ನವರಾತ್ರಿ ಹಬ್ಬಕ್ಕೆ ಬ್ರಹ್ಮಚಾರಿಣಿಯಾಗಿ ಅವತಾರವೆತ್ತಿದ ರಾಮಚಾರಿಯ ಚಾರು!

ಕಲರ್ಸ್ ಕನ್ನಡದಲ್ಲಿ (Colors Kannada) ಪ್ರಸಾರವಾಗುತ್ತಿರುವ ಜನರು ಮೆಚ್ಚಿದ್ದ ಧಾರಾವಾಹಿ ರಾಮಾಚಾರಿಯ ಚಾರು ಖ್ಯಾತಿ ಮೌನ ಗುಡ್ಡೆಮನೆ ನವರಾತ್ರಿ ಹಿನ್ನೆಲೆಯಲ್ಲಿ ದೇವಿಯಾಗಿ ಅವತಾರವೆತ್ತಿದ್ದಾರೆ. ಈ ಫೋಟೋಗಳನ್ನು ತಮ್ಮ ಸೋಶಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿದ್ದಾರೆ. 
 

ನವರಾತ್ರಿಯ ಎರಡನೆ ದಿನದಂದು ಬ್ರಹ್ಮಚಾರಿಣಿಯನ್ನು ಪೂಜಿಸಲಾಗುತ್ತದೆ. ಮೌನ (Mouna Guddemane) ಬ್ರಹ್ಮಚಾರಿಣಿಯಂತೆ ಬಿಳಿ ಬಣ್ಣದ ಸೀರೆಯುಟ್ಟು, ಕೆಂಪು ರವಿಕೆ, ಕಾಸಗಲದ ಕೆಂಪು ಬೊಟ್ಟು ತೊಟ್ಟು ದೇವಿಯೇ ಅವತರಿಸಿ ಬಂದಂತೆ ಕಾಣಿಸಿಕೊಂಡಿದ್ದಾರೆ. 
 

ಬಿಳಿ ಬಣ್ಣದ ಸೀರೆಗೆ ಮ್ಯಾಚ್ ಆಗುವಂತೆ ಕೆಂಪು ಬೊಟ್ಟು, ಕೆಂಪು ಲಿಪ್ ಸ್ಟಿಕ್, ಕೆಂಪು ಗಾಜಿನ ಬಳೆಗಳು, ಕೈಯಲ್ಲಿ ದೊಡ್ಡದಾದ ಉಂಗುರ, ಕಿವಿಯಲ್ಲಿ ಮುತ್ತಿನ ಜುಮುಕಿ, ಮೂಗಲ್ಲಿ ಮುತ್ತಿನ ಮೂಗುತಿ ಹಾಕಿ ಕೂದಲು ಲೂಸ್ ಆಗಿ ಬಿಟ್ಟಿದ್ದು, ಸುರಸುಂದರಿಯಂತೆ ಕಾಣಿಸುತ್ತಿದ್ದಾರೆ. 
 

ತಮ್ಮ ನೆಚ್ಚಿನ ನಟಿಯನ್ನು ದೇವಿ ಅವತಾರದಲ್ಲಿ ಕಂಡು ಅಭಿಮಾನಿಗಳಂತೂ ತುಂಬಾ ಖುಷಿಯಾಗಿದ್ದಾರೆ. ಸಾಕ್ಷಾತ್ ದೇವಿಯನ್ನೇ ಕಂಡಂತಾಗಿದೆ ಎಂದು ಕೆಲವರು ಹೇಳಿದರೆ, ಯಾವುದೇ ಪಾತ್ರಕ್ಕೂ ಸೈ ಎನಿಸುವಂತ ಸುಂದರಿ ಚಾರು ಎಂದು ಮತ್ತೆ ಕೆಲವರು ಹೇಳಿದ್ದಾರೆ. 
 

ಬ್ರಹ್ಮಚಾರಿಗೆ ಸಂಬಂಧಿಸಿದಂತೆ ಮೌನ, ಎರಡು ವಿಡಿಯೋ ಮತ್ತು ಫೋಟೋಗಳನ್ನು ಸಹ ಶೇರ್ ಮಾಡಿದ್ದಾರೆ. ವಿಭಿನ್ನ ಉಡುಗೆಯಲ್ಲಿ, ಪ್ರಶಾಂತ್ ಮೇಕ್ ಓವರ್ ಲುಕ್ ನಲ್ಲಿ, ಅರುಣ್ ಕುಮಾರ್ ಪೋಟ್ರೇಟ್ ಫೋಟೋಗ್ರಾಫಿಯಲ್ಲಿ ಮೌನ ಅದ್ಭುತವಾಗಿ ಕಾಣಿಸುತ್ತಿದ್ದಾರೆ. 
 

ಇನ್ನು ಸೀರಿಯಲ್ ವಿಷಯಕ್ಕೆ ಬಂದ್ರೆ ಚಾರು ತನ್ನ ಮಾವನ ಷಷ್ಟಿಪೂರ್ತಿ ಆಚರಣೆ ಮಾಡಲು ಸಿಕ್ಕಾಪಟ್ಟೆ ಸಂಭ್ರಮದಲ್ಲಿದ್ದಾರೆ, ಮನೆಯವರೆಲ್ಲಾ ಅದು ಸಾಧ್ಯವೇ ಆಗಲ್ಲ ಎಂದು ಹೇಳಿದ್ರು, ನಾನು ಮಾಡಿಯೇ ಮಾಡ್ತೀನಿ ಎಂದು ಗುರುಗಳ ಮುಖಾಂತರ ಮಾವನನ್ನು ಒಪ್ಪಿಸುವ ಕೆಲಸ ಮಾಡಿದ್ದಾರೆ. 
 

ಚಾರು ಯೋಜನೆಗೆ ಕಲ್ಲು ಹಾಕಲು ತಯಾರಿ ನಡೆಸಿರುವ ವೈಶಾಖ, ಈ ಬಾರಿ ಸಹ ಷಷ್ಠಿಪೂರ್ತಿಯನ್ನು ನಿಲ್ಲಿಸುವ ಸಲುವಾಗಿ ಚಾರು ತಾಯಿ ಕಿವಿ ಊದಿದ್ದಾಳೆ. ಚಾರು ತಾಯಿ ಈ ಕಾರ್ಯಕ್ರಮ ನಡೆಯದಂತೆ ಮಾಡ್ತಾಳಾ? ಅಥವಾ ಚಾರು ಸಂಭ್ರಮದಿಂದ ಹಬ್ಬ ಆಚರಿಸುತ್ತಾಳೋ ಕಾದು ನೋಡಬೇಕು.