ಪಾಕಿಸ್ತಾನದ ಸೀಮಾ ಹೈದರ್ ಹಾಗೂ ಸಚಿನ್ ದಂಪತಿ ಹೆಸರಲ್ಲಿ ₹100 ಕೋಟಿ ವಂಚನೆ!
ಪಾಕಿಸ್ತಾನದಿಂದ ಓಡಿಬಂದ ಸೀಮಾ ಹೈದರ್ ಮತ್ತು ಆಕೆಯನ್ನು ಮದುವೆಯಾದ ಸಚಿನ್ ಹೆಸರಿನಲ್ಲಿ 100 ಕೋಟಿ ರೂ. ವಂಚನೆ ಪ್ರಕರಣ ಬೆಳಕಿಗೆ ಬಂದಿದೆ. ಅರುಣಾಚಲ ಪ್ರದೇಶ ಪೊಲೀಸರು ಬಿಹಾರದಲ್ಲಿ ಇಬ್ಬರು ಆರೋಪಿಗಳನ್ನು ಬಂಧಿಸಿದ್ದಾರೆ, ಇಬ್ಬರು ತಲೆಮರೆಸಿಕೊಂಡಿದ್ದಾರೆ.
Followಸಾಮಾಜಿಕ ಜಾಲತಾಣದಲ್ಲಿ ಪರಿಚಿತವಾದ ಪಾಕಿಸ್ತಾನದ ಮಹಿಳೆ ಸೀಮಾ ಹೈದರ್ ಮತ್ತು ಭಾರತದ ಯುವಕ ಸಚಿನ್ ಅವರ ಪ್ರೇಮ ಪ್ರಕರಣ ಇಡೀ ದೇಶಕ್ಕೆ ಗೊತ್ತಿರುವ ವಿಚಾರ. ಆದರೆ, ಇದೀಗ ಸೀಮಾ ಹೈದರ್ ಹಾಗೂ ಸಚಿನ್‌ನ ಹೆಸರಲ್ಲಿ ಸುಮಾರು 100 ಕೋಟಿ ರೂ. ವಂಚನೆ ನಡೆದಿದೆ. ಅರುಣಾಚಲ ಪ್ರದೇಶ ಪೊಲೀಸರು ಬಿಹಾರಕ್ಕೆ ಬಂದಾಗ ಈ ವಿಷಯ ಬಯಲಾಗಿದೆ.
ಅರುಣಾಚಲ ಪ್ರದೇಶ ಪೊಲೀಸರು ಶುಕ್ರವಾರ ತಡರಾತ್ರಿ ಬಿಹಾರದ ದರ್ಭಂಗಾ ಜಿಲ್ಲೆಯ ರೈಯಾಮ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ 100 ಕೋಟಿ ರೂಪಾಯಿ ವಂಚನೆ ಆರೋಪದ ಮೇಲೆ ಇಬ್ಬರು ಸಹೋದರರನ್ನು ಬಂಧಿಸಿದ್ದಾರೆ. ಆದರೆ ಮತ್ತಿಬ್ಬರು ಸೋದರ ಸಂಬಂಧಿಗಳು ಪೊಲೀಸರಿಂದ ತಪ್ಪಿಸಿಕೊಂಡಿದ್ದಾರೆ. ಬಂಧಿತ ಆರೋಪಿಗಳಾದ ಬನ್ಸಾರ ಗ್ರಾಮದ ನಿವಾಸಿಗಳಾದ ಆಶುತೋಷ್ ಕುಮಾರ್ ಜಾ ಮತ್ತು ವಿಪಿನ್ ಕುಮಾರ್ ಜಾ ಅವರನ್ನು ಶನಿವಾರ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಯಿತು. ಅವರನ್ನು ಅರುಣಾಚಲ ಪ್ರದೇಶಕ್ಕೆ ಕರೆದೊಯ್ಯಲು ಅನುಮತಿ ಸಿಕ್ಕ ನಂತರ ಅರುಣಾಚಲ ಪೊಲೀಸರು ಇಬ್ಬರನ್ನೂ ಕರೆದುಕೊಂಡು ಹೋದರು. ಸಬ್ ಇನ್ಸ್ಪೆಕ್ಟರ್ ರಣಧೀರ್ ಕುಮಾರ್ ಜಾ ಹೇಳುವ ಪ್ರಕಾರ, ಆರೋಪಿಗಳ ಸೋದರ ಸಂಬಂಧಿಗಳಾದ ಸೋನು ಕುಮಾರ್ ಜಾ ಮತ್ತು ಬಿಟ್ಟು ಕುಮಾರ್ ಜಾ ಪರಾರಿಯಾಗಿದ್ದಾರೆ. ಅವರನ್ನು ಹಿಡಿಯಲು ಪೊಲೀಸರು ಶೋಧ ಕಾರ್ಯ ಮುಂದುವರೆಸಿದ್ದಾರೆ.
100 ಕೋಟಿ ರೂಪಾಯಿ ವಂಚನೆ: ಈ ನಾಲ್ವರು ಸಹೋದರರು ಪಾಕಿಸ್ತಾನದ ಸೀಮಾ ಹೈದರ್ ಮತ್ತು ಅವರ ಗಂಡ ಸಚಿನ್ ಅವರ ನಕಲಿ ಫೋಟೋ, ಆಧಾರ್ ಕಾರ್ಡ್, ಪ್ಯಾನ್ ಕಾರ್ಡ್ ಮತ್ತು ಜಿಎಸ್‌ಟಿ ಸಂಖ್ಯೆಯನ್ನು ಬಳಸಿ 100 ಕೋಟಿ ರೂಪಾಯಿ ವಂಚಿಸಿದ್ದಾರೆ ಎಂದು ಆರೋಪ ಕೇಳಿಬಂದಿದೆ. ಅರುಣಾಚಲ ಪ್ರದೇಶದ ಪಪುಂಪಾರ ಜಿಲ್ಲೆಯ ಇಟಾನಗರ ಪೊಲೀಸ್ ಠಾಣೆಯಲ್ಲಿ ಜಿಎಸ್‌ಟಿಯಿಂದ 100 ಕೋಟಿ ರೂಪಾಯಿ ವಂಚನೆ ಪ್ರಕರಣ ದಾಖಲಾಗಿದೆ. ಇಬ್ಬರು ಸಹೋದರರು ತಮ್ಮ ಬ್ಯಾಂಕ್ ಖಾತೆ ಮತ್ತು ಕಚೇರಿಯನ್ನು ಮುಚ್ಚಿ ಪರಾರಿಯಾಗಿದ್ದರು. ಸಿದ್ಧಿ ವಿನಾಯಕ ಟ್ರೇಡ್ ಮರ್ಚೆಂಟ್ ಕಂಪನಿಯ ಮಾಲೀಕ ರಾಹುಲ್ ಜೈನ್ 650 ಕೋಟಿ ರೂಪಾಯಿ ವಹಿವಾಟು ನಡೆಸಿದ್ದಾರೆ. ಇದರಲ್ಲಿ ಜಿಎಸ್‌ಟಿ ರಿಟರ್ನ್ ಮೂಲಕ 99.31 ಕೋಟಿ ರೂಪಾಯಿಗಳನ್ನು ಹೊರತೆಗೆಯಲಾಗಿದೆ. ಈ ಪ್ರಕರಣದಲ್ಲಿ ರಾಹುಲ್ ಜೈನ್ ಜೊತೆಗೆ ಆಶುತೋಷ್ ಕುಮಾರ್ ಜಾ, ವಿಪಿನ್ ಕುಮಾರ್ ಜಾ, ಸೋನು ಕುಮಾರ್ ಜಾ ಮತ್ತು ಬಿಟ್ಟು ಕುಮಾರ್ ಜಾ ಭಾಗಿಯಾಗಿದ್ದಾರೆ.
ಇದನ್ನೂ ಓದಿ: ಸುಮ್ನೆ ನಿಂತಿದ್ದ ಪೊಲೀಸಪ್ಪನ ಪುಸಲಾಯಿಸಿದ ಸುಂದ್ರಿ: ಮುಂದಾದದ್ದು ಮಾತ ...
ಸೀಮಾ ಮತ್ತು ಸಚಿನ್ ಹೆಸರಿನಲ್ಲಿ ವಂಚನೆ: ಈ ಆರೋಪಿಗಳು ಸೀಮಾ ಹೈದರ್ ಮತ್ತು ಸಚಿನ್ ಅವರ ಫೋಟೋ ಮತ್ತು ನಕಲಿ ದಾಖಲೆಗಳನ್ನು ಬಳಸಿ ವಂಚನೆ ಮಾಡಿದ್ದಾರೆ. ಜಿಎಸ್‌ಟಿ ಆಯುಕ್ತರ ದೂರಿನ ಮೇರೆಗೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ಸಂಖ್ಯೆ 183/24 ದಾಖಲಾಗಿದೆ. ರಾಹುಲ್ ಜೈನ್ ಯಾರೆಂದು ಇನ್ನೂ ತಿಳಿದುಬಂದಿಲ್ಲ. ಆದರೆ, ಬಂಧಿತರಿಂದ ಹೊಸ ಮಾಹಿತಿ ಸಿಗುವ ಸಾಧ್ಯತೆ ಇದೆ. ಸ್ಥಳೀಯ ಪೊಲೀಸರ ಸಹಾಯದಿಂದ ಅರುಣಾಚಲ ಪೊಲೀಸರು 2 ದಿನಗಳಿಂದ ಶೋಧ ಕಾರ್ಯ ಮಾಡುತ್ತಿದ್ದರು. ಗ್ರಾಮಸ್ಥರಿಗೆ ಅನುಮಾನ ಬಾರದಂತೆ ಪೊಲೀಸರು ಮೈಥಿಲಿ ಭಾಷೆ ಕಲಿತು 2 ದಿನಗಳ ಕಾಲ ಗ್ರಾಮದಲ್ಲಿ ತನಿಖೆ ನಡೆಸಿದರು.
ಗ್ರಾಮಸ್ಥರ ಮಾಹಿತಿ ಪ್ರಕಾರ, ಆರೋಪಿಗಳು ವಂಚನೆ ಮಾಡಿ 4 ಕೋಟಿ ರೂಪಾಯಿ ಮೌಲ್ಯದ ಐಷಾರಾಮಿ ಮನೆ ಕಟ್ಟಿಸಿದ್ದಾರೆ. ಗ್ರಾಮದಲ್ಲಿ ಅವರ ಮಾತಿನ ಶೈಲಿಯನ್ನು ನೋಡಿ ಯಾರೂ ಅವರು ಇಂತಹ ಹಗರಣದಲ್ಲಿ ಭಾಗಿಯಾಗಿದ್ದಾರೆಂದು ಊಹಿಸಿರಲಿಲ್ಲ. ಬಂಧಿತ ಆರೋಪಿಗಳ ವಿಚಾರಣೆಯಿಂದ ರಾಹುಲ್ ಜೈನ್ ಮತ್ತು ಇತರ ತಲೆಮರೆಸಿಕೊಂಡಿರುವ ಆರೋಪಿಗಳ ಬಗ್ಗೆ ಮಾಹಿತಿ ಸಿಗುವ ಸಾಧ್ಯತೆ ಇದೆ. ಪೊಲೀಸರು ತನಿಖೆಯನ್ನು ಚುರುಕುಗೊಳಿಸಿದ್ದಾರೆ.
ಇದನ್ನೂ ಓದಿ: 2025ರಲ್ಲಿ ಬಿಡುಗಡೆಯಾಗುವ ಟಾಪ್ 8 ವೆಬ್ ಸೀರೀಸ್‌ಗಳು!
