Rashtriya Bal Puraskar 2023: ಬೆಂಗಳೂರಿನ ರಿಷಿಗೆ ಬಾಲ ಪುರಸ್ಕಾರ ಗರಿ!
2023ನೇ ಸಾಲಿನ ಪ್ರಧಾನ ಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರಕ್ಕೆ ಬೆಂಗಳೂರಿನ ಬಾಲಕ ರಿಷಿ ಶಿವಪ್ರಸನ್ನ (8) ಭಾಜನರಾಗಿದ್ದಾರೆ. ಬಾಲಕನ ಐಕ್ಯೂ(ಬುದ್ಧಿಮತ್ತೆ) ಪ್ರಖ್ಯಾತ ವಿಜ್ಞಾನಿಗಳಾದ ಆಲ್ಬರ್ಚ್ ಐನ್ಸ್ಟೀನ್, ಸ್ಟೀಫನ್ ಹಾಕಿನ್ಸ್ ಅವರಿಗಿಂತ ಅಧಿಕವಾಗಿದೆ!
ನವದೆಹಲಿ (ಜ.24): 2023ನೇ ಸಾಲಿನ ಪ್ರಧಾನ ಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರಕ್ಕೆ ಬೆಂಗಳೂರಿನ ಬಾಲಕ ರಿಷಿ ಶಿವಪ್ರಸನ್ನ (8) ಭಾಜನರಾಗಿದ್ದಾರೆ.
ಸೋಮವಾರ ದೆಹಲಿಯ ವಿಜ್ಞಾನ ಭವನದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ರಾಷ್ಟ್ರಪತಿ ದ್ರೌಪದಿ ಮುರ್ಮು(President draupadi murmu) ಅವರು 6 ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ 11 ಮಕ್ಕಳಿಗೆ ಗೌರವ ಪ್ರದಾನ ಮಾಡಿದರು. ಈ ಪೈಕಿ ಸೃಜನಶೀಲತೆ ವಿಭಾಗದಲ್ಲಿ ರಿಷಿ ಈ ಪುರಸ್ಕಾರಕ್ಕೆ ಭಾಜನರಾಗಿದ್ದಾರೆ.
ಬಾಲ ಪುರಸ್ಕಾರ(Bala puraskar) ಪಡೆದ ಮಕ್ಕಳಿಗೆ ಪ್ರಶಸ್ತಿ ಪತ್ರ, ಮೆಡಲ್ ಮತ್ತು 1 ಲಕ್ಷ ರು. ನಗದು ಬಹುಮಾನ ವಿತರಿಸಲಾಗುತ್ತದೆ. ಈ ಬಾರಿ 6 ಬಾಲಕರು ಮತ್ತು 5 ಬಾಲಕಿಯರು ಪ್ರಶಸ್ತಿ ಪಡೆದುಕೊಂಡಿದ್ದಾರೆ. ಅಸಾಧಾರಣ ಸಾಧನೆಗಳನ್ನು ಮಾಡಿದ 5ರಿಂದ 18 ವರ್ಷದ ಮಕ್ಕಳಿಗೆ ಈ ಪ್ರಶಸ್ತಿಯನ್ನು ನೀಡಲಾಗುತ್ತದೆ.
ಮೋಟಾರ್ ಸ್ಪೋರ್ಟ್ನಲ್ಲೇ ಮೊದಲು; ಬೆಂಗಳೂರಿನ ಯಶ್ಗೆ ಪ್ರಧಾನ ಮಂತ್ರಿ ಬಾಲ ಪುರಸ್ಕಾರ
ಬಾಲ ಪುರಸ್ಕಾರಕ್ಕೆ ಭಾಜನರಾದ ಮಕ್ಕಳ ಜೊತೆ ಪ್ರಧಾನಿ ನರೇಂದ್ರ ಮೋದಿ(Narendra Modi) ಮತ್ತು ಸಚಿವೆ ಸ್ಮೃತಿ ಇರಾನಿ(Smriti Irani) ಮಂಗಳವಾರ ಸಂವಾದ ನಡೆಸಲಿದ್ದಾರೆ.
‘ರಿಷಿ 3 ವರ್ಷದವನಿದ್ದಾಗಲೇ, ಸೌರವ್ಯೂಹದ ಬಗ್ಗೆ ವಿವರಿಸುತ್ತಿದ್ದ, ಆತನ ಬುದ್ಧಿವಂತಿಕೆಯನ್ನು ನೋಡಿ ನಾವು ಆಶ್ಚರ್ಯಗೊಂಡಿದ್ದೆವು. 2019ರಲ್ಲಿ 5 ವರ್ಷದವನಿದ್ದಾಗಲೇ ಐಕ್ಯೂಗಾಗಿ ಇಂಡಿಯಾ ಬುಕ್ ಆಫ್ ರೆಕಾರ್ಡ್ನಿಂದ ಪ್ರಶಸ್ತಿಗೆ ಪಾತ್ರನಾಗಿದ್ದ’ ಎಂದು ರಿಷಿಯ ತಾಯಿ ರಾಜೇಶ್ವರಿ ಹೇಳಿದ್ದಾರೆ.
ಮೂಲತಃ ಮೈಸೂರು ಜಿಲ್ಲೆಯ ನಂಜನಗೂಡಿನವರಾದ ರಿಷಿಯ ಪೋಷಕರು ಸದ್ಯ ಬೆಂಗಳೂರಿನಲ್ಲಿ ನೆಲೆಸಿದ್ದಾರೆ. ಕಿರಿಯ ಆ್ಯಪ್ ಡೆವೆಲಪರ್ ಮತ್ತು ಬರಹಗಾರ ಎಂದು ಹೆಸರು ಪಡೆದುಕೊಂಡಿರುವ ರಿಷಿ, ಮಕ್ಕಳಿಗೋಸ್ಕರ 2 ಪುಸ್ತಕಗಳನ್ನು ಬರೆದಿದ್ದಾರೆ. ‘ಎಲಿಮೆಂಟ್ಸ್ ಆಫ್ ಅತ್ರ್’ ಹಾಗೂ ‘ಲರ್ನ್ ವಿಟಮಿನ್ಸ್ ವಿತ್ ಹ್ಯಾರಿ ಪಾಟರ್’ ಎಂಬುವೇ ಆ ಪುಸ್ತಕಗಳು.
ರಿಷಿ ಶಿವಪ್ರಸನ್ನ ‘ಐಕ್ಯೂ’ ಐನ್ಸ್ಟೀನ್ಗಿಂತ ಅಧಿಕ!
‘ಪ್ರಧಾನ ಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರ ಪ್ರಶಸ್ತಿಗೆ ಭಾಜನವಾಗಿರುವ ಪುತ್ರ ರಿಷಿ ಶಿವಪ್ರಸನ್ನ(Rishi shivaprasanna) ಐಕ್ಯೂ(ಬುದ್ಧಿಮತ್ತೆ) ಪ್ರಖ್ಯಾತ ವಿಜ್ಞಾನಿಗಳಾದ ಆಲ್ಬರ್ಚ್ ಐನ್ಸ್ಟೀನ್, ಸ್ಟೀಫನ್ ಹಾಕಿನ್ಸ್ ಅವರಿಗಿಂತ ಅಧಿಕವಾಗಿದೆ’ ಎಂದು ತಂದೆ ಪ್ರೊ.ಪ್ರಸನ್ನ ಕುಮಾರ್ ತಿಳಿಸಿದ್ದಾರೆ.
