ಅಮಿತ್ ಶಾ ಆಸ್ತಿ ವಿವರ ಬಹಿರಂಗ: ಗೃಹ ಸಚಿವರ ಬಳಿ ಏನೇನಿದೆ?

ಪ್ರಧಾನಿ ಮೋದಿ ಆಸ್ತಿಯಲ್ಲಿ ಕೊಂಚ ಏರಿಕೆಯಾಗಿದ್ದರೆ,  ಶ್ರೀಮಂತ ಗುಜರಾತಿ ಕುಟುಂಬಕ್ಕೆ ಸೇರಿದ ಗೃಹಸಚಿವ ಅಮಿತ್ ಶಾ ಅವರ ಆಸ್ತಿ ಇಳಿಮುಖವಾಗಿದೆ. 2020 ಜೂನ್​ ವೇಳೆಗೆ ₹28.63 ಕೋಟಿ ರೂಪಾಯಿ ಆಸ್ತಿ ಹೊಂದಿರುವುದಾಗಿ ಅಮಿತ್ ಶಾ ಘೋಷಿಸಿದ್ದಾರೆ. ಕಳೆದ ವರ್ಷ ಅವರು ಘೋಷಿಸಿದ್ದ ಆಸ್ತಿ 32.3 ಕೋಟಿ ರೂಪಾಯಿ. ಅಮಿತ್ ಶಾ ಅವರು ಗುಜರಾತ್​ನಲ್ಲಿ 10 ಸ್ಥಿರಾಸ್ತಿಯನ್ನ ಹೊಂದಿದ್ದಾರೆ. ತಾಯಿಯ ಆಸ್ತಿಯ ಪಾಲು ಹಾಗೂ ಶಾ ಅವರ ಆಸ್ತಿ ಸೇರಿ ಒಟ್ಟು ಮೌಲ್ಯ 13.56 ಕೋಟಿ ರೂಪಾಯಿಯಾಗಿದೆ.

₹15,814 ನಗದು ಹಣ ಹಾಗೂ ಬ್ಯಾಂಕ್​ ಖಾತೆಯಲ್ಲಿ ₹1.04 ಕೋಟಿ ಹಣವನ್ನ ಅಮಿತ್​ ಶಾ ಹೊಂದಿದ್ದಾರೆ.

ಜೊತೆಗೆ ₹3.47 ಲಕ್ಷ ಮೌಲ್ಯದ ಇನ್ಶೂರೆನ್ಸ್​ ಮತ್ತು ಪೆನ್ಶನ್ ಪಾಲಿಸಿ, ₹2.79 ಲಕ್ಷ ಮೌಲ್ಯದ Fixed Deposit​ ಇದೆ ಎಂದು ತಿಳಿಸಿದ್ದಾರೆ.

ಶಾ ಅವರ ಬಳಿ ₹44.47 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣಗಳಿವೆ.

ಅಮಿತ್ ಶಾ ಅವರ ಸೆಕ್ಯೂರಿಟಿಗಳ ಮಾರುಕಟ್ಟೆ ಮೌಲ್ಯ ಕುಸಿದ ಕಾರಣ ಆಸ್ತಿಯಲ್ಲಿ ಇಳಿಕೆಯಾಗಿದೆ.

ಪಿತ್ರಾರ್ಜಿತವಾಗಿ 12.10 ಕೋಟಿ ಮೌಲ್ಯದ ಸೆಕ್ಯೂರಿಟಿ ಹಾಗೂ ತಮ್ಮ ಸ್ವಂತ 1.4 ಕೋಟಿ ಮೊತ್ತದ ಸೆಕ್ಯೂರಿಟಿ ಇದ್ದು, ಈ ವರ್ಷ ಮಾರ್ಚ್​ ವೇಳೆಗೆ ಇದರ ಒಟ್ಟು ಮೌಲ್ಯ 13.5 ಕೋಟಿಯದ್ದಾಗಿದೆ ಎಂದು ಅಮಿತ್​ ಶಾ ತಿಳಿಸಿದ್ದಾರೆ. 

ಕಳೆದ ವರ್ಷ ಅವರು ಘೋಷಿಸಿದ್ದ ಸೆಕ್ಯೂರಿಟಿ ಮೌಲ್ಯ 17.9 ಕೋಟಿ ರೂಪಾಯಿಯಾಗಿದ್ದು, ಈ ವರ್ಷ ಭಾರೀ ಇಳಿಕೆ ಕಂಡಿದೆ.

ಇನ್ನು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರ ಆಸ್ತಿ ಕಳೆದ ವರ್ಷಕ್ಕೆ ಹೋಲಿಸಿದ್ರೆ ಹೆಚ್ಚಿಗೇನೂ ಬದಲಾವಣೆಯಾಗಿಲ್ಲ. ಈ ವರ್ಷ 1.97 ಕೋಟಿ ಚರಾಸ್ತಿ ಹಾಗೂ 2.97 ಕೋಟಿ ಸ್ಥಿರಾಸ್ತಿಯನ್ನ ಸಿಂಗ್ ಘೋಷಿಸಿದ್ದಾರೆ.