ಗರಿಷ್ಠ ಬೋಯಿಂಗ್ 787 ಡ್ರೀಮ್ಲೈನರ್ ವಿಮಾನ ಬಳಸುವ ದೇಶಗಳು ಯಾವವು? ಭಾರತಕ್ಕೆ ಎಷ್ಟನೇ ಸ್ಥಾನ!
ಜೂನ್ 2025ರ ವೇಳೆಗೆ, ಬೋಯಿಂಗ್ 1189 ಡ್ರೀಮ್ಲೈನರ್ ವಿಮಾನಗಳನ್ನು ಮಾರಾಟ ಮಾಡಿದ್ದು, ಅಮೆರಿಕದ ಪಾಲು ಗರಿಷ್ಠವಾಗಿದೆ. ಭಾರತವು 33 ಡ್ರೀಮ್ಲೈನರ್ಗಳೊಂದಿಗೆ ಒಂಬತ್ತನೇ ಸ್ಥಾನದಲ್ಲಿದೆ. ಏರ್ ಇಂಡಿಯಾ ದುರಂತದ ನಂತರ ಡ್ರೀಮ್ಲೈನರ್ ಸುದ್ದಿಯಲ್ಲಿದೆ.
ಜೂನ್ 2025ರ ವೇಳೆ ಅಮೆರಿಕದ ಬೋಯಿಂಗ್ ಕಂಪನಿ ತನ್ನ 1189 ಬೋಯಿಂಗ್ 787 ವಿಮಾನವನ್ನು ಮಾರಾಟ ಮಾಡಿದೆ. ಇದರಲ್ಲಿ ಯಾವ ದೇಶಗಳು ಗರಿಷ್ಠವಾಗಿ ಡ್ರೀಮ್ಲೈನರ್ ಏರ್ಕ್ರಾಫ್ಟ್ ಬಳಕೆ ಮಾಡುತ್ತಿದೆ ಅನ್ನೋದರ ವಿವರ ಇಲ್ಲಿದೆ.
ಬೋಯಿಂಗ್ ಕಂಪನಿಯ ಪ್ರಕಾರ, ಎಲ್ಲಾ ಬೋಯಿಂಗ್ 787 ಡ್ರೀಮ್ಲೈನರ್ ವಿತರಣೆಗಳಲ್ಲಿ ಕಾಲು ಭಾಗದಷ್ಟು ಅಮೆರಿಕ ಪಾಲನ್ನು ಹೊಂದಿದ್ದರೆ, ಜಪಾನ್ ಶೇ. 11.9 ರಷ್ಟು ಪಾಲನ್ನು ಮತ್ತು ಚೀನಾ ಶೇ. 8.8 ರಷ್ಟು ಪಾಲನ್ನು ಹೊಂದಿದೆ. ಭಾರತವು ಒಂಬತ್ತನೇ ಸ್ಥಾನದಲ್ಲಿದೆ, ಜೂನ್ 2025 ರ ಹೊತ್ತಿಗೆ ಜಾಗತಿಕವಾಗಿ ವಿತರಿಸಲಾದ 1,189 ಬೋಯಿಂಗ್ 787 ವಿಮಾನಗಳಲ್ಲಿ ಕೇವಲ ಶೇ. 2.8 ರಷ್ಟು ಮಾತ್ರ ಅಂದರೆ, 33 ಡ್ರೀಮ್ಲೈನರ್ಗಳನ್ನು ಭಾರತ ಸ್ವೀಕರಿಸಿದೆ.
ಗರಿಷ್ಠ ಡ್ರೀಮ್ಲೈನರ್ ವಿಮಾನ ಹೊಂದಿರುವ ದೇಶಗಳನ್ನು ನೋಡೋದಾದರೆ, ಅಮೆರಿಕ (292), ಜಪಾನ್ (141), ಚೀನಾ (105), ಯುನೈಟೆಡ್ ಕಿಂಗ್ಡಮ್(77), ಸಿಂಗಾಪುರ (58), ಕತಾರ್ (53), ಕೆನಡಾ (47), ಯುನೈಟೆಡ್ ಅರಬ್ ಎಮಿರೇಟ್ಸ್ (43), ಭಾರತ (33) ಹಾಗೂ ಆಸ್ಟ್ರೇಲಿಯಾ (25) ಮೊದಲ 10 ಸ್ಥಾನದಲ್ಲಿದೆ.
ಇಲ್ಲಿಯವರೆಗಿನ ಎಲ್ಲಾ 787 ಡ್ರೀಮ್ಲೈನರ್ ವಿತರಣೆಗಳಲ್ಲಿ ಅಗ್ರ 10 ದೇಶಗಳು ಒಟ್ಟಾರೆಯಾಗಿ ಶೇಕಡಾ 74 ರಷ್ಟು ಪಾಲನ್ನು ಹೊಂದಿವೆ. 2025 ರಲ್ಲಿ 28 ವಿಮಾನಗಳನ್ನು ವಿತರಿಸಲಾಗಿದ್ದು, ಅದರಲ್ಲಿ ಏಳು ವಿಮಾನಗಳು ಮೇ ತಿಂಗಳಲ್ಲಿ ಬಂದಿದ್ದು, ಅವುಗಳಲ್ಲಿ ಮೂರು ಕತಾರ್ ಏರ್ವೇಸ್ಗೆ ಮತ್ತು ಎರಡು ಅಮೆರಿಕ ಮೂಲದ ಏರ್ಲೈನರ್ಗಳಿಗೆ ಹೋಗಿದೆ.
ಭಾರತದಲ್ಲಿ, ಈಗ ಏರ್ ಇಂಡಿಯಾದೊಂದಿಗೆ ವಿಲೀನಗೊಂಡಿರುವ ವಿಸ್ತಾರಾ,ಮಾರ್ಚ್ 2024 ರಲ್ಲಿ ಬೋಯಿಂಗ್ 787-9 ವಿತರಣೆಯನ್ನು ಪಡೆದುಕೊಂಡಿತು. ಭಾರತದ ಅತ್ಯಂತ ಹಳೆಯ ಡ್ರೀಮ್ಲೈನರ್ ಅನ್ನು ಸೆಪ್ಟೆಂಬರ್ 2012 ರಲ್ಲಿ ಏರ್ ಇಂಡಿಯಾಕ್ಕೆ ತಲುಪಿಸಲಾಯಿತು. 2023 ರಲ್ಲಿ, ವಿಸ್ತಾರಾ ಮೂರು ಹೆಚ್ಚುವರಿ ಡ್ರೀಮ್ಲೈನರ್ಗಳನ್ನು ಪಡೆದುಕೊಂಡಿತು.
ಏರ್ ಇಂಡಿಯಾದ ಬೋಯಿಂಗ್ 787-8 ವಿಮಾನವು ಅಹಮದಾಬಾದ್ ವಿಮಾನ ನಿಲ್ದಾಣದ ಬಳಿ ಟೇಕ್ ಆಫ್ ಆದ ಸ್ವಲ್ಪ ಸಮಯದ ನಂತರ ಪತನಗೊಂಡು 241 ಜೀವಗಳನ್ನು ಬಲಿ ಪಡೆದ ದುರಂತದ ನಂತರ ಈ ವಿಮಾನವು ಗಮನ ಸೆಳೆಯುತ್ತಿದೆ. 2007 ರಲ್ಲಿ ವಿಮಾನವು ವಾಣಿಜ್ಯ ಸೇವೆಗೆ ಪ್ರವೇಶಿಸಿದ ನಂತರ ಡ್ರೀಮ್ಲೈನರ್ ಒಳಗೊಂಡ ಮೊದಲ ಮಾರಕ ಅಪಘಾತ ಇದಾಗಿದೆ.
ಈ ಅಪಘಾತದಿಂದಾಗಿ ಜೂನ್ 12 ರಂದು ಅಮೆರಿಕದ ಷೇರು ಮಾರುಕಟ್ಟೆಯಲ್ಲಿ ಬೋಯಿಂಗ್ನ ಷೇರುಗಳು ತೀವ್ರವಾಗಿ ಕುಸಿದವು. ಕಂಪನಿಯು ಇತ್ತೀಚೆಗೆ 300 ವಿಮಾನಗಳಿಗೆ ಆರ್ಡರ್ ಪಡೆದುಕೊಂಡಿತ್ತು ಮತ್ತು ಅದರ ಡ್ರೀಮ್ಲೈನರ್ ಸರಣಿಯಲ್ಲಿ 948 ವಿತರಣೆಗಳು ಬಾಕಿ ಉಳಿದಿವೆ.
ಜನರಲ್ ಎಲೆಕ್ಟ್ರಿಕ್ (GE) ಏರೋಸ್ಪೇಸ್ ಎಲ್ಲಾ ಡ್ರೀಮ್ಲೈನರ್ಗಳಲ್ಲಿ ಸುಮಾರು ಮೂರನೇ ಎರಡರಷ್ಟು ಭಾಗಕ್ಕೆ ಎಂಜಿನ್ಗಳನ್ನು ಪೂರೈಸುತ್ತದೆ. ಅಹಮದಾಬಾದ್ ಅಪಘಾತದಲ್ಲಿ ಭಾಗಿಯಾದ ವಿಮಾನವೂ ಕೂಡ ಜಿಇ ಇಂಜಿನ್ಅನ್ನು ಹೊಂದಿತ್ತು. ಮಾರುಕಟ್ಟೆ ಪೂರ್ವ ವಹಿವಾಟಿನ ಸಮಯದಲ್ಲಿ ಅದರ ಷೇರುಗಳು ಶೇಕಡಾ 4 ರಷ್ಟು ಕುಸಿದವು.
ವ್ಯವಹಾರ (business ideas in kannada) , ಬ್ಯಾಂಕಿಂಗ್ (Banking News), ಹಣಕಾಸು, ಭಾರತೀಯ ಆರ್ಥಿಕತೆ, ಜಾಗತಿಕ ಮಾರುಕಟ್ಟೆ, ಷೇರು ಮಾರುಕಟ್ಟೆ, ಹೂಡಿಕೆ ಸೇರಿದಂತೆ ಇನ್ನಿತರ ಮತ್ತು ಇತ್ತೀಚಿನ ಹಣಕಾಸಿನ ಸುದ್ದಿಗಳನ್ನು ಏಷ್ಯಾನೆಟ್ ಸುವರ್ಣ ನ್ಯೂಸ್ನಲ್ಲಿ ಓದಿರಿ.
