ಬೆಂಗಳೂರು: 3 ಕೋಟಿಯ ಇ-ಸಿಗರೆಟ್ ಜಪ್ತಿ, ವ್ಯಕ್ತಿ ಸೆರೆ
ಗುರಪ್ಪನಪಾಳ್ಯದ ಶೋಯೆಬ್ ಬಂಧಿತನಾಗಿದ್ದು, ಆರೋಪಿಯಿಂದ ₹3 ಕೋಟಿ ಮೌಲ್ಯದ ಇ-ಸಿಗರೆಟ್ ಜಪ್ತಿ ಮಾಡಲಾಗಿದೆ. ಎರಡು ವರ್ಷಗಳಿಂದ ಅಕ್ರಮವಾಗಿ ಇ-ಸಿಗರೆಟ್ ಮಾರಾಟದಲ್ಲಿ ಶೋಯೆಬ್ ತೊಡಗಿದ್ದ. ಈ ಬಗ್ಗೆ ಖಚಿತ ಮಾಹಿತಿ ಪಡೆದು ಆತನ ಮನೆ ಮೇಲೆ ದಾಳಿ ನಡೆಸಿದಾಗ ಮಾಲಿನ ಸಮೇತ ಸಿಕ್ಕಿಬಿದ್ದ ಆರೋಪಿ.
ಬೆಂಗಳೂರು(ಫೆ.01): ಮನೆಯೊಂದರ ಮೇಲೆ ದಾಳಿ ನಡೆಸಿ ಅಕ್ರಮವಾಗಿ ₹3 ಕೋಟಿ ಮೌಲ್ಯದ ನಿಷೇಧಿತ ಎಲೆಕ್ಟ್ರಾನಿಕ್ ಸಿಗರೆಟ್‌ಗಳನ್ನು ಸಂಗ್ರಹಿಸಿದ್ದ ವ್ಯಕ್ತಿಯನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.
ಗುರಪ್ಪನಪಾಳ್ಯದ ಶೋಯೆಬ್ ಬಂಧಿತನಾಗಿದ್ದು, ಆರೋಪಿಯಿಂದ ₹3 ಕೋಟಿ ಮೌಲ್ಯದ ಇ-ಸಿಗರೆಟ್ ಜಪ್ತಿ ಮಾಡಲಾಗಿದೆ. ಎರಡು ವರ್ಷಗಳಿಂದ ಅಕ್ರಮವಾಗಿ ಇ-ಸಿಗರೆಟ್ ಮಾರಾಟದಲ್ಲಿ ಶೋಯೆಬ್ ತೊಡಗಿದ್ದ. ಈ ಬಗ್ಗೆ ಖಚಿತ ಮಾಹಿತಿ ಪಡೆದು ಆತನ ಮನೆ ಮೇಲೆ ದಾಳಿ ನಡೆಸಿದಾಗ ಮಾಲಿನ ಸಮೇತ ಸಿಕ್ಕಿಬಿದ್ದ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಕರಾವಳಿಯ ಶಿಕ್ಷಣ ಕ್ಯಾಂಪಸ್‌ಗಳ ಸುತ್ತಮುತ್ತ ಮಾದಕದ್ರವ್ಯ ಘಾಟು..!
ದುಬೈನಿಂದ ಕೊರಿಯರ್ ಮೂಲಕ ಇ-ಸಿಗರೆಟ್?:
ಈ ಮೊದಲು ದುಬೈನಲ್ಲಿ ಕೆಲಸದಲ್ಲಿದ್ದ ಕೇರಳ ಮೂಲದ ಶೋಯೆಬ್, ಕೊರೋನಾ ವೇಳೆ ಕೆಲಸ ಕಳೆದುಕೊಂಡು ನಗರಕ್ಕೆ ಮರಳಿದ್ದ. ದುಬೈನಲ್ಲಿದ್ದಾಗ ಆತನಿಗೆ ಇ-ಸಿಗರೆಟ್ ಮಾರಾಟಗಾರರ ಜತೆ ಸಂಪರ್ಕವಿತ್ತು. ಬೆಂಗಳೂರಿಗೆ ಮರಳಿದ ಬಳಿಕ ನಗರದಲ್ಲಿ ಇ-ಸಿಗರೆಟ್‌ಗೆ ಒಳ್ಳೆಯ ಬೇಡಿಕೆ ಇದೆ ಎಂಬ ಮಾಹಿತಿ ತಿಳಿದ ಆತ, ದುಬೈನ ಸ್ನೇಹಿತರ ಮೂಲಕ ಇ-ಸಿಗರೆಟ್ ತರಿಸಿಕೊಂಡು ನಗರದಲ್ಲಿ ದುಬಾರಿ ಬೆಲೆಗೆ ಮಾರುತ್ತಿದ್ದ.
ಕೆಲ ದಿನಗಳ ಹಿಂದೆ ಶೋಯೆಬ್‌ಗೆ ದುಬೈನಿಂದ ಕೊರಿಯರ್ ಮೂಲಕ ಸಿಗರೆಟ್ ಪಾರ್ಸಲ್ ಬಂದಿತ್ತು. ಚೆನ್ನೈ ವಿಮಾನ ನಿಲ್ದಾಣಕ್ಕೆ ಪಾರ್ಸಲ್ ಬಂದು ಅಲ್ಲಿಂದ ಶೋಯೆಬ್‌ಗೆ ಕೈ ಸೇರಿತ್ತು. ಹೀಗಾಗಿ ಈ ಕೊರಿಯರ್ ಕುರಿತು ಚೆನ್ನೈ ಕಸ್ಟಮ್ಸ್‌ ಅಧಿಕಾರಿಗಳಿಂದ ಮಾಹಿತಿ ಕೋರಿದ್ದೇವೆ ಎಂದು ಸಿಸಿಬಿ ಅಧಿಕಾರಿಗಳು ಹೇಳಿದ್ದಾರೆ.
