1 ಕೆಜಿ ಮಾವಿನ ಹಣ್ಣಿಗೆ 3 ಲಕ್ಷ ರೂಪಾಯಿ; ಇದು ಜಗತ್ತಿನ ದುಬಾರಿ ಮಾವು

Miyazaki mango from Japan: ಭಾರತದಲ್ಲಿ ಬೇಸಿಗೆ ಮತ್ತು ಮಾವಿನ ಹಣ್ಣಿನ ಸೀಸನ್ ಪ್ರಾರಂಭವಾಗಿದೆ. ಜಗತ್ತಿನ ಅತ್ಯಂತ ದುಬಾರಿ ಮಾವು ಮಿಯಾಜಾಕಿ ಬಗ್ಗೆ ಮಾಹಿತಿ ಇಲ್ಲಿದೆ. ಇದು ಜಪಾನ್‌ನಲ್ಲಿ ಮಾತ್ರ ಬೆಳೆಯಲು ಸಾಧ್ಯ.

ಭಾರತದಲ್ಲಿ ಬೇಸಿಗೆ ಕಾಲ ಪ್ರಾರಂಭವಾಗಿದೆ. ಬೇಸಿಗೆ ಕಾಲ ಬಂತೆಂದರೆ ಮಾವಿನ ಹಣ್ಣಿನ ಸೀಸನ್ ಶುರುವಾಗುತ್ತದೆ. ಮಾವಿನ ಹಣ್ಣುಗಳ ಆಗಮನ ಶುರುವಾಗಿದೆ. ಇದು ಬೇಸಿಗೆಯಲ್ಲಿ 2 ರಿಂದ 3 ತಿಂಗಳು ಮಾತ್ರ ಸಿಗುತ್ತದೆ. ಪ್ರತಿಯೊಂದು ಮನೆಯಲ್ಲೂ ಮಾವಿನ ಹಣ್ಣಿನ ರುಚಿ ಇದ್ದೇ ಇರುತ್ತದೆ. ಮಾವಿನ ಹಣ್ಣಿನಲ್ಲಿ ಬಾದಾಮಿ, ಗಿಣಿಮೂತಿ ಮಾವಿನಹಣ್ಣಿನಿಂದ ಹಿಡಿದು ಅಲ್ಫೋನ್ಸೊವರೆಗೆ ಹಲವು ವಿಧಗಳಿವೆ.

ಇವುಗಳಲ್ಲಿ ಅಲ್ಫೋನ್ಸೊ ಬಹಳಷ್ಟು ಇಷ್ಟಪಡುವ ಮಾವಿನ ಹಣ್ಣುಗಳಲ್ಲಿ ಒಂದು. ರುಚಿಯಾದ ಒಂದು ಮಾವಿನ ಹಣ್ಣು ರೂ.50 ರಿಂದ ರೂ.100 ರವರೆಗೆ ಸಿಗುತ್ತವೆ. ಕೆಲವು ಹಣ್ಣುಗಳು ಗುಣಮಟ್ಟವನ್ನು ಅವಲಂಬಿಸಿ ಬೆಲೆ ಹೆಚ್ಚಿರುತ್ತವೆ. ಆದರೆ ಇಂದು ನಾನು ನಿಮಗೆ ಒಂದು ಮಾವಿನ ಹಣ್ಣಿನ ಬಗ್ಗೆ ಹೇಳಲು ಹೊರಟಿದ್ದೇವೆ. ಇದನ್ನು ಖರೀದಿಸಲು ನಿಮ್ಮ ಚಿನ್ನಾಭರಣವನ್ನು ಸಹ ಅಡವಿಡಬೇಕಾಗುತ್ತದೆ. ಪ್ರಪಂಚದ ಅತ್ಯಂತ ದುಬಾರಿ ಮಾವಿನ ಹಣ್ಣಿನ ಮಾಹಿತಿ ಇಲ್ಲಿದೆ.

ಪ್ರಪಂಚದ ಅತ್ಯಂತ ದುಬಾರಿ ಮಾವು ಎಂಬ ಬಿರುದನ್ನು ಪಡೆದ ಮಿಯಾಜಾಕಿ ಮಾವು.  ಇದು ಅಪರೂಪದ ಜಪಾನೀ ಮಾವಿನ ವಿಧವಾಗಿದೆ. ಈ ಮಾವಿನ ಹಣ್ಣು ಒಂದು ಕೆಜಿಗೆ 2.5 ಲಕ್ಷದಿಂದ 3 ಲಕ್ಷದವರೆಗೆ ಇರುತ್ತದೆ. ಈ ಮಾವಿನ ಹಣ್ಣನ್ನು ಬೆಳೆಯುವುದು ತುಂಬಾ ಕಷ್ಟ. ಏಕೆಂದರೆ ಇದನ್ನು ಜಪಾನ್‌ನಲ್ಲಿ ಮಾತ್ರ ಬೆಳೆಯಲು ಸಾಧ್ಯ. ಮುಖ್ಯವಾಗಿ ಇದು ಜಪಾನ್‌ನ ಕ್ಯುಶು ಪ್ರಾಂತ್ಯದಲ್ಲಿರುವ ಮಿಯಾಜಾಕಿ ನಗರದಲ್ಲಿ ಬೆಳೆಯಲಾಗುತ್ತದೆ. 

ಈ ಮಾವಿನ ಹಣ್ಣನ್ನು ಕಾಡುಗಳಲ್ಲಿ ಹಸಿರು ಮನೆಗಳನ್ನು ನಿರ್ಮಿಸಿ ಬೆಳೆಯಲಾಗುತ್ತದೆ. ಇಲ್ಲಿನ ಹವಾಮಾನ ಮಾವಿನ ಹಣ್ಣು ಬೆಳೆಯಲು ಸೂಕ್ತವಾಗಿದೆ. ಆದ್ದರಿಂದ ಈ ಮಾವಿನ ಹಣ್ಣನ್ನು ಭಾರತದಲ್ಲಾಗಲಿ ಅಥವಾ ಬೇರೆ ದೇಶಗಳಲ್ಲಾಗಲಿ ಬೆಳೆಯಲು ಸಾಧ್ಯವಿಲ್ಲ. ಇದುವೇ ಈ ಅಪರೂಪದ ಮಾವಿನ ಹಣ್ಣಿನ ಬೆಲೆ ಹೆಚ್ಚಾಗಿರಲು ಕಾರಣ.

ಜಪಾನ್‌ನಲ್ಲಿ ಮಿಯಾಜಾಕಿ ಮಾವಿನ ಹಣ್ಣನ್ನು 'ತೈಯೋ ನೋ ತಮಾಗೋ' ಎಂದು ಕರೆಯುತ್ತಾರೆ. ಇದರರ್ಥ ಸೂರ್ಯನ ಮೊಟ್ಟೆ. ಈ ಮಾವಿನ ಹಣ್ಣು 'ತೈಯೋ ನೋ ತಮಾಗೋ' ಎಂಬ ಹೆಸರನ್ನು ಪಡೆಯಲು ಕೆಲವು ಷರತ್ತುಗಳನ್ನು ಪೂರೈಸಬೇಕು. ಅದರ ಪ್ರಕಾರ ಮಾವಿನ ಹಣ್ಣಿನ ತೂಕ 350 ಗ್ರಾಂ ಗಿಂತ ಹೆಚ್ಚಿರಬೇಕು. ಅದರ ಸಿಪ್ಪೆಯ ಮೂರನೇ ಎರಡರಷ್ಟು ಭಾಗ ಕೆಂಪು ಬಣ್ಣದಲ್ಲಿರಬೇಕು. ಅದರಲ್ಲಿ ಸಕ್ಕರೆಯ ಪ್ರಮಾಣ 15% ಅಥವಾ ಅದಕ್ಕಿಂತ ಹೆಚ್ಚಿರಬೇಕು. 10% ಮಿಯಾಜಾಕಿ ಮಾವಿನ ಹಣ್ಣಿಗೆ ಮಾತ್ರ 'ತೈಯೋ ನೋ ತಮಾಗೋ' ಎಂಬ ಗುಣಮಟ್ಟವನ್ನು ನೀಡಲಾಗುತ್ತದೆ.

ಮಿಯಾಜಾಕಿ ಮಾವು ಅದರ ಸುಂದರವಾದ ರಚನೆ ಮತ್ತು ರುಚಿಗೆ ಹೆಸರುವಾಸಿಯಾಗಿದೆ. ಇದು ಹಳದಿ ಬಣ್ಣದಲ್ಲಿಲ್ಲದೆ ಕೆಂಪು ಬಣ್ಣದಲ್ಲಿರುತ್ತದೆ. ಇದು ಸಾಮಾನ್ಯ ಮಾವಿನ ಹಣ್ಣಿಗಿಂತ ಸಿಹಿಯಾಗಿಯೂ ಮತ್ತು ಜ್ಯೂಸಿಯಾಗಿಯೂ ಇರುತ್ತದೆ. ರುಚಿಯೊಂದಿಗೆ ಆರೋಗ್ಯಕ್ಕೂ ಒಳ್ಳೆಯದು. ಇದರಲ್ಲಿ ಆಂಟಿ-ಆಕ್ಸಿಡೆಂಟ್‌ಗಳು ಮತ್ತು ಫೋಲಿಕ್ ಆಮ್ಲ ಸಮೃದ್ಧವಾಗಿದೆ. ಇದು ಒಟ್ಟಾರೆ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಇದನ್ನು ರೆಡ್ ಸನ್ ಅಥವಾ ರೆಡ್ ಎಗ್ ಎಂದೂ ಕರೆಯುತ್ತಾರೆ.