ಯಾರಪ್ಪಾ ಇವ್ನು ಪುಂಗಿದಾಸ! ನಾನೇ Chandrayaan 3 ಲ್ಯಾಂಡರ್ ಡಿಸೈನರ್; ನಾಸಾ ಜತೆಗೂ ಕೆಲಸ ಮಾಡ್ತೀನಿ ಎಂದ ಭೂಪ
ನಾನೇ ಚಂದ್ರಯಾನ ಲ್ಯಾಂಡರ್‌ನ ಡಿಸೈನರ್ ಅಂತ ಗುಜರಾತ್‌ನ ಸೂರತ್‌ ನಿವಾಸಿಯೊಬ್ಬ ಹೇಳಿಕೊಂಡಿದ್ದಾನೆ. ಈ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಇಸ್ರೋದ ಚಂದ್ರಯಾನ - 3 ಸಕ್ಸಸ್‌ ಇಡೀ ಜಗತ್ತನ್ನೇ ನಿಬ್ಬೆರಗಾಗಿಸಿದೆ. ಇನ್ನು, ಇದಕ್ಕೆ ಕಾರಣವಾದ ಸಾಧಕರ ಬಗ್ಗೆಯೂ ಸಾಕಷ್ಟು ಚರ್ಚೆಯಾಗ್ತಿದೆ. ಈ ಮಧ್ಯೆ, ನಾನೇ ಚಂದ್ರಯಾನ ಲ್ಯಾಂಡರ್‌ನ ಡಿಸೈನರ್ ಅಂತ ಗುಜರಾತ್‌ನ ಸೂರತ್‌ ನಿವಾಸಿಯೊಬ್ಬ ಹೇಳಿಕೊಂಡಿದ್ದಾನೆ. ನಾನು, ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ದಲ್ಲಿ ಕೆಲಸ ಮಾಡುವ ವಿಜ್ಞಾನಿಯಾಗಿದ್ದೆ ಮತ್ತು ಚಂದ್ರಯಾನ -3 ಮೂನ್‌ ಮಿಷನ್‌ನ ಲ್ಯಾಂಡರ್ ಮಾಡ್ಯೂಲ್ ಅನ್ನು ವಿನ್ಯಾಸಗೊಳಿಸಿದ್ದೆ ಎಂದು ಹೇಳಿಕೊಂಡಿದ್ದಾನೆ.
ಈ ಬಗ್ಗೆ ಗುಜರಾತ್‌ ಪೊಲೀಸರು ಹೇಳಿಕೆ ನೀಡಿದ್ದು, ಸಿಟಿ ಪೊಲೀಸ್ ಕಮಿಷನರ್ ಅಜಯ್ ತೋಮರ್ ಅವರು ಪ್ರಾಥಮಿಕವಾಗಿ ಸುಳ್ಳು ಹಕ್ಕುಗಳನ್ನು ಪರಿಶೀಲಿಸಲು ತನಿಖೆ ನಡೆಸುವಂತೆ ಅಪರಾಧ ಶಾಖೆಗೆ ಸೂಚಿಸಿದ್ದಾರೆ ಎಂದು ಪೊಲೀಸ್ ಉಪ ಆಯುಕ್ತ (ವಿಶೇಷ ಶಾಖೆ) ಹೇತಲ್ ಪಟೇಲ್ ಹೇಳಿದ್ದಾರೆ.
ಗುರುವಾರ ವಿಕ್ರಮ್ ಲ್ಯಾಂಡರ್ ಚಂದ್ರನ ಮೇಲೆ ಯಶಸ್ವಿಯಾಗಿ ಇಳಿದಾಗಿನಿಂದ ಸ್ಥಳೀಯ ಮಾಧ್ಯಮಗಳಿಗೆ ಸಂದರ್ಶನಗಳನ್ನು ಮಿಥುಲ್ ತ್ರಿವೇದಿ ನೀಡುತ್ತಿದ್ದಾರೆ. ಆದರೆ, ತಾನು ಇಸ್ರೋ ವಿಜ್ಞಾನಿ ಎಂಬ ತನ್ನ ಹೇಳಿಕೆಯನ್ನು ಬೆಂಬಲಿಸಲು ಯಾವುದೇ ಸಾಕ್ಷ್ಯಚಿತ್ರ ಪುರಾವೆಗಳನ್ನು ನೀಡಲು ವಿಫಲರಾಗಿದ್ದಾರೆ ಎಂದೂ ಮಹಿಳಾ ಡಿಸಿಪಿ ಹೇಳಿದ್ದಾರೆ.
