WPL 2023: ಚೊಚ್ಚಲ ಪ್ರಶಸ್ತಿಗಾಗಿಂದು ಮುಂಬೈ vs ಡೆಲ್ಲಿ ಫೈನಲ್ ಫೈಟ್
* ಚೊಚ್ಚಲ ವುಮೆನ್ಸ್ ಪ್ರೀಮಿಯರ್ ಲೀಗ್ ಫೈನಲ್‌ಗೆ ಕ್ಷಣಗಣನೆ
* ಪ್ರಶಸ್ತಿಗಾಗಿ ಮುಂಬೈ ಇಂಡಿಯನ್ಸ್‌-ಡೆಲ್ಲಿ ಕ್ಯಾಪಿಟಲ್ಸ್ ಪೈಪೋಟಿ
* ಬಲಿಷ್ಠ ತಂಡಗಳ ನಡುವಿನ ಪೈಪೋಟಿಗೆ ಕೌಂಟ್‌ ಡೌನ್
ಮುಂಬೈ(ಮಾ.26): ಚೊಚ್ಚಲ ಆವೃತ್ತಿಯ ವುಮೆನ್ಸ್ ಪ್ರೀಮಿಯರ್ ಲೀಗ್(ಡಬ್ಲ್ಯುಪಿಎಲ್‌) ಫೈನಲ್ ಹಣಾಹಣಿಗೆ ವೇದಿಕೆ ಸಜ್ಜುಗೊಂಡಿದ್ದು, ಪ್ರಶಸ್ತಿಗಾಗಿ ಭಾನುವಾರ ಡೆಲ್ಲಿ ಕ್ಯಾಪಿಟಲ್ಸ್ ಹಾಗೂ ಮುಂಬೈ ಇಂಡಿಯನ್ಸ್‌ ತಂಡಗಳು ಸೆಣಸಾಡಲಿವೆ.
ಎರಡೂ ತಂಡಗಳು ಟೂರ್ನಿಯುದ್ದಕ್ಕೂ ಪ್ರಾಬಲ್ಯ ಸಾಧಿಸಿದ್ದು, ಲೀಗ್ ಹಂತದಲ್ಲಿ ಆಡಿದ 8 ಪಂದ್ಯಗಳಲ್ಲಿ ತಲಾ 6 ಗೆಲುವು ಸಾಧಿಸಿದ್ದವು. ಆದರೆ ನೆಟ್‌ ರನ್‌ರೇಟ್‌ ಆಧಾರದಲ್ಲಿ ಡೆಲ್ಲಿ ಗುಂಪಿನಲ್ಲಿ ಅಗ್ರಸ್ಥಾನಿಯಾಗಿ ನೇರವಾಗಿ ಫೈನಲ್ ಪ್ರವೇಶಿಸಿದರೆ, 2ನೇ ಸ್ಥಾನ ಪಡೆದ ಮುಂಬೈ ಎಲಿಮಿನೇಟರ್‌ನಲ್ಲಿ ಯು.ಪಿ.ವಾರಿಯರ್ಸ್‌ ತಂಡವನ್ನು ಸೋಲಿಸಿ ಪ್ರಶಸ್ತಿ ಸುತ್ತಿಗೇರಿದೆ. ಲೀಗ್‌ನಲ್ಲಿ ಡೆಲ್ಲಿ-ಮುಂಬೈ ಎರಡು ಬಾರಿ ಮುಖಾಮುಖಿಯಾಗಿದ್ದು, ಇತ್ತಂಡಗಳು ಒಂದೊಂದು ಗೆಲುವು ಕಂಡಿವೆ.
