ಕೊರೋನಾ ಲಸಿಕೆ ಪಡೆದ 10 ದಿನದಲ್ಲಿ ವ್ಯಕ್ತಿ ಸಾವು; ತನಿಖೆಗೆ ಆದೇಶಿಸಿದ ಮಧ್ಯ ಪ್ರದೇಶ ಸರ್ಕಾರ!

ಕೋವಾಕ್ಸಿನ್ ಲಸಿಕೆ ಪ್ರಯೋಗದಲ್ಲಿ ಸ್ವಯಂ ಪ್ರೇರಣೆಯಿಂದ ಪಾಲ್ಗೊಂಡು ಲಸಿಕೆ ಹಾಕಿಸಿಕೊಂಡಿದ್ದ ಬೋಪಾಲದ 42 ವರ್ಷದ ದೀಪಕ್ ಮರಾವಿ ಸಾವನ್ನಪ್ಪಿದ್ದಾರೆ.

ಡಿಸೆಂಬರ್ 12 ರಂದು ಕೋವಾಕ್ಸಿನ್ ಲಸಿಕೆ ಹಾಕಿಸಿಕೊಂಡಿದ್ದ ದೀಪಕ್ ಮರಾವಿ 10 ದಿನದಲ್ಲಿ, ಅಂದರೆ ಡಿಸೆಂಬರ್ 22ರಂದು ಸಾವನ್ನಪ್ಪಿದ್ದಾರೆ.  

ಮರಣೋತ್ತರ ಪರೀಕ್ಷೆಯಲ್ಲಿ ದೀಪಕ್ ಮರಾವಿ ದೇಹದಲ್ಲಿ ವಿಷಕಾರಿ ಅಂಶ ಪತ್ತೆಯಾಗಿದೆ. ಈ ವಿಷಕಾರಿ ಅಂಶದಿಂದ ಸಾನಪ್ಪಿರುವ ಶಂಕೆ ಇದೆ ಎಂದು ಮೆಡಿಕೋ ಲೀಗಲ್ ಇನ್ಸ್ಟಿಟ್ಯೂಟ್ ನಿರ್ದೇಶಕ ಡಾ.ಅಶೋಕ್ ಶರ್ಮಾ ಹೇಳಿದ್ದಾರೆ.

 ದೀಪಕ್ ಮರಾವಿಗೆ ಲಸಿಕೆ ನೀಡುವಿಕೆಯಲ್ಲಿ  ಭಾರತ್ ಬಯೋಟೆಕ್ ಮಾರ್ಗಸೂಚಿ ಹಾಗೂ ಭಾರತದ ಔಷಧ ನಿಯಂತ್ರಕ ಮಂಡಳಿ ಮಾರ್ಗಸೂಚಿ ಪಾಲಿಸಲಾಗಿದೆ ಎಂದು ಮೆಡಿಕಲ್ ಕಾಲೇಜು ವೈದ್ಯರಾದ ಡಾ.ರಾಜೇಶ್ ಕಪೂರ್ ಹೇಳಿದ್ದಾರೆ.

ಲಸಿಕೆ ನೀಡಿದ 30 ನಿಮಿಷ ಸಂಪೂರ್ಣ ಸೂಕ್ಷ್ಮವಾಗಿ ವೈದ್ಯರ ತಂಡ ನಿಘಾವಹಿಸಿದೆ. ಬಳಿಕ 7 ರಿಂದ 8 ದಿನ ಆರೋಗ್ಯ ವಿಚಾರಿಸಿದ್ದೇವೆ. ಈ ವೇಳೆ ಯಾವುದೇ ಸಮಸ್ಯೆ ಕುರಿತು ದೀಪಕ್ ಹೇಳಿಲ್ಲ ಎಂದು ಕಪೂರ್ ಹೇಳಿದ್ದಾರೆ.

ದೀಪಕ್ ಮರಾವಿ ಸಾವಿನ ಕುರಿತು ತನಿಖೆ ನಡೆಸಲು ಮಧ್ಯ ಪ್ರದೇಶ ಸರ್ಕಾರ ಆದೇಶಿಸಿದೆ. ಇತ್ತ ಕೋವಾಕ್ಸಿನ್ ಪ್ರಯೋಗ ಮಾಡಲು ನೀಡಿದ್ದ ಭಾರತ್ ಬಯೋಟೆಕ್ ಸಂಸ್ಥೆ ಹಾಗೂ ಭಾರತದ ಔಷಧ ನಿಯಂತ್ರ ಮಂಡಳಿಗೆ ಈ ಕುರಿತು ಮಾಹಿತಿ ನೀಡಲಾಗಿದೆ.