ಅಲ್ಲು ಅರ್ಜುನ್​ಗೆ ಕಾಲು ಹೋಯ್ತಾ? ಕಣ್ಣು ಹೋಯ್ತಾ? ಇಲ್ಲ ಕಿಡ್ನಿ ಹಾಳಾಯ್ತಾ?: ಸಿಎಂ ರೇವಂತ್ ರೆಡ್ಡಿ ಗರಂ

ಸಂಧ್ಯಾ ಥಿಯೇಟರ್ ವಿವಾದ ಹೀರೋ ಅಲ್ಲು ಅರ್ಜುನ್​ರನ್ನ ಕಾಡ್ತಿದೆ. ತುಳಿತದಲ್ಲಿ ಮಹಿಳೆ ಸಾವನ್ನಪ್ಪಿದ ಹಿನ್ನೆಲೆಯಲ್ಲಿ ಅಲ್ಲು ಅರ್ಜುನ್​ರನ್ನ ಅರೆಸ್ಟ್ ಮಾಡಲಾಗಿತ್ತು. ಒಂದು ದಿನ ರಾತ್ರಿ ಜೈಲಿನಲ್ಲಿ ಕಳೆದಿದ್ರು. ಈ ಅರೆಸ್ಟ್ ಹಿಂದೆ ಸಿಎಂ ರೇವಂತ್ ರೆಡ್ಡಿ ಕೈವಾಡ ಇದೆ ಅಂತ ಸಾಮಾಜಿಕ ಜಾಲತಾಣಗಳಲ್ಲಿ ಟೀಕೆಗಳು ಕೇಳಿಬಂದಿದ್ದವು. ತೆಲಂಗಾಣ ಸಿಎಂರನ್ನ ಟ್ರೋಲ್ ಮಾಡುವ ಪೋಸ್ಟ್​ಗಳು ಹರಿದಾಡಿದ್ದವು.

ಈ ವಿವಾದದಲ್ಲಿ ತಮ್ಮ ಹೆಸರು ತಳಕು ಹಾಕಿದ್ದಕ್ಕೆ ಸಿಎಂ ರೇವಂತ್ ರೆಡ್ಡಿ ವಿಧಾನಸಭೆಯಲ್ಲಿ ಗರಂ ಆಗಿದ್ರು. ಅಲ್ಲು ಅರ್ಜುನ್ ಜೊತೆಗೆ ಟಾಲಿವುಡ್ ಗಣ್ಯರ ಮೇಲೂ ಟೀಕೆ ಮಾಡಿದ್ರು. ರೇವಂತ್ ರೆಡ್ಡಿ ಮಾತನಾಡಿ, ಸಂಧ್ಯಾ ಥಿಯೇಟರ್​ನಲ್ಲಿ ನಡೆದ ಘಟನೆಯಲ್ಲಿ ಮಹಿಳೆ ಸಾವನ್ನಪ್ಪಿದ್ದಾರೆ. ಕೇಸ್ ದಾಖಲಿಸಿದ ಪೊಲೀಸರು ಅರೆಸ್ಟ್ ಮಾಡಿದ್ದಾರೆ. ಎ1 ಆಗಿದ್ದ ಅಲ್ಲು ಅರ್ಜುನ್​ರನ್ನೂ ಅರೆಸ್ಟ್ ಮಾಡಲಾಗಿದೆ. ಮನೆಗೆ ಬಂದ ಪೊಲೀಸರ ಜೊತೆ ಅಲ್ಲು ಅರ್ಜುನ್ ಅಸಭ್ಯವಾಗಿ ವರ್ತಿಸಿದ್ದಾರೆ.

