ಬಾಲಕನೋರ್ವ ಹಠಾತ್ ನಾಪತ್ತೆಯಾಗಿದ್ದು, ಆತನನ್ನು ಹುಡುಕಲು ಆತನ ಜೊತೆ ಆಟವಾಡುತ್ತಿದ್ದ ನಾಯಿಯೊಂದು ಸಹಾಯ ಮಾಡಿದ ಮನಕಲುಕುವ ಘಟನೆ ಕೇಂದ್ರಾಡಳಿತ ಪ್ರದೇಶ ದಮನ್ನಲ್ಲಿ ನಡೆದಿದೆ.
ತನ್ನೊಂದಿಗೆ ಆಟವಾಡುತ್ತಿದ್ದ ಆದರೆ ಕಾಣೆಯಾಗಿದ್ದ ಬಾಲಕನನ್ನು ಪತ್ತೆ ಮಾಡಲು ಬೀದಿನಾಯಿಯೊಂದು ಪೊಲೀಸರಿಗೆ ಸಹಾಯ ಮಾಡಿದ ಘಟನೆ ಕೇಂದ್ರಾಡಳಿತ ಪ್ರದೇಶವಾದ ದಾದ್ರಾ-ನಗರ ಹವೇಲಿಯಲ್ಲಿ ನಡೆದಿದೆ. ಬಾಲಕ ಮಂಗಳವಾರದಿಂದ ನಾಪತ್ತೆಯಾಗಿದ್ದ. ಸಂಜೆ ಆಟವಾಡಲು ಹೋದ ಒಂಬತ್ತು ವರ್ಷದ ಬಾಲಕ ಹಿಂತಿರುಗದ ಕಾರಣ ಬಾಲಕನ ತಂದೆ ಪೊಲೀಸರಿಗೆ ದೂರು ನಿಡಿದ್ದರು. ನಂತರ ಪೊಲೀಸರು ಬಾಲನಿಗಾಗಿ ಹುಡುಕಾಟ ನಡೆಸಿದಾಗ 60 ಮೀಟರ್ ದೂರದಲ್ಲಿ ಮರಳ ದಿಬ್ಬದಲ್ಲಿ ಹೂತು ಹಾಕಿದ ಸ್ಥಿತಿಯಲ್ಲಿ ಬಾಲಕನ ಶವ ಪತ್ತೆಯಾಗಿದೆ.
ಮಂಗಳವಾರ ಮಗು ಕಾಣೆಯಾದ ದೂರು ಬಂದ ತಕ್ಷಣ ಪೊಲೀಸರು ಪ್ರದೇಶದ ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸಿದರು. ಈ ವೇಳೆ ಮಗು ಬೀದಿ ನಾಯಿಯೊಂದಿಗೆ ಆಡುತ್ತಿರುವ ದೃಶ್ಯಗಳು ಲಭ್ಯವಾಗಿವೆ. ಇದರ ಬಗ್ಗೆ ವಿಚಾರಿಸಿದಾಗ ನಾಯಿ ಆ ಪ್ರದೇಶದಲ್ಲಿದ್ದು, ಮಗು ಅದರೊಂದಿಗೆ ಆಟವಾಡುತ್ತಿತ್ತು ಮತ್ತು ಮಗು ನಾಯಿಗೆ ಆಹಾರ ನೀಡುತ್ತಿತ್ತು ಎಂದು ಸ್ಥಳೀಯರು ತಿಳಿಸಿದ್ದಾರೆ. ನಂತರ ಪೊಲೀಸರು ನಾಯಿಗಾಗಿ ಹುಡುಕಾಟ ನಡೆಸಿದರು. ನಾಯಿಯನ್ನು ನೋಡಿದಾಗ ಮಗು ಸತ್ತ ಸ್ಥಿತಿಯಲ್ಲಿ ಪತ್ತೆಯಾದ ಮಣ್ಣಿನ ದಿಬ್ಬದ ಮೇಲೆ ನಾಯಿ ಮಣ್ಣನ್ನು ಅಗೆಯುತ್ತಿತ್ತು. 15 ಅಡಿ ಎತ್ತರದ ಮರಳ ದಿಬ್ಬದಲ್ಲಿ ನಾಯಿಯನ್ನು ಅಸಹಜವಾಗಿ ಕಂಡ ಪೊಲೀಸರು ಮರಳು ತೆಗೆದು ಪರಿಶೀಲಿಸಿದಾಗ ಮರಳಿನ ದಿಬ್ಬದಲ್ಲಿ ಮಗು ಪತ್ತೆಯಾಯಿತು ಎಂದು ತಿಳಿದು ಬಂದಿದೆ.
ಹನುಮಾನ್ ಚಾಲೀಸಾಗೆ ಈ ಶ್ವಾನ ಹೇಗೆ ಪ್ರತಿಕ್ರಿಯಿಸುತ್ತಿದೆ ನೋಡಿ: ವೀಡಿಯೋ ಸಖತ್ ವೈರಲ್
'ನನ್ನ ಮಗ ಮತ್ತು ನಾಯಿ ಸ್ನೇಹಿತರಾಗಿದ್ದರು. ಪೊಲೀಸರು ಮತ್ತು ಗ್ರಾಮಸ್ಥರು ನನ್ನ ಮಗನನ್ನು ಹಲವು ಕಡೆಗಳಲ್ಲಿ ಹುಡುಕುತ್ತಿರುವಾಗ ನಾಯಿ ತನ್ನ ಕರ್ತವ್ಯವನ್ನು ನಿರ್ವಹಿಸುತ್ತಿತ್ತು. ಅವರಿಬ್ಬರೂ ಈವರೆಗೆ ಆ ಮಣ್ಣಿನ ದಿಬ್ಬದ ಬಳಿ ಹೋಗಿರಲಿಲ್ಲ. ಅದನ್ನು ಮುಳ್ಳುಬೇಲಿಯಿಂದ ಮುಚ್ಚಲಾಗಿತ್ತು. ನಾಯಿ ಮಣ್ಣನ್ನು ಅಗೆಯುವುದನ್ನು ನೋಡಿ ಅನುಮಾನ ಬಂದು ಅಲ್ಲಿ ಹುಡುಕಿದೆವು ಎಂದು ಮಗುವಿನ ತಂದೆ ಹೇಳಿದ್ದಾರೆ. ಮರಣೋತ್ತರ ಪರೀಕ್ಷೆಯ ನಂತರ ಆಂತರಿಕ ಅಂಗಗಳನ್ನು ಪರೀಕ್ಷೆಗೆ ಕಳುಹಿಸಲಾಗಿದೆ. ಸದ್ಯಕ್ಕೆ ಸಾವಿಗೆ ನಿಖರ ಕಾರಣ ತಿಳಿದುಬಂದಿಲ್ಲ, ಮರಣೋತ್ತರ ಪರೀಕ್ಷೆಯ ವರದಿ ಬಂದ ನಂತರವಷ್ಟೇ ಸಾವಿಗೆ ಕಾರಣ ತಿಳಿಯಲಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
