ಗರ್ಭಧರಿಸಿದ ನವಮಾಸ ಸಂಭ್ರಮ, ಕುತೂಹಲ, ಗಾಬರಿ ಹೀಗೆ ಹಲವಾರು ಮನಸ್ಥಿತಿಯಿಂದ ಸಾಗುತ್ತದೆ. ಪ್ರತಿ ತಿಂಗಳಿಗೂ ಬದಲಾಗುವ ಮನಸ್ಥಿತಿ, ಆರೋಗ್ಯ, ದೈಹಿಕ ಪ್ರಕೃತಿ ಇವೆಲ್ಲಕ್ಕೂ ಹೊಂದಿಕೊಳ್ಳುತ್ತಾ ಒಂಭತ್ತು ತಿಂಗಳು ಕಳೆದು ಹೊಸ ಜೀವದ ಸೃಷ್ಟಿಗೆ ಸಾಕ್ಷಿಯಾಗುತ್ತೇವೆ. ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ಗರ್ಭಧರಿಸಿದ ಒಂಭತ್ತು ತಿಂಗಳು ನವಗ್ರಹಗಳ ಅಧೀನದಲ್ಲಿರುತ್ತದೆ. ಪತಿ-ಪತ್ನಿ ಕೂಡುವುದರಿಂದ ಪ್ರಾರಂಭಿಸಿ ಗರ್ಭದ ಜನನದವರೆಗೂ ನವಗ್ರಹಗಳು ಒಂದೊಂದಾಗಿ ತಮ್ಮ ಕಾರ್ಯವನ್ನು ನಿರ್ವಹಿಸುತ್ತದೆ. 

ಮಗು ತಾಯಿಯ ಗರ್ಭದಲ್ಲಿರುವುದು ಒಂಭತ್ತು ತಿಂಗಳು ಮತ್ತು ಒಂಭತ್ತು ದಿನ ಎಂಬ ಮಾತಿದೆ. ಗರ್ಭಧರಿಸಿದ ದಿನದಿಂದ ಪ್ರತಿ ತಿಂಗಳ ಭ್ರೂಣದ ಬೆಳವಣಿಗೆ, ತಾಯಿಯ ಆರೋಗ್ಯ, ಮನಸ್ಥಿತಿ ಎಲ್ಲವೂ ಗ್ರಹಗಳ ಅಧೀನದಲ್ಲಿರುತ್ತದೆ. ಈ ಒಂಭತ್ತು ತಿಂಗಳು ಹಾಗೂ ಒಂಭತ್ತು ದಿನದವರೆಗೂ ಗ್ರಹಗಳು ಗರ್ಭಿಣಿ ಮತ್ತು ಭ್ರೂಣದ ಬೆಳವಣಿಗೆಗೆ ಹೇಗೆ ಸಹಾಯಕವಾಗಿ ಕಾರ್ಯನಿರ್ವಹಿಸುತ್ತವೆ ಎಂದು ತಿಳಿಯಬಹುದು.



ಮೊದಲ ತಿಂಗಳು ಶುಕ್ರ
ಗರ್ಭಧಾರಣೆ ಮತ್ತು ಮೊದಲ ತಿಂಗಳು ಶುಕ್ರನ ಪ್ರಭಾವದಲ್ಲಿರುತ್ತದೆ. ನೀರು ಶುಕ್ರನ ಅಂಶ, ಹಾಗಾಗಿ ಪತಿ-ಪತ್ನಿಯ ಕೂಡುವಿಕೆಯಿಂದ ಉತ್ಪತ್ತಿಯಾಗುವ ದ್ರವದಿಂದ ಪ್ರಾರಂಭಿಸಿ ಮೊಟ್ಟೆಯ ರೂಪ ಪಡೆಯುವ ಕ್ರಿಯೆಯು ಶುಕ್ರಗ್ರಹದ ಅಧೀನದಲ್ಲಿರುತ್ತದೆ.

ಇದನ್ನು ಓದಿ: ರಾಶಿ ಅನುಸಾರ ನಿಮ್ಮಲ್ಲಿರುವ ಕೆಟ್ಟ ಗುಣ ಯಾವುದೆಂದು ತಿಳಿಯಿರಿ! 

ಎರಡನೇ ತಿಂಗಳು ಮಂಗಳ
ಎರಡನೇ ತಿಂಗಳನ್ನು ಆಳುವ ಮಂಗಳ ಗ್ರಹವು ಬೆಂಕಿಯ ಅಂಶವಾಗಿದೆ. ಇದು ಮೊಟ್ಟೆಯ ರೂಪವನ್ನು ಮೃದುಗೊಳಿಸಿ ಮಾಂಸದ ಮುದ್ದೆಯನ್ನಾಗಿಸುತ್ತದೆ. ಮಂಗಳ ಗ್ರಹದ ಪ್ರಭಾವದಿಂದ ತಾಯಿಯ ಆರೋಗ್ಯದಲ್ಲಿ ಏರುಪೇರಾಗುತ್ತದೆ. ಅಂದರೆ ಪಿತ್ತ ಪ್ರಕೃತಿ ಹೆಚ್ಚುತ್ತದೆ. ಇದರಿಂದ ಬೆಳಗಿನ ಹೊತ್ತು ವಾಂತಿಯಾಗುವುದು, ಸುಸ್ತಾಗುವುದು (ಮಾರ್ನಿಂಗ್ ಸಿಕ್‌ನೆಸ್) ಆಗುತ್ತದೆ.



ಮೂರನೇ ತಿಂಗಳು ಗುರು
ಗರ್ಭಧರಿಸಿದ ಮೂರನೇ ತಿಂಗಳು ಗುರುಗ್ರಹದ ಅಧೀನದಲ್ಲಿರುತ್ತದೆ. ಭ್ರೂಣದ ಲಿಂಗವು ಈ ತಿಂಗಳಿನಲ್ಲಿ ತಿಳಿಯುತ್ತದೆ. ಗುರುವಿನಿಂದ ಗುಪ್ತಾಂಗ, ಸಂತಾನೋತ್ಪತ್ತಿ ಅಂಗಗಳನ್ನು ರೂಪುಗೊಂಡು, ಭ್ರೂಣದ ಬೆಳವಣಿಗೆಯಾಗುವುದರ ಮೂಲಕ ಆಕಾರವನ್ನು ಪಡೆಯುತ್ತದೆ. ಮಂಗಳನ ಪ್ರಭಾವವನ್ನು ಕಡಿಮೆ ಮಾಡಿ, ತಾಯಿಯ ಆರೋಗ್ಯದಲ್ಲಿ ಸುಧಾರಣೆಯನ್ನು ತರುವುದರೊಂದಿಗೆ ಸಂತೋಷವನ್ನು ನೀಡುತ್ತಾನೆ ಗುರುಗ್ರಹ.

ನಾಲ್ಕರಲ್ಲಿ ಸೂರ್ಯನ ಅಧಿಪತ್ಯ
ನಾಲ್ಕನೇ ತಿಂಗಳು ಸೂರ್ಯಗ್ರಹದ ಅಧೀನದಲ್ಲಿರುತ್ತೆ. ಸೂರ್ಯನ ಬಿಸಿಲು ಮೂಳೆಗಳನ್ನು ಗಟ್ಟಿಗೊಳಿಸುತ್ತದೆ ಎಂದು ವಿಜ್ಞಾನವು ಹೇಳುತ್ತದೆ. ಈ ತಿಂಗಳನಲ್ಲಿ ಸೂರ್ಯಗ್ರಹದ ಸಹಾಯದಿಂದ ಮೂಳೆಗಳ ಬೆಳವಣಿಗೆಯಾಗುತ್ತದೆ.

ಇದನ್ನು ಓದಿ: ಜೂನ್ ತಿಂಗಳಿನಲ್ಲಿ ಜನಿಸಿದವರ ಸ್ವಭಾವ ಹೀಗಿರತ್ತೆ!. 

ಐದರಲ್ಲಿ ಚಂದ್ರ
ಐದನೇ ತಿಂಗಳು ಚಂದ್ರಗ್ರಹದ ಸುಪರ್ದಿಯಲ್ಲಿರುತ್ತದೆ, ಮತ್ತು ಚಂದ್ರನ ಅಂಶವಾದ ನೀರು ಸಹಾಯಕವಾಗಿರುತ್ತದೆ. ಈ ತಿಂಗಳಿನಲ್ಲಿ ನರಗಳ ಬೆಳವಣಿಗೆ, ರಕ್ತನಾಳಗಳು, ಅಪದಮನಿಗಳು ಮತ್ತು ರಕ್ತದ ಹರಿಯುವಿಕೆಯ ಕಾರ್ಯ ಚಂದ್ರಗ್ರಹದ ಅವಧಿಯಲ್ಲಿ ಬೆಳವಣಿಗೆ ಹೊಂದುತ್ತದೆ.

ಆರನೇ ತಿಂಗಳಲ್ಲಿ ಶನಿ
ಸೂರ್ಯನ ಮಗ ಶನಿಯ ಕಾರ್ಯ ಆರನೇ ತಿಂಗಳಿನಲ್ಲಿ. ಈ ತಿಂಗಳಿನಲ್ಲಿ ಗರ್ಭದಲ್ಲಿ ಶಿಶುವಿನ ಕೂದಲು, ಬಣ್ಣ ಮತ್ತು ದೇಹದ ರಚನೆಯಾಗುತ್ತದೆ.  

ಏಳನೇ ತಿಂಗಳಲ್ಲಿ ಬುಧ
ಏಳನೇ ತಿಂಗಳನ್ನು ಬುಧಗ್ರಹ ಆಳುತ್ತದೆ. ಈ ತಿಂಗಳಿನಲ್ಲಿ ಮೆದುಳು ಬುದ್ಧಿ ಶಕ್ತಿಯ ಬೆಳವಣಿಗೆಯಾಗುತ್ತದೆ. ಬುಧನಿಂದ ಬುದ್ಧಿಶಕ್ತಿ ಮತ್ತು ಅರಿವಿನ ಗುಣ ಬರುತ್ತದೆ. ತಂದೆ ಮತ್ತು ತಾಯಿ ಏಳನೇ ತಿಂಗಳಿನಲ್ಲಿ ಧ್ಯಾನ ಮತ್ತು ಇಂದ್ರಿಯ ನಿಗ್ರಹಕ್ಕೆ ಹೆಚ್ಚು ಒತ್ತುಕೊಟ್ಟು ಅಭ್ಯಸಿಸಬೇಕೆಂದು ನಮ್ಮ ಪ್ರಾಚೀನರು ತಿಳಿಸಿದ್ದಾರೆ.
ಈ ತಿಂಗಳಿನಲ್ಲಿ ಗರ್ಭದಲ್ಲಿರುವ ಶಿಶುವು ಹೆಚ್ಚು ಜಾಗೃತವಾಗಿರುವ ಕಾರಣ ತಾಯಿಯು ಯಾವಾಗಲೂ ಸಂತೋಷವಾಗಿರಬೇಕು. ಒಳ್ಳೆಯ ಆಲೋಚನೆಗಳನ್ನು ಮಾಡಬೇಕು. ಹೆಚ್ಚೆಚ್ಚು ಖುಷಿಯಾಗಿರಲು ಪ್ರಯತ್ನಿಸುವುದರಿಂದ ಮಗುವಿನ ಮೇಲೆ ಉತ್ತಮ ಪರಿಣಾಮವಾಗುತ್ತದೆ.  ಈ ಸಂದರ್ಭದಲ್ಲಿ ಗರ್ಭದಲ್ಲಿ ಶಿಶು ಎಷ್ಟು ಜಾಗೃತವಾಗಿರುತ್ತದೆ ಎನ್ನುವುದಕ್ಕೆ ಮಹಾಭಾರತದ   ಹೇಳುವಂತೆ ಸುಭದ್ರೆಯ ಗರ್ಭದಲ್ಲಿದ್ದ ಅಭಿಮನ್ಯುವಿನ ಕಥೆಯೇ ಸಾಕ್ಷಿ.  

ಸೂಕ್ಷ್ಮ ಮಾಸ ಎಂಟು
ತಾಯಿಯ ಜಾತಕದಲ್ಲಿನ ಗ್ರಹಗಳ ಅಧಿಪತ್ಯದಲ್ಲಿ ಎಂಟನೇ ತಿಂಗಳು ಇರುತ್ತದೆ. ಈ ತಿಂಗಳಿನಲ್ಲಿ ಜ್ಯೋತಿಷ್ಯದ ಪ್ರಕಾರ ಯಾವುದೇ ಗ್ರಹವಾಗಿರಬಹುದು ಪ್ರತಿ ಎರಡು ತಾಸಿಗೊಮ್ಮೆ ಅದರ ಸ್ಥಿತಿಯಲ್ಲಿ  ಬದಲಾವಣೆ ಬರುವ ಸಾಧ್ಯತೆ ಇರುತ್ತದೆ. ಗ್ರಹಗಳ ಸ್ಥಿತಿ ಕಠಿಣವಾಗಿದ್ದರೆ ಈ ತಿಂಗಳಿನಲ್ಲಿ ಮಗು ಜನನವಾಗುವ ಸಾಧ್ಯತೆ ಇರುತ್ತದೆ ಅಥವಾ ಇನ್ನಿತರ ಸಮಸ್ಯೆಗಳನ್ನು ಎದುರಿಸಬೇಕಾಗಬಹುದು. ಎಂಟನೇ ತಿಂಗಳಿನಲ್ಲಿ ಹೆಚ್ಚು ಸೂಕ್ಷ್ಮವಾಗಿ ಇರಬೇಕೆಂದು ಹೇಳುತ್ತಾರೆ ಪೂರ್ವಜರು ಮತ್ತು ಜ್ಯೋತಿಷ್ಯ ಶಾಸ್ತ್ರ.

ಒಂಭತ್ತಕ್ಕೆ ಚಂದ್ರ
ಈ ತಿಂಗಳಿನಲ್ಲಿ ಚಂದ್ರನ ಅಧಿಪತ್ಯವಿರುತ್ತದೆ. ಮಗುವು ತಾಯಿ ಗರ್ಭದಿಂದ ಸುಲಭವಾಗಿ ಹೊರಬರಲು ಸಹಾಯ ಮಾಡುತ್ತದೆ ಚಂದ್ರಗ್ರಹ. ಹೊಟ್ಟೆಯಲ್ಲಿ ಸರಿಯಾದ ಕ್ರಮದಲ್ಲಿ ಕೂರುವಂತೆ ಮಾಡುವುದು ಸಹ ಚಂದ್ರನ ಕಾರ್ಯ.

ಇದನ್ನು ಓದಿ: ನಿಮಗೂ ಸರ್ಕಾರಿ ಕೆಲಸ ಸಿಗುವ ಯೋಗವಿರಬಹುದು!...

ಉಳಿದ ಒಂಭತ್ತು ದಿನಕ್ಕೆ ಸೂರ್ಯ
ಉಳಿದ 9 ದಿನವನ್ನು ಸೂರ್ಯ ನೋಡಿಕೊಳ್ಳುತ್ತಾನೆ. ಸೂರ್ಯ ದೇಹದಲ್ಲಿ ಶಾಖವನ್ನು ಉತ್ಪತ್ತಿ ಮಾಡುವುದರಿಂದ, ನಿಧಾನವಾಗಿ ಶಿಶುವು ತಾಯಿಗರ್ಭದಿಂದ ಹೊರಬರಲು ಅನುವಾಗುತ್ತದೆ.