ವಿಜ್ಞಾನವನ್ನೂ ಬೆಚ್ಚಿಬೀಳಿಸಿದ 7 ನಿಗೂಢ ರಹಸ್ಯಗಳು; ಜಗತ್ತನ್ನು ಕಾಡುತ್ತಿರುವ ಪ್ರಶ್ನೆಗಳು
ತಂತ್ರಜ್ಞಾನ ಎಷ್ಟೇ ಮುಂದುವರೆದರೂ, ಜಗತ್ತಿನಲ್ಲಿ ಇಂದಿಗೂ ಉತ್ತರ ಸಿಗದ ಹಲವಾರು ನಿಗೂಢ ರಹಸ್ಯಗಳಿವೆ. ಡಯಾಟ್ಲೋವ್ ಪಾಸ್ ಘಟನೆ, ಮೇರಿ ಸೆಲೆಸ್ಟ್ ಹಡಗಿನ ಸಿಬ್ಬಂದಿ ನಾಪತ್ತೆ, ಮತ್ತು ವೋಯ್ನಿಚ್ ಹಸ್ತಪ್ರತಿಯಂತಹ 7 ಘಟನೆಗಳು ವಿಜ್ಞಾನಿಗಳಿಗೆ ಮತ್ತು ಇತಿಹಾಸಕಾರರಿಗೆ ಇಂದಿಗೂ ಸವಾಲಾಗಿ ಉಳಿದಿವೆ.
ಉತ್ತರ ಸಿಗದ ಕೆಲವು ಪ್ರಶ್ನೆ-7 ನಿಗೂಢ ರಹಸ್ಯ
ಮನುಷ್ಯ ಎಷ್ಟೇ ತಂತ್ರಜ್ಞಾನದಲ್ಲಿ ಮುಂದುವರೆದರೂ, ಜಗತ್ತಿನಲ್ಲಿ ಇಂದಿಗೂ ಉತ್ತರ ಸಿಗದ ಕೆಲವು ಪ್ರಶ್ನೆಗಳಿವೆ. ವಿಜ್ಞಾನಿಗಳು ಮತ್ತು ಇತಿಹಾಸಕಾರರು ವರ್ಷಗಟ್ಟಲೆ ಸಂಶೋಧನೆ ನಡೆಸಿದರೂ, ಕೆಲವು ರಹಸ್ಯಗಳು ಮಾತ್ರ ನಿಗೂಢವಾಗಿಯೇ ಉಳಿದಿವೆ. ಈ 7 ಘಟನೆಗಳಲ್ಲಿ ಕೆಲವಕ್ಕೆ ಉತ್ತರ ಸಿಗುವ ಸೂಚನೆಗಳಿದ್ದರೂ, ಪೂರ್ಣ ಸಾಕ್ಷ್ಯಗಳಿಲ್ಲದೆ ಇಂದಿಗೂ ನಿಗೂಢವಾಗಿಯೇ ಉಳಿದಿವೆ.
ಡಯಾಟ್ಲೋವ್ ಪಾಸ್ ಘಟನೆ – ಅಸಲಿಗೆ ಅಲ್ಲಿ ಏನಾಗಿತ್ತು?
1959ರಲ್ಲಿ ರಷ್ಯಾದ ಉರಲ್ ಪರ್ವತಗಳಲ್ಲಿ ಸ್ಕೀಯಿಂಗ್ಗೆ ಹೋದ 9 ಯುವಕರು ಅನುಮಾನಾಸ್ಪದವಾಗಿ ಸಾವನ್ನಪ್ಪಿದ್ದರು. ಅವರ ಟೆಂಟ್ ಒಳಗಿನಿಂದ ಹರಿದಿತ್ತು. ಕೆಲವರ ದೇಹದ ಮೇಲೆ ತೀವ್ರ ಗಾಯಗಳಾಗಿದ್ದು, ಇದು ದೊಡ್ಡ ರಹಸ್ಯವಾಗಿತ್ತು. ಹಿಮಕುಸಿತ, ಭಯಾನಕ ಹವಾಮಾನದಂತಹ ಹಲವು ಸಿದ್ಧಾಂತಗಳಿವೆ. ಇತ್ತೀಚಿನ ಸಂಶೋಧನೆಗಳು ಹಿಮಕುಸಿತದ ಸಾಧ್ಯತೆಯನ್ನು ಹೇಳಿದರೂ, ಈ ಘಟನೆಯ ಪ್ರತಿಯೊಂದು ಅಂಶಕ್ಕೂ ಇಂದಿಗೂ ಒಂದೇ ಉತ್ತರ ಸಿಕ್ಕಿಲ್ಲ.
ಮೇರಿ ಸೆಲೆಸ್ಟ್ – ಸಿಬ್ಬಂದಿ ಎಲ್ಲಿಗೆ ಹೋದರು?
1872ರಲ್ಲಿ ಅಟ್ಲಾಂಟಿಕ್ ಮಹಾಸಾಗರದಲ್ಲಿ 'ಮೇರಿ ಸೆಲೆಸ್ಟ್' ಎಂಬ ಹಡಗು ಪತ್ತೆಯಾಗಿತ್ತು. ಹಡಗಿಗೆ ಹೆಚ್ಚು ಹಾನಿಯಾಗಿರಲಿಲ್ಲ, ಸರಕು ಕೂಡಾ ಹಾಗೆಯೇ ಇತ್ತು. ಆದರೆ, ಹಡಗಿನಲ್ಲಿದ್ದ ಸಿಬ್ಬಂದಿ ಮತ್ತು ಪ್ರಯಾಣಿಕರು ನಾಪತ್ತೆಯಾಗಿದ್ದರು. ಅವರು ಎಲ್ಲಿಗೆ ಹೋದರು? ಏನಾದರು? ಎಂಬ ಪ್ರಶ್ನೆಗಳಿಗೆ ಸ್ಪಷ್ಟ ಉತ್ತರ ಸಿಕ್ಕಿಲ್ಲ. ಸಮುದ್ರದ ಬಿರುಗಾಳಿಯಿಂದ ಹಿಡಿದು ಹಡಗಿನೊಳಗಿನ ಅಪಘಾತದವರೆಗೆ ಹಲವು ಕಾರಣಗಳನ್ನು ಹೇಳಲಾಗುತ್ತದೆಯಾದರೂ, ನಿಜವಾದ ಕಾರಣ ನಿಗೂಢವಾಗಿಯೇ ಉಳಿದಿದೆ.
ಬ್ಲ್ಯಾಕ್ ಡಾಲಿಯಾ ಹ*ತ್ಯೆ – ಹಂತಕ ಯಾರು?
1947ರಲ್ಲಿ ಅಮೆರಿಕದಲ್ಲಿ ಎಲಿಜಬೆತ್ ಶಾರ್ಟ್ ಎಂಬ ಯುವತಿಯ ಹ*ತ್ಯೆ ಪ್ರಕರಣ 'ಬ್ಲ್ಯಾಕ್ ಡಾಲಿಯಾ' ಎಂದೇ ಪ್ರಸಿದ್ಧವಾಯಿತು. ತನಿಖಾ ಸಂಸ್ಥೆಗಳು ಎಷ್ಟೇ ಪ್ರಯತ್ನಿಸಿದರೂ, ಹಂತಕ ಯಾರೆಂದು ಖಚಿತಪಡಿಸಲು ಸಾಧ್ಯವಾಗಲಿಲ್ಲ. ಈ ಪ್ರಕರಣ ಇಂದಿಗೂ ಅಮೆರಿಕದ ಬಗೆಹರಿಯದ ಹತ್ಯಾ ರಹಸ್ಯಗಳಲ್ಲಿ ಒಂದಾಗಿದೆ.
ಅಮೆಲಿಯಾ ಇಯರ್ಹಾರ್ಟ್ ನಾಪತ್ತೆ
ವಿಶ್ವಪ್ರಸಿದ್ಧ ಪೈಲಟ್ ಅಮೆಲಿಯಾ ಇಯರ್ಹಾರ್ಟ್, 1937ರಲ್ಲಿ ಜಗತ್ತನ್ನು ಸುತ್ತುವ ಪ್ರಯತ್ನದಲ್ಲಿ ವಿಮಾನದೊಂದಿಗೆ ಕಣ್ಮರೆಯಾದರು. ಅವರ ವಿಮಾನ ಎಲ್ಲಿ ಪತನವಾಯಿತು? ಅವರಿಗೇನಾಯಿತು? ಎಂಬ ಪ್ರಶ್ನೆಗಳಿಗೆ ದಶಕಗಳಿಂದಲೂ ಉತ್ತರ ಹುಡುಕಲಾಗುತ್ತಿದೆ. ಆದರೆ, ಇಂದಿಗೂ ಯಾವುದೇ ಖಚಿತ ಸಾಕ್ಷ್ಯ ಸಿಕ್ಕಿಲ್ಲ.
ಟಾವೋಸ್ ಹಮ್ – ಈ ಶಬ್ದ ಎಲ್ಲಿಂದ ಬರುತ್ತದೆ?
ಜಗತ್ತಿನ ಕೆಲವು ಪ್ರದೇಶಗಳಲ್ಲಿ ಜನರು ಒಂದು ವಿಚಿತ್ರ, ಕಡಿಮೆ ಸ್ಥಾಯಿಯ ಶಬ್ದವನ್ನು ಕೇಳುತ್ತಿರುವುದಾಗಿ ಹೇಳುತ್ತಾರೆ. ಅಮೆರಿಕದ ನ್ಯೂ ಮೆಕ್ಸಿಕೋದ ಟಾವೋಸ್ ಪ್ರದೇಶದಲ್ಲಿ ಕೇಳಿಬಂದ ಈ ಶಬ್ದವನ್ನು 'ಟಾವೋಸ್ ಹಮ್' ಎನ್ನುತ್ತಾರೆ. ಕೆಲವೇ ಜನರಿಗೆ ಕೇಳಿಸುವ ಈ ಶಬ್ದಕ್ಕೆ ಕೈಗಾರಿಕೆಗಳು, ಹವಾಮಾನ ಅಥವಾ ಕಿವಿಯೊಳಗಿನ ಆಂತರಿಕ ಶಬ್ದಗಳೇ ಕಾರಣ ಎನ್ನಲಾಗುತ್ತದೆಯಾದರೂ, ನಿಜವಾದ ಕಾರಣ ಯಾರಿಗೂ ತಿಳಿದಿಲ್ಲ
Voynich Manuscript ವೋಯ್ನಿಚ್ ಹಸ್ತಪ್ರತಿ
ಹಲವು ಶತಮಾನಗಳಷ್ಟು ಹಳೆಯದಾದ ಈ ವಿಚಿತ್ರ ಪುಸ್ತಕ ಇಂದಿಗೂ ಭಾಷಾ ತಜ್ಞರಿಗೆ ಸವಾಲಾಗಿದೆ. ಇದನ್ನು 'ವೋಯ್ನಿಚ್ ಹಸ್ತಪ್ರತಿ' ಎಂದು ಕರೆಯುತ್ತಾರೆ. ಇದರಲ್ಲಿ ಗುರುತಿಸಲಾಗದ ಲಿಪಿ, ವಿಚಿತ್ರ ಸಸ್ಯಗಳು, ಖಗೋಳ ಕಾಯಗಳು ಮತ್ತು ಆಕೃತಿಗಳಿವೆ. ಈ ಪುಸ್ತಕವನ್ನು ಯಾರು, ಯಾವ ಭಾಷೆಯಲ್ಲಿ ಬರೆದರು? ಇದರಲ್ಲಿರುವ ಮಾಹಿತಿಯ ಅರ್ಥವೇನು? ಎಂಬ ಪ್ರಶ್ನೆಗಳಿಗೆ ಇಂದಿಗೂ ನಿಖರ ಉತ್ತರ ಸಿಕ್ಕಿಲ್ಲ.