ಒಂದು ದಿನ ಅಲ್ಲು ಅರ್ಜುನ್ ಜೈಲಿನಲ್ಲಿದ್ದಕ್ಕೆ ತೆಲಂಗಾಣ ಸರ್ಕಾರ, ಸಿಎಂರನ್ನ ಟೀಕಿಸಿದ್ದಾರೆ. ಅಲ್ಲು ಅರ್ಜುನ್​ಗೆ ಏನಾಯ್ತು ಅಂತ ಇಡೀ ಇಂಡಸ್ಟ್ರಿಯೇ ಅವರನ್ನ ಭೇಟಿ ಮಾಡೋಕೆ ಹೋಗಿದ್ದಾರೆ. ಅಲ್ಲು ಅರ್ಜುನ್​ಗೆ ಕಾಲು ಹೋಯ್ತಾ? ಕಣ್ಣು ಹೋಯ್ತಾ? ಇಲ್ಲ ಕಿಡ್ನಿ ಹಾಳಾಯ್ತಾ?. ಅಲ್ಲು ಅರ್ಜುನ್​ರನ್ನ ಭೇಟಿ ಮಾಡಿದ ಇಂಡಸ್ಟ್ರಿ ಗಣ್ಯರು, ಸಾವು ಬದುಕಿನ ನಡುವೆ ಇದ್ದ ಆ ಹುಡುಗನನ್ನ ಭೇಟಿ ಮಾಡಿದ್ರಾ? ಪರಾಮರ್ಶೆ ಮಾಡಿದ್ರಾ? ಇವರನ್ನ ಹೇಗೆ ಅರ್ಥ ಮಾಡ್ಕೊಳ್ಳೋದು ಅಂತ ಗರಂ ಆಗಿ ಪ್ರಶ್ನಿಸಿದ್ದಾರೆ.

ಡಿಸೆಂಬರ್ 4ರಂದು ರಾತ್ರಿ ಪುಷ್ಪ 2 ಪ್ರೀಮಿಯರ್ ಶೋ ಹಿನ್ನೆಲೆಯಲ್ಲಿ ಅಲ್ಲು ಅರ್ಜುನ್ ನಾಯಕಿ ರಶ್ಮಿಕಾ ಜೊತೆ ಸಂಧ್ಯಾ ಥಿಯೇಟರ್​ಗೆ ಹೋಗಿದ್ರು. ಅಲ್ಲು ಅರ್ಜುನ್ ಬಂದಿದ್ದರಿಂದ ಅಭಿಮಾನಿಗಳು ಥಿಯೇಟರ್​ಗೆ ಮುಗಿಬಿದ್ದಿದ್ರು. ಈ ವೇಳೆ ತುಳಿತ ಉಂಟಾಗಿ ರೇವತಿ ಎಂಬ ಮಹಿಳೆ ಸಾವನ್ನಪ್ಪಿದ್ದರು. ಆಕೆಯ ಮಗ ಗಾಯಗೊಂಡಿದ್ದ. ಈ ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ಕ್ರಿಮಿನಲ್ ಕೇಸ್ ದಾಖಲಿಸಿದ್ರು. ಅಲ್ಲು ಅರ್ಜುನ್ ಹೆಸರನ್ನ ಎ1 ಆಗಿ ಸೇರಿಸಿದ್ರು. ಡಿಸೆಂಬರ್ 12ರಂದು ಅಲ್ಲು ಅರ್ಜುನ್​ರನ್ನ ಅರೆಸ್ಟ್ ಮಾಡಲಾಯಿತು. ಕೋರ್ಟ್ 14 ದಿನಗಳ ರಿಮ್ಯಾಂಡ್ ವಿಧಿಸಿತ್ತು. ಅಲ್ಲು ಅರ್ಜುನ್ ಪರ ವಕೀಲರು ಹೈಕೋರ್ಟ್ ಮೆಟ್ಟಿಲೇರಿದ್ರು. ಮಧ್ಯಂತರ ಜಾಮೀನಿಗೆ ಅರ್ಜಿ ಸಲ್ಲಿಸಿದ್ರು. ವೈಎಸ್​ಆರ್​ಸಿಪಿ ಸಂಸದ, ವಕೀಲ ನಿರಂಜನ್ ರೆಡ್ಡಿ ಅವರನ್ನ ಕಣಕ್ಕಿಳಿಸಿದ್ರು.

ವಾದವನ್ನ ಒಪ್ಪಿದ ಕೋರ್ಟ್ ಅಲ್ಲು ಅರ್ಜುನ್​ಗೆ 4 ವಾರಗಳ ಮಧ್ಯಂತರ ಜಾಮೀನು ಮಂಜೂರು ಮಾಡಿತ್ತು. ಆದ್ರೆ ಒಂದು ದಿನ ರಾತ್ರಿ ಅಲ್ಲು ಅರ್ಜುನ್ ಚಂಚಲ್​ಗೂಡ ಜೈಲಿನಲ್ಲಿ ಕಳೆಯಬೇಕಾಯಿತು. ಹೈಕೋರ್ಟ್​ನಲ್ಲಿ ವಾದ ನಡೆಯುತ್ತಿದ್ದಂತೆಯೇ ಕೆಳ ನ್ಯಾಯಾಲಯದ ತೀರ್ಪಿನಂತೆ ಅಲ್ಲು ಅರ್ಜುನ್​ರನ್ನ ಚಂಚಲ್​ಗೂಡ ಜೈಲಿಗೆ ಕಳುಹಿಸಲಾಯಿತು. ಕೋರ್ಟ್ ಜಾಮೀನು ಮಂಜೂರು ಮಾಡಿದ್ರೂ, ಆದೇಶದ ಪ್ರತಿ ಜೈಲು ಅಧಿಕಾರಿಗಳಿಗೆ ತಲುಪಬೇಕಿತ್ತು. ಆ ಪ್ರತಿ ಸಕಾಲಕ್ಕೆ ತಲುಪಿಲ್ಲ ಅಂತ ಹೇಳಿ ಅಲ್ಲು ಅರ್ಜುನ್​ರನ್ನ ಜೈಲಿನಲ್ಲಿ ಇರಿಸಲಾಗಿತ್ತು.

ಅಲ್ಲು ಅರ್ಜುನ್ ಅರೆಸ್ಟ್ ಉದ್ದೇಶಪೂರ್ವಕವಾಗಿ ನಡೆದಿದೆ. ಪುಷ್ಪ 2 ಸಕ್ಸಸ್ ಮೀಟ್​ನಲ್ಲಿ ಅಲ್ಲು ಅರ್ಜುನ್ ತೆಲಂಗಾಣ ಸಿಎಂ ರೇವಂತ್ ರೆಡ್ಡಿ ಹೆಸರನ್ನ ಮರೆತಿದ್ರು. ಸಿಎಂಗೆ ಇಗೋ ಹರ್ಟ್ ಆಗಿದ್ದರಿಂದ ಅಲ್ಲು ಅರ್ಜುನ್ ಮೇಲೆ ಸೇಡು ತೀರಿಸಿಕೊಂಡಿದ್ದಾರೆ ಅಂತ ಟಿಆರ್​ಎಸ್, ಬಿಜೆಪಿ ನಾಯಕರು ಟೀಕಿಸಿದ್ರು. ವಿರೋಧ ಪಕ್ಷಗಳು, ಚಿತ್ರರಂಗದ ಗಣ್ಯರು ಅಲ್ಲು ಅರ್ಜುನ್ ಅರೆಸ್ಟ್​ನ್ನ ಖಂಡಿಸಿದ್ರು. ಬಿಡುಗಡೆಯಾದ ನಂತರ ಟಾಲಿವುಡ್ ಗಣ್ಯರು ಅಲ್ಲು ಅರ್ಜುನ್​ರನ್ನ ಭೇಟಿ ಮಾಡಿ ಸಾಂತ್ವನ ಹೇಳಿದ್ರು. ಅಲ್ಲು ಅರ್ಜುನ್​ಗೆ ಇಂಡಸ್ಟ್ರಿ ಗಣ್ಯರು ಬೆಂಬಲ ಸೂಚಿಸಿದ್ದನ್ನ ಸಿಎಂ ರೇವಂತ್ ರೆಡ್ಡಿ ವಿಧಾನಸಭೆಯಲ್ಲಿ ಖಂಡಿಸಿದ್ದಾರೆ.