2ನೇ ಅಲೆ ಸೋಂಕಲ್ಲಿ ಡೆಲ್ಟಾ ತಳಿಯ ಪಾಲು ಶೇ.90ರಷ್ಟು!
* 2ನೇ ಅಲೆ ಸೋಂಕಲ್ಲಿ ಡೆಲ್ಟಾತಳಿಯ ಪಾಲು ಶೇ.90ರಷ್ಟು
* 35 ರಾಜ್ಯಗಳ 174 ಜಿಲ್ಲೆಗಳಲ್ಲಿ ಡೆಲ್ಟಾದ ವಿವಿಧ ತಳಿ ಪತ್ತೆ
* ಎಲ್ಲ ತಳಿಗಳಿಗೂ ಕೋವಿಶೀಲ್ಡ್, ಕೋವ್ಯಾಕ್ಸಿನ್ ರಾಮಬಾಣ
* ಗರ್ಭಿಣಿಯರಿಗೂ ಲಸಿಕೆ: ಶೀಘ್ರ ಮಾರ್ಗಸೂಚಿ ಬಿಡುಗಡೆ
ನವದೆಹಲಿ(ಜೂ.26): ದೇಶದಲ್ಲಿ 2ನೇ ಅಲೆ ವೇಳೆಗೆ ಕಾರಣವಾದ ಡೆಲ್ಟಾರೂಪಾಂತರಿ, ಒಟ್ಟು ಕೇಸಿನ ಪೈಕಿ ಶೇ.90ರಷ್ಟುಜನರಲ್ಲಿ ಸೋಂಕಿಗೆ ಕಾರಣವಾಗಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ. ಜೊತೆಗೆ ದೇಶದ 35 ರಾಜ್ಯ/ ಕೇಂದ್ರಾಡಳಿತ ಪ್ರದೇಶಗಳ 174 ಜಿಲ್ಲೆಗಳಲ್ಲಿ ಅಪಾಯಕಾರಿ ರೂಪಾಂತರಿಗಳು (ಡೆಲ್ಟಾಮತ್ತು ಡೆಲ್ಟಾಪ್ಲಸ್) ಪತ್ತೆಯಾಗಿದೆ. ಈ ಪೈಕಿ ಅತಿ ಹೆಚ್ಚು ಕೇಸುಗಳು ಮಹಾರಾಷ್ಟ್ರ, ದೆಹಲಿ, ಪಂಜಾಬ್, ತೆಲಂಗಾಣ, ಪಶ್ಚಿಮ ಬಂಗಾಳ ಮತ್ತು ಗುಜರಾತ್ನಲ್ಲಿ ಪತ್ತೆಯಾಗಿದೆ. 2021ರ ಮೇ ತಿಂಗಳಲ್ಲಿ ಒಟ್ಟು ಕೇಸಿನಲ್ಲಿ ಡೆಲ್ಟಾರೂಪಾಂತರಿ ಪಾಲು ಶೇ.10.31 ಇದ್ದರೆ, 2021ರ ವೇಳೆ ಶೇ.51ಕ್ಕೆ ಹೆಚ್ಚಳವಾಗಿದೆ ಎಂದು ತಿಳಿಸಿದೆ.
ರಾಮಬಾಣ:
ಇದೇ ವೇಳೆ ಕೊರೋನಾದ ವಿವಿಧ ತಳಿಗಳಾದ ಆಲ್ಫಾ, ಬೇಟಾ, ಗಾಮಾ ಮತ್ತು ಡೆಲ್ಟಾತಳಿಗಳ ಮೇಲೆ ಭಾರತದ ಕೋವಿಡ್ ಲಸಿಕೆಗಳಾದ ಕೋವಿಶೀಲ್ಡ್ ಮತ್ತು ಕೋವ್ಯಾಕ್ಸಿನ್ ಪರಿಣಾಮಕಾರಿ ಎಂದು ಸಾಬೀತಾಗಿದೆ ಎಂದು ಹೇಳಿದೆ.
2ನೇ ಅಲೆ ಮುಗಿದಿಲ್ಲ:
ದೇಶದ 75 ಜಿಲ್ಲೆಗಳಲ್ಲಿ ಪಾಸಿಟಿವಿಟಿ ಪ್ರಮಾಣ ಇನ್ನೂ ಶೇ.10ಕ್ಕಿಂತ ಹೆಚ್ಚಿದೆ. 92 ಜಿಲ್ಲೆಗಳಲ್ಲಿ ಶೇ.5-10ರಷ್ಟಿದೆ. ಹೀಗಾಗಿ ಎರಡನೇ ಅಲೆ ಇನ್ನೂ ಮುಗಿದಿಲ್ಲ ಎಂದು ಸರ್ಕಾರ ಹೇಳಿದೆ.
ಗರ್ಭಿಣಿಯರಿಗೂ ಲಸಿಕೆ:
ಗರ್ಭಿಣಿಯರೂ ಕೋವಿಡ್ ಲಸಿಕೆ ಪಡೆದುಕೊಳ್ಳಬಹುದಾಗಿದೆ. ಅದು ಅವರಿಗೂ ಅನುಕೂಲ ಮಾಡಿಕೊಡಲಿದೆ. ಶೀಘ್ರವೇ ಈ ಕುರಿತು ಮಾರ್ಗಸೂಚಿ ಬಿಡುಗಡೆ ಮಾಡಲಾಗುವುದು ಎಂದು ಸರ್ಕಾರ ತಿಳಿಸಿದೆ.