ವಿದೇಶಿ ಪೆಡ್ಲರ್‌ಗಳನ್ನು 1 ಕಿ.ಮೀ. ಬೆನ್ನಟ್ಟಿ ಹಿಡಿದರು..!
ಅಂಚೆ ಕಚೇರಿಗೆ ಡ್ರಗ್ಸ್ ಪಾರ್ಸೆಲ್‌ ಪಡೆಯಲು ಬಂದಿದ್ದ ಕೀನ್ಯಾ ಪ್ರಜೆಗಳು| ಅಧಿಕಾರಿಗಳನ್ನೇ ತಳ್ಳಿ ಪರಾರಿಗೆ ಯತ್ನ| ಬೆಂಗಳೂರಿನ ಚಾಮರಾಜಪೇಟೆಯಲ್ಲಿ ಘಟನೆ|
 )
Followಬೆಂಗಳೂರು(ಡಿ.23): ವಿದೇಶಿ ಅಂಚೆ ಮೂಲಕ ಮಾದಕ ವಸ್ತುಗಳನ್ನು ತರಿಸಿಕೊಂಡು ನಗರದಲ್ಲಿ ಮಾರಾಟ ಮಾಡಲು ಯತ್ನಿಸುತ್ತಿದ್ದ ಮಹಿಳೆ ಸೇರಿ ಇಬ್ಬರು ವಿದೇಶಿ ಪ್ರಜೆಗಳು ಕೇಂದ್ರ ಮಾದಕ ನಿಯಂತ್ರಣ ದಳ (ಎನ್‌ಸಿಬಿ) ಬಲೆಗೆ ಬಿದ್ದಿದ್ದಾರೆ.
ಕೀನ್ಯಾ ದೇಶದ ರಾಮಲಾ ಶೇಡಫಾ (30) ಮತ್ತು ಇಮ್ಯಾನ್ಯುಯಲ್‌ ಮೈಕೆಲ್‌ ಬಂಧಿತರು. ಆರೋಪಿಗಳಿಂದ .55 ಲಕ್ಷ ಮೌಲ್ಯದ 3000 ಎಂಡಿಎಂಎ ಮಾತ್ರೆಗಳು, 240 ಗ್ರಾಂ ಕೊಕೇನ್‌ ಜಪ್ತಿ ಮಾಡಲಾಗಿದೆ ಎಂದು ಎನ್‌ಸಿಬಿ ಅಧಿಕಾರಿಗಳು ತಿಳಿಸಿದ್ದಾರೆ.
ಡಿ.17ರಂದು ಚಾಮರಾಜಪೇಟೆಯಲ್ಲಿರುವ ವಿದೇಶಿ ಅಂಚೆ ಕಚೇರಿಗೆ ನೆದರ್‌ಲ್ಯಾಂಡ್‌ ಮತ್ತು ಇಥಿಯೋಪಿಯಾದಿಂದ ಎರಡು ಪಾರ್ಸೆಲ್‌ಗಳು ಬಂದಿದ್ದವು. ಈ ಪೈಕಿ ಒಂದು ಪಾರ್ಸೆಲ್‌ನ ಗಾತ್ರ ಮತ್ತು ತೂಕದಲ್ಲಿ ಅನುಮಾನಗೊಂಡು ಪರಿಶೀಲಿಸಿದಾಗ ಮಾದಕ ವಸ್ತು ಇರುವುದು ಪತ್ತೆಯಾಗಿದ್ದು, ಅದನ್ನು ತೆರೆದು ನೋಡಿದಾಗ ಬಟ್ಟೆಗಳಲ್ಲಿ ಸುತ್ತಿ ಎಂಡಿಎಂ ಮಾತ್ರೆಗಳನ್ನು ಇಡಲಾಗಿತ್ತು. ಇದೇ ವೇಳೆ ಇಥಿಯೋಪಿಯಾದಿಂದ ಖಾಕಿ ಬಣ್ಣದ ಪಾರ್ಸೆಲ್‌ನ ಒಳ ಭಾಗದಲ್ಲಿ ಕೊಕೇನ್‌ ಪುಡಿಯನ್ನು ಪ್ಲಾಸ್ಟಿಕ್‌ ಕವರ್‌ನಲ್ಲಿ ತುಂಬಿ ಮೇಲ್ಭಾಗದಲ್ಲಿ ಬೇರೆ ಬೇರೆ ವಸ್ತುಗಳನ್ನು ಇಟ್ಟಿದ್ದರು.
ಟ್ರಾವೆಲ್ಸ್‌ ಏಜೆನ್ಸಿ ಸೋಗಲ್ಲಿ ಡ್ರಗ್ಸ್ ಮಾಫಿಯಾ: 32 ಲಕ್ಷ ಮೌಲ್ಯದ ಮಾದಕ ವಸ್ತು ಜಪ್ತಿ
ಖಚಿತ ಮಾಹಿತಿ ಮೇರೆಗೆ ಡಿ.18ರಂದು ಬೆಂಗಳೂರು ಎನ್‌ಸಿಬಿ ವಲಯ ನಿರ್ದೇಶಕ ಅಮಿತ್‌ ಗುವಾಟೆ ನೇತೃತ್ವದ ತಂಡ ಚಾಮರಾಜಪೇಟೆ ವಿದೇಶಿ ಅಂಚೆ ಕಚೇರಿ ಬಳಿ ಆರೋಪಿಗಳ ಆಗಮನಕ್ಕಾಗಿ ಕಾಯುತ್ತಿತ್ತು. ಇದೇ ವೇಳೆ ಇಬ್ಬರು ಆರೋಪಿಗಳು ಪಾರ್ಸೆಲ್‌ ಕೊಂಡೊಯ್ಯಲು ಅಂಚೆ ಕಚೇರಿ ಬಳಿ ಬಂದಿದ್ದರು. ಆರೋಪಿಗಳನ್ನು ಬಂಧಿಸಲು ಬಂದ ಅಧಿಕಾರಿಗಳನ್ನು ತಳ್ಳಿ ಕಾಲ್ಕಿತ್ತಿದ್ದರು. ಸುಮಾರು 1 ಕಿ.ಮೀ. ಆರೋಪಿಗಳನ್ನು ಬೆನ್ನಟ್ಟಿತಂಡ ಬಂಧಿಸಿದೆ. ಘಟನೆಯಲ್ಲಿ ಅಧಿಕಾರಿ ಸುನೀಲ್‌ ಪರೀವಾ ಗಾಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಎನ್‌ಸಿಬಿ ಅಧಿಕಾರಿಗಳು ತಿಳಿಸಿದ್ದಾರೆ.
ಆರೋಪಿಗಳ ವಿಚಾರಣೆ ಸಂದರ್ಭದಲ್ಲಿ ಪಾಸ್‌ಪೋರ್ಟ್‌ ಮತ್ತು ವೀಸಾ ವಶಕ್ಕೆ ಪಡೆಯಲಾಗಿದ್ದು, ವಿದ್ಯಾರ್ಥಿ ಮತ್ತು ಪ್ರವಾಸಿ ವೀಸಾದಲ್ಲಿ ಬೆಂಗಳೂರಿಗೆ ಬಂದಿದ್ದರು. ಆದರೆ, ಅವುಗಳು ನಕಲಿ ಎಂಬುದು ಗೊತ್ತಾಗಿದೆ. ಹೊಸ ವರ್ಷಾಚರಣೆ ಸಂದರ್ಭದಲ್ಲಿ ಐಷಾರಾಮಿ ಪಾರ್ಟಿ ಹಾಗೂ ಹೋಟೆಲ್‌ಗಳಲ್ಲಿ ಡ್ರಗ್‌ ಮಾರಾಟ ಮಾಡಲು ಮುಂದಾಗಿದ್ದರು ಎಂದು ತನಿಖಾಧಿಕಾರಿಗಳು ಮಾಹಿತಿ ನೀಡಿದರು.
