ಐಎನ್‌ಎಸ್‌ ವಿರಾಟ್‌ ಗುಜರಿ ಸೇರಲು ಕ್ಷಣಗಣನೆ!
ಅತ್ಯಂತ ಸುದೀರ್ಘ ಅವಧಿಗೆ ಯುದ್ಧ ನೌಕೆಯಾಗಿ ಕಾರ್ಯನಿರ್ವಹಿಸಿ, ಗಿನ್ನೆಸ್‌ ದಾಖಲೆ ನಿರ್ಮಿಸಿರುವ ಭಾರತೀಯ ನೌಕಾಪಡೆಯ ಹೆಮ್ಮೆಯ ಯುದ್ಧ ನೌಕೆ ‘ಐಎನ್‌ಎಸ್‌ ವಿರಾಟ್‌’ ಅನ್ನು ಚೂರುಚೂರು ಮಾಡಿ ಗುಜರಿಗೆ ಹಾಕುವ ಪ್ರಕ್ರಿಯೆಗೆ ಕ್ಷಣಗಣನೆ ಆರಂಭವಾಗಿದೆ.
Followನೌಕಾಪಡೆಯಲ್ಲಿ ಬರೋಬ್ಬರಿ 30 ವರ್ಷಗಳ ಕಾಲ ರಾಷ್ಟ್ರ ಸೇವೆ ಮಾಡಿರುವ ಈ ನೌಕೆಗೆ ಕೇಂದ್ರ ಹಡಗು ಸಚಿವ ಮನ್ಸುಖ್‌ ಮಾಂಡವೀಯ ಅವರು ಸೋಮವಾರ ಬೀಳ್ಕೊಡುಗೆ ನೀಡಿದರು
ಈ ವೇಳೆ ಮಾತನಾಡಿದ ಅವರು, ಈ ನೌಕೆಯನ್ನು ವಸ್ತು ಸಂಗ್ರಹಾಲಯ (ಮ್ಯೂಸಿಯಂ) ಮಾಡುವ ಕುರಿತು ಪ್ರಯತ್ನಗಳು ನಡೆದವು.
ಈ ಸಂಬಂಧ ಹಲವು ಸುತ್ತಿನ ಸಮಾಲೋಚನೆಗಳು ಜರುಗಿದವು. ಕೇಂದ್ರ ಸರ್ಕಾರ 400ರಿಂದ 500 ಕೋಟಿ ರು. ಖರ್ಚು ಮಾಡಲು ಸಿದ್ಧವಿತ್ತು. ಆದರೆ ಮ್ಯೂಸಿಯಂ ಮಾಡಿದರೂ ಈ ನೌಕೆ ಹೆಚ್ಚೆಂದರೆ ಒಂದು ದಶಕದವರೆಗೆ ಮಾತ್ರ ಬಳಕೆಗೆ ಸಿಗಬಹುದು ಎಂದು ತಜ್ಞರ ಸಮಿತಿ ವರದಿ ನೀಡಿತು.
ಕಬ್ಬಿಣಾಂಶ ಹೆಚ್ಚು ದಿನ ಬಾಳಿಕೆ ಬಾರದ ಕಾರಣ ಅಪಘಾತಗಳಾಗಬಹುದು ಎಂದು ಎಚ್ಚರಿಸಿತು.
ಹೀಗಾಗಿ ನಾವು ನೌಕೆಗೆ ವಿದಾಯ ಹೇಳಬೇಕಾಯಿತು ಎಂದು ವಿವರಿಸಿದರು. ಈ ನೌಕೆ ಒಟ್ಟಾರೆ 11 ಲಕ್ಷ ಕಿ.ಮೀ. ಓಡಿದೆ. ಇದು ಇಡೀ ವಿಶ್ವವನ್ನೇ 27 ಬಾರಿ ಸುತ್ತುವುದಕ್ಕೆ ಸಮ ಎಂದು ತಿಳಿಸಿದರು.
1959ರಲ್ಲಿ ಬ್ರಿಟನ್‌ ನೌಕಾಪಡೆಯಲ್ಲಿ ಹಮ್ಸ್‌ರ್‍ ಹೆಸರಿನಲ್ಲಿ ಸೇವೆಯಲ್ಲಿದ್ದ ಈ ನೌಕೆ 1984ರಲ್ಲಿ ನಿವೃತ್ತವಾಗಿತ್ತು.
ಭಾರತ ಅದನ್ನು ಖರೀದಿಸಿ ಐಎನ್‌ಎಸ್‌ ವಿರಾಟ್‌ ಹೆಸರಿನಲ್ಲಿ 1987ರಲ್ಲಿ ಸೇವೆ ಸೇರ್ಪಡೆ ಮಾಡಿಕೊಂಡಿತ್ತು. 2017ರಲ್ಲಿ ಸೇವೆಯಿಂದ ನಿವೃತ್ತವಾಗಿತ್ತು.
