ಈ ಸೀರಿಯಲ್ಸ್ ಜೋಡಿ ಪ್ರೀತಿ ನೋಡಿದ್ರೆ ಎಂಥವ್ರಿಗೂ ಹೊಟ್ಟೆಕಿಚ್ಚಾಗುತ್ತೆ!
ಹರ್ಷ-ಭುವಿಯಿಂದ ಹಿಡಿದು ಸ್ನೇಹಾ-ಕಂಠಿಯವರೆಗೆ, ಈ ಆನ್-ಸ್ಕ್ರೀನ್ ಜೋಡಿಗಳು ಖಂಡಿತವಾಗಿಯೂ ಪ್ರೇಕ್ಷಕರ ಹೃದಯದಲ್ಲಿ ವಿಶೇಷ ಸ್ಥಾನವನ್ನು ಪಡೆದಿದ್ದಾರೆ. ಅದು ಅವರ ಕೆಮಿಸ್ಟ್ರಿಯಾಗಿರಬಹುದು, ಸಣ್ಣ ಪುಟ್ಟ ಜಗಳಗಳಾಗಿರಬಹುದು ಅಥವಾ ಅವರು ಪರಸ್ಪರರ ಕಣ್ಣುಗಳಲ್ಲಿ ನೋಡುವ ವಿಧಾನವಾಗಿರಬಹುದು. ಎಲ್ಲವೂ ಪ್ರೇಕ್ಷಕರಿಗೆ ಪಾತ್ರಗಳ ಮೇಲೆ ಲವ್ ಆಗುವಂತೆ ಮಾಡಿದೆ. ಅಂತಹ ಪಾತ್ರಗಳು ಯಾವುವು ನೋಡೋಣ.
ವೇದಾಂತ್ - ಅಮೂಲ್ಯ (Vedanth - Amulya)
ಗಟ್ಟಿಮೇಳದ ವೇದಾಂತ್ ಮತ್ತು ಅಮೂಲ್ಯ ವೀಕ್ಷಕರ ಹೃದಯದಲ್ಲಿ ವಿಶೇಷ ಸ್ಥಾನ ಪಡೆದಿದ್ದಾರೆ. ಈ ದಂಪತಿ ಪ್ರಣಯ ದೃಶ್ಯವನ್ನು ಅಭಿನಯಿಸಿದಾಗಲೆಲ್ಲಾ ಸ್ಕ್ರೀನ್ ಮೇಲೆ ಬಿಸಿ ಹೆಚ್ಚಾಗೋದು ಗ್ಯಾರಂಟಿ. ಹುಡುಗಿಯರನ್ನೆ ಇಷ್ಟಪಡದ ವೇದಾಂತ್ ಮತ್ತು ರೌಡಿ ಬೇಬಿ ಅಮೂಲ್ಯ ಮುದ್ದಾದ ಜಗಳ, ರೊಮ್ಯಾನ್ಸ್ ಎಲ್ಲವೂ ಕಚಗುಳಿ ಇಟ್ಟ ಅನುಭವ ನೀಡುತ್ತೆ.
ಸತ್ಯ - ಕಾರ್ತಿಕ್ (Satya - Karthik)
ಕ್ಲಾಸ್ ಮತ್ತು ಮಾಸ್ ಭೇಟಿಯಾದ್ರೆ ಅದು ಪರ್ಫೆಕ್ಟ್ ಜೋಡಿಯಾಗುತ್ತೆ ಅನ್ನೋದು ಸುಳ್ಳಲ್ಲ. ಸತ್ಯ ಮತ್ತು ಕಾರ್ತಿಕ್ ಅವರ ಪ್ರೀತಿ-ದ್ವೇಷದ ಕೆಮಿಸ್ಟ್ರಿ ಇತ್ತೀಚಿನ ದಿನಗಳಲ್ಲಿ ಖಂಡಿತವಾಗಿಯೂ ಹೆಚ್ಚು ಜನರಿಗೆ ಇಷ್ಟವಾಗ್ತಿದೆ. ಏನೇ ಬಂದ್ರೂ ಎದುರಿಸೋಕೆ ರೆಡಿ ಎನ್ನುವ ಮಾಸ್ ಹುಡುಗಿ ಸತ್ಯ - ಮತ್ತು ಮುಗ್ಧತೆಯ ಪ್ರತಿಬಿಂಬ ಎಂಬಂತಿರೋ ಕಾರ್ತಿಕ್ ಜೋಡಿ ನೋಡಿ ಜನ ವಾವ್ ಅನ್ನುತ್ತಿದ್ದಾರೆ.
ಹರ್ಷ -ಭುವಿ (Harsha -Bhuvi)
ಈ ಜೋಡಿಯನ್ನು ಇಷ್ಟಪಡದ ಕನ್ನಡಿಗರು ಯಾರೂ ಇಲ್ಲ ಅನ್ಸುತ್ತೆ. ಕನ್ನಡತಿ ಜೋಡಿ ತನ್ನ ವೀಕ್ಷಕರಿಗೆ ಪ್ರಬುದ್ಧ ಪ್ರೀತಿಯ ರುಚಿಯನ್ನು ನೀಡುವ ಮೂಲಕ ಮನೆ-ಮನ ಗೆದ್ದಿದ್ದರು. ದಂಪತಿ ಜೀವನದಲ್ಲಿ ಅಡೆತಡೆಗಳನ್ನು ಎದುರಿಸುತ್ತಿದ್ದರೂ, ಅವರು ಪ್ರತಿಯೊಂದು ಹಂತದಲ್ಲೂ ಒಬ್ಬರನ್ನೊಬ್ಬರು ಬಿಟ್ಟುಕೊಡದೆ ಪ್ರಬುದ್ಧವಾಗಿ ತಮ್ಮ ಪ್ರೀತಿಯನ್ನು ಕಾಪಾಡಿಕೊಂಡದ್ದು ನೋಡಿ ಜನ ಕೂಡ ಪ್ರೀತಿ ಅಂದ್ರೆ ಹೀಗೆ ಇರಬೇಕು ಅಂದಿದ್ರು.
ನಕ್ಷತ್ರ - ಭೂಪತಿ (Nakshatra - Bhupathi)
ಲಕ್ಷಣ ಸೀರಿಯಲ್ ನ ನಕ್ಷತ್ರ ಭೂಪತಿ ಜೋಡಿ ಕೂಡ ಜನರಿಗೆ ಇಷ್ಟವಾಗಿದ್ದಾರೆ. ನಕ್ಷತ್ರ ತನ್ನ ಭಾವನೆಗಳನ್ನು ಭೂಪತಿಗೆ ಎಂದಿಗೂ ಹೇಳಿಕೊಳ್ಳದಿದ್ದರೂ, ವಿಧಿ ಅವರನ್ನು ಹತ್ತಿರಕ್ಕೆ ತಂದಿತು. ಅವರ ಕೆಮಿಸ್ಟ್ರಿ ಮತ್ತು ಕೋಳಿ ಜಗಳ, ಭೂಪತಿ ದೂರ ಮಾಡಿದ್ರೂ ನಕ್ಷತ್ರಾಗೆ ಅವನ ಮೇಲಿರುವ ಪ್ರೀತಿ ಎಲ್ಲವೂ ಜನರಿಗೆ ಇಷ್ಟವಾಗಿದೆ.
ಸ್ನೇಹ - ಕಂಠಿ (Sneha - Kanthi)
ಪುಟ್ಟಕ್ಕನ ಮಕ್ಕಳು ಖ್ಯಾತಿಯ ಈ ಆನ್-ಸ್ಕ್ರೀನ್ ಜೋಡಿಗಳು ಬಹಳ ಕಡಿಮೆ ಅವಧಿಯಲ್ಲಿ ಖ್ಯಾತಿಯನ್ನು ಗಳಿಸಿದರು. ಪುಟ್ಟಕ್ಕನ ಮಕ್ಕಳ ಸ್ನೇಹಾ ಮತ್ತು ಕಂಠಿ ಇತ್ತೀಚಿನ ದಿನಗಳಲ್ಲಿ ಯುವ ಜನರಿಗೆ ತುಂಬಾನೆ ಹತ್ರ ಆಗ್ತಿದ್ದಾರೆ. ಪ್ರೀತಿಗಾಗಿ ಎಲ್ಲವನ್ನೂ ಮಾಡುವ ಕಂಠಿ, ಪ್ರೀತಿ ಇದ್ರೂ ಇಲ್ಲದಂತೆ ನಟಿಸುವ ಸ್ನೇಹ. ಇವರಿಬ್ಬರ ಮಾತು, ಗೆಳೆತನ ಪ್ರೇಕ್ಷಕರಿಗೆ ಕಚಗುಳಿ ಇಟ್ಟ ಅನುಭವ ನೀಡುತ್ತೆ.
ಅನು ಮತ್ತು ಆರ್ಯವರ್ಧನ್ (Anu - Aryavardhan)
ಅನು ಮತ್ತು ಆರ್ಯ ತೆರೆಯ ಮೇಲೆ ಅತ್ಯಂತ ಸ್ಮರಣೀಯ ಜೋಡಿಯಾದರು ಮತ್ತು ಸಾಮಾನ್ಯ ಪ್ರೇಮಕಥೆಗೆ ಹೊಸ ಆಯಾಮವನ್ನು ಸೇರಿಸಿದ ಜೋಡಿಯಾದರು ಅಂದರೆ ತಪ್ಪೇನಿಲ್ಲ. ಒಬ್ಬ ಇಪ್ಪತ್ತರ ಹರೆಯದ ಹುಡುಗಿಗೆ, ಮಧ್ಯವಯಸ್ಕನ ಜೊತೆಗಿನ ಪ್ರೀತಿ, ಮದುವೆ ಇವೆಲ್ಲವೂ ಜನರಿಗೆ ಇಷ್ಟವಾಗಿತ್ತು.
ಪಾರು ಮತ್ತು ಆದಿ (Paaru - Adhi)
ಪಾರು ಮತ್ತು ಆದಿ ಅವರ ಮುದ್ದಾದ ಪ್ರೇಮಕಥೆ ವೀಕ್ಷಕರ ಗಮನ ಸೆಳೆಯುತ್ತದೆ. ಪ್ರಣಯದಿಂದ ಸಣ್ಣ ನಾಟಕದವರೆಗೆ, ಪಾರು ಮತ್ತು ಆದಿ ಎಲ್ಲವನ್ನೂ ಜೊತೆಯಾಗಿ ಪ್ರೀತಿಯಿಂದ ಮಾಡೋದು ನೋಡಿ ಜನರು ಇಷ್ಟಪಡ್ತಾರೆ. ಪ್ರೀತಿ ಯಾರ ಮೇಲೆ, ಯಾವಾಗ ಬೇಕಾದರೂ ಆಗುತ್ತೆ… ಆ ಪ್ರೀತಿಯನ್ನು ಜೋಪಾನ ಮಾಡೋದು ಮುಖ್ಯ ಎನ್ನುತ್ತಾ ಜೀವಿಸೋ ಇವರ ಪ್ರೀತಿ ಯಾರಿಗೆ ಇಷ್ಟ ಆಗೋದಿಲ್ಲ ಹೇಳಿ.