ಪ್ರಶಸ್ತಿ ಸ್ವೀಕರಿಸಲು ಪುತ್ರನೊಂದಿಗೆ ದೆಹಲಿಗೆ ತೆರಳಿರುವ ಅವರು ‘ಕನ್ನಡಪ್ರಭ’ದೊಂದಿಗೆ ಮಾತನಾಡಿ, ರಿಷಿ ಚಿಕ್ಕವನಿದ್ದಾಗಲೇ ಅವನ ‘ಐಕ್ಯೂ ಹೆಚ್ಚಾಗಿದೆ, ಪರೀಕ್ಷೆ ಮಾಡಿಸಿ’ ಎಂದು ಶಿಕ್ಷಕಿ ಸರಿತಾ ಅವರು ತಿಳಿಸಿದ್ದರು. ಆಗ ಪರೀಕ್ಷಿಸಿದಾಗ 180ಕ್ಕೂ ಹೆಚ್ಚು ಐಕ್ಯೂ ಇರುವುದು ಬೆಳಕಿಗೆ ಬಂತು. ಇದು ಪ್ರಖ್ಯಾತ ವಿಜ್ಞಾನಿಗಳಾದ ಆಲ್ಬರ್ಚ್ ಐನ್ಸ್ಟೀನ್, ಸ್ಟೀಫನ್ ಹಾಕಿನ್ಸ್ ಅವರಿಗಿಂತ ಅಧಿಕವಾಗಿದೆ ಎಂದು ತಿಳಿಸಿದರು.
ನಾಗರಬಾವಿಯ ಆರ್ಕಿಡ್ ಸ್ಕೂಲ್(Orchid School, Nagarbavi)ನಲ್ಲಿ ಎಲ್ಕೆಜಿಗೆ ಸೇರ್ಪಡೆಯಾದಾಗಲೇ ರಿಷಿಯ ಪ್ರತಿಭೆಯನ್ನು ಅಲ್ಲಿನ ಶಿಕ್ಷಕಿ ಗುರುತಿಸಿದರು. ಬಳಿಕ ಬನಶಂಕರಿಯ ವಿದ್ಯಾಶಿಲ್ಪ ಶಾಲೆಗೆ ರಿಷಿಯನ್ನು ಸೇರಿಸಿದ್ದು ಇದೀಗ ಮೂರನೇ ತರಗತಿ ಅಭ್ಯಾಸ ಮಾಡುತ್ತಿದ್ದಾನೆ. ಮೂರೂವರೆ ವರ್ಷದವನಿದ್ದಾಗಲೇ ರಿಷಿಯಲ್ಲಿನ ಪ್ರತಿಭೆ ಬೆಳಕಿಗೆ ಬಂದಿತ್ತು. ಇದೀಗ ರಾಷ್ಟ್ರೀಯ ಬಾಲ ಪುರಸ್ಕಾರ ಸಂದಿರುವುದು ಸಂತಸ ಹೆಚ್ಚಿಸಿದೆ ಎಂದು ಹರ್ಷ ವ್ಯಕ್ತಪಡಿಸಿದರು.
ಮಂಗಳೂರಿನ ಬಾಲೆಗೆ ಪ್ರಧಾನಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರ ಪ್ರಶಸ್ತಿ ಪ್ರಧಾನ
ನಾನು ಕುಂಬಳಗೂಡಿನ ರಾಜರಾಜೇಶ್ವರಿ ಕಾಲೇಜ್ ಆಫ್ ಎಂಜಿನಿಯರಿಂಗ್ನಲ್ಲಿ ಕಂಪ್ಯೂಟರ್ ಸೈನ್ಸ್ ಪ್ರೊಫೆಸರ್. ನನ್ನ ಪತ್ನಿ ಐಬಿಎಂನಲ್ಲಿ ಬ್ಯುಸಿನೆಸ್ ಅನಾಲಿಸ್ಟ್ ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇಂಗ್ಲೆಂಡ್ನಲ್ಲಿರುವ ‘ಮೆನ್ಸಾ’ ಸಂಘಟನೆ ಐಕ್ಯೂ ಹೆಚ್ಚಾಗಿರುವವರಿಗೆ ಮಾತ್ರ ಸದಸ್ಯತ್ವ ನೀಡುತ್ತದೆ. 4.11 ವರ್ಷದವನಿದ್ದಾಗಲೇ ರಿಷಿಗೆ ಇದರ ಸದಸ್ಯತ್ವ ಸಿಕ್ಕಿತು ಎಂದರು.