ಪವಿತ್ರಾ ಗೌಡಗೆ ಹುಟ್ಟುಹಬ್ಬದ ದಿನವೇ ಜೈಲಾಧಿಕಾರಿಗಳ ಶಾಕ್: 'ಮನೆ ಊಟ' ಕೊಡಲೊಪ್ಪದೇ ಹೈಕೋರ್ಟ್ ಮೊರೆ!

ಜೈಲಲ್ಲಿರುವ ನಟಿ ಪವಿತ್ರಾ ಗೌಡಗೆ ಮನೆ ಊಟ ನೀಡಲು ಕೋರ್ಟ್ ಆದೇಶವನ್ನು ಜೈಲಾಧಿಕಾರಿಗಳು ಪ್ರಶ್ನಿಸಿದ್ದಾರೆ. ಕಾರಾಗೃಹ ಕಾಯ್ದೆ, ಭದ್ರತೆ ಮತ್ತು ಸಮಾನತೆಯ ಕಾರಣಗಳನ್ನು ಮುಂದಿಟ್ಟು, ಈ ಆದೇಶದ ವಿರುದ್ಧ ಹೈಕೋರ್ಟ್ ಮೆಟ್ಟಿಲೇರಲು ಸಿದ್ಧತೆ ನಡೆಸಿದ್ದು, ಇದು ಪವಿತ್ರಾ ಜನ್ಮದಿನದಂದೇ ಅವರಿಗೆ ಆಘಾತ ನೀಡಿದೆ.

Image Credit : X

ಬೆಂಗಳೂರು (ಜ.07): ಚಿತ್ರದುರ್ಗದ ರೇಣುಕಸ್ವಾಮಿ ಕೊಲೆ ಪ್ರಕರಣದಲ್ಲಿ ಎ-1 ಆರೋಪಿಯಾಗಿ ಪರಪ್ಪನ ಅಗ್ರಹಾರ ಜೈಲು ಸೇರಿರುವ ಪವಿತ್ರಾ ಗೌಡ ಅವರಿಗೆ ಜೈಲಾಧಿಕಾರಿಗಳು ಬಿಗ್ ಶಾಕ್ ನೀಡಿದ್ದಾರೆ. ಪವಿತ್ರಾ ಗೌಡ ಅವರ ಜನ್ಮದಿನದಂದೇ (Birthday) ಅವರಿಗೆ ಮನೆ ಊಟದ ಸೌಲಭ್ಯ ತಪ್ಪಿಸಲು ಕಾರಾಗೃಹ ಇಲಾಖೆ ಹೈಕೋರ್ಟ್ ಮೆಟ್ಟಿಲೇರಲು ಸಿದ್ಧತೆ ನಡೆಸಿದೆ.

Image Credit : Google

ಇತ್ತೀಚೆಗಷ್ಟೇ ಪವಿತ್ರಾ ಗೌಡ ಪರ ವಕೀಲರು, 'ಜೈಲಿನ ಊಟ ಸರಿಯಿಲ್ಲ, ಅದು ಪವಿತ್ರಾ ಅವರ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತಿದೆ' ಎಂದು ನ್ಯಾಯಾಲಯಕ್ಕೆ ಮನವಿ ಮಾಡಿದ್ದರು. ಈ ಅರ್ಜಿಯನ್ನು ಪುರಸ್ಕರಿಸಿದ್ದ ವಿಚಾರಣಾ ನ್ಯಾಯಾಲಯವು, ಅವರಿಗೆ ಮನೆಯಿಂದ ಊಟ ತರಿಸಿಕೊಳ್ಳಲು ಅವಕಾಶ ನೀಡಿ ಆದೇಶಿಸಿತ್ತು. 

ಆದರೆ, ಈ ಆದೇಶ ಜಾರಿಗೆ ತರಲು ಜೈಲಾಧಿಕಾರಿಗಳು ಆರಂಭದಿಂದಲೂ ಹಿಂದೇಟು ಹಾಕುತ್ತಿದ್ದರು. ಈಗ ಈ ಆದೇಶವನ್ನೇ ಪ್ರಶ್ನಿಸಿ ಹೈಕೋರ್ಟ್‌ನಲ್ಲಿ ಮೇಲ್ಮನವಿ ಸಲ್ಲಿಸಲು ಅಧಿಕಾರಿಗಳು ನಿರ್ಧರಿಸಿದ್ದಾರೆ.

Image Credit : Instagram

ಜೈಲಾಧಿಕಾರಿಗಳ ಆಕ್ಷೇಪಕ್ಕೆ ಕಾರಣಗಳೇನು? ಪವಿತ್ರಾ ಗೌಡ ಅವರಿಗೆ ಮನೆ ಊಟ ನೀಡಲು ಸಾಧ್ಯವಿಲ್ಲ ಎಂದು ಅಧಿಕಾರಿಗಳು ಪ್ರಬಲವಾದ ಕಾರಣಗಳನ್ನು ಮುಂದಿಟ್ಟಿದ್ದಾರೆ:

ಕಾಯ್ದೆಯ ಅಡ್ಡಿ: ಕಾರಾಗೃಹ ಇಲಾಖೆ ಕಾಯ್ದೆ 13ರ ಅಡಿಯಲ್ಲಿ ವಿಚಾರಣಾಧೀನ ಕೈದಿಗಳಿಗೆ ವಿಶೇಷವಾಗಿ ಮನೆ ಊಟ ನೀಡಲು ಅವಕಾಶವಿಲ್ಲ.

ಊಟದ ಗುಣಮಟ್ಟ: ಕೇಂದ್ರ ಹಾಗೂ ರಾಜ್ಯ ಆರೋಗ್ಯ ಇಲಾಖೆಗಳು ಈಗಾಗಲೇ ಜೈಲಿನ ಊಟವನ್ನು ಪರಿಶೀಲಿಸಿದ್ದು, ಅದು ‘ಉತ್ತಮ ಗುಣಮಟ್ಟ’ದಿಂದ ಕೂಡಿದೆ ಎಂದು ವರದಿ ನೀಡಿವೆ.

Image Credit : our own

ಸಮಾನತೆಯ ಪ್ರಶ್ನೆ: ಪವಿತ್ರಾ ಗೌಡ ಒಬ್ಬರಿಗೆ ಮನೆ ಊಟಕ್ಕೆ ಅವಕಾಶ ನೀಡಿದರೆ, ಜೈಲಿನಲ್ಲಿರುವ ಉಳಿದ ಸಾವಿರಾರು ಕೈದಿಗಳು ಕೂಡ ನ್ಯಾಯಾಲಯದ ಮೊರೆ ಹೋಗುವ ಸಾಧ್ಯತೆ ಇರುತ್ತದೆ.

ಭದ್ರತಾ ಸವಾಲು: ಮನೆಯಿಂದ ಪ್ರತಿ ಬಾರಿ ಊಟ ತಂದಾಗ ಅದನ್ನು ಸೂಕ್ಷ್ಮವಾಗಿ ತಪಾಸಣೆ ಮಾಡಬೇಕಾಗುತ್ತದೆ. ಇದು ಜೈಲಿನ ಭದ್ರತೆಗೆ ದೊಡ್ಡ ಸವಾಲು.

Image Credit : our own

ಸಿಬ್ಬಂದಿ ಕೊರತೆ: ಪ್ರತಿ ಕೈದಿಯ ಮನೆ ಊಟ ಪರಿಶೀಲಿಸಲು ಹೆಚ್ಚುವರಿ ಸಿಬ್ಬಂದಿಯನ್ನು ನೇಮಕ ಮಾಡಬೇಕಾಗುತ್ತದೆ, ಇದು ಸದ್ಯದ ಪರಿಸ್ಥಿತಿಯಲ್ಲಿ ಅಸಾಧ್ಯ.

ಸಮಯದ ವ್ಯಯ: ಭದ್ರತಾ ಸಿಬ್ಬಂದಿಯ ಅಮೂಲ್ಯ ಸಮಯ ಕೇವಲ ಊಟದ ತಪಾಸಣೆಗೆ ವಿನಿಯೋಗವಾಗುತ್ತದೆ.

ಕೈದಿಗಳ ಮನವಿ: ಈಗಾಗಲೇ ಹಲವು ಸಜಾ ಮತ್ತು ವಿಚಾರಣಾಧೀನ ಕೈದಿಗಳು ತಮಗೂ ಮನೆ ಊಟ ಬೇಕೆಂದು ಪಟ್ಟು ಹಿಡಿದಿದ್ದಾರೆ.

Image Credit : our own

ಏಷ್ಯಾನೆಟ್ ಸುವರ್ಣ ನ್ಯೂಸ್‌ಗೆ ಲಭ್ಯವಾಗಿರುವ ಮಾಹಿತಿಯ ಪ್ರಕಾರ, ಜೈಲಾಧಿಕಾರಿಗಳು ಇಂದು ಮಧ್ಯಾಹ್ನ ಅಥವಾ ನಾಳೆಯೊಳಗೆ ಹೈಕೋರ್ಟ್‌ನಲ್ಲಿ ಆಕ್ಷೇಪಣೆ ಅರ್ಜಿ ಸಲ್ಲಿಸಲಿದ್ದಾರೆ. ಎಲ್ಲ ಕೈದಿಗಳನ್ನು ಸಮಾನವಾಗಿ ಕಾಣಬೇಕೆಂಬ ತತ್ವದ ಅಡಿಯಲ್ಲಿ ಈ ಹೋರಾಟ ನಡೆಸಲು ಇಲಾಖೆ ಮುಂದಾಗಿದೆ. ಹುಟ್ಟುಹಬ್ಬದ ಸಂಭ್ರಮದ ನಿರೀಕ್ಷೆಯಲ್ಲಿದ್ದ ಪವಿತ್ರಾ ಗೌಡಗೆ, ಜೈಲಾಧಿಕಾರಿಗಳ ಈ ನಡೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.