ಪ್ಲೇ-ಆಫ್‌ ಪ್ರವೇಶಿಸಿದ ಮೊದಲ ತಂಡ ಎನಿಸಿಕೊಂಡಿದ್ದ ಮುಂಬೈಗೆ ನ್ಯಾಥಲಿ ಶೀವರ್, ಹೇಲಿ ಮ್ಯಾಥ್ಯೂಸ್‌ರ ಆಲ್ರೌಂಡ್‌ ಆಟ ಪ್ಲಸ್‌ ಪಾಯಿಂಟ್‌. ನಾಯಕಿ ಹರ್ಮನ್‌ಪ್ರೀತ್ ಕೌರ್, ಯಸ್ತಿಕಾ ಭಾಟಿಯಾ ಬ್ಯಾಟಿಂಗ್ ಆಧಾರಸ್ತಂಭ ಎನಿಸಿಕೊಂಡಿದ್ದರೂ ಇಬ್ಬರೂ ಸ್ಥಿರ ಪ್ರದರ್ಶನ ತೋರಿಲ್ಲ. ಇದು ತಂಡಕ್ಕೆ ಮುಳುವಾಗಬಹುದು. ಯುವ ಸ್ಪಿನ್ನರ್‌ ಸಾಯಿಕಾ ಇಸಾಖ್, ಅಮೇಲಿಯಾ ಕೆರ್‌, ಇಸ್ಸಿ ವೊಂಗ್ ಬೌಲಿಂಗ್‌ನಲ್ಲಿ ಎದುರಾಳಿ ತಂಡಕ್ಕೆ ಮಾರಕವಾಗಿ ಪರಿಣಮಿಸುತ್ತಿದ್ದು, ನಿರ್ಣಾಯಕ ಪಂದ್ಯದಲ್ಲೂ ತಂಡದ ಕೈ ಹಿಡಿಯುವ ನಿರೀಕ್ಷೆಯಲ್ಲಿದ್ದಾರೆ.
WPL 2023: ಹ್ಯಾಟ್ರಿಕ್‌ ವಿಕೆಟ್ ಕಬಳಿಸಿ ಹೊಸ ದಾಖಲೆ ನಿರ್ಮಿಸಿದ ಮುಂಬೈ ಇಂಡಿಯನ್ಸ್‌ ಇಸ್ಸೆ ವಾಂಗ್‌..!
ಮತ್ತೊಂದೆಡೆ ಟೂರ್ನಿಯ ಗರಿಷ್ಠ ಸ್ಕೋರರ್‌ ಎನಿಸಿಕೊಂಡಿರುವ ಮೆಗ್ ಲ್ಯಾನಿಂಗ್(310 ರನ್‌) ಬ್ಯಾಟಿಂಗ್ ಜೊತೆ ನಾಯಕತ್ವದ ಅನುಭವದಲ್ಲೂ ಡೆಲ್ಲಿಗೆ ನೆರವಾಗುತ್ತಿದ್ದು, ಶಫಾಲಿ ವರ್ಮಾರ ಪ್ರದರ್ಶನ ಫೈನಲ್‌ನಲ್ಲಿ ಡೆಲ್ಲಿಗೆ ನಿರ್ಣಾಯಕ ಎನಿಸಿದೆ. ಬೌಲಿಂಗ್‌ನಲ್ಲಿ ಶಿಖಾ ಪಾಂಡೆ, ಮಾರಿಝಾನ್ ಕಾಪ್‌, ಜೊನಾಸೆನ್‌ರನ್ನು ಡೆಲ್ಲಿ ಹೆಚ್ಚಾಗಿ ನೆಚ್ಚಿಕೊಂಡಿದೆ.
ಮತ್ತೆ ಹರ್ಮನ್‌ಪ್ರೀತ್ ಕೌರ್ - ಮೆಗ್ ಲ್ಯಾನಿಂಗ್ ಫೈಟ್
ಭಾರತದ ನಾಯಕಿ ಹರ್ಮನ್‌ ಹಾಗೂ ಆಸ್ಪ್ರೇಲಿಯಾದ ನಾಯಕಿ ಲ್ಯಾನಿಂಗ್ ಮತ್ತೊಮ್ಮೆ ಮಹತ್ವದ ಪಂದ್ಯದಲ್ಲಿ ಮುಖಾಮುಖಿಯಾಗಲಿದ್ದಾರೆ. ಇತ್ತೀಚೆಗೆ ಮಹಿಳಾ ಟಿ20 ವಿಶ್ವಕಪ್‌ ಸೆಮಿಫೈನಲ್‌, 2020ರ ಟಿ20 ವಿಶ್ವಕಪ್‌ ಫೈನಲ್, ಕಳೆದ ವರ್ಷದ ಕಾಮನ್‌ವೆಲ್ತ್‌ ಗೇಮ್ಸ್‌ ಫೈನಲ್‌ನಲ್ಲೂ ಭಾರತ-ಆಸೀಸ್‌ ತಂಡಗಳನ್ನು ಕ್ರಮವಾಗಿ ಹರ್ಮನ್‌ ಹಾಗೂ ಲ್ಯಾನಿಂಗ್ ಮುನ್ನಡೆಸಿದ್ದರು.
ಮೆಗ್ ಲ್ಯಾನಿಂಗ್‌ಗೆ ಮತ್ತೊಂದು ಪ್ರಶಸ್ತಿ ಗೆಲ್ಲುವ ಗುರಿ
ನಾಯಕತ್ವದಲ್ಲಿ ಅಪಾರ ಅನುಭವ ಹೊಂದಿರುವ ಲ್ಯಾನಿಂಗ್, ಆಸ್ಪ್ರೇಲಿಯಾಗೆ 4 ಟಿ20, 1 ಏಕದಿನ ವಿಶ್ವಕಪ್‌ ಗೆಲ್ಲಿಸಿಕೊಟ್ಟಿದ್ದಾರೆ. ಚೊಚ್ಚಲ ಆವೃತ್ತಿಯ ಡಬ್ಲ್ಯುಪಿಎಲ್‌ ಟ್ರೋಫಿ ಗೆಲ್ಲುವ ಮೂಲಕ ಮತ್ತೊಂದು ಹಿರಿಮೆಗೆ ಪಾತ್ರರಾಗಲು ಎದುರು ನೋಡುತ್ತಿದ್ದಾರೆ.
ಸಂಭಾವ್ಯ ತಂಡಗಳು ಹೀಗಿವೆ
ಡೆಲ್ಲಿ ಕ್ಯಾಪಿಟಲ್ಸ್:
ಮೆಗ್ ಲ್ಯಾನಿಂಗ್(ನಾಯಕಿ), ಶಫಾಲಿ ವರ್ಮಾ, ಮಾರಿಝಾನ್ ಕ್ಯಾಪ್, ಜೆಮಿಯಾ ರೋಡ್ರಿಗ್ಸ್‌, ಎಲೈಸಿ ಕ್ಯಾಪ್ಸಿ, ಜೆಸ್ ಜೊನಾಸೆನ್, ತಾನಿಯಾ ಭಾಟಿಯಾ(ವಿಕೆಟ್ ಕೀಪರ್), ಮಿನ್ನು ಮಣಿ, ಶಿಖಾ ಪಾಂಡೆ, ರಾಧಾ ಯಾದವ್, ತಾರಾ ನೊರಿಸ್.
ಮುಂಬೈ ಇಂಡಿಯನ್ಸ್‌:
ಹೀಲೆ ಮ್ಯಾಥ್ಯೂಸ್, ಯಸ್ತಿಕಾ ಭಾಟಿಯಾ(ವಿಕೆಟ್ ಕೀಪರ್), ನಥಾಲಿ ಶೀವರ್ ಬ್ರಂಟ್, ಹರ್ಮನ್‌ಪ್ರೀತ್ ಕೌರ್(ನಾಯಕಿ), ಅಮೆಲಿಯಾ ಕೆರ್ರ್, ಪೂಸ್ತಾ ವಸ್ತ್ರಾಕರ್, ಇಸ್ಸಿ ವೊಂಗ್, ಅಮನ್‌ಜೋತ್ ಕೌರ್, ಹುಮೈರಾ ಖಾಜಿ, ಜಿಂತಿಮಣಿ ಕಲಿತಾ, ಸಾಯಿಕಾ ಇಸಾಖ್.
ಪಂದ್ಯ: ಸಂಜೆ 7.30ಕ್ಕೆ
ನೇರಪ್ರಸಾರ: ಸ್ಪೋಟ್ಸ್‌ರ್‍ 18, ಜಿಯೋ ಸಿನಿಮಾ
ಚಾಂಪಿಯನ್ ತಂಡಕ್ಕೆ 6 ಕೋಟಿ ಬಹುಮಾನ: ಪ್ರಶಸ್ತಿ ಗೆಲ್ಲುವ ತಂಡ 6 ಕೋಟಿ ರು. ನಗದು ಬಹುಮಾನ ಪಡೆಯಲಿದ್ದು, ರನ್ನರ್‌-ಅಪ್‌ ತಂಡಕ್ಕೆ 3 ಕೋಟಿ ರು. ಬಹುಮಾನ ಸಿಗಲಿದೆ.
