ಐಸಿಸಿ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಭಾರತ-ನ್ಯೂಜಿಲೆಂಡ್ ಪಂದ್ಯವು ಸೆಮಿಫೈನಲ್ ಹಾದಿಯನ್ನು ನಿರ್ಧರಿಸಲಿದೆ. ಭಾರತ ಗೆದ್ದರೆ ಆಸ್ಟ್ರೇಲಿಯಾ ವಿರುದ್ಧ, ಸೋತರೆ ದಕ್ಷಿಣ ಆಫ್ರಿಕಾ ವಿರುದ್ಧ ಸೆಣಸಾಡಲಿದೆ. ದಕ್ಷಿಣ ಆಫ್ರಿಕಾ ತಂಡವು ಇಂಗ್ಲೆಂಡ್ ವಿರುದ್ಧ ಗೆದ್ದು ಸೆಮಿಫೈನಲ್ ಪ್ರವೇಶಿಸಿದೆ. ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳು ದುಬೈಗೆ ಪ್ರಯಾಣಿಸಲಿವೆ. ಭಾರತದ ಸೆಮಿಫೈನಲ್ ಪಂದ್ಯ ದುಬೈನಲ್ಲಿ ನಡೆಯಲಿದೆ. (50 words)

ದುಬೈ: ಐಸಿಸಿ ಚಾಂಪಿಯನ್ಸ್‌ ಟ್ರೋಫಿಯಲ್ಲಿ ಭಾರತ ಭಾನುವಾರ ನ್ಯೂಜಿಲೆಂಡ್‌ ವಿರುದ್ಧ ಪಂದ್ಯದಲ್ಲಿ ಗೆದ್ದರೆ ಸೆಮಿಫೈನಲ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೆಣಸಾಡಲಿದೆ. ಇಂದಿನ ಪಂದ್ಯದ ಫಲಿತಾಂಶ ಸೆಮೀಸ್ ಹಾದಿಯನ್ನು ನಿರ್ಧರಿಸಲಿದೆ.

ಭಾರತ ಸದ್ಯ ‘ಎ’ ಗುಂಪಿನಲ್ಲಿ 2ನೇ ಸ್ಥಾನದಲ್ಲಿ, ನ್ಯೂಜಿಲೆಂಡ್‌ ಅಗ್ರಸ್ಥಾನದಲ್ಲಿದೆ. ಭಾನುವಾರ ಗೆದ್ದರೆ ಭಾರತ ಅಗ್ರಸ್ಥಾನಕ್ಕೇರಲಿದೆ. ‘ಎ’ ಗುಂಪಿನಲ್ಲಿ ಅಗ್ರಸ್ಥಾನ ಪಡೆಯುವ ತಂಡ ‘ಬಿ’ ಗುಂಪಿನ 2ನೇ ಸ್ಥಾನಿ ತಂಡವಾಗಿರುವ ಆಸ್ಟ್ರೇಲಿಯಾ ವಿರುದ್ಧ ಸೆಮೀಸ್‌ನಲ್ಲಿ ಆಡಬೇಕಿದೆ. ಒಂದು ವೇಳೆ ಭಾರತ ಸೋತರೆ ಆಗ ತಂಡಕ್ಕೆ ಸೆಮಿಫೈನಲ್‌ನಲ್ಲಿ ದ.ಆಫ್ರಿಕಾ ಸವಾಲು ಎದುರಾಗಲಿದೆ.

8 ತಂಡಗಳು ಪಾಲ್ಗೊಂಡಿರುವ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಟೂರ್ನಿಯಲ್ಲಿ ಭಾರತ, ನ್ಯೂಜಿಲೆಂಡ್ 'ಎ' ಗುಂಪಿನಿಂದ ಹಾಗೂ 'ಬಿ' ಗುಂಪಿನಿಂದ ದಕ್ಷಿಣ ಆಫ್ರಿಕಾ ಹಾಗೂ ಆಸ್ಟ್ರೇಲಿಯಾ ತಂಡಗಳು ಸೆಮೀಸ್‌ಗೆ ಅರ್ಹತೆ ಪಡೆದಿವೆ. ಇನ್ನು ಪಾಕಿಸ್ತಾನ, ಬಾಂಗ್ಲಾದೇಶ, ಇಂಗ್ಲೆಂಡ್ ಹಾಗೂ ಆಫ್ಘಾನಿಸ್ತಾನ ತಂಡಗಳು ಗ್ರೂಪ್‌ ಹಂತದಲ್ಲೇ ಹೊರಬಿದ್ದಿವೆ.

ಇದನ್ನೂ ಓದಿ: ಚಾಂಪಿಯನ್ಸ್ ಟ್ರೋಫಿ: ಸೆಮೀಸ್ ಮುನ್ನ ಭಾರತಕ್ಕೆ ಕಿವೀಸ್ ಟೆಸ್ಟ್

ಲಾಹೋರ್‌ನಲ್ಲಿ ಸೆಮೀಸ್‌ ಇದ್ರೂ ದುಬೈಗೆ ಆಸೀಸ್‌, ದಕ್ಷಿಣ ಆಫ್ರಿಕಾ ಪ್ರಯಾಣ!

ದುಬೈ: ಈ ಸಲ ಚಾಂಪಿಯನ್ಸ್‌ ಟ್ರೋಫಿಯಲ್ಲಿ ಸೆಮಿಫೈನಲ್‌ನ 4 ತಂಡಗಳು ಅಂತಿಮಗೊಂಡಿವೆ. ಆದರೆ ಭಾನುವಾರದ ಭಾರತ-ನ್ಯೂಜಿಲೆಂಡ್‌ ಪಂದ್ಯದ ಬಳಿಕವಷ್ಟೇ ಸೆಮೀಸ್‌ ವೇಳಾಪಟ್ಟಿ ಪ್ರಕಟಗೊಳ್ಳಲಿದೆ. ಭಾರತ ಆಡಲಿರುವ ಸೆಮಿಫೈನಲ್‌ ಮಂಗಳವಾರ ದುಬೈನಲ್ಲಿ, ಮತ್ತೊಂದು ಸೆಮೀಸ್‌ ಬುಧವಾರ ಲಾಹೋರ್‌ನಲ್ಲಿ ನಿಗದಿಯಾಗಿದೆ. 

ಅಂದರೆ ಆಸೀಸ್‌, ದ.ಆಫ್ರಿಕಾ ಪೈಕಿ 1 ತಂಡದ ಸೆಮಿಫೈನಲ್‌ ಲಾಹೋರ್‌ನಲ್ಲಿ ನಡೆಯಲಿದೆ. ಆದರೆ ಅಭ್ಯಾಸದ ಕೊರತೆ ಉಂಟಾಗದಿರಲು ಎರಡೂ ತಂಡ ದುಬೈಗೆ ಪ್ರಯಾಣಿಸಬೇಕಿದೆ. ಆಸೀಸ್‌ ತಂಡ ಶನಿವಾರವೇ ದುಬೈ ತೆರಳಿದ್ದು, ದ.ಆಫ್ರಿಕಾ ತಂಡ ಭಾನುವಾರ ದುಬೈಗೆ ಪ್ರಯಾಣಿಸಲಿದೆ. ಇದರಲ್ಲಿ ಒಂದು ತಂಡ ಸೋಮವಾರವೇ ಲಾಹೋರ್‌ಗೆ ಹಿಂದಿರುಗಲಿದೆ.

ಇದನ್ನೂ ಓದಿ: ಚಾಂಪಿಯನ್ಸ್ ಟ್ರೋಫಿಯಲ್ಲಿ ಒಂದೇ ಒಂದು ಪಂದ್ಯ ಗೆಲ್ಲದ ಪಾಕ್‌ಗೆ ಸಿಕ್ತು ಐಸಿಸಿಯಿಂದ ಕೋಟಿ-ಕೋಟಿ ನಗದು ಬಹುಮಾನ!

ಇಂಗ್ಲೆಂಡ್‌ನ ಮಣಿಸಿದ ದಕ್ಷಿಣ ಆಫ್ರಿಕಾ ಸೆಮಿಗೆ

ಕರಾಚಿ: ಚೊಚ್ಚಲ ಆವೃತ್ತಿಯ ಚಾಂಪಿಯನ್ ದಕ್ಷಿಣ ಆಫ್ರಿಕಾ ತಂಡ ಈ ಬಾರಿ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಸೆಮಿಫೈನಲ್ ಪ್ರವೇಶಿಸಿದೆ. ಶನಿವಾರ 'ಬಿ' ಗುಂಪಿನ ನಿರ್ಣಾಯಕ ಫಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ದ 7 ವಿಕೆಟ್ ಜಯಗಳಿಸಿತು. ಇದರೊಂದಿಗೆ ಆಡಿರುವ 3 ಪಂದ್ಯಗಳಲ್ಲಿ ಸಂಪಾದಿಸಿ ಅಗ್ರಸ್ಥಾನಿಯಾಯಿತು. ಇಂಗ್ಲೆಂಡ್ ಒಂದೂ ಗೆಲುವಿಲ್ಲದೆ ಅಭಿಯಾನ ಕೊನೆಗೊಳಿಸಿತು. ಅಲ್ಲದೆ, ಅಫ್ಘಾನಿಸ್ತಾನ(3 ಅಂಕ)ದ ಸೆಮೀಸ್ ಕನಸು ಕೂಡಾ ಭಗ್ನಗೊಂಡಿತು.

ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ 38.2 ಓವರ್‌ಗಳಲ್ಲಿ 179ಕ್ಕೆ ಆಲೌಟಾಯಿತು. ಜೋ ರೂಟ್ (37) ತಂಡದ ಪರ ಗರಿಷ್ಠ ವೈಯಕ್ತಿಕ ಮೊತ್ತ ಗಳಿಸಿದರು. ದ.ಆಫ್ರಿಕಾವನ್ನು ನೆಟ್ ರನ್‌ರೇಟ್‌ನಲ್ಲಿ ಹಿಂದಿಕ್ಕಿ ಅಫ್ಘಾನಿಸ್ತಾನ ಸೆಮಿಫೈನಲ್ ಪ್ರವೇಶಿಸಬೇಕಿದ್ದರೆ, ಇಂಗ್ಲೆಂಡ್ ತಂಡ 200ಕ್ಕೂ
ಹೆಚ್ಚು ರನ್ ಅಂತರದಲ್ಲಿ ಗೆಲ್ಲಬೇಕಿತ್ತು. ಆದರೆ ತಂಡದ ಮೊತ್ತವೇ 200 ದಾಟದ ಕಾರಣ ಚೇಸಿಂಗ್‌ಗೆ ಇಳಿಯುವ ಮೊದಲೇ ದ.ಆಫ್ರಿಕಾ ಸೆಮಿಫೈನಲ್ ಸ್ಥಾನ ಖಚಿತಪಡಿಸಿಕೊಂಡಿತ್ತು. ಸುಲಭ ಗುರಿ ಬೆನ್ನತ್ತಿದ ದ.ಆಫ್ರಿಕಾ ಕೇವಲ 29.1 ಓವರ್‌ಗಳಲ್ಲಿ 3 ವಿಕೆಟ್ ನಷ್ಟದಲ್ಲಿ ಜಯಗಳಿಸಿತು. ವ್ಯಾನ್ ಡರ್ ಡಸ್ಟೆನ್ ಔಟಾಗದೆ 72, ಹೈನ್ರಿಚ್ ಕ್ಲಾಸೆನ್ 64 ರನ್ ಸಿಡಿಸಿದರು. 

ಸ್ಕೋರ್:

ಇಂಗ್ಲೆಂಡ್ 38.2 ಓವರಲ್ಲಿ 179/10 (ರೂಟ್ 37, ಮುಲ್ಲರ್3-25, ಯಾನ್ಸನ್ 3-39)
ದ.ಆಫ್ರಿಕಾ 29.1 ಓವರಲ್ಲಿ 181/3 (ಡನ್ 72, ಕ್ಲಾಸೆನ್ 64, ಆರ್ಚರ್ 2-55) 
ಪಂದ್ಯಶ್ರೇಷ್ಠ: ಯಾನ್ಸನ್