ಮೊದಲ ಸಲ ಐಸಿಸಿ ವಿಶ್ವ ಟೆಸ್ಟ್ ಫೈನಲ್‌ನಿಂದ ಟೀಂ ಇಂಡಿಯಾ ಔಟ್! ಫೈನಲ್ ರೇಸ್‌ನಿಂದ ಹೊರಬಿದ್ದಿದ್ದು ಹೇಗೆ?
ಟೀಂ ಇಂಡಿಯಾ ಮೊದಲ ಬಾರಿಗೆ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ ಫೈನಲ್ ತಲುಪಲು ವಿಫಲವಾಗಿದೆ. ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳು ಫೈನಲ್‌ನಲ್ಲಿ ಸ್ಪರ್ಧಿಸಲಿವೆ.
Followಸಿಡ್ನಿ: ಟೀಂ ಇಂಡಿಯಾ ಇದೇ ಮೊದಲ ಬಾರಿ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ ಫೈನಲ್‌ಗೇರಲು ವಿಫಲವಾಗಿದೆ. 2019-21 ಹಾಗೂ 2021-23ರಲ್ಲಿ ಫೈನಲ್ ಪ್ರವೇಶಿಸಿದ್ದ ತಂಡ, 2023-25ರಲ್ಲಿ ಲೀಗ್‌ ಹಂತದಿಂದಲೇ ನಿರ್ಗಮಿಸಿದೆ. ಈ ಬಾರಿ ಫೈನಲ್‌ನಲ್ಲಿ ಹಾಲಿ ಚಾಂಪಿಯನ್‌ ಆಸ್ಟ್ರೇಲಿಯಾ ಹಾಗೂ ದಕ್ಷಿಣ ಆಫ್ರಿಕಾ ತಂಡಗಳು ಮುಖಾಮುಖಿಯಾಗಲಿದೆ. ಜೂನ್‌ 11ರಿಂದ ನಡೆಯಲಿರುವ ಪಂದ್ಯಕ್ಕೆ ಇಂಗ್ಲೆಂಡ್‌ನ ಲಾರ್ಡ್ಸ್‌ ಕ್ರೀಡಾಂಗಣ ಆತಿಥ್ಯ ವಹಿಸಲಿದೆ.
ಇತ್ತೀಚೆಗೆ ತವರಿನಲ್ಲೇ ನ್ಯೂಜಿಲೆಂಡ್‌ ವಿರುದ್ಧ 0-3 ಸೋಲುವ ಮೂಲಕ ಭಾರತ ಫೈನಲ್ ರೇಸ್‌ನಿಂದ ಒಂದು ಹೆಜ್ಜೆ ಹಿಂದಿಟ್ಟಿತ್ತು. ಇದರ ಹೊರತಾಗಿಯೂ, ಆಸೀಸ್‌ ವಿರುದ್ಧ ಸರಣಿಯಲ್ಲಿ ಭಾರತ 3 ಪಂದ್ಯ ಗೆದ್ದಿದ್ದರೆ ಫೈನಲ್‌ಗೇರಬಹುದಿತ್ತು. ಅದು ಸಾಧ್ಯವಾಗಲಿಲ್ಲ. ಒಂದು ವೇಳೆ ಸಿಡ್ನಿ ಟೆಸ್ಟ್‌ನಲ್ಲಿ ಗೆದ್ದಿದ್ದರೆ, ಭಾರತ ರೇಸ್‌ನಲ್ಲಿ ಉಳಿದುಕೊಂಡು ಫೈನಲ್ ಸ್ಥಾನದ ಅದೃಷ್ಟಕ್ಕಾಗಿ ಕಾಯಬಹುದಿತ್ತು. ಆದರೆ ಭಾರತ ಅಲ್ಲೂ ಗೆಲ್ಲಲಿಲ್ಲ.
10ರಲ್ಲಿ 6 ಟೆಸ್ಟ್ ಸೋತ ಗಂಭೀರ್‌ ಹುದ್ದೆ ಮೇಲೆ ತೂಗುಗತ್ತಿ: ರಣಜಿ ಆಡಲು ಆಟಗಾರರಿಗೆ ಖಡಕ್ ವಾರ್ನಿಂಗ್‌!
ಆಸೀಸ್‌ ಈ ಪಂದ್ಯದಲ್ಲಿ ಜಯಗಳಿಸುವ ಮೂಲಕ ಒಟ್ಟಾರೆ ಗೆಲುವಿನ ಪ್ರತಿಶತವನ್ನು ಶೇ.63.73ಕ್ಕೆ ಹೆಚ್ಚಿ ಅಗ್ರ-2ರಲ್ಲಿ ಸ್ಥಾನ ಖಚಿತಪಡಿಸಿಕೊಂಡಿತು. ಭಾರತ ಶೇ.50.00 ಗೆಲುವಿನ ಪ್ರತಿಶತದೊಂದಿಗೆ 3ನೇ ಸ್ಥಾನಕ್ಕೆ ಕುಸಿಯಿತು. ಇತ್ತೀಚೆಗೆ ಪಾಕಿಸ್ತಾನ ವಿರುದ್ಧ ಗೆಲ್ಲುವ ಮೂಲಕ ದ.ಆಫ್ರಿಕಾ(ಶೇ.66.67) ಫೈನಲ್ ಸ್ಥಾನ ಖಚಿತಪಡಿಸಿಕೊಂಡಿತ್ತು. ಆಸ್ಟ್ರೇಲಿಯಾಕ್ಕೆ ಇನ್ನು ಶ್ರೀಲಂಕಾ ವಿರುದ್ಧ 2 ಪಂದ್ಯಗಳಿದ್ದು, ಅದರಲ್ಲಿ ಗೆದ್ದರೆ ಅಗ್ರಸ್ಥಾನಕ್ಕೇರುವ ಸಾಧ್ಯತೆಯಿದೆ.
2019-21ರ ಫೈನಲ್‌ನಲ್ಲಿ ಭಾರತ ವಿರುದ್ಧ ನ್ಯೂಜಿಲೆಂಡ್‌ ಗೆದ್ದಿದ್ದರೆ, 2021-23ರಲ್ಲಿ ಭಾರತವನ್ನು ಮಣಿಸಿ ಆಸ್ಟ್ರೇಲಿಯಾ ಚಾಂಪಿಯನ್‌ ಆಗಿತ್ತು.
ಫೈನಲ್ ರೇಸ್‌ನಿಂದ ಭಾರತ ಹೊರ ಬಿದ್ದಿದ್ದು ಹೇಗೆ?
ಭಾರತ ಈ ಬಾರಿಯೂ ಟೆಸ್ಟ್ ಚಾಂಪಿಯನ್‌ಶಿಪ್‌ ಫೈನಲ್‌ಗೇರುವ ನೆಚ್ಚಿನ ತಂಡ ಎನಿಸಿಕೊಂಡಿತ್ತು. 2024 ಸೆಪ್ಟೆಂಬರ್‌ನಲ್ಲಿ ಬಾಂಗ್ಲಾದೇಶ ವಿರುದ್ಧ ಸರಣಿ ಆರಂಭಗೊಂಡಾಗ ಭಾರತಕ್ಕೆ 10 ಟೆಸ್ಟ್‌ಗಳಲ್ಲಿ ಕನಿಷ್ಠ 5 ಜಯ, 1 ಡ್ರಾ ಬೇಕಿತ್ತು. ಬಾಂಗ್ಲಾ ವಿರುದ್ಧ 2ರಲ್ಲಿ ಗೆದ್ದಾಗ ತಂಡದ ಫೈನಲ್ ಹಾದಿ ಸುಲಭವಾಗಿತ್ತು. ಆದರೆ ಆ ಬಳಿಕ ನಡೆದಿದ್ದೇ ಬೇರೆ. ನ್ಯೂಜಿಲೆಂಡ್‌ ವಿರುದ್ಧ 0-3 ಅನಿರೀಕ್ಷಿತ ಸೋಲು, ಆಸ್ಟ್ರೇಲಿಯಾ ವಿರುದ್ಧ 1-3 ಆಘಾತಕಾರಿ ಸೋಲಿನಿಂದಾಗಿ ಭಾರತ ರೇಸ್‌ನಿಂದಲೇ ಹೊರಬಿತ್ತು.
ಭಾರತ ಬಾರ್ಡರ್-ಗವಾಸ್ಕರ್ ಟೆಸ್ಟ್ ಸರಣಿ ಸೋತಿದ್ದೇ ಈ 6 ಪ್ರಮುಖ ಕಾರಣಗಳಿಂದ! ನೀವೇನಂತೀರಾ?
ಟೆಸ್ಟ್‌ನಲ್ಲಿ ಮೊಹಮ್ಮದ್‌ ಸಿರಾಜ್‌ಗೆ 100 ವಿಕೆಟ್‌
ಸಿಡ್ನಿ: ಭಾರತದ ತಾರಾ ವೇಗಿ ಮೊಹಮ್ಮದ್‌ ಸಿರಾಜ್‌ ಟೆಸ್ಟ್ ಕ್ರಿಕೆಟ್‌ನಲ್ಲಿ 100 ವಿಕೆಟ್‌ ಪೂರ್ಣಗೊಳಿಸಿದರು. ಭಾನುವಾರ ಆಸ್ಟ್ರೇಲಿಯಾದ ಉಸ್ಮಾನ್‌ ಖವಾಜ ವಿಕೆಟ್‌ ಪಡೆಯುವ ಮೂಲಕ 100ರ ಮೈಲುಗಲ್ಲು ಸಾಧಿಸಿದರು. ಸಿರಾಜ್‌ ಈ ಸಾಧನೆ ಮಾಡಿದ ಭಾರತದ 10ನೇ ವೇಗಿ, ಒಟ್ಟಾರೆ 24ನೇ ಬೌಲರ್‌. ಅವರು 2020ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಆಡುವ ಮೂಲಕ ಟೆಸ್ಟ್ ಪಾದಾರ್ಪಣೆ ಮಾಡಿದ್ದರು. ಈ ವರೆಗೂ ದೇಶದ ಪರ 36 ಟೆಸ್ಟ್ ಆಡಿದ್ದಾರೆ.