ಪಿಎಚ್‌ಡಿ ಪದವಿ ಹೊಂದಿರುವುದಾಗಿ ಹೇಳಿಕೊಂಡಿರುವ ಮಿಥುಲ್ ತ್ರಿವೇದಿ ಗುರುವಾರ ಹಲವಾರು ಮಾಧ್ಯಮಗಳು ಮತ್ತು ಸುದ್ದಿ ವಾಹಿನಿಗಳಿಗೆ ತಾನು ಚಂದ್ರಯಾನ-3 ಲ್ಯಾಂಡರ್ ಅನ್ನು ವಿನ್ಯಾಸಗೊಳಿಸಿರುವುದಾಗಿ ಹೇಳಿದ್ದಾರೆ. ತಾನು ಚಂದ್ರಯಾನ-2 ಯೋಜನೆಯ ಭಾಗವಾಗಿರುವುದರಿಂದ, ಇತ್ತೀಚಿನ ಚಂದ್ರನ ಕಾರ್ಯಾಚರಣೆಯಲ್ಲಿ ಕೆಲಸ ಮಾಡಲು ಇಸ್ರೋ ತನ್ನನ್ನು ಆಹ್ವಾನಿಸಿತು. ಮತ್ತು ಲ್ಯಾಂಡರ್‌ನ ಮೂಲ ವಿನ್ಯಾಸದಲ್ಲಿ ನಾನು ಹಲವಾರು ಬದಲಾವಣೆಗಳನ್ನು ಮಾಡಿದೆ. ಅದು ಯಶಸ್ವಿಯಾಗಿ ಇಳಿಯಲು ಕಾರಣವಾಗಿದೆ ಎಂದೂ ಅವರು ಹೇಳಿದ್ದಾರೆ.
ಆದರೆ ಕೆಲವು ಸ್ಥಳೀಯ ಪತ್ರಿಕೆಗಳು ಶುಕ್ರವಾರ ಅವರ ಹಕ್ಕುಗಳ ಸತ್ಯಾಸತ್ಯತೆಯನ್ನು ಪ್ರಶ್ನಿಸುವ ವರದಿಗಳನ್ನು ಪ್ರಕಟಿಸಿದವು. ಹಾಗೂ, ದಾಖಲೆ ನೀಡುವಂತೆ ಕೇಳಿವೆ. "ಆದರೆ ಅವರು ಇಸ್ರೋದೊಂದಿಗೆ ಸಂಬಂಧ ಹೊಂದಿದ್ದಾರೆ ಎಂಬುದನ್ನು ಸ್ಥಾಪಿಸಲು ಯಾವುದೇ ದಾಖಲೆ ಅಥವಾ ಪುರಾವೆಗಳನ್ನು ಅವರು ನೀಡಲಿಲ್ಲ. ನಮ್ಮ ತನಿಖೆಯಲ್ಲಿ ಆತ ಬಿ.ಕಾಂ. ಪದವಿ ಪಡೆದವರು.
ವಿಜ್ಞಾನಿ ಎಂಬ ಅವರ ಹಕ್ಕುಗಳ ಬಗ್ಗೆ ಕೇಳಿದಾಗ, ಅವರು ಇಸ್ರೋದ ಬೆಂಗಳೂರಿನ ಕಚೇರಿಯಲ್ಲಿ ಚಂದ್ರಯಾನ -3 ವಿನ್ಯಾಸದಲ್ಲಿ ಕೆಲಸ ಮಾಡಿದ ಫ್ರೀಲ್ಯಾನ್ಸರ್‌ ಎಂದು ಹೇಳಿದರು. ಹಾಗೂ, ನಾಸಾದೊಂದಿಗೆ ಕೆಲಸ ಮಾಡುತ್ತಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ ಎಂದೂ ಅಧಿಕಾರಿ ಹೇಳಿದರು.
"ನಮ್ಮ ಪ್ರಾಥಮಿಕ ತನಿಖೆಯ ಪ್ರಕಾರ, ಅವರು ಇಸ್ರೋ ವಿಜ್ಞಾನಿ ಅಲ್ಲ. ಅಪರಾಧ ವಿಭಾಗದವರು ಹೆಚ್ಚಿನ ತನಿಖೆ ನಡೆಸುತ್ತಾರೆ ಮತ್ತು ಅವರು ಸುಳ್ಳು ಹೇಳುವುದು ಕಂಡುಬಂದಲ್ಲಿ ಅವರ ವಿರುದ್ಧ ಎಫ್‌ಐಆರ್‌ ದಾಖಲಿಸಲಾಗುತ್ತದೆ’’ ಎಂದೂ ಡಿಸಿಪಿ ತಿಳಿಸಿದ್ದಾರೆ.
