ನವ​ದೆ​ಹ​ಲಿ(ಮಾ.02): ತಮಿ​ಳು​ನಾಡಿನ ಉದ್ಯ​ಮಿ​ಯೊ​ಬ್ಬ​ರಿಂದ 220 ಕೋಟಿ ರು. ಮೊತ್ತದ ಕಪ್ಪು​ಹಣ ವಶ​ಪ​ಡಿ​ಸಿ​ಕೊಂಡ ಬೆನ್ನಲ್ಲೇ, ತೆರಿ​ಗೆ ಇಲಾಖೆ ಅಧಿ​ಕಾ​ರಿ​ಗ​ಳು ಹೈದ​ರಾ​ಬಾದ್‌ ಮೂಲದ ಪ್ರಮುಖ ಔಷಧ ತಯಾ​ರಿಕಾ ಸಮೂ​ಹ​ವೊಂದರ ಮೇಲೆ ದಾಳಿ ನಡೆ​ಸಿ 400 ಕೋಟಿ ರು. ಕಾಳ​ಧ​ನ​ ಪತ್ತೆಹಚ್ಚಿದ್ದಾರೆ. ಫೆ.24ರಂದು 5 ರಾಜ್ಯ​ಗಳ 24 ಸ್ಥಳ​ಗಳ ಮೇಲೆ ದಾಳಿಗಳನ್ನು ಕೈಗೊ​ಳ್ಳ​ಲಾ​ಗಿತ್ತು ಎಂದು ಕೇಂದ್ರೀಯ ನೇರ ತೆರಿ​ಗೆ ಮಂಡಳಿ (ಸಿ​ಬಿ​ಡಿ​ಟಿ) ಸೋಮ​ವಾರ ತಿಳಿ​ಸಿ​ದೆ.

ಔಷ​ಧೀಯ ಪದಾ​ರ್ಥ​ಗಳು ಮತ್ತು ಸೂತ್ರ​ಗಳ ರಚ​ನೆ​ಯಲ್ಲಿ ಮಧ್ಯ​ವ​ರ್ತಿ​ಯಾಗಿ ಈ ಸಂಸ್ಥೆ ಕಾರ್ಯ​ನಿ​ರ್ವ​ಹಿ​ಸು​ತ್ತಿತ್ತು. ದಾಳಿಯ ವೇಳೆ ದಾಖ​ಲೆ​ಗಳು ಇಲ್ಲ​ದೇ ಇಟ್ಟಿದ್ದ 400 ಕೋಟಿ ರು.ಗಿಂತ ಹೆಚ್ಚು ಆದಾಯ ಪತ್ತೆ ಆಗಿ​ದೆ. ತೆರಿಗೆ ಪಾವ​ತಿ​ಸಿದ ಹಣ​ಕ್ಕಿಂತ 350 ಕೋಟಿ ಹೆಚ್ಚು​ವರಿ ಆದಾ​ಯ​ವನ್ನು ಹೊಂದಿ​ರು​ವುದು ಸಾಬೀ​ತಾ​ಗಿದೆ. ದಾಳಿಯ ವೇಳೆ 1.66 ಕೋಟಿ ರು. ನಗ​ದನ್ನು ವಶ​ಪ​ಡಿ​ಸಿ​ಕೊ​ಳ್ಳ​ಲಾ​ಗಿದೆ. ಅಕ್ರಮ ಹಣ​ದಲ್ಲಿ ಭೂಮಿ ಖರೀದಿ ಮಾಡಿ​ರು​ವು​ದಕ್ಕೆ ಸಾಕ್ಷ್ಯಾ​ಧಾ​ರ​ಗಳು ಲಭ್ಯ​ವಾ​ಗಿವೆ ಎಂದು ಅಧಿ​ಕಾ​ರಿ​ಗಳು ತಿಳಿಸಿದ್ದಾ​ರೆ. ಈ ಕಂಪನಿಯ ಬಹುತೇಕ ಉತ್ಪನ್ನಗಳು ಅಮೆರಿಕ ಮತ್ತು ಯುರೋಪಿಯನ್‌ ದೇಶಗಳಿಗೆ ರಫ್ತಾಗುತ್ತವೆ ಎಂದು ಸಿಬಿಡಿಟಿ ತಿಳಿಸಿದೆ.

ದಾಳಿ ಬಳಿಕ 350 ಕೋಟಿ ರು. ಕಪ್ಪುಹಣ ಇರುವುದನ್ನು ಕಂಪನಿ ಒಪ್ಪಿಕೊಂಡಿದೆ. ದಾಳಿ ವೇಳೆ ಪೆನ್‌ಡ್ರೈವ್‌, ಸಾಕಷ್ಟುರಹಸ್ಯ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿತ್ತು ಎಂದು ಸಿಬಿಡಿಟಿ ತಿಳಿಸಿದೆ.