ಬೆಂಗಳೂರಿನಲ್ಲಿ ಹೆಚ್ಚಾಗಿದೆ RX ಬೈಕ್ ಕಳ್ಳತನ: ಕಳ್ಳರಿಗೂ ಇಷ್ಟವಾಯ್ತು ಆರ್ ಎಕ್ಸ್ ಕ್ರೇಜ್!
ಆರ್ ಎಕ್ಸ್ ಬೈಕ್ ಇಟ್ಕೊಂಡಿರೋರು ಈ ಸ್ಟೋರಿನಾ ನೋಡ್ಲೇ ಬೇಕು. RX ಬೈಕ್ ಗಳನ್ನೇ ಟಾರ್ಗೆಟ್ ಮಾಡುತ್ತಿದೆ ಕಳ್ಳರ ಗ್ಯಾಂಗ್ .
ವರದಿ :ಚೇತನ್ ಮಹಾದೇವ, ಏಷ್ಯಾನೆಟ್ ಸುವರ್ಣನ್ಯೂಸ್
ಬೆಂಗಳೂರು, (ಸೆಪ್ಟೆಂಬರ್.13) : ನಿಮ್ಮ ಮನೆಯಲ್ಲಿ ಆರ್ ಎಕ್ಸ್ ಬೈಕ್ ಇದ್ರೆ ಅದನ್ನು ಜೋಪಾನವಾಗಿ ನೋಡ್ಕೊಳ್ಳಿ... ಕೊಂಚ ಯಾಮಾರಿದ್ರೂ ಮನೆಯ ಪಾರ್ಕಿಂಗ್‌ನಿಂದಲೇ ನಿಮ್ಮ ಬೈಕ್ ಕಳ್ಳರ ಪಾಲಾಗುತ್ತೆ. ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಆರ್ ಎಕ್ಸ್ ಬೈಕ್‌ಗಳನ್ನೇ ಟಾರ್ಗೆಟ್ ಮಾಡಿ ಕಳವು ಮಾಡುತ್ತಿರುವ ಕಳ್ಳರ ಗ್ಯಾಂಗ್ ಈಗ ಆ್ಯಕ್ಟೀವ್ ಆಗಿದೆ.
RX ಬೈಕ್ ಗಳನ್ನೇ ಟಾರ್ಗೆಟ್ ಮಾಡುತ್ತಿದೆ ಕಳ್ಳರ ಗ್ಯಾಂಗ್
ಬೈಕ್‌ಗಳಲ್ಲಿ ಒಬ್ಬೊಬ್ಬರಿಗೆ ಒಂದೊಂದು ಬ್ಯ್ರಾಂಡ್‌ನ ಬೈಕ್ ಅಂದ್ರೆ ಸಿಕ್ಕಾಪಟ್ಟೆ ಇಷ್ಟ. ಆ ಲಿಸ್ಟ್‌ನಲ್ಲಿ ಆರ್ ಎಕ್ಸ್ ಬೈಕ್ ಸಹ ಬರುತ್ತೆ. ಆರ್ ಎಕ್ಸ್ ಬೈಕ್ ಎಷ್ಟು ಹಳೆಯದಾಗಿರುತ್ತೋ ಅಷ್ಟು ಬೆಲೆ ಜಾಸ್ತಿ. ಕಾರಣ ಇಷ್ಟೆ ಆರ್ ಎಕ್ಸ್ ಗೆ ಇರುವ ಕ್ರೇಜ್. ಹೌದು, ಆರ್ ಎಕ್ಸ್ ಬೈಕ್‌ಗಳಿಗೆ ಇರುವ ಕ್ರೇಜ್ ಈಗ ಬೈಕ್ ಕಳ್ಳತನಕ್ಕೆ ಕಾರಣವಾಗುತ್ತಿದೆ. ಬೆಂಗಳೂರಿನಲ್ಲಿ ಮನೆಗಳ ಪಾರ್ಕಿಂಗ್‌ನಲ್ಲಿ ನಿಲ್ಲಿಸಿರುವ ಆರ್ ಎಕ್ಸ್ ಬೈಕ್‌ಗಳನ್ನೇ ಟಾರ್ಗೆಟ್ ಮಾಡಿ ಕಳ್ಳರು ಕಳವು ಮಾಡ್ತಿದ್ದಾರೆ. ಇಂತದೊಂದು ಗ್ಯಾಂಗ್ ಈಗ ನಗರದಲ್ಲಿ ಆ್ಯಕ್ಟೀವ್ ಆಗಿದೆ. ಸದ್ಯ ಜೆಜೆ ನಗರ ಠಾಣಾ ವ್ಯಾಪ್ತಿ ಮನೆ ಮುಂದೆ ನಿಲ್ಲಿಸಿದ್ದ ಆರ್ ಎಕ್ಸ್ ಬೈಕ್ ಹ್ಯಾಂಡಲ್ ಲಾಕ್ ಮುರಿದು ಬೈಕ್ ಕದ್ದು ಆರೋಪಿಯೊಬ್ಬ ಪರಾರಿಯಾಗಿದ್ದಾನೆ. ಬೈಕ್ ಕಳ್ಳತನ ಮಾಡುತ್ತಿರುವ ದೃಶ್ಯ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ಬೈಕ್ ಕಳ್ಳರ ಜಾಲ ಭೇದಿಸಿದ ರಾಯಚೂರು ಪೊಲೀಸ್ರು, ಖದೀಮರ ಖತರ್ನಾಕ್ ಐಡಿಯಾ ಕೇಳಿ ಪೊಲೀಸರೇ ಶಾಕ್
ಆರ್ ಎಕ್ಸ್ ಬೈಕ್‌ಗಳಿಗೆ ಇರುವ ಕ್ರೇಜ್‌ನಿಂದಲೇ ಕಳವಿಗೆ ಕಾರಣವಾಗ್ತಿದೆ. ಅದರಲ್ಲೂ ವೀಲಿಂಗ್ ಮಾಡುವ ಚಟವಿರುವವರು ಹೆಚ್ಚಾಗಿ ಈ ಬೈಕ್ ಕಳವು ಮಾಡೋಕೆ ಮುಂದಾಗ್ತಿದ್ದಾರೆ ಎನ್ನಲಾಗುತ್ತಿದೆ. ಇನ್ನು ಹಳೇ ಆರ್ ಎಕ್ಸ್ ಬೈಕ್‌ಗಳನ್ನು ಖರೀದಿಸಿ ಅದನ್ನು ಗ್ಯಾರೇಜ್‌ಗೆ ಬಿಟ್ಟು 20 ಸಾವಿರದಷ್ಟು ಖರ್ಚು ಮಾಡಿ, ಬೈಕ್ ರೆಡಿ ಮಾಡಿಸಿದ್ರೆ, ಮಾರುಕಟ್ಟೆಯಲ್ಲಿ ಆ ಬೈಕ್ ಬೆಲೆ 1 ಲಕ್ಷ ದಿಂದ 1.5 ಲಕ್ಷದವರೆಗೆ ಏರುತ್ತದೆ. ಅದರಲ್ಲೂ ಆರ್ ಎಕ್ಸ್ 100 ಹಾಗೂ 135 ಸಿಸಿ ಬೈಕ್‌ಗಳಿಗೆ ಬೇಡಿಕೆ ಹೆಚ್ಚಿದೆ. ಹೀಗಾಗಿಯೇ ಈ ಬೈಕ್‌ಗಳನ್ನು ಕಳವು ಮಾಡುವ ಪುಂಡರು ಮೊದಲಿಗೆ ಅವುಗಳನ್ನು ವೀಲಿಂಗ್ ಮಾಡಲು ಬಳಸಿಕೊಂಡು, ನಂತರ ಅದನ್ನು ಲಕ್ಷಾಂತರ ರೂಪಾಯಿಗೆ ಮಾರಿ ಬಿಡುತ್ತಾರೆ.
ಈ ಹಳೆಯ ಆರ್ ಎಕ್ಸ್ ಬೈಕ್‌ಗಳಿಗೆ ದಾಖಲೆಗಳೇ ಇರೋದಿಲ್ಲ. ಹೀಗಾಗಿ ಈ ಬೈಕ್‌ಗಳನ್ನ ಕಳವು ಮಾಡಿದ್ರೆ ಮಾರಾಟವೂ ಸುಲಭ ಹಾಗೂ ದೂರು ಕೊಟ್ರೂ ಬೈಕ್ ಪತ್ತೆ ಮಾಡುವುದು ಪೊಲೀಸ್ರಿಗೆ ದೊಡ್ಡ ಸವಾಲಾಗಿದೆ.
