ಪಾಕ್‌ ಕೈ ತಪ್ಪಿದ ಏಷ್ಯಾಕಪ್ ಕ್ರಿಕೆಟ್ ಟೂರ್ನಿಯ ಆತಿಥ್ಯ..!
ಏಷ್ಯಾಕಪ್ ಕ್ರಿಕೆಟ್ ಟೂರ್ನಿಯಿಂದ ಪಾಕಿಸ್ತಾನದಿಂದ ಬೇರೆಡೆ ಶಿಫ್ಟ್
ಟೂರ್ನಿಯನ್ನು ಪಾಕಿಸ್ತಾನದ ಹೊರಗಡೆ ಆಯೋಜಿಸಲು ತೀರ್ಮಾನ
ಶ್ರೀಲಂಕಾದಲ್ಲಿ ಟೂರ್ನಿಯನ್ನು ಆಯೋಜಿಸುವ ಸಾಧ್ಯತೆ
ನವದೆಹಲಿ(ಮೇ.09): ಹಲವು ಗೊಂದಲಗಳಿಗೆ ಕಾರಣವಾಗಿದ್ದ ಬಹುನಿರೀಕ್ಷಿತ ಏಷ್ಯಾಕಪ್ ಕ್ರಿಕೆಟ್ ಟೂರ್ನಿಯ ಆತಿಥ್ಯ ಹಕ್ಕು ಕೊನೆಗೂ ಪಾಕಿಸ್ತಾನದ ಕೈ ತಪ್ಪಿದೆ. ಸೋಮವಾರ ಈ ಬಗ್ಗೆ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್(ಎಸಿಸಿ) ಅಂತಿಮ ನಿರ್ಧಾರ ಕೈಗೊಂಡಿದ್ದು, ಟೂರ್ನಿಯನ್ನು ಪಾಕಿಸ್ತಾನದ ಹೊರಗಡೆ ಆಯೋಜಿಸಲು ತೀರ್ಮಾನಿಸಿದೆ. ಟೂರ್ನಿ ಶ್ರೀಲಂಕಾದಲ್ಲಿ ನಡೆಯುವ ಸಾಧ್ಯತೆಯಿದೆ.
ಟೂರ್ನಿ ಆತಿಥ್ಯ ಹಕ್ಕು ಪಾಕಿಸ್ತಾನದ ಬಳಿ ಇದ್ದರೂ ಅಲ್ಲಿಗೆ ತೆರಳಲು ಭಾರತ ನಿರಾಕರಿಸಿತ್ತು. ತಟಸ್ಥ ಸ್ಥಳದಲ್ಲಿ ಆಯೋಜಿಸುವಂತೆ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್(ಎಸಿಸಿ)ಗೆ ಬಿಸಿಸಿಐ ಪಟ್ಟು ಹಿಡಿದಿತ್ತು. ಆದರೆ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ(ಪಿಸಿಬಿ) ಟೂರ್ನಿಯನ್ನು ಪಾಕ್‌ನಲ್ಲೇ ಆಯೋಜಿಸಿ, ಭಾರತದ ಪಂದ್ಯಗಳನ್ನು ಬೇರೆ ದೇಶದಲ್ಲಿ ಆಡಿಸುವ ಪ್ರಸ್ತಾಪವಿರಿಸಿತ್ತು. ಆದರೆ ಇದಕ್ಕೆ ಎಸಿಸಿ ಸದಸ್ಯ ರಾಷ್ಟ್ರಗಳು ವಿರೋಧ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ಟೂರ್ನಿಯನ್ನು ಸ್ಥಳಾಂತರಗೊಳಿಸಲಾಗಿದೆ. ಶ್ರೀಲಂಕಾದಲ್ಲಿ ಟೂರ್ನಿಯನ್ನು ಆಯೋಜಿಸಿದರೆ, ಪಾಕಿಸ್ತಾನವು ಏಷ್ಯಾಕಪ್ ಟೂರ್ನಿಯನ್ನು ಬಹಿಸ್ಕರಿಸುವ ಸಾಧ್ಯತೆಯಿದೆ.
ಈ ನಡುವೆ ಟೂರ್ನಿಗೆ ಶ್ರೀಲಂಕಾ ಆತಿಥ್ಯ ವಹಿಸುವ ಸಾಧ್ಯತೆಗಳಿದ್ದು, ಈ ತಿಂಗಳ ಕೊನೆಯಲ್ಲಿ ಈ ಬಗ್ಗೆ ಎಸಿಸಿ ಅಂತಿಮ ನಿರ್ಧಾರ ಕೈಗೊಳ್ಳಲಿದೆ ಎಂದು ವರದಿಯಾಗಿದೆ. ಆತಿಥ್ಯ ಹಕ್ಕು ಕೈತಪ್ಪಿದರೆ ಪಾಕಿಸ್ತಾನ ಟೂರ್ನಿಯಲ್ಲಿ ಪಾಲ್ಗೊಳ್ಳುವುದಿಲ್ಲ ಎಂದು ಪಿಸಿಬಿ ಅಧ್ಯಕ್ಷ ನಜಂ ಸೇಠಿ ಹೇಳಿದ್ದು, ಶ್ರೀಲಂಕಾದಲ್ಲಿ ಟೂರ್ನಿ ಆಯೋಜಿಸಿದರೆ ಪಾಕ್‌ ತಂಡ ಬಹಿಷ್ಕಾರ ಹಾಕುವ ಸಾಧ್ಯತೆಯಿದೆ.
ಏಷ್ಯಾಕಪ್ ಹಕ್ಕು ಕೈತಪ್ಪಿದ್ರೆ ಪಾಕ್‌ಗೆ 25 ಕೋಟಿ ರುಪಾಯಿ ನಷ್ಟ!
ಕರಾಚಿ: ಏಷ್ಯಾಕಪ್ ಆತಿಥ್ಯ ಹಕ್ಕು ಬಿಟ್ಟುಕೊಡುವುದಿಲ್ಲ ಎಂದು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಅಧ್ಯಕ್ಷ ನಜಂ ಸೇಠಿ ಪುನರುಚ್ಚರಿಸಿದ್ದು, ಟೂರ್ನಿಯಿಂದ ಹಿಂದೆ ಸರಿದರೆ 3 ಮಿಲಿಯನ್‌ ಡಾಲರ್‌(ಅಂದಾಜು 25 ಕೋಟಿ ರು.) ನಷ್ಟವಾಗಲಿದೆ ಎಂದು ಹೇಳಿದ್ದರು. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಅವರು, ‘ಟೂರ್ನಿಯನ್ನು ಪಾಕಿಸ್ತಾನದಲ್ಲೇ ಆಯೋಜಿಸಿ, ಭಾರತದ ಪಂದ್ಯಗಳನ್ನಷ್ಟೇ ಬೇರೆಡೆ ನಡೆಸಲು ಪ್ರಸ್ತಾಪಿಸಿದ್ದೇವೆ. ಈ ಪ್ರಸ್ತಾಪವನ್ನು ಹೊರತುಪಡಿಸಿ ಬೇರಾರ‍ಯವುದಕ್ಕೂ ನಾವು ಒಪ್ಪುವುದಿಲ್ಲ ಎಂದು ಏಷ್ಯಾ ಕ್ರಿಕೆಟ್ ಸಮಿತಿ(ಎಸಿಸಿ)ಗೆ ಸ್ಪಷ್ಟವಾಗಿ ತಿಳಿಸಿದ್ದೇವೆ’ ಎಂದಿದ್ದರು.
2 ದಿನದಲ್ಲೇ ಏಕದಿನ ನಂ.1 ಸ್ಥಾನ ಕಳೆದುಕೊಂಡ ಪಾಕ್‌
ಕರಾಚಿ: 2 ದಿನಗಳ ಹಿಂದಷ್ಟೇ ಐಸಿಸಿ ಏಕದಿನ ರ‍್ಯಾಂಕಿಂಗ್‌‌ದಲ್ಲಿ ಮೊದಲ ಬಾರಿ ನಂ.1 ಸ್ಥಾನಕ್ಕೇರಿದ್ದ ಸಾಧನೆ ಮಾಡಿದ್ದ ಪಾಕಿಸ್ತಾನ, ನ್ಯೂಜಿಲೆಂಡ್‌ ವಿರುದ್ಧದ ಕೊನೆ ಪಂದ್ಯದ ಸೋಲಿನ ಬಳಿಕ ಅಗ್ರಸ್ಥಾನ ಕಳೆದುಕೊಂದೆ. ನೂತನ ಪಟ್ಟಿಯಲ್ಲಿ ತಂಡ 112 ಅಂಕದೊಂದಿಗೆ ಮತ್ತೆ 3ನೇ ಸ್ಥಾನಕ್ಕೆ ಕುಸಿದಿದೆ.
WTC Final: ಕೆ ಎಲ್ ರಾಹುಲ್ ಬದಲು ಇಶಾನ್ ಕಿಶನ್‌ಗೆ ಜಾಕ್‌ಪಾಟ್
ಸದ್ಯ ಆಸ್ಪ್ರೇಲಿಯಾ 113 ಅಂಕಗಳೊಂದಿಗೆ ನಂ.1 ಸ್ಥಾನ ಅಲಂಕರಿಸಿದ್ದು, ಅಷ್ಟೇ ಅಂಕ ಹೊಂದಿರುವ ಭಾರತ 2ನೇ ಸ್ಥಾನದಲ್ಲಿದೆ. ಇಂಗ್ಲೆಂಡ್, ನ್ಯೂಜಿಲೆಂಡ್‌, ದ.ಆಫ್ರಿಕಾ, ಬಾಂಗ್ಲಾದೇಶ ಕ್ರಮವಾಗಿ ನಂತರದ ಸ್ಥಾನಗಳಲ್ಲಿವೆ. ಟಿ20 ಹಾಗೂ ಟೆಸ್ಟ್‌ನಲ್ಲಿ ಭಾರತ ನಂ.1 ಸ್ಥಾನದಲ್ಲಿ ಮುಂದುವರಿದಿದೆ.
ಏಕದಿನ: ಕ್ಲೀನ್ಸ್ವೀಪ್ನಿಂದ ಪಾರಾದ ನ್ಯೂಜಿಲೆಂಡ್‌
ಕರಾಚಿ: ಪಾಕಿಸ್ತಾನ ವಿರುದ್ಧದ 5ನೇ ಹಾಗೂ ಕೊನೆ ಏಕದಿನ ಪಂದ್ಯದಲ್ಲಿ ನ್ಯೂಜಿಲೆಂಡ್‌ 47 ರನ್‌ ಗೆಲುವು ಸಾಧಿಸಿದ್ದು, ಕ್ಲೀನ್ಸ್ವೀಪ್ ಮುಖಭಂಗದಿಂದ ಪಾರಾಗಿದೆ. ಮೊದಲ 4 ಪಂದ್ಯ ಗೆದ್ದಿದ್ದ ಪಾಕ್‌ 4-0 ಅಂತರದಲ್ಲಿ ಸರಣಿ ಕೈವಶಪಡಿಸಿಕೊಂಡಿತು.
ಮೊದಲು ಬ್ಯಾಟ್‌ ಮಾಡಿದ ಕಿವೀಸ್‌ 49.3 ಓವರಲ್ಲಿ 299ಕ್ಕೆ ಆಲೌಟಾಯಿತು. ವಿಲ್‌ ಯಂಗ್‌ 87, ಲ್ಯಾಥಮ್‌ 59 ರನ್‌ ಸಿಡಿಸಿದರು. ಸ್ಪರ್ಧಾತ್ಮಕ ಗುರಿ ಬೆನ್ನತ್ತಿದ ಪಾಕ್‌ 46.1 ಓವರಲ್ಲಿ 252ಕ್ಕೆ ಸರ್ವಪತನ ಕಂಡಿತು. ಇಫ್ತಿಕಾರ್‌ ಅಹ್ಮದ್‌ ಔಟಾಗದೆ 94 ರನ್‌ ಸಿಡಿಸಿದರೂ ತಂಡಕ್ಕೆ ಗೆಲುವು ಲಭಿಸಲಿಲ್ಲ.
