟ್ ಕಂಪನಿ ಹಾಗೂ ಅದಕ್ಕೆ ಸಂಬಂಧಿಸಿದ ಬ್ರೋಕರ್ಗಳ ಮೇಲೆ ಸೆ.28ರಂದು ತೆರಿಗೆ ಇಲಾಖೆ ದಾಳಿ ನಡೆಸಿತ್ತು. ಕಂಪನಿಯ 22 ಸ್ಥಳಗಳಲ್ಲಿ ಪರಿಶೀಲನೆ ಇನ್ನೂ ಮುಂದುವರಿದಿದೆ. ಈ ವೇಳೆ, ಕಂಪನಿಯ ಬಳಿ 200 ಕೋಟಿ ರು. ಅಧಿಕ ಅಕ್ರಮ ವಹಿವಾಟು ಬೆಳಕಿಗೆ ಬಂದಿದ್ದರೆ, ಬ್ರೋಕರ್ಗಳ ಬಳಿಯ ದಾಖಲೆಗಳ ಪರಿಶೀಲನೆ ವೇಳೆ 200 ಕೋಟಿ ರು. ದಾಖಲೆರಹಿತ ವಹಿವಾಟು ಪತ್ತೆಯಾಗಿದೆ ಎಂದು ತೆರಿಗೆ ಇಲಾಖೆ(IT Department) ಹೇಳಿಕೆಯಲ್ಲಿ ತಿಳಿಸಿದೆ.
ಇದೇ ವೇಳೆ 1 ಕೋಟಿ ರು. ನಗದು, 98 ಲಕ್ಷ ರು. ಮೌಲ್ಯದ ಚಿನ್ನಾಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ. 24 ಲಾಕರ್ಗಳ ಬಳಕೆಯನ್ನು ನಿರ್ಬಂಧಿಸಲಾಗಿದೆ. ಈ ಕಂಪನಿ ಆಸ್ತಿಯನ್ನು ಬೇನಾಮಿ ವ್ಯಕ್ತಿಗಳ ಹೆಸರಿನಲ್ಲಿ ಖರೀದಿಸಿರುವುದು ಪತ್ತೆಯಾಗಿದೆ.
ಅಕ್ರಮಕ್ಕೆ ಸಂಬಂಧಿಸಿದ ದಾಖಲೆಗಳು, ಬಿಡಿ ಹಾಳೆಗಳು, ಡಿಜಿಟಲ್ ಸಾಕ್ಷ್ಯಗಳನ್ನು ರಿಯಲ್ ಎಸ್ಟೇಟ್ ಕಂಪನಿಯಿಂದ ವಶಪಡಿಸಿಕೊಳ್ಳಲಾಗಿದೆ. ಹಲವಾರು ಹಣಕಾಸು ವರ್ಷಗಳಲ್ಲಿ ಈ ಕಂಪನಿ ಅಕ್ರಮ ವಹಿವಾಟು ನಡೆಸಿರುವ ಮಾಹಿತಿಯನ್ನು ಈ ದಾಖಲೆಗಳು ಹೊಂದಿವೆ ಎಂದು ತೆರಿಗೆ ಇಲಾಖೆ ತಿಳಿಸಿದೆ.
