ರಾಹುಲ್ ಆದಾಯ 54 ಲಕ್ಷದಿಂದ 9 ಕೋಟಿ ಹೇಗೆ?: ಬಿಜೆಪಿ ಪ್ರಶ್ನೆ
ರಾಹುಲ್ ಆದಾಯ 54 ಲಕ್ಷದಿಂದ 9 ಕೋಟಿ ಹೇಗೆ?: ಬಿಜೆಪಿ| ಮೂಲವಿಲ್ಲದೆ ಆದಾಯ ಗಳಿಕೆ ರಾಹುಲ್ ಮಾದರಿ ಅಭಿವೃದ್ಧಿಯೇ?| ರಾಹುಲ್ ಕುರಿತು ಕೇಂದ್ರ ಸಚಿವ ರವಿಶಂಕರ್ ಪ್ರಸಾದ್ ಲೇವಡಿ
ನವದೆಹಲಿ[ಮಾ.24]: ಯುಪಿಎ ಅಧಿಕಾರಾವಧಿಯಲ್ಲಿದ್ದ 2004ರಿಂದ 2014ರ ಅವಧಿಯೊಳಗೆ ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಅವರ ಆದಾಯ ಏಕಾಏಕಿ 9 ಕೋಟಿ ರು.ಗೆ ಏರಿಕೆಯಾಗಿದೆ. ಆದರೆ, ಈ ಆದಾಯಕ್ಕೆ ರಾಹುಲ್ ಗಾಂಧಿ ಬಳಿ ಯಾವುದೇ ಮೂಲಗಳಿಲ್ಲ ಎಂದು ಬಿಜೆಪಿ ಆರೋಪಿಸಿದೆ. ಬಿಜೆಪಿಯ ಆ ಆರೋಪದ ಬಗ್ಗೆ ಕಾಂಗ್ರೆಸ್ ಇದುವರೆಗೂ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ಶನಿವಾರ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಕೇಂದ್ರ ಸಚಿವ ರವಿಶಂಕರ್ ಪ್ರಸಾದ್ ಅವರು, ‘2004ರಲ್ಲಿ 55,38,123 ರು. ಇದ್ದ ರಾಹುಲ್ ಗಾಂಧಿ ಅವರ ಆದಾಯ 2009ರಲ್ಲಿ 2 ಕೋಟಿ ರು.ಗೆ ಏರಿಕೆಯಾಗಿತ್ತು. ಆದರೆ, 2014ರ ಲೋಕಸಭಾ ಚುನಾವಣೆ ಅಫಿಡೇವಿಟ್ನಲ್ಲಿ ಅದು 9 ಕೋಟಿ ರು.ಗೆ ಜಿಗಿದಿದೆ. ಓರ್ವ ಸಂಸದನ ಆದಾಯ ಎಷ್ಟುಎಂಬುದು ನಮಗೆಲ್ಲರಿಗೂ ಗೊತ್ತಿದೆ,’ ಎಂದರು.
‘2004ರಲ್ಲಿ 55 ಲಕ್ಷ ರು. ಇದ್ದ ರಾಹುಲ್ ಗಾಂಧಿ ಅವರ ಆದಾಯವು 2014ರ ಅವಧಿಯಲ್ಲಿ 9 ಕೋಟಿ ರು.ಗೆ ಏರಿಕೆಯಾಗಿದೆ. ಈ ಬಗ್ಗೆ ಅವರ ಚುನಾವಣೆಗೆ ನಾಮಪತ್ರ ಸಲ್ಲಿಕೆ ವೇಳೆಯ ಅಫಿಡವಿಟ್ನಿಂದ ಬಹಿರಂಗವಾಗಿದೆ. ಓರ್ವ ಸಂಸದನ ಆದಾಯ ಈ ಪರಿಯಾಗಿ ಒಮ್ಮೆಲ್ಲೇ ಏರಿಕೆಯಾಗಿದ್ದು ಹೇಗೆ. ಯಾವುದೇ ಮೂಲಗಳಿಲ್ಲದೆ ಆದಾಯ ಏರಿಕೆಯಾಗುವುದೇ ರಾಹುಲ್ ಗಾಂಧಿ ಅವರ ಅಭಿವೃದ್ಧಿಯ ಮಾದರಿಯೇ,’ ಎಂದು ವ್ಯಂಗ್ಯವಾಡಿದರು.