- Home
- Technology
- What's New
- ಗೂಗಲ್ ಇಂಜಿನಿಯರ್ಗಳನ್ನು ನೇಮಿಸಿಕೊಳ್ಳುತ್ತಲೇ ಇರುತ್ತದೆ, AI ನಿಂದ ಕೆಲಸ ಕಳೆದುಕೊಳ್ಳುವುದಿಲ್ಲ
ಗೂಗಲ್ ಇಂಜಿನಿಯರ್ಗಳನ್ನು ನೇಮಿಸಿಕೊಳ್ಳುತ್ತಲೇ ಇರುತ್ತದೆ, AI ನಿಂದ ಕೆಲಸ ಕಳೆದುಕೊಳ್ಳುವುದಿಲ್ಲ
ಗೂಗಲ್ ಸಿಇಒ ಸುಂದರ್ ಪಿಚೈ 2026ರವರೆಗೆ ಎಂಜಿನಿಯರಿಂಗ್ ತಂಡವನ್ನು ವಿಸ್ತರಿಸುವುದಾಗಿ ಘೋಷಿಸಿದ್ದಾರೆ. AI ಮಾನವ ನೌಕರರನ್ನು ಬದಲಿಸುವುದಿಲ್ಲ, ಬದಲಿಗೆ ಹೆಚ್ಚು ಶಕ್ತಿಶಾಲಿಗಳನ್ನಾಗಿಸುತ್ತದೆ ಎಂದರು. ಯೂಟ್ಯೂಬ್, ವೇಮೊ, ಕ್ವಾಂಟಮ್ ಕಂಪ್ಯೂಟಿಂಗ್ನಂತಹ ಯೋಜನೆಗಳಿಗೆ ಎಂಜಿನಿಯರ್ಗಳ ಅಗತ್ಯ ಎಂದಿದ್ದಾರೆ.
ಗೂಗಲ್ ಸಹ ಸಂಸ್ಥೆ ಆಲ್ಫಾಬೆಟ್ನ ಸಿಇಒ ಸುಂದರ್ ಪಿಚೈ ಅವರು 2026ರವರೆಗೆ ಕಂಪನಿ ತನ್ನ ಎಂಜಿನಿಯರಿಂಗ್ ತಂಡವನ್ನು ವಿಸ್ತರಿಸುತ್ತಲೇ ಇರುತ್ತದೆ ಎಂದು ಘೋಷಿಸಿದ್ದಾರೆ. ಬ್ಲೂಮ್ಬರ್ಗ್ ಟೆಕ್ ಸಮ್ಮೇಳನದಲ್ಲಿ ಮಾತನಾಡಿದ ಅವರು, "AI ಮಾನವ ನೌಕರರನ್ನು ಬದಲಾಯಿಸುವುದಿಲ್ಲ, ಅದು ಅವರನ್ನು ಹೆಚ್ಚು ಶಕ್ತಿಶಾಲಿಗಳಾಗಿಸಲು ನೆರವಾಗುತ್ತದೆ" ಎಂದು ಸ್ಪಷ್ಟಪಡಿಸಿದ್ದಾರೆ.
ಇತರ ಟೆಕ್ ಕಂಪನಿಳಾದ ಅಮೆಜಾನ್, ಮೈಕ್ರೋಸಾಫ್ಟ್, ಮೆಟಾ ಸಾವಿರಾರು ಉದ್ಯೋಗಗಳನ್ನು ಕಡಿತಗೊಳಿಸುತ್ತಿರುವ ಈ ಸಮಯದಲ್ಲಿ, ಗೂಗಲ್ ಮಾತ್ರ ಎಂಜಿನಿಯರ್ಗಳಿಗೆ ಹೊಸ ಅವಕಾಶಗಳನ್ನು ಸೃಷ್ಟಿಸಲು ಮುಂದಾಗಿದೆ. ಪಿಚೈ ಅವರ ಹೇಳಿಕೆಯ ಪ್ರಕಾರ, AI ಉದ್ಯೋಗ ಕಳೆದುಕೊಳ್ಳುವ ತಂತ್ರಜ್ಞಾನ ಅಲ್ಲ, ಇದು ಮನುಷ್ಯರನ್ನು ಹೆಚ್ಚು ಪರಿಣಾಮಕಾರಿಯಾಗಿ ಕೆಲಸ ಮಾಡಲು ಸಹಾಯ ಮಾಡುವ ಸಾಧನವಾಗಿದೆ.
AI ಗೂ ಎಂಜಿನಿಯರ್ಗೂ ಕೈಕೈಗೂಡಿಸುವ ಸಮಯ
"ನಾವು ಹೊಸ ಅವಕಾಶಗಳನ್ನು ಅನ್ವೇಷಿಸುತ್ತಿರುವಾಗ, ನಮ್ಮ ಎಂಜಿನಿಯರ್ಗಳ ಶಕ್ತಿ ನಮ್ಮ ದಿಕ್ಕು ತೋರಿಸುತ್ತದೆ. ಮುಂದಿನ ವರ್ಷವೂ (2026ರವರೆಗೆ) ನಾವು ಹೆಚ್ಚಿನ ಎಂಜಿನಿಯರ್ಗಳನ್ನು ನೇಮಿಸೋಣ ಅನ್ನೋದು ನನ್ನ ನಿರೀಕ್ಷೆ," ಎಂದು ಪಿಚೈ ಹೇಳಿದರು. AI ಬಳಸಿ ಸಾಮಾನ್ಯ ಕೆಲಸಗಳನ್ನು ತ್ವರಿತಗೊಳಿಸಬಹುದಾದರೂ, ನಾವೀನ್ಯತೆಯಂತಹ ಸೃಜನಾತ್ಮಕ ಕೆಲಸಗಳಲ್ಲಿ ಇನ್ನೂ ಮಾನವ ಪ್ರತಿಭೆಯ ಅವಶ್ಯಕತೆಯಿದೆ. ಇದನ್ನು ಗೂಗಲ್ ಸ್ಪಷ್ಟವಾಗಿ ಅರಿತಿದೆ ಎಂದು ಪಿಚೈ ವಿವರಿಸಿದರು.
ಯೂಟ್ಯೂಬ್, ವೇಮೊ, ಕ್ವಾಂಟಮ್ ಕಂಪ್ಯೂಟಿಂಗ್: ಹೊಸ ಹಾದಿಗೆ ಬೇಕಾದ ಹೊಸ ಪ್ರತಿಭೆ
ಪಿಚೈ ಅವರು ಗೂಗಲ್ ಬೆಂಬಲಿಸುತ್ತಿರುವ ಹಲವಾರು ಉತ್ಸಾಹದ ಯೋಜನೆಗಳನ್ನು ಉಲ್ಲೇಖಿಸಿದರು. ವೇಮೊನ ಸ್ವಯಂಚಾಲಿತ ವಾಹನಗಳು, ಕ್ವಾಂಟಮ್ ಕಂಪ್ಯೂಟಿಂಗ್ ಹಾಗೂ ಯೂಟ್ಯೂಬ್ನ ವಿಶ್ವದರ್ಜೆಯ ಬೆಳವಣಿಗೆ. ಭಾರತದಲ್ಲಿನ ಯೂಟ್ಯೂಬ್ ಚಾನೆಲ್ಗಳ ಸಂಖ್ಯೆ 100 ಮಿಲಿಯನ್ ದಾಟಿದ್ದು, 15,000 ಚಾನೆಲ್ಗಳು ಒಂದು ಮಿಲಿಯನ್ಗಿಂತ ಹೆಚ್ಚು ಚಂದಾದಾರರನ್ನು ಹೊಂದಿವೆ ಎಂದು ಅವರು ವಿವರಿಸಿದರು. ಇವು ಎಲ್ಲಾ ಗೂಗಲ್ಗೆ ಸಾಂದರ್ಭಿಕವಾಗಿ ಹೆಚ್ಚು ತಾಂತ್ರಿಕ ಕೌಶಲ್ಯ ಹೊಂದಿರುವ ಎಂಜಿನಿಯರ್ಗಳ ಅಗತ್ಯವಿದೆ ಎಂಬುದನ್ನು ತೋರಿಸುತ್ತವೆ.
AI ಭವಿಷ್ಯ ಕುರಿತು ಜವಾಬ್ದಾರಿ ಭರಿತ ನೋಟ
ಪಿಚೈ ಅವರು AI ಬಗ್ಗೆ ನಿರಾಶೆ ವ್ಯಕ್ತಪಡಿಸಿಲ್ಲ ಆದರೆ ತಂತ್ರಜ್ಞಾನ ಇನ್ನೂ ಅಪೂರ್ಣವಾಗಿದೆ ಎಂಬುದನ್ನು ಒಪ್ಪಿಕೊಂಡರು. “AI ಕೆಲವೊಮ್ಮೆ ಮೂಲಭೂತ ತಪ್ಪುಗಳನ್ನು ಮಾಡಬಹುದು. ನಾವು AGI (Artificial General Intelligence) ತಲುಪಿದ್ದೇವೆಯೇ? ಇದನ್ನು ಖಚಿತವಾಗಿ ಹೇಳಲು ಯಾರಿಗೂ ಸಾಧ್ಯವಿಲ್ಲ" ಎಂದರು. ಇದಕ್ಕೂ ಮುನ್ನ, ಗೂಗಲ್ 2023ರಲ್ಲಿ ಸುಮಾರು 12,000 ಉದ್ಯೋಗಗಳನ್ನು ಕಡಿತಗೊಳಿಸಿತ್ತು ಮತ್ತು 2024-25ರಲ್ಲಿ ಸಹ ಇಡೀ ಉದ್ಯಮದಲ್ಲಿ ಸಣ್ಣಪುಟ್ಟ ಕಡಿತಗಳು ನಡೆದವು. ಆದರೆ ಈಗ ಪಿಚೈ ಅವರ ಹೇಳಿಕೆ ಗೂಗಲ್ ಮಾನವ ಸಂಪತ್ತಿನಲ್ಲಿ ಮತ್ತೆ ಬಂಡವಾಳ ಹೂಡಲು ತಯಾರಾಗಿರುವುದನ್ನು ಸೂಚಿಸುತ್ತದೆ.
ಸುಂದರ್ ಪಿಚೈ ಅವರ ದೃಷ್ಟಿಕೋನವು ಸ್ಪಷ್ಟವಾಗಿದೆ. AI ಸಂಭ್ರಮ ಹಾಗೂ ಭೀತಿಯಿಂದಲೇ ನಿಲ್ಲಬಾರದು. ಅದರ ಬದಲು, ಮಾನವ ಪ್ರತಿಭೆಯೊಂದಿಗೆ ಕೈಜೋಡಿಸಿ, ಹೊಸ ತಂತ್ರಜ್ಞಾನಗಳನ್ನು ರೂಪಿಸಿ, ಜಗತ್ತಿಗೆ ಹೊಸ ದಿಕ್ಕು ತೋರಿಸಬೇಕಾಗಿದೆ. Google ಇದರತ್ತ ಹೆಜ್ಜೆ ಇಡಲಿದೆ ಮತ್ತು ಈ ನಿಟ್ಟಿನಲ್ಲಿ ಎಂಜಿನಿಯರ್ಗಳ ಪಾತ್ರ ಅತಿ ಮುಖ್ಯ ಎಂದರು.