ದೀಪಾವಳಿ ಮುನ್ನವೇ ಮತ್ತೊಮ್ಮೆ ಅಜ್ಜ-ಅಜ್ಜಿ ಆದ ನಾರಾಯಣ ಮೂರ್ತಿ, ಸುಧಾ ಮೂರ್ತಿ!
ಮಗುವಿಗೆ ಏಕಗ್ರಾಹ್ ಎಂದು ಹೆಸರಿಸಲಾಗಿದೆ, ಅಂದರೆ ಸಂಸ್ಕೃತದಲ್ಲಿ ಅಚಲವಾದ ಗಮನ ಮತ್ತು ಏಕಾಗ್ರತೆ ಎನ್ನುವ ಅರ್ಥವಾಗಿದೆ.
ಬೆಂಗಳೂರು (ನ.16): ಇನ್ಫೋಸಿಸ್ ಸಂಸ್ಥಾಪಕ ಎನ್‌ಆರ್ ನಾರಾಯಣ ಮೂರ್ತಿ ಮತ್ತು ಲೇಖಕಿ ಹಾಗೂ ಸಾಮಾಜಿಕ ಕಾರ್ಯಕರ್ತೆ ಸುಧಾ ಮೂರ್ತಿ ಮೂರನೇ ಬಾರಿಗೆ ಅಜ್ಜಿಯರಾಗಿದ್ದಾರೆ. ಅವರ ಮಗ ರೋಹನ್ ಮೂರ್ತಿ ಮತ್ತು ಸೊಸೆ ಅಪರ್ಣಾ ಕೃಷ್ಣನ್ ಅವರು ನವೆಂಬರ್ 10 ರಂದು ಬೆಂಗಳೂರಿನಲ್ಲಿ ಗಂಡು ಮಗುವನ್ನು ಸ್ವಾಗತಿಸಿದ್ದಾರೆ. ನಾರಾಯಣ ಮೂರ್ತಿ ಮತ್ತು ಸುಧಾ ಮೂರ್ತಿ ಅವರಿಗೆ ಇಬ್ಬರು ಮೊಮ್ಮಗಳಿದ್ದಾರೆ. ಕೃಷ್ಣ ಸುನಕ್ ಮತ್ತು ಅನೌಷ್ಕಾ ಸುನಕ್, ಯುಕೆ ಪ್ರಧಾನಿ ರಿಷಿ ಸುನಕ್ ಮತ್ತು ಅಕ್ಷತಾ ಮೂರ್ತಿ ಅವರ ಪುತ್ರಿಯರು. ತಾಯಿ ಹಾಗೂ ಮಗ ಇಬ್ಬರೂ ಆರೋಗ್ಯವಾಗಿದ್ದಾರೆ. ಮಗುವಿಗೆ ಏಕಗ್ರಾಹ್ ಎಂದು ಹೆಸರಿಸಲಾಗಿದೆ, ಅಂದರೆ ಸಂಸ್ಕೃತದಲ್ಲಿ ಅಚಲವಾದ ಗಮನ ಮತ್ತು ಏಕಾಗ್ರತೆ ಎನ್ನುವ ಅರ್ಥ ನೀಡುತ್ತದೆ. ಮೂರ್ತಿ ಕುಟುಂಬವು ಹಿಂದೂ ಮಹಾಕಾವ್ಯ ಮಹಾಭಾರತದಲ್ಲಿ ಅರ್ಜುನನ ಅಚಲವಾದ ಏಕಾಗ್ರತೆ ಕಾರಣಕ್ಕೆ ಈ ಹೆಸರನ್ನು ಇಟ್ಟಿದೆ ಎಂದು ವರದಿಯಾಗಿದೆ.
ರೋಹನ್ ಮೂರ್ತಿ ಅವರು ಯುಎಸ್-ಆಧಾರಿತ ಸಾಫ್ಟ್‌ವೇರ್ ಅಭಿವೃದ್ಧಿ ಸಂಸ್ಥೆ ಸೊರೊಕೊದ ಸಂಸ್ಥಾಪಕರಾಗಿದ್ದಾರೆ, ಇದು ಡೇಟಾವನ್ನು ಅರ್ಥಪೂರ್ಣ ಮಾಹಿತಿಯನ್ನಾಗಿ ಪರಿವರ್ತಿಸಲು ಸಹಾಯ ಮಾಡುತ್ತದೆ, ಇದು ಕೆಲಸದ ಮಾದರಿಗಳನ್ನು ಪರಿಹರಿಸಲು ಸಂಸ್ಥೆಗಳಿಗೆ ಸಹಾಯ ಮಾಡುತ್ತದೆ. ಇದು ಮಾತ್ರವಲ್ಲದೆ, ಅವರು ಅಮೇರಿಕನ್ ಸಂಸ್ಕೃತ ವಿದ್ವಾಂಸರಾದ ಶೆಲ್ಡನ್ ಪೊಲಾಕ್ ಅವರ ನೇತೃತ್ವದ ಕ್ಲೇ ಸಂಸ್ಕೃತ ಲೈಬ್ರರಿ ಯೋಜನೆಯ ಮುಂದುವರಿಕೆಯಾದ ಮೂರ್ತಿ ಕ್ಲಾಸಿಕಲ್ ಲೈಬ್ರರಿ ಆಫ್ ಇಂಡಿಯಾವನ್ನು ಸ್ಥಾಪಿಸಿದವರಾಗಿದ್ದಾರೆ.
ಅಪರ್ಣಾ ಕೃಷ್ಣನ್ ಅವರು ಭಾರತೀಯ ನೌಕಾಪಡೆಯ ನಿವೃತ್ತ ಅಧಿಕಾರಿ ಕಮಾಂಡರ್ ಕೆಆರ್ ಕೃಷ್ಣನ್ ಮತ್ತು ಮಾಜಿ ಎಸ್‌ಬಿಐ ಉದ್ಯೋಗಿ ಸಾವಿತ್ರಿ ಕೃಷ್ಣನ್ ಅವರ ಪುತ್ರಿ. ಭಾರತದಲ್ಲಿಯೇ ತಮ್ಮ ಆರಂಭಿಕ ಶಾಲಾ ಶಿಕ್ಷಣವನ್ನು ಮಾಡಿದ್ದ ಅಪರ್ಣಾ, ಯುನೈಟೆಡ್ ವರ್ಲ್ಡ್ ಕಾಲೇಜಿನಲ್ಲಿ ವಿದ್ಯಾರ್ಥಿವೇತನವನ್ನು ಪಡೆದ ನಂತರ ಪ್ರೌಢಶಾಲಾ ಶಿಕ್ಷಣಕ್ಕಾಗಿ ಕೆನಡಾಕ್ಕೆ ತೆರಳಿದ್ದರು.
ಅವರು ಯುಎಸ್ ಡಾರ್ಟ್ಮೌತ್ ಕಾಲೇಜಿನಿಂದ ಅರ್ಥಶಾಸ್ತ್ರದಲ್ಲಿ ಪದವಿ ಪಡೆದಿದ್ದರು. ಆ ಬಳಿಕ ಭಾರತದಲ್ಲಿ ಮೆಕಿನ್ಸೆ ಮತ್ತು ಸಿಕ್ವೊಯಾ ಕ್ಯಾಪಿಟಲ್ ಜೊತೆ ಕೆಲಸ ಮಾಡಿದರು. ಕೃಷ್ಣನ್ ಅವರು ಸುಮಾರು ನಾಲ್ಕು ವರ್ಷಗಳ ಕಾಲ ಸೊರೊಕೊದಲ್ಲಿ ಕಾರ್ಯಾಚರಣೆಗಳ ಜನರಲ್ ಮ್ಯಾನೇಜರ್ ಆಗಿದ್ದರು. ಅವರು ಪ್ರಸ್ತುತ ಮೂರ್ತಿ ಮಾಧ್ಯಮವನ್ನು ಮುನ್ನಡೆಸುತ್ತಿದ್ದಾರೆ. ಮೂರ್ತಿ ಮೀಡಿಯಾವು ಸುಧಾ ಅಮ್ಮನೊಂದಿಗೆ ಸ್ಟೋರಿ ಟೈಮ್ ಅನ್ನು ನಿರ್ಮಿಸಿದೆ, ಸುಧಾ ಮೂರ್ತಿಯವರ ಪುಸ್ತಕಗಳನ್ನು ಅಳವಡಿಸಿಕೊಂಡ ಯೂಟ್ಯೂಬ್‌ನಲ್ಲಿ ಸರಣಿ ಕಾರ್ಯಕ್ರಮಗಳು ಇದರಲ್ಲಿ ಪ್ರಸಾರವಾಗುತ್ತದೆ.
ಡಿಸೆಂಬರ್ 2019 ರಲ್ಲಿ, ರೋಹನ್ ಮೂರ್ತಿ ಬೆಂಗಳೂರಿನಲ್ಲಿ ನಡೆದ ಸರಳ ಸಮಾರಂಭದಲ್ಲಿ ಅಪರ್ಣಾ ಕೃಷ್ಣನ್ ಅವರನ್ನು ವಿವಾಹವಾದರು. ಮದುವೆ ಸಮಾರಂಭದಲ್ಲಿ ಕುಟುಂಬಸ್ಥರು ಹಾಗೂ ಆಪ್ತರು ಪಾಲ್ಗೊಂಡಿದ್ದರು. ರೋಹನ್ ಮತ್ತು ಅಪರ್ಣಾ 2016 ರಲ್ಲಿ ಆಪ್ತ ಸ್ನೇಹಿತರ ಮೂಲಕ ಪರಸ್ಪರ ಭೇಟಿಯಾದರು. ಆ ಬಳಿಕ ಇಬ್ಬರ ನಡುವೆ ಪ್ರೇಮ ಚಿಗುರಿ ಮದುವೆಯಾಗಲು ನಿರ್ಧಾರ ಮಾಡಿದ್ದರು.
ಯುಕೆ ಪ್ರಧಾನಿ ರಿಷಿ ಸುನಕ್, ಅಕ್ಷತಾ ನಿವಾಸದಲ್ಲಿ ಸಡಗರದ ದೀಪಾವಳಿ: ಹಬ್ಬಕ್ಕೆ ಶುಭ ಕೋರಿದ ಭಾರತದ ಅಳಿಯ
ರೋಹನ್ ಈ ಹಿಂದೆ ಟಿವಿಎಸ್ ಮೋಟಾರ್ಸ್ ಅಧ್ಯಕ್ಷ ವೇಣು ಶ್ರೀನಿವಾಸನ್ ಮತ್ತು ಮಲ್ಲಿಕಾ ಶ್ರೀನವಾಸನ್ ಅವರ ಪುತ್ರಿ ಲಕ್ಷ್ಮಿ ವೇಣು ಅವರನ್ನು ವಿವಾಹವಾಗಿದ್ದರು. ದಂಪತಿಗಳು 2011 ರಲ್ಲಿ ವಿವಾಹವಾದರು ಮತ್ತು 2013 ರಲ್ಲಿ ಬೇರ್ಪಟ್ಟರು. ಇಬ್ಬರಿಗೆ ಅಕ್ಟೋಬರ್ 2015 ರಲ್ಲಿ ವಿಚ್ಛೇದನವನ್ನು ಕೋರ್ಟ್‌ ನೀಡಿತ್ತು.
70 ಗಂಟೆ ಕೆಲ್ಸ ಮಾಡೋ ಸಲಹೆ ನೀಡಿದ ನಾರಾಯಣ ಮೂರ್ತಿ, ನೀವೇನು ಮಾಡ್ತೀರಿ ಎಂದು ಪ್ರಶ್ನಿಸಿದ ಟ್ರೂಕಾಲರ್ ಸಿಇಒ